ضلال الحب (باللهجة العراقية)

البارت الثاني

البارت الثاني
ضلال الحب
بقلم روجينا
"""""""""""""""
كُن وحيداً فالوحدة جميلة لا ألم ...لا اشتياق... لا فراق ... و ربما لا

""""""""""""""""
ميثاء

تونسنا بالبستان و رجعنا للبيت بعدنا بالباب صرنا نسمع غير صوت صراخ جاي من جوة
الواضح هم عركة بين الجناين عبدالجبار ما اهتم راح للاستقبال تمدد كال

_راح انام لحد يزعجني

استغربت بنص الصوت و العركه ما مهتم و راح نام والله دمك بارد جبوري على كولة يشم

_ سمرة أخذي خواتج و فوتو ل غرفة امكم أروح اشوف شبيهم

_ تمام عمه

اخذت خواتهه و راحت انا هم فتت للمطبخ شفت نهلة مرت زيدان جاي تتعارك مع مريم و سميرة مرت سالم و امي كاعدة تخيط ب قميص علي كتلهم

_شبيكم مو عيب عليكم نسوان شكبركم تتعاركون

_ هي انتي شدخلج حاشرة نفسج بنصنا

_ لا بالله لا يكون بيت الخلفج لا تنسين هذا بيت ابوي و غصب عنكم ادخل

_ عمه تسمعين بنتج شتحجي

_ والله الي يدك الباب يسمع الجواب

_ بسيطة الا اخلي زيدان اليوم يطلعنا لبيت وحدنا

_ روحي دربي السد الما يرد علساس جاي تخوفني
طلعت من المطبخ تبجي

كالت مريم _ عمه انا بعد ما اتحمل العيشة هنانه
البيت صغير علينا و بناتي ما ياخذون راحتهم هم جاي يكبرون ف نريد نطلع لبيت وحد هم شايفه مشاكل نهله كل يوم مشكلة جديدة

_ تريدين تأخذين ابني جبيري و تروحين منا لا والله اذا تريدين روحي بس ابني ما يروح

_ عمه ما اريد أتجاوز عليج بس بعد راح اخذ بناتي و اطلع لبيت الي متروك بالركن اسكن بي من يرجع ابنج خل يلحكني

_ ولج بنت الجل..ب جاي تتحديني اله اجيب عليج مرة

مريم ما اهتمت اخذت بناتهه و راحت اول مرة اشوفهه بهاي القوة لملت غراضهه و طلعت تنقلهم هيه و البنات رحت اساعدهم

_ ها سمورة بعد راح تطلعون منا ارتاحي من هاي الهوسه

_ لا والله عمه راح اشتاق لج ماريد اعوفج

_ دنجبي لو بيدي انا هم اهج بس شوفت عينج ماكو مكان اروحلة

_ تعاي عدنا عمه