حبيبة

الحلقة الثانية عشر

🩷 رواية #حبيبة 🩷

🌱 الحلقة الثانية عشر🌱

  🌹Hăbošh🌹للكاتبة

..................... 🩷🩷🩷🩷🩷🩷🩷🩷🩷🩷🩷

كنت انفكر في حبيبة و نتذكر في يوم العرس لما شبحتها بالفستان الابيض كيف طالعة حلوة و جذابة و تذكرت برودة و رعشة ايديها و شعورها بالخوف و هي شادة فيا،،
قص عليا صوت الباب
تميم: خش؛
نزلت ايدي من على وجههي و شبحت للباب في انتظار امجد ايخش و توسعوا عيوني لما شبحت حبيبة واقفة ع الباب و باين عليها الارتباك ❤
تميم: ابتسمت بفرحة؛ حبيبة ❤
حبيبة: بلعت ارياقها؛ ج جييت اانشووف لوو تبي حااجة
تميم: مدتلها يدي؛ تعاالي حبيبة خشي؛
تقعدت سندت اكتافي بالمخاد و هي
خشت تمشي بارتباك وقفت جنب السرير
حبيبة: بتوتر؛ ااااء تبيني انسااعدك في شنو
تميم: لا اوكي اموري تمام، قعمزي حبيبة ليش واقفة؛ زحت رجلي وسعتلها باش اتقعمز
حبيبة: بارتباك؛ ارجع ارقد، اني بس كنت نبي انش....؛ قاطعتها
تميم: لالا كنت واعي مش راقد، تعالي قعمزي جنبي ؛
جت قعمزت بكل خجل تفرك في ايديها بتوتر، شديت ايدها ضميتها بيدي
تميم: بحنية؛ كيف حالك حبيبة ؟
حبيبة: رفعت عينها؛  تمام الحمدلله ، انت شن داير توا؟
تميم: اهو الحمدلله على كل حال
حبيبة: نزلت عيونها بحزن؛ كنت ح تموت بسببي 💔
تميم: تقعدت نبي نقرب منها؛ اااخ
حبيبة: جت لعندي بفزع؛ تميم انت كويس 🥺
تميم: زفرت بوجع؛ ااي ، صلحي المخدة وراء ضهري؛
حطت المخدة بحيث تسند ضهري باش ما نتوجعش لما نقعمز
حبيبة: هكي كويس؟
تميم: اي اي تمام ، صحيتي؛
رجعت قعمزت
تميم: حبيبة معش تحملي نفسك السبب في اللي صار، و لازم تعرفي انا  مستعد نفديك بروحي ولا ايصيبك مكروه
حبيبة: بوجع؛ بس اني غلطت ما حذرتك منه و قولتلك على التهديدات اللي وصلوني
تميم: عقدت حاجبي؛ تهديدات شنو!!؟
حبيبة: تهديدات بالقتل، سامر كان يبعثلي في مسجات اشكال و الالوان و اخر شي قبل العرس بعثلي مسج طويل و هددني ان ح يقتلني
تميم: ليش ما قلتيلي
حبيبة: توقعت بس يبي ايخوفني ما كنتش نعرف اينفذ تهديده  صح 💔
تميم: كان مفروض قلتي ان ايضايق فيك، موضوع زي هذا ما ينسكتش عليه
حبيبة: بأسف؛ صح معك حق، انا اسفة تميم سامحني؛  نزلت رأسها 😞 جيت رفعتهولها نشبح ف عيونها بحنية
تميم:  خلاص اللي صار صار ، و قدر الله ماشاء فعل، بس في الجديد اي شي ايصير معك اتقولهولي تمام
حبيبة: هزت راسها بايجاب؛ اي تمام  ، يعني انت مش زعلان مني
تميم:  ابتسمت بحب؛ لا طبعا انا مستحيل نزعل منك ❤ انتي تعرفي مكانتك عندي شنو؛ مررت يدي على خدها و وجهها تلون بالاحمرار
حبيبة: نزلت عيونها بخجل؛ حتى انت يا تميم مكانتك كبيرة عندي؛ جت تبي توقف حطيت ايدي فوق ايدها
تميم: خليك شوية
حبيبة: بلكلكة؛ اااء الوقت متاخر اانخليك تررقد
تميم: شاد في يدها؛ مش جايني نوم و نحس في روحي مالل نبي حد نهدرز معه؛
قعدت مقعمزة و ايدي في ايدها للحظات وانا نشبحلها باشتياق و كنت على وشك ننطق بالاعتراف بمشاعري الحقيقية ، انفتح باب المربوعة اللي كان مردود ع الاخر و خش امجد وجت عينه على ايدي كيف شاد بيها يد حبيبة اللي بدورها لما خش طول ناضت مرتبكة ،
امجد: بحقد؛ اسف جيت في وقت مش مناسب 🔥؛
قبل ما انرد عليه تكلمت حبيبة بتوتر
حبيبة: لااا اني كنت طاالعة، تصبحوا على خير؛
قعدت نشبحلها وهي طالعة و امجد قعد واقف ع الباب خلاها تطلع و خش جاء لعندي
امجد: نحساب كنت راقد
تميم: لا توا نبي نرقد
امجد: بملل؛ اهاااء، تبي انساعدك
تميم: اي ياريت؛ طلبت انحي الوسادة اللي كنت مستند عليها و تسطحت بصعوبة وجع  ع السرير؛ صحيت الله يرحم ولديك
امجد: تبي مني شي اخرى؟
تميم: لا شكرا بارك الله فيك
؛ مشى خذا الوسادة و البطنية و حطهن ع الصالون في الزاوية
تميم: خش تريح ارقد في سريرك
امجد: بمسايرة؛ عادي توا نرقد اهني،  تبي الضي
تميم: لا طفي؛
مشى طفى الضي و رجع رقد ع الصالون، عم الهدؤء للحظات و كان شاد تلفونه
تميم: كيف حالها مرتك و البيبي؟ صحتهم كويسة؟
امجد: زم فمه بغضب؛ اي ، ليش تسال ؟ قصدي شن ذكرك بيهم  توا
تميم: نحن لنا فترة معش تلقينا و نحساب صاير شي مع مرتك خلاك ما جيتش للمستشفى
امجد: بملل؛ ااهااا، لا بس كان عندي شغل و في اوراق جريت عليهن نبيهن من الجامعة ناخذهن قبل ما انسافر
تميم: و انت امتى امسافر!؟
امجد: قريب 😤؛
كان يحساب سوالي مش لغرض الاستفسار العادي، هو حط في باله ان اني نبيه ايسافر بسرعة ، و الوساوس اللي ادور في راسه زاد في حقده و غضبه عليا🔥،
حسيته مش راغب في الدوة و مشغول في التلفون سكتت معش دويت معه و رجعت نتذكر في دقائق الاخيرة مع حبيبة اللي لو ما خش علينا امجد كنت اعترفتلها بكل حاجة ، بس لفت انتباهي كيف توترت لما خش شبحها و تبعدت مني بفزع و كيف تبرر وجودها معي ..
حاولت انبعد الوساوس و ما نخليش الشك يلعب بعقلي،
غمضت اعيوني للاسترخاء و صفيت ذهني لين رقدت،
اما حبيبة بعد طلعت كانت مرتبكة و دقات قلبها سريعة، اول مرة اتحس بشعور السعادة لأنها تعيش لحظة مميزة مع الشخص اللي تحبه و تتاثر بكلماته و تعابير وجهه و لمساته، شعور فريد خلاها تعيش عالم من الالوان و الاحاسيس ، فتحت باب الدار وخشت صكراته، شبحت تسنيم راقدة استندت ع الباب و ابتسمت بعد تحسست وجهها من اثار لمسة ايدي، و بعديها خشت لسريرها بكل فرح و سعادة كما لو أن قلبها يتسع لاحتضان العالم كله ❤ و تساءل نفسها إذا كنت نحس بنفس الشعور ❤ نزلت راسها ع المخدة و تشبح لسقف بسرحان و تلعب بخصلات شعرها مع ابتسامة و عض على شفايفها💓
.
.
الصبح
امي: تهز فاها؛ تسنيم، تسنيم هيا نوضي
تسنيم: فتحت اعيونها؛ باهي
امي: راه ترقدي و ايفوتك الوقت
تسنيم: هيا نايضة، اووووف؛ قعمزت حكت شعرها المنكوش وشبحت جنبها لقت حبيبة راقدة في سريرها و تلفون في ايدها، نزلت من السرير و قربت لحبيبة سحبت منها التلفون ، شبحت لخلفية الشاشة صورتي انا صغير شاد حبيبة عمرها سنتين ، حطت التلفون ع الكمدينوا و طلعت خشت للحمام و رجعت لبست و طلعت ،
تسنيم: صباح الخير
امي: صباح النور، تعالي افطري
تسنيم: شبحت لسفرة؛ لا مانبيش؛ شبحت لساعة😨؛ ساعة ثمانية الا ربع ليش تاخرت الحافلة لتوا
امي: بوك قال اعطاه حقاته و توا ايجي اسامة يرفعك و امجد ايروح بيك
تسنيم: فنصت اعيونها؛ علاااش!!؟
امي: ما نعرفش هو هك قالي
تسنيم: نفخت بغضب؛ رجعنا للهم، هيا توا وينه اسامة؟
امي: رني عليه
تسنيم: بنرفزة؛ مش رانة على حد؛  قعمزت تهز برجلها بعصبية و شوية رن تلفونها شبحاته طلع اسامة
امي: اسامة؟
تسنيم: بملل؛ اي  ؛ قعدت مقعمزة تلعب بالتلفون، التفتت امي شبحتلها
امي: باه هيا اطلعي
تسنيم: بمكر؛ خليه يستنى😎
امي: طفت ع الغاز و خذت البراد حطاته في السفرة؛  ردي عليه راه يمشي؛ خذت السفرة وطلعت ماشية للمربوعة
تسنيم: شبحت لتلفون بخبث؛ اوكي خليك اترن، باش تحرم تدخل في خصوصياتي 😏؛ فوتت خمس دقايق و اسامة شادها رنات لين طلعت و قعدت تمشي على مهل تغيض فيه،
تسنيم: فتحت باب السيارة؛ صباحؤ 😒
اسامة: 😤 صباح الخير، تبي ساعة باش تطلعي
تسنيم: نضت متاخرة
اسامة: باهي مالا ردي ع التلفون
تسنيم: بخبث؛ مش فاضية انرد عليك 😏، هيا امشي راه تاخرت ع المدرسة
اسامة: ماشي يا ستي بس غدوة نوضي بكري ، تمام
تسنيم: تمام 😒؛
طول الطريق كان متردد يسالها و قبل ما يوصلوا المدرسة التفت شبحلها
اسامة: خالي دوا معك؟
تسنيم: عينها في تلفون؛ على شنو؟ قصدك ع الحافلة
اسامة: اااء اي
تسنيم: لا امي قالتلي  و اكيد انت وراء الموضوع 😒
اسامة: صح انا قلت لخالي معش تمشي فاها
تسنيم: بغضب؛ انت شن دخلك، لامتى تقعد حاشر روحك في اللي مالكش فيه!؟
اسامة: شبحلها بخبث؛ توا بعدين تعرفي
تسنيم: بستهزاء؛ شن نعرف؟
اسامة: ليش حاشر روحي 😎
تسنيم: بثقة؛ شن ما ايكون مالكش حق تدخل في خصوصيات غيرك 😒
اسامة:  باه 😏؛ وقف السيارة؛ لما تطلعي رني عليا
تسنيم: فتحت الباب؛ توا ايروح بيا امجد، سلام 👋
اسامة: سلام؛ قعد يشبحلها لين خشت المدرسة و مشى لشركة
.
.
ساعة تسعة و نص ناضت حبيبة و طلعت اتساعد في امي ع الحوش و بعديها طلعت كنست السور و هي خاشة لمدخل الحوش طلع امجد من المربوعة ماشي للحمام .
حبيبة: شبحاته؛ صباح الخير
امجد: صباح الخير؛
و قبل ما تخش وقفها؛ من امتى كان في بينكم علاقة 😠
حبيبة: شبحتله بستغراب؛ شن تقصد!؟
امجد: قرب منها؛ ما اديرش روحك مش فاهمة، انتي تعرفي كويس شن نقصد، و اكيد مش اول مرة اتجي لعنده في اخر الليل
حبيبة: توسعوا عيونها بصدمة؛ اااحترم نفسك، و اعرف شن تدوي 😤؛ جت تبي تمشي شد ايدها بالقوة
امجد: بغضب؛ انااا عارف شن ندوي ، بس الحق مش عليك الحق على خوي اللي وثقت فيه و طعني في ضهري😡؛ قطعاته
حبيبة: نتشت يدها بالقوة؛ اني و تميم مافيش حاجة بينا زي ما انت متخيل
انجيلا: جت قصت عليهم تشبحلهم بستفهام؛ هل حدث شئ ما؟
امجد: لا كنت اطلب من حبيبة ان تحضر لي الفطار  ؛
شبحتله و خشت شادة دمعتها
انجيلا: شبحتلها و رجعت شبحت لامجد؛ سوف اقوم انا ب احضره
امجد: حسسنا؛  مشى خش الحمام و انجيلا مشت خشت المطبخ ،
كنت طالع مع امي نمشي في الجنان زي ما وصاني الدكتور،
و لما جيت خشيت من باب السور و ماشي للمربوعة وقتها سمعت صوت حبيبة اتبرر لامجد ان مافيش حاجه بيني وبينها زي ما هو متخيل 🔥 وقفت في مكاني مصدوم و الدنيا لفت بيا، يعني هو عاتبها و هي قاعدة اتبرر شن كانت ادير معي،
سمعت جت انجيلا قصت عليهم و تغير موضوع في ثانية و استبدل بالكذب، عرفت وقتها ان حبيبة اتحب امجد ومستحيل تنساه 💔
استنيت لين فضى المكان و مشيت خشيت المربوعة منهك وصلت لسرير قعمزت عليه و كلام حبيبة ايرن في اوذاني 💔
كنت نايض الصبح فرحان و توا كيف تبدل حالي،
قعدت على وضعيتي مقعمز نشبح للباب بسرحان و الدمعة انحبست في عيني، حسيت قلبي معصور و ضاق صدري لحد الاختناق 🔥
طلعت تلفوني و اتصلت ب اسامة
اسامة: اهلين تميم ، شنجوك اليوم
تميم: بغصة؛ تمام، انت فاضي توا ؟
اسامة:  لا والله توا وصلت للمشروع ، خير تبي حاجة
تميم:  بعد اتكمل شغلك تعال
اسامة: اوكي؛
عزقت التلفون ع السرير و صدري يعلا و يهبط و في قلبي نار والعة 🔥 مش عارف كيف انبردها ،
امجد: خش جت عيني في عينه؛ صباح الخير
تميم: صباح الخير
امجد: ما لقيتكش بعد وعيت، وين كنت
تميم: بلعت بغصة؛ نبرم في الجنان
امجد: اها؛ طبس على فراشه خذا تلفون و طلع ،
زفرت بضيق و قعدت نستنى على نار امتى ايجي اسامة، لان خلاص مش قادر نستحمل 🔥
امجد خش للمطبخ و كانت انجيلا مجهزتله الفطور، قعمز يفطر و انجيلا واقفة تغسل في المواعين
امي: بعد تطلع نعطيك اتجيبلي حاجات من السوق
امجد: ابعثيلي شن تبي في رسالة
امي: تمام  و باش اتروح باختك من المدرسة
امجد: نفخ بملل و ناض من الكرسي؛ مالا طلباتك انجيبهملك بعد انروح بتسنيم
امي: لالا نبيهم توا بنديرهم ع الغداء
امجد: تم اوكي؛
طلع مشى لداره ايبدل حوايجه و امي نادت على حبيبة
حبيبة: خشت المطبخ؛ نعم يا خالتي
امي: شوفي تميم قال عنده حوايج يبوا غسل حطيهمله في الغسالة
حبيبة: هيا بس انكمل اللي في يدي؛
رجعت اتكمل في شغلها كانت اتظم في غرفة الضيوف و تبخر فاها و بعديها خشت دارها شبحت روحها ع المرايا و حطيت شوية روج خفيف وبخت عطر و طلعت
كنت واقف نشبح من روشن المربوعة ، دق الباب وخشت
حبيبة: بابتسامة؛ صباح الخير
تميم: من غير ما نشبحلها؛ صباح النور
حبيبة: احممم، كيف حالك تميم، شن داير
تميم: الحمدالله؛ صكرت الروشن و مشيت خطوتين لسرير قعمزت خذيت تلفوني؛
قعدت تشبحلي بستغراب ما سالتش عن حالها و ردي كلمتين وقص و لا شبحتلها و لا حسستها بوجودها
حبيبة: وين الحوايج يبوا غسل
تميم: مافيش، كلهم انظاف
حبيبة: بس خالتي قالتلي عندك حوايج يبوا غسل
تميم: بعصبية؛ خلاااص معش نبي نغسلهم
حبيبة: بلعت ارياقها و بستغراب؛ اوكي على راحتك 🥺 تبي حاجة اخرى
تميم: بزعلة؛  لااا شكرا ؛
قعدت لثواني تشبحلي بتعجب عن سر التغير المفاجئ، طلعت و صكرت الباب وراها و مشت لامي في المطبخ
امي: ولعتي الغسالة
حبيبة: لا قال ماعنداش حوايج وسخة
امي: بتعجب؛ توا و نحن في الجنان قالي
حبيبة: وقفت ع الحوض؛ شن قاعدة اديري
امي: تميم مشتهي الكفتة مع كسكسي بالحوت
حبيبة: اها، توا انساعدك اندير الكفتة، وين المفروم؟
امي: وصيت امجد توا ايجيبه
حبيبة: باهي تبي مني حاجة توا
امي: لا حبيبتي صحيتي
.
.
دعاء: عيطتلها؛ تسسسنيم 👋🏻
تسنيم: قلبت اعيونها؛ اوووف؛ وقفت تستنى فاها
دعاء: جت لعندها؛ شني امروحة
تسنيم: اي قاعدة انرن على خويا
دعاء: خوك اللي يبي ايجي ياخذك؟
تسنيم: بخبث؛ اي مالا منو
دعاء: اها، و كيف حال اسامة شن اخباره
تسنيم: شنو معش تدوي معه!؟
دعاء: اه لااا يوميا ندوي معه
تسنيم: خلاص مالا علاش تسالي عليه 😒
دعاء: عادي مجرد سؤال
تسنيم: امممم، و انتم وين وصلت علاقتكم  ولا بس دوة فاضية
دعاء: لا حبيبتي مش دوة، هو كان يبي يبعث اهله بس اني رفضت
تسنيم: برفعت حاجب؛ هو صح دمه ثقيل و حشري بس انتي اتحبيه يعني علاش رفضتيه
دعاء: لا اني ما رفضتاش، قصدي رفضت يبعثهم توا
تسنيم: بستفسار؛  امتى مالا ايجي يخطبك
دعاء: بس نطلع من الثانوية ايجيب اهله
تسنيم: اهاااا
دعاء: انتي شن رايك فيه
تسنيم: من؟
دعاء: اسامة
تسنيم: خيره؟
دعاء: بعقدة حاجب؛ شن انطباعك عليه، يعني انتي بنت خاله و تعرفي عنه حاجات اكثر مني
تسنيم: امممم، شوفي، هو ك شكل الله اكبر مافيش ولا غلطة، الغلطة جت في دمه الثقيل و عقله الحجري و تفكيره الخامر و اسلوبه المستفز وشن اخرى ...؛ قاطعتها
دعاء: خلاص شن ما حطيتي فيه
تسنيم: انتي سالتيني 😏
دعاء: بس هو ما ايبانش هكي!
تسنيم: اني هذا انطباعي عليه و لو  مش عاجبك اتزوجيه و اشبعي بيه، هيا سلام خوي ايرن عليا
دعاء: بااي 👋🏻؛
تسنيم: تمشي قالبة وجهها ؛ التافه طلع واعدها بالزواج 😡؛
طلعت لقت امجد يستنى فاها برا ،
وصلوا الحوش و سيارة اسامة وقفت وراهم، شبحاته من المرايا نازل من السيارة و جاي لعندهم فتحت الباب و نزلت مشت بسرعة خشت الحوش
اسامة: شنجو
امجد: صكر باب السيارة؛ ماشية
اسامة: شن صار معك؟ تميت اوراقك
امجد: مزال قالوا في عطل في المنظومة
اسامة: الدولة احبالها طويلة ضروري ايشحوروك
امجد: انشوف اسبوع هذا لو ما صار شي انسافر و انوصي صاحبي يبعثهملي
اسامة: تمام اوكي
.
.
تسنيم: خشت المطبخ؛ سلام
امي و حبيبة: و عليكم السلام
تسنيم: استنشقت؛ شن دايرين الغداء؟
امي: كسكسي بالحوت و كفتة
تسنيم: يممم 🤤😋
امي: بدلي حوايجك و تعالي ديري السلطة
تسنيم: اعتبريني مزال ما جيت و خلي كنتك الثانية اديرها، نبي نرقد
حبيبة: 🤭
امي: انتي هذا اللي فالحة فيه
تسنيم: شن في احلى من النوم غير الاكل
امي: مش عارفه غدوة كيف تبي تفتحي حوش
تسنيم:  بالمفتاح؛ مشت طلعت و عيطتلهم؛ نوضوني ع الغداء
.
.
اسامة: يشبحله بستفهام؛ علاش تبي اتروح توا، اصبر هاليومين
تميم: انحب انتريح في شقتي، شنو ترفعني ولا انشوف حد اخرى
اسامة: اوكي توا نرفعكم ، شوف حبيبة
تميم: بحسم؛ لا انا ماشي بروحي
اسامة: بستفهام؛ كييف ! و حبيبة؟
تميم: مش ماشية معي
اسامة: علاش، منك ولا منها
تميم: بغضب؛ اانا و ما تسالنيش ليش، هيا كان تبي توصلني؛
مشيت طلعت قدامه و تلقيت مع امجد جاي وجايب القهوة،
طلع اسامة وراي بالشنطة
امجد: شبحله بستغراب؛ وين ماشين؟ القهوة
.
.
انجيلا: فتحت الطنجرة؛ رائحة شهية 🤤 ما هذا الطعام
حبيبة: تلقن فاها؛ كسكسي بالحوت
انجيلا: كسكسي هوت
حبيبة: بالضحكة؛ حووت مش هوت
انجيلا: ما هو حهوت
حبيبة: fishs 🐳
انجيلا: Ok انا اهب الهوت و اهب البهر  كتيرا 🌊
حبيبة: تنهدت بضيق؛ كنت انحبه 😞؛
خش امجد جايب سفرة القهوة
امي: بستغراب؛ خيرك روحت بالقهوة
امجد:  حط السفرة؛ طلعوا مافيش حد  ؛
شبحوله امي و حبيبة بستغراب
امي: وين طلعوا؟
امجد: تميم امروح لشقة
امي: بقلق؛ خيره علاش ماشي لشقة
امجد: مانعرفش بس  واخذ حتى حوايجه، شكله يبي يقعد في الشقة
حبيبة: 😨
امي: بخوف؛ لا اكيد صاير شي و انت تكذب عليا، وين تلفوني؛ قعدت تحوس
امجد: والله مافيه حاجة ليش نكذب عليك، توا طلع ماشي على رجليه
امي: كيف يمشي هكي فجاة! انا الصبح كنت معه ما قالش يبي يروح
امجد: مش عارف، انا سالته قال امروح
امي: شادة التلفون اترن عليا؛ و ليش ما خذا حبيبة معه!!؟؛
ضرب عندي فتحت عليها
امي: الووو تميم انت وين
تميم: في الطريق امروح الشقة
امي: و انت ليش روحت شن تبي فاها
تميم: نبي نقعد في شقتي، انا في الحوش ما تريحتش كل مرة ايخش حد ....؛ قعدت نقنع فاها ان مشيت باش انتريح من الزيارات و ان ممنوع عليا كثرة السلام و الحركة، المهم طمنتها و شبه اقتنعت،
اما حبيبة قلبها وجعها و زعلت عشان روحت من غير ما انقوللها و ناخذها معي،
طلعت من المطبخ وخشت لدار و اول ما صكرت الباب نزلوا دموعها زي المطر، سمعتها تسنيم تبكي نحت البطنية من على وجهها و شبحتلها بستفهام
تسنيم: حبيبة خيرك ! علاش تبكي؟
حبيبة: تمسح في دموعها بالشهقة؛ تميم روح لشقة من غير ما ايقولي💔🥺
تسنيم: ليش روح توا  ! مش المفروض يبي يقعد اسبوع و تروحوا
حبيبة: مش عارفة ليش دار هك 💔😢؛ قعمزت على سريرها تبكي
تسنيم: قعمزت تواسي فاها؛ باهي انتي ليش تبكي، عشان ما رفعك معه؟
حبيبة: اي لان اني مفروضة عليه  عشان هكي مش معبرني و ما لياش اي قيمة عنده 💔
تسنيم: زمت فمها؛ لا ما تظلميش بالكي تحشم من بوي، انتي تعرفي تميم مش من نوع الجري
حبيبة: مسحت دموعها؛ قولك هكي؟
تسنيم: بالثقة؛ اي اكيد مافيش غير هالتفسير؛ 
جاء بوي للحوش و خش للمربوعة ما لقانيش، مشى لصالة و شاف امي مقعمزة في الصالة كانت اتكلم بالتلفون، انهت مكالمتها و حكتله شن صار، طبعا بوي استغرب من مشيتي المفاجاة و طول اتصل بيا و دويت معه نفس الكلام اللي قالته لامي و بعد صكر الخط
امي: بعتاب؛ ليش ما قنعته ايجي اهني
بوي: خليه على راحته هو متريح في شقته
امي: بزعلة؛ و الغداء اللي درته على خاطره 😢
بوي: ارفعيه له، و قولي لحبيبة تمشي معك تقعد جنب راجلها
امي: هيا توا انقوللها؛
مشت خشت عليهن و قالتلها تلبس باش تمشي معها و طلعت  اتحطلي من الغداء
تسنيم: مش قايلتلك يا نكدية
حبيبة: نننننن؛ عزقت عليها المخدة و ناضت تضحك فرحانة فتحت الدولاب و قعدت تختار شن تلبس،
حوايج حبيبة و حاجاتها كلهن في الشقة من قبل العرس، امخلية بس حوايجها القديمة، بعد ربع ساعة طلعت مع امي و مشيوا مع  امجد بعد كلمه بوي ايوصلهن،
.
.
اسامة: بعقدت حاجب؛ انت تدوي جد!؟
تميم: بحسم؛ اي، خلاص مافيش حاجة تجبرها تعيش معي
اسامة: لا انت اكيد مش واعي ، توا بالله عليك بعد تزوجتها  تبي  اتخلى عليها و اطلقها!؟
تميم: لو سعادتها مع غيري ليش ما انطلقها و تعيش حياتها مع الشخص اللي اتحبه...؛ قاطعه
اسامة: بغضب؛ تي شن اتخرف ، راه انت تدوي على مرتك
تميم: بعصبية؛ انا تعبت يا ااسامة اافهم ما نقدرش انخليها على ذمتي و نقعد انتعذب 💔؛ زفرت بضيق حسيت روحي مخنوق انا فعلا تعبت تعب جسدي و نفسي و عاطفي💔
خذيت قرار نعطيها حريتها و تختار حياتها بنفسها بدون ما حد يجبرها على شي،،
اسامة: خليك كم يوم فكر كويس و راجع روحك ، ما ادير شي في لحظة غضب
تميم: خلاص القرار خذيت من امس معش نبي انفكر فيه ، ح تقعد شهر على ذمتي و كل حد يمشي في طريق
اسامة: زفر بوجع؛ ليش مصكر راسك، انت شايف عليها حاجة لا سمح الله
تميم: لااا حشاها، انا مش امطلقها كره فاها، اللي ايهمني ان  هي تعيش سعيدة
اسامة: تنهد بنفس طويل؛ ربي يهديك و يصلح حالك، انا والله العظيم قلبي وجعني 💔؛
رن جرس الباب شبحلي بستفهام
اسامة: تستنى في حد
تميم: لا، نوض شوف من؛
ناض اسامة فتح الباب و توسعوا عيونها و فمها بسعادة
اسامة: ااهلين خاالتي
امي: خير يا اسامة كيف حالك
اسامة: تماممم، تفضلواا تفضلواا؛
خشت امي و خشت وراها حبيبة و سمعت اسامة ايسلم على حبيبة و سمعت صوتها
اسامة: تريحوا جوا في الدار
امي: لا خليني حتى اهني، وين تميم؛
طلعت من المطبخ وجت عيني في عينها ، شبحتني امي استلمتني عتاب و تعزير و اسامة جاء في صفها و يشحن فاها عليا،
اما حبيبة خشت بصونية الغداء حطتها في المطبخ وجت قعمزت تسمعلنا،
امي: كان قلتلي تبي تمشي مش تطلع من ورانا، خفنا ايكون صارتلك حاجة
تميم: جت بسرعة كنت حاط في بالي انروح في الليل بس لما جاء اسامة قلت نمشي معه قبل ما ايخش علينا حد
اسامة: 😒
امي: المهم انت كويس مافيش حاجة تشكي منها
تميم:  لا تمام الحمدلله
امي: الحمدلله؛ شبحت لحبيبة؛ نوضي حبيبة جيبيلهم الغداء  اكيد جاعوا
اسامة: ناض؛ لا انا اسمحولي
امي: قعمز  تغداء قبل
اسامة: و الله ما عندي نية ، هيا السلام عليكم
امي:  استنى ننزل معك امجد قاعد يستنى فيا برا
تميم: وين ماشية توا بس جيتي
امي: يبوا ايجوا عيت خالك و مش حلوة يلقوني مش قاعدة؛ شبحت لحبيبة؛ ديري بالك منه سلم بنتي
حبيبة: ان شاءلله ☺️؛
شبحت لاسامة كان امنزل راسه و يضحك بعد شبحلي غمزلي بعينه و مشى طلع ، و حبيبة وصلت امي لعند الباب و قعدت امي اتوصي فاها ويعديها طلعت وصكرت وراها الباب
حبيبة: جت لعندي مبتسمة؛ اتحب تاكل اهني ولا في المطبخ
تميم: ببرود؛ توا نمشي للمطبخ
حبيبة: اوكي هيا بدل حوايجك وتعال؛
نحت العباية و الوشاح و مشت للمطبخ حطت صونية الكسكسي في المكرويف و مشت حطت تبسي السلطة ع الطاولة و طلعت عصير من الثلاجة طبعا كان امعبيها اسامة قبل العرس مش امخلي حاجة ما جابها من جميع الاصناف،
جهزت كل شي ع الطاولة ،
بعد بدلت حوايجي و طلعت خشيت المطبخ
حبيبة: في دواء تاخذ فيه قبل الاكل؟
تميم: اي خذيته توا
حبيبة: باهي بالعافية ان شاءلله ☺️
تميم: الله ايعافيك؛ قعمزت بكل جمود و قعدت ناكل فوق من النفس انجامل فاها مجاملة، و انرد على كل سؤال بكلمة و نقص
حبيبة: خذت من الكفتة؛ ذوقها اني اللي دايرتها 😊
تميم: خذيت من يدها و نزلتها؛ خلاص معش نقدر ناكل شبعت
حبيبة: باهي ذوق منها درتها عشانك 🥺؛
رجعت خذيت الكفتة كليت منها لقمة؛ شنو عجباتك
تميم: اي، تسلم ايدك
حبيبة: بالبسمة؛ صحة ❤؛
نضت نغسل في ايدي في الحمام و خليت حبيبة اتظم في الطبخ
.
.
بوي: خذا طاسة الشاي؛ وين تسنيم
امي: تغسل في المواعين
بوي: اسامة امس كلمني على تسنيم، انتي شن رايك
امي: اسامة ما شاءلله عليه مافيه ما ايعيبه
بوي: خلاص ادوي معها و اقنعيها
امي: ان شاءلله مش ح اتقول لا ،  اسامة شاب كويس و الف بنت تتمنه؛
قعدوا ايهدرزوا و بعديها بوي طلع ايصلي العصر
تسنيم: خشت اتعارك؛ شن هالظلم هذا، ليش ما الاميرة ديانا طلعت غسلت معي المواعين
امي: المسكينة مش متعودة ع الخدمة و قاعدة حامل
تسنيم: زمت فمها؛ يا خسارتك يا حبيبة الحوش بدونها شين 😭
امي: حتى انتي توا تلحقيها، ربي ايكون في عوني قبل امجاد و توا حبيبة و غدوة انتي تمشي و يفضى عليا الحوش💔😢
تسنيم: ذبلت اعيونها؛ لا اني مستحيل نتزوج بنعيش معكم العمر كله 🥺
امي: لا من غير شر، انتي بس تزوجي و قعدي امشي و اتجي علينا
تسنيم: واااك بعتيني بسرعة يا نبع الحنان
امي: ابتسمت؛ منى عيني انشوفكم كل حد متهني و سعيد في حياته شن نبي اكثر من هك
تسنيم: ان شاءلله؛
خذت الرموت تقلب في القنوات
امي: بوك توا كلمني جايك عريس و يبي ياخذ رايك
تسنيم: شبحتلها بصدمة و بلعت ارياقها؛ عرريس ليا اني!؟
امي: اي معش في الا انت 🙂
تسنيم: يا نهار اسود على قولت المصريين، و من العريس
امي: اسامة
تسنيم: اسمه اسامة هك ما عنداش اسم عيلة و ولد من وين يسكن و من وين يعرفني و...؛ قاطعتها
امي: نحن عندنا كم اسامة؟؛ قاطعتها
تسنيم: قصدك! انتي تدوي على اسامة ولد راجل عمتي
امي: اي
تسنيم: عقدت حاجبها؛ لااا مستحيل 😡
امي: خيره اسامة من شن يشكي 😠
تسنيم: ما يشكي من شي بس  هو ما ايناسبنيش
امي: بعقدت حاجب؛ زيدي فكري ما تعطيش رايك توا
تسنيم: لو اني ما وفقتش تبوا تغصبوني زي ما غصبتوا حبيبة
امي: بغضب؛ حبيبة وافقت بارادتها مافيش حد غصبها
تسنيم: ناضت بنرفزة؛ اني مستحيل ناخذ واحد كل مرة مهدرز مع بنت؛
مشت خشت دارها وخبطت الباب
تسنيم: بغضب؛ ماشي يا اسامة بعد ما رفضاتك الحية دعاء جاي لعندي و تبيني انوافق 😠🔥
.
.
كنت مستند على سريري و حاط الاب توب على رجلي،
خشت جايبة في يدها كباية عصير فريش
حبيبة: خوذ تميم اشرب العصير
تميم: شبحت ليدها؛ لا شكرا ما نبيش؛ رجعت شبحت للجهاز
حبيبة: قعمزت بحذاي؛ بس انت مش متغدي كويس و قاعد تاخذ في دواء
تميم: من غير ما نشبحلها؛ خلاص حبيبة خليه بعدين
حبيبة: حطت العصير ع الكمدينو؛ اوكي انخلهولك اهني باش ما تنساش؛
ناضت فتحت دولابها خذت منه حوايج و مشت للزيانة فتحت الدرج خذت كريمات و طلعت ،
كنت نرفع في عيني نشبحلها لعند ما طلعت، زفرت بضيق و حسيت روحي في ورطة 🔥
فاتت نص ساعة و بعدين انفتح الباب و خشت،
كانت لابسة بجامة حرير و فاتحة شعرها نازل لخصرها و عطرها كان جذاب بشكل كبير 🔥
قعدت نعرق وقلبي يضرب بالقوة و كان لازم نحسم الامر،
طفيت الجهاز حطيته على جنب و نزلت من السرير مشيت فتحت باب الدار  و حبيبة اتمشط في شعرها  تشبحلي من انعكاس المرايا،
طلعت صكرت الباب و مشيت قعمزت ع الصالون خذيت الرموت وقعدت انقلب في القنوات لقيت برنامج مباشر على القناة الوطنية قعدت انتفرج عليه و افكاري و انتباهي كله كان مع حبيبة صوت حركتها داخل الدار و بعد طلعت خشت المطبخ دارت نسكافي و جت قعمزت بحذاي مرة تسال بخصوص البرنامج اللي حاط عليه و مرة تدويلي ع الجامعة و غيره من مواضيع عامة، انتهى البرنامج و حطيت على فيلم اكشن و كانت الساعة تقريبا 8 ، بالاول حسيتها مستمتعة مع الفيلم و متفاعلة معه و بعدين حسيتها ملت و قاعدة  اتفرج عليه وخلاص
تميم: شبحتلها؛ لو ما عجبك الفيلم انغير عليه
حبيبة: لا عادي خليه؛
رفعت ضمت رجليها ع الصالون و قعدت اتفرج معي،
بعد ساعة و نص انتهى الفيلم نقصت صوت التفلزيون
تميم: نهاية مش حلوة؛ شبحتلها لقيتها راقدة؛
حبيبة رقدتي؟؛
نضت مشيت قربت منها حطيت ايدي على كتفها و نشبح لوجهها؛ حبيبة حبيبة
حبيبة: فتحت عيونها؛ هممم شنو؛ قعمزت تشبح حوليها
تميم:  خشي ارقدي في الدار
حبيبة: مسحت عينها؛ لا مزال بكري
تميم: ساعة عشرة
حبيبة: اي مش متعودة نرقد توا
تميم: براحتك؛ مشيت خشيت الحمام و هي ناضت خذت فنجان النسكافي و خشت حطاته في المطبخ و مشت خشت لدار شبحت وجهها ع المرايا زادت شوية مكياج و بخت من العطر و مشت خذت تلفونها و خشت لسرير،
انا بعد طلعت خشيت المطبخ خذيت شيشة مية و مشيت لدار المعيشة فتحت الدولاب طلعت منه ورغان و مخدة و كان في فراش كان يرقد عليه اسامة فرشته و طلعت خشيت داري،
كانت مقعمزة ع السرير شادة التلفون جيت لسرير خذيت الاب توب و تلفوني و مشيت للباب
تميم: من غير ما نشبحلها؛ تصبح على خير
حبيبة: شبحتلي بستغراب ؛ و انت من اهله! ؛
طلعت صكرت الباب و خشيت لدار المعيشة  وصكرتها
.
.
خش داره ايثاوب نعسان، طفى الضي و نحى تيشرته و خش لسريره، بعد خمس دقائق رن التلفون انقلب على جهة الثانية نحى التفون من الشحن و شبح لشاشة، ابتسم و فتح عليها
اسامة: سبحان الله كنت انفكر فيك توا
تسنيم: 😏 بدينا في الكذب و جو المشاكسين
اسامة: لا لا ما توقعتهاش منك، انا كذاب يا بنت خالي
تسنيم: شوف ما نبيش نعطلك
اسامة: باهي افتحي الكاميرة انشوف 😂
تسنيم: ننننننن ما بردك 😒
اسامة: ااخ و الله برداااان
تسنيم: تسمع ولا انصكررر
اسامة: هيا ادوي نسمع فيك
تسنيم: من الاخير اني مش موافقة و ياريت ما تستعملش اسلوب الضغط معي لان لو اتكون اخر شخص في العالم مش ح نوافق
اسامة: بستفزاز؛  يا ساتر و ليش هذا كله انا كخة
تسنيم: بغضب؛  لا انت مستفز و ما ينفعش ندوي معك باسلوب 😡
اسامة: بهزوة؛ وين الاسلوب انا لا اراه
تسنيم: اني الحمارة اللي اتصلت عليك
اسامة: استني يا حمارة ما تصكريش...؛
تسنيم: صكرت عليه و عزقت التلفون؛ ااااااا غببببية
اسامة:حك راسه؛ المجنونة راه ترفضني صح؛
عاود هو اتصل عليها قعد التلفون يضرب و يفصل بعد ثالث اتصال دارتله حظر
اسامة: اوووف خيرها معصبة، زعما اديرها 🤔
.
.
جت الساعة اطناش و استغربت معش جيت لدار، ناضت طلعت من الدار و شبحت لصالة مافيهاش حد مشت للمطبخ و شافت الحمام و برضوا مش قاعد، خافت و بعدين انتبهت للضوء من طالع من تحت باب دار المعيشة،
مشت وقفت بحذا الباب مترددة ادق عليه، خذت نفس طويل و دقت بخفة،
نزلت تلفون و درت روحي راقد، شوية اخرى فتحت الباب
حبيبة: خشت جت لعندي ؛ تميم تميم نوض؛
استمريت بتمثيلي و هي قعدت تحرك في ايدي و تنوض فيا بس ولا كنت رديت عليها
كنت موجوع عليها بس هذا المفروض ايصير 😞
ياست مني، غطتني كويس و طفت عليا الضي و طلعت
فتحت عيوني و زفرت بضيق و وجع ايقطع في قلبي من جوا💔
الصبح طلع علينا بعد سهر و تخميم ما حد فينا رقد الا بعد طلعوا الفجر....

ساعة 7: 42 دقيقة  درست سيارة اسامة قدام الحوش و لما رن عليها تذكر ان حاظرته، نفخ بغضب و نزل خبط ع الباب
امي: بسم الله من ايخبط ع الصبح
تسنيم: هذا اسامة، هيا سلام؛ خذت شنطتها و طلعت و لما فتحت الباب كان واقف في وجهها
تسنيم: صباح الخير 😏
اسامة: صباح الورد، شكلك واعية بكري اليوم
تسنيم: طلعت صكرت الباب؛  الحق تذكرت حبيبة معش رقدت ، خلي مكانها 💔🥺
اسامة: معليش هذه سنة الحياة، الفال ليك وليا 😉
تسنيم: اني مزال انخش لجامعة و انتخرج و بعديها باش انفكر بالزواج؛ لفت مشت فتحت باب السيارة
اسامة: ركب ايسوق؛ عادي نستناك حتى لو تبي تاخذي الماجستير
تسنيم: قصدك انكون المراة الثانية
اسامة: زي ما اتحبي تبي الاولى الثانية اختاري الخانة و انا مش ح نقصر معك 😎
تسنيم: يا حليلي كيف واثق من نفسه 😏؛
سكت معش رد عليها و قعد ايسوق مركز ع الطريق، بعد لحظات
اسامة: بهدوء ؛ توا خلينا ندوؤ جد، انت موافقة ولا
تسنيم: اكيد لا
اسامة: السبب!؟
تسنيم: ضروري ايكون في سبب
اسامة: اي مالا شن اللي خلاك ترفضي
تسنيم: اني وانت زي الزيت و المية ما يمزجوش مع بغض
اسامة: يا عليك تشبيه، يعني هذا اخر كلام عندك
تسنيم: اي
اسامة: تمام؛
و عم الهدوء في السيارة طول الطريق للمدرسة،
.
.
نضت ضهري يوجع فيا من الرقدة ع الارض و ماحوتك وقفت،
طلعت نمشي مستند بايدي ع الحيط لين وصلت للحمام،
بعديها خشيت لدار ناخذ في دواء المسكن
كانت حبيبة راقدة، جيت للكمدينوا ما قدرتش انطبس عليه نفتحه و اضطريت انقعمز على السرير و هي نفس الجهة اللي راقدة فاها و ناضت مفزوعة
تميم: ااسف ازعجتك
حبيبة: تنهدت هزت راسها؛ لا مش مشكلة، تبي حاجة
تميم: ناخذ في دواء من درج الكمدينو
حبيبة: فطرت؟
تميم: لا مزال
حبيبة: ما تخذاش،  توا نمشي انجهزلك الفطور
تميم: وقفتها بيدي؛ لا مافيش داعي، خليك راقدة
حبيبة: خلاص تميم وعيت؛
نحت الورغان و نزلت رجليها و انا قعدت نشبح بكل تفصيل جسمها، كانت غاية في الجمال و الانوثة،  و وجودها  معي في نفس المكان ح ايزيد ايتعبني 🔥
غسلت وجهها و طول خشت المطبخ جهزتلي الفطور و نادت عليا،
طلعت عليها نمشي بخطوات ثقيلة انتبهت على مشيتي
حبيبة: شنو انت مريض
تميم: ضهري وجعني شوية
حبيبة: ماهو انت امس رقدت ع الارض هذا علاش ظهرك واجعك،
تميم: اي ، توا ناخذ المسكن يمشي الحال
حبيبة: بس انت داير عملية كيف ترقد ع الارض،  جيت انوعي فيك ما تبيش تنوض
تميم: خذيت نفس؛ حبيبة انا ما نقدرش نرقد معك في نفس الدار و على سرير واحد
حبيبة: وجهها تلون بالاحمرار ؛ اااني قصدددي عشان ترتاح على سريرك بس
تميم: اي عارف فاهم  عليك
حبيبة: خلاص انت خليك ترقد في دارك و اني اللي نطلع نرقد في الدار الثانية
تميم: لا انا انحب نرقد اهني، متعودة من قبل؛
كملت فطوري و نضت طلعت من المطبخ و حبيبة مقعمزة و صدرها يعلا و يهبط و قلبها ايخبط و عيونها امتلين بالدموع
كنت متخيل الشي هذا ايفرحها بس طلع العكس، كانت في قمة االحزن و الخذلان💔
يتبع..........

🩷🩷🩷🩷🩷🩷🩷🩷🩷🩷🩷🩷🩷🩷🩷🩷