ضلال الحب (باللهجة العراقية)

البارت السابع عشر

ضلال الحب
البارت السابع عشر
بقلم روجينا

*************************

كِرام

احس الحياة طفت بعيوني بعد ما يهمني شي انغدرت من اقرب الناس الي ، لهسه ما جاي اصدك و عقلي ما يستوعب يعني خلص تزوجت و راحت من ايدي ما كدرت اسوي شي دخل خالد

_ هاا خوية شلون صرت

_ كوم ساعدني اكوم اريدك تأخذني لمكان

_ وين خويه بعدة وضعك مو تمام وين طالع

_ شوكت تروح ميثاء

_ اليوم

_ كوم اريد اشوفها من بعيد

_ بس

_ كوم يلا ، و تعال ساعدني اكوم

كمت بالكوة و خالد مخليني جوة جتفه جاب كرسي متحرك لان ما اكدر اتحرك من العمليه طلعنا صار بوجهنا الدكتور كال

_ وين يمعودين

_ دكتور كافي لعبت نفسي من المستشفى اريد اطلع

_ بس جرحك ما يصير هيج

_ لا هسه أوقع على مسئوليتي اطلع

_ تمام بس اي وجع يصير لازم ترجع فوراً للمستشفى

_ تمام

طلعنا من المستشفى خالد كال وين اوصلك هسه

_ أخذني البابهم

_ إن شاءالله

انطلقنا لبيتهم اريد اشوفها من بعيد اخر مرة اريد اقنع كلبي خلاص بعد لازم تنساها صارت لغيرك بقينا كاعدين ب سيارة شوي بعيد عن بيتهم

_ خويه لشوكت نبقى

_ أنته متأكد بعدهم ما طالعين

_ لا ، بعدهم بالبيت هيج كال عبدالجبار

هزيت راسي بقينا هناك تقريباً مرت نص ساعه انفتح الباب و طلعوا كلهم شفتها طالعه من بيت و بيدها الجنطه
يعني خلاص ناويتيها هاي المرة راح تروحين بعيد عني و بعد ما اشوفج صرتي لغيري و انا الي جنت ما انام الليل من تفكير بيج

_ اخذج مني الما تعب عليج

رددت بيني و بين ربي دعاء

_اللهم إني أستودعك شخص قريب من قلبي ، اللهم إني أستودعك راحة باله و سعادته و ضحكته
اللهم ارزق قلبه الراحة و الطمأنينة و الفرح و الأمان

ركبت ويا خليل راحت و اخذت كلبي وياها احس اختنكت حيل و ضربت ايدي حيل مكان كلبي

_ موت كافي ليش تريدها راحت بعد

_ خويه كِرام أهدى راح تأذي نفسك

_ واحد مثلي شكو عايش اذا ما كدرت احافظ على الشخص الي احبه