جربت قبل كده تبني حياتك على كدبة؟
جربت تكدب فى كل مرة متعرفش تتصرف فيها؟
جربت تكدب عشان تنقذ نفسك من موقف؟
جربت قبل كده تتخيل كدبة كبيرة و ترسم حياتك كلها فيها؟
أنا جربت.
كدبت كتير و كتير.
كدبت على نفسي، على عيلتي، على صحابي، على مدرسيني. على كل اللي حواليا.
كدبت لما قولت أنا هقدر و مقدرتش.
كدبت يوم ما قولت سبوني اتصرف و أنا عيلة صغيرة عايزة اللي يقرر بالنيابة عني.
عمرك قعدت تتخيل و ترسم حياتك بالطريقة اللي أنت عايزها من غير ما حد يتدخل و يبوظهالك و انت عارف إن مفيش حاجه من دي هتحصل أو تتحقق.
كلها تخيلات، كلها كدبة فى كدبة
بس عارف الكدبة دي بتريح و بتطيب الخاطر عشان على مزاجك و هواك مش هوا حد تاني.
بس المشكلة إنها بتخليك كاره اللي حواليك و مش عايزهم فى حياتك عشان شايف إنهم أكبر سبب فى تعاستك و حزنك عشان بيوروك الواقع اللي أنت بتهرب منه فى كدبتك اللي أنت بس اللي عارفها و عايشها.
كدبتك بتكبر كل يوم عن اليوم اللي قبله لحد ما صدقتها و بقيت مدرك إن ده الواقع اللي تستحق تعيش فيه و إنك خسارة فى الناس اللي حواليك.
بس الحقيقة إن كل ده كدبة.
Aphrodite 🦋
