ثنيان مظلوم يا سياف

البارت الرابع والثلاثون؛

بعد ساعه..
راكب بجانب اخوه ويطقطق ب جواله.. دخل ألبوم الصور وقلب بها.. وصل عند مقطع فديو كان بعام "202‪3..
كان هو السائق وجانبه سياف إلى يصور المقطع ووراه سلطان وهزاع إلى يتناقرون على الشيلات.. ضحك ب المقطع من سمع صوت صفقه قويه من الشباب وكان سلطان إلى صفقها هزاع واخذ منه الجوال يشغل شيله عبدالله آل ملخص وغريب ال ملخص.. ترجيتك تروف..
ناظر نهيان الجوال معه وناظر ل ملامح اخوه الضايقه.. سكر جواله وحطه بحضنه من لف سياف الجوال ل وجهه يصور ويغني مع الشيله.. ونطق نهيان؛ ودك تسامحه..
سكت ثواني ونطق؛
يا خوي صرح النفس والوفي طاح..
والقلب كنه من عروايه مقشوع..
كانت احسب ان لحبنا عشره أرواح..
الين شفت الحبل بيدي مقطوع..
العام عضيدي يسمع القلب لا صاح..
واليوم مهما صاح ماهو بمسموع..
..
نهيان؛ تسامحه وماودك تسامحه..
ثنيان؛ ودي أعيد أبتلاه لي.. وودي أسامحه واخذه ب الاحضان..
نهيان بهدوء؛ عشت معه سنين وعمر.. أندري انه صعب عليك يا ثنيان..
ملت محاجر عيونه دموع واخذ شماغه يمسح به نطق والضيق يحتوي صدره؛ أسامحه لأنه مغصوب وأندري به.. مير أذكر سجن الأعوام وهلي..
لف له برأسه ونطق؛ مير تدري انه مغصوب.. وشوله ما تسامح يا ثنيان..
صد عن اخوه ونطق؛ إلى مسويه هزاع وسياف ومناور كلها بسيطه يا ولد ضارب..
قاطعه نهيان؛ السجن مكدر حالك وغيرك..
ثنيان؛ أهرج معك والصد ماليني.. ماهي طباعي ولاهي علومي..
تنهد نهيان ونطق؛ دام الهرج مع العربان ومعي يضيقك خلك الأولى يا خوي..
سكت ثنيان مايرد عليه وتنهد بضيق على حاله إلى يقلب فجأة.. حرك سيارته يغير جو ل اخوه ب السامري وبعدها يرجعون الديره..
...
وقف سيارته قدام الخيم والسيارات المصفوفه بجانب بعض.. فك حزامه ونطق؛ ياخوك أحلى سامري تشوفه الان..
ابتسم له وفك الحزام معه ينزل من السياره.. مشى نهيان وجانبه اخوه ثنيان.. ناظر ل مجموعه الناس الى تلعب السامري.. والفرق إلى تدف ب الدفوف..
مشى عند شايب ناظر له ثنيان وملامح وجهه ماهي غريبه عنه.. بس الذاكره ما أسعفته يتذكره..
سلم نهيان على الشايب وتقدم وراه ثنيان يسلم ونطق الشايب؛ ذا هو أخوك يا نهيان.. هز نهيان راسه له ونطق؛ اي هو ياعمي..
ابتسم الشاب له ونطق؛ الله يحفظكم لبعضكم..
رد عليه نهيان ب المثل ومشى ممسك بيد اخوه ويجلسون  عند أحد الصفوف من بدأ يدف ب الدفوف وينطق ب كلمات..
قلبي إلى تعذب من سبايب حلاه..
كل ما راح عني ودي أنه قريب.. كل ما راح عني ودي انه قريب..
ولا يزيد المواجع يترك إلى شراه.. ولا يزيد المواجع يترك إلى شراه..
قله إني مريض ولا نفع بي طبيب.. قله اني مريض ولا نفع بي طبيب..
والله اني احبه مثل روحي غلاه.. والله اني احبه مثل روحي غلاه..
ودي انه بجنبي لاجل جرحي يطيب.. ودي انه بجنبي لأجل جرحي يطيب..
حايل أجا وسلمى.. حايل أجا وسلمى..
..
صفوف كبيره وناس كثيره.. ومن بينهم عيال ضارب.. وسط الحشد وسط الناس الى تلعب سامري كل أنواعه.. فرق كثيره ودفوف لا تعد ولا تحصى.. والكلمات إلى تلامس قلوبهم.. يرفعون يدينهم وينزلونها.. يحركونها يمين ويسار.. صف واحد متناغم حركاته..جسدهم يميلي مع بعضهم البعض.. منهم إلى رمي شماغه وغترته.. ومنهم إلى رمي عقاله.. يرددون ورا الفرقه ب أصواتهم.. أجواء الرياض وليالها وسامري حائل وأنواعه.. كآنت ليله جميلة ب النسبه ل عيال ضارب.. ليله اخذتهم بعيد عن المشاكل والهموم إلى تصيب قلبهم وأنفسهم.. بعيده عن مصارعات ثنيان مع نفسه لا يقسى على إخوانه.. ماوده يجرحهم .. الجرح لا من شخص توده صعب جداً وهو مجربه لأجل كذا ماوده بهم جرحه.. بس صعب ينسى الأيام السوداء إلى عاشها بين أربع جدران وناس ماترحم..
نهيان إلى متناسى كل شيء يخصه وماعنده مانع أنهم إهانو له كثر ماهو مقهور على أخوه.. ظروفهم نفس بعض وعلى قوله ثنيان كأنهم كتاب مكتوب.. إلا ظرفين ماهو نفسه.. دخول اخوه الأكبر السجن وسبب بلوى أولاد عمه..ومرضه القلبي..
ثنيان طبعه هادي ويدري كيف يحكم أعصابه ومسامح .. لكنه شخص متهور وجنوني بنفس الوقت.. ماينكر المعروف ويكره إلى ينكره.. قلبه رهيف على أهله ويحبهم ويعزهم كثير.. ياكثر ما ضربه وسلخ جلده محمد.. كان يفرق بين ثنيان وسياف وسلطان..هم لهم نفس الضرب بس ماهو كثر ثنيان إلى على كبيره وصغيره ينهبد بها..يضيق صدره منهم ومن طواريهم..وبنفس الوقت مشتاق ومتلهف لهم..عكس نهيان إلى كان حقود وكريه.. كان يكره ال فيصل من كبيرهم الا صغيرهم سنين يحاول يركض وراهم لأجل يدري وشوله يعاملونه كذا الا آخر السنين ترك كل شيء من بعد ما درى انه ولد ال مطلق.. ما سامحهم ولا قدر يسامحهم لكنه متناسى أمرهم متناسى أيامه معهم.. عنده خير وكله من تعبه وشقاه وش عقب يكره لا هج عنهم.. عكس ثنيان إلى متمسك ب مكانه ويسامح..
إنتهت الفرقه من الدف الأول وبدأ الدف الثاني بدون توقف.. صارخ الشباب من درو كلمات السامري ورددو وراه..
ياجبل شمر هل إلهيبه.. أنتي أم الجود والجابه..
للحيا ياديرة الطيبه.. والعمار وجعلك مهابه..
حايلن والكل يدري به.. دار عز لمن تلاجاً به..
دار حاتم مابه ريبه.. يوم هي غظه وحنا به..
والسلام أزكى تراحيبه.. والسلام الختام ماجابه..
..
بدأ اليل ب السامري وينتهى ب السامري.. طوال اليل يلعبون ويردون ورا الكلمات.. الفرح ماليهم والضحكات..
..
بعد أسبوعين .. ضهر الديره..
رابط ثوبه على خصره بعد ما تعامل مع تاجر الذهب إلى بديرتهم وباع الذهب إلى كان ب محل ابوه..
شغلته ماهي ذهب ولا يدري بها.. شغلته عزب وسيوف وبشوت.. قدام محل البشوت إلى مغير إسمه ( بشوت وسيوف الإخوان)..
يقصد به هو وأخوه نهيان.. ناظر ل اخوه إلى جاء ب سيارته الجديده ونطق بعد مانزل الزجاج شوي؛ طلبات الفرو جايه بعد العصر.. أبدل وأجيك..
هز راسه له ونطق؛ على القوه يا نهيان.. مشى نهيان ل بيت الجد سياف..طريق تعب وسفر.. مسافر ل القصيم وتحديد بريده.. يطلب فرو لهم وجلس ثلاث ايام هناك..
ناظر للعامل إلى نطق؛ مدير كلاص كلو.. أجرى بعض التعديلات على ألمحل.. وانتهى العمال منه الان ونطق؛ كم حسابك..
العامل؛ هادا حسابك كلو*****
هز راسه له مشى ل سيارته المركونه أمامه وفتح الباب يدخل بنصف جسمه ويأخذ محفظته ويطلع الفلوس منها.. مد للعامل فلوسه ومشى العامل..
ناظر للمحل إلى أعجب به الآن.. دخل وناظر لكل شيء مغير ومرتب من بعدهم.. غيرو الأشياء الى قالهم عليها ونظفو وراهم ورتبو البشوت والسيوف..ناظر ل أماكن الفرو إلى جايه بعد العصر ووراهم كرف.. اسبوعين كامله يكرفون ب محلات ابوهم ومحلات الجد سياف.. ناظر ابو صويلح إلى فتح باب محله وناظر ابو صويلح له.. وثم التفت ل وأحد من  بزران الديره ونطق؛ ثنيان الشيخ يزهم لك.. يقول إن ماجيت هو يجيك..
ومشى البزر بعد كلامه ل ثنيان وتنهد ثنيان بضيق من طاري الشيخ.. من كلمه خالد قبل أسبوعين أن الشيخ وده به وهو ماراح له.. أو متناسى أمره أنشغل مع أخوه ومحلات ابوه ونسى الشيخ وطاريه.. مشى يطلع من المحل ويسكره.. فتح باب سيارته ورن جواله وكان المتصل سلطان.. رد عليه وناظر ل وجهه إلى مهلوك ومضمد ونطق؛ ولد علامه وجهك..
سلطان إلى طاح من فوق الخيل حقه وأنرفس منه و  سبب له جرح بوجهه وضمده ونطق؛ كله من خيلك حسبي الله ونعم الوكيل عليك انت وياه..
وسع عيونه منه ونطق يركب سيارته؛ وش مسوي بك هاه.. ثبت الجوال على الستاند الموجود ب سيارته وشغلها يسمع كلام سلطان؛ سنين محد حوله قلت أسوي خير وأعطى له جوله يحبها قلبه.. آخرها هو المعطينى..
ابتسم ونطق متوجه ل بيت الشيخ؛ تستاهل والله من قال لك تطلعه..
نطق سلطان من شاف وجه اخوه إلى مركز ب سواقته ويحرك الدركسون؛ وين قاط..
ثنيان؛ قاط عند الشيخ مزهم لي من اسبوعين ونسيته..
انصدم سلطان ونطق؛ الله أكبر عليك.. اسبوعين يا رجال اسبوعين..
ثنيان؛ والله عاد ماودي أروح له.. إلا إصراره بس..
سلطان بتوتر؛ تكفى لا قال.. قاطعه ثنيان إلى نطق؛ لا تخاف ولا شيء.. إن سمعته يحاكى رديت له..
سلطان؛ تكفى يا عزوتي لا تضر نفسك..
ثنيان؛ ابشر ياخوك..
سكر سلطان من ودعه ووصل ثنيان بيت الشيخ.. وقف سيارته بعيد شوي عن الباب ونزل منها.. سكر الباب يحط جواله بثوبه ويعصب شماغه.. مشى ل الباب وتنحنح قبل يدق الباب.. مرت دقائق ونطقت واحده من  بناته؛ من..
نطق ثنيان بصوته الرجولي؛ ثنيان.. الشيخ موجود.. انصفقت ورد من صوته و نطقت؛ دقائق وأدخل على يمينك.. مشت هي تدخل بيتهم بعد ما قالت له يدخل ويروح على يمينه.. انتظر ثنيان ثلاث دقائق وبعدها دخل البيت منزل راسه ل تحت ونطق؛ ياولد..
ماسمع صوت وسكر الباب وراه ومشى على وصفها وهو صاد عن الجهه الثانيه.. دخل المجلس وناظر ل الشيخ إلى جالس ويتقهوي.. ونطق وهو واقف قدام الباب؛ السلام عليكم.. رفع رأسه له ونطق؛ عليك السلام ورحمة.. اقلط..
مشى ثنيان يجلس قريب منه ب مسافه.. ونطق الشيخ؛ قهوه ولا ياولد ضارب..
هز راسه ب لا ونطق؛ اعتبرها مشروبه.. هز الشيخ راسه ب ايه ونطق بعدها؛ الا أنت ماودك بي يا ولد ضارب.. ازهم لك أسبوعين تعيي..
تنهد ونطق؛ السموحه منك.. سريت اليوم الأول طالع الرياض.. والايام الباقيه منشغل..
الشيخ جميل؛ ماعلينا الآن.. ودي بك بموضوع..
حس ثنيان أنه بيتكلم عن طردته ونطق قايم؛ العذر والسموحه دامك تحكى عن شيء صار ماضي ماودي به يتحكى..
الشيخ جميل بهدوء؛ أجلس يا ثنيان.. أنا ما حكى لك عن القديم.. ادري ب ظلمي لك وأستحي أكلمك به..أنا طلبتك لأجل تدري عن أشخاص حولك يحومون..
استغرب كلامه ونطق؛ أشخاص منهم..
الشيخ جميل؛ ابحكى بصلب الموضوع بدون مقدمات.. أنت ولد ضارب.. ولد إلى قتل مغدور.. إلى قاتلين ابوك يا ثنيان يحومون حولك الأيام ذي أنت واخوك.. زاد استغرابه أكثر وتذكر كلام العم وسيم عن مناور وأبوه ونطق؛ المطلوب..
الشيخ جميل؛ لأنك ولد الأجاويد والأصول يا ثنيان.. ودي أنك تغادر من الديره أنت واخوك وتسيرون ديره الضاهريه ان كانك تدري بها.. كان بيتكلم ودري الشيخ وش بيقول له ونطق.؛ ياولدي يشهد الله على اني قايل لك من خوفي عليكم.. لا تقتلون مثل أبوكم..
سكت ثنيان يسمعه ونطق الشيخ؛ الضاهر يا ثنيان مانت بداري عن قصه أبوك كلها..
مارد عليه ثنيان.. وش يقول له إيه انت صادق.. العم وسيم إلى كان يحكى له سالفه أبوه هو قام من وسط حكيه ومشى بدون لا يدري ب الباقي.. والحين يقول له الشيخ يغادرون الديره لا يموتون مقتولين.. ضحك ثنيان بعد هواجيسه ونطق؛ خوفك ياشيخ مشكور به..تقول أغادر انا واخوي من الديره لكن ارد لك.. مانيب بمغادر انا واخوي عن الديره
أن شاء الله وجو إلى تقول عنهم لا ذاك اليوم يصير الخير يا شيخنا.. وأنهى حديثه ناطق؛ السموحه والعذر منك.. وراي أشغال قد اليل.. مشى ثنيان بعد كلامه.. طلع من البيت وركب السياره شغلها وغير وجهته من محل ابوه ل بيت العم وسيم..
...
بنفس الوقت عند نهيان..وصل بيت الجد سياف وفتح شوي من الباب ونطق؛ ياولد..
ونطقت الريم له؛ مابه احد..
مشى يدخل البيت وسكر الباب وراه ونطق؛ يامرحبا ب الريم والغيم..
ضحكت الريم عليه ونطقت؛ ماعجبك للحين ياولد ضارب..
هز راسه ب لا وأخذ نغم من حضن امها ونطق؛ وشوله نغم يا ريمي.. غنمه هي لأجل تنادينها نغم.. غيم أجمل والله.. غيم وسحاب..
ضحكت الريم بقوه ونطقت بعد ما خبطت كتفه؛ الله يقطع ابليسك..
نهيان؛ كيف حالتس وامورتس..
الريم؛ من يقول ل الثاني يا نهيان.. انا ولا انت..
نهيان ب ابتسامه؛ وش نقول إلى مفروض يسأل سهى..
الريم؛ أبد حالي على ماتحب.. وانت..
نهيان؛ الحمدلله الحمدلله.. وينهم الشعب..
الريم؛ سعود راح يجيب كم غرض وضارب معه.. وسلطان تدري به.. وسوير فوق السطح..
هز راسه ونطق؛ عاد أخليك وحدك قلت ل ثنيان أبدل واروح له..
الريم؛ روح روح الله يستر عليكم..
مشى بسرعه يدخل المجلس ودخل الحمام ياخذ له دش... دخل سعود  ووراه ضارب الصغير على دخله نهيان المجلس ونطق ب استغراب؛ سياره منهو برا..
استغربت الريم ونطقت؛ من..
سعود؛ جي كلاس أسود..
فهمت الريم عليه الآن ونطقت؛ اها ذي حقت نهيان.. انصفق سعود ونطق؛ وشو ذي حقته..
هزت رأسها ونطقت؛ توه جاء..
سعود؛ والله..
الريم؛ والله..
مشى سعود يحط الأغراض ب المطبخ.. ومشى للمجلس وسمع صوت مويا.. جلس على المركى ينتظره لأجل ياخذ العلم..
...
دخلت سياره مصعب وبعدها سياره نمر.. الديره.. وتصادفو مع سياره ثنيان إلى موقفه قدام بيت العم وسيم.. نزل معصب الزجاج ونطق؛ ياولدد..
كان فاتح الباب وجزء جسمه الأيسر طالع منه.. ونطق بعد مالف راسه له؛ أرحب يا مصعب..
نزل مصعب من سيارته ووقف نمر سيارته من شافه وقف.. سلم على ثنيان ونطق؛ أول دقائق وشوفتك يا سلام.. نزل نمر من سيارته ونطق بصراخ ؛ بوو ضارببب..
لف له مبتسم ونطق؛ ياهلا ومسهلا.. مشى نمر يضمه ويشد عليه.. تركه بعد ما خرج العم وسيم من بيته على صراخ نمر ونطق؛ جعلها تهيا بوجهك ذا يا نمير..
ابتسم نمر بورطه ونطق؛ عمي وسيم.. مشى له يبوس راسه وابعد العم وسيم راسه عنه ونطق؛ أبعد أبعد..
ضحك مصعب عليه وعلى شكله القصير بينهم ونطق؛ ياعمي يا سنفور ليه الزعل والتصدي..
العم وسيم ودايم يناديه مصعب كذا ونطق بحده؛ أعقب ياولد.. طول طول نخله وعقل عقل نمله..
ضحك مصعب ونمر عليه ونطقو؛ ليه ياعمي الحكى ذا .. وأكمل مصعب؛ وبعدين وشهو ذنبنا لا هو انت قصير.. هذا هو سعود قصير ولا يقول شيء..
العم وسيم؛ إيه سعود مسكين يروح بها يمين يسار.. وثم لف ثنيان ونطق؛ وأنت علامك مبرطم..
هز راسه له ونطق؛ عند حكى لك..
لف العم وسيم ونطق؛ اقول يا مصعب انت ونمر..
مصعب ونمر؛ سم..
العم وسيم؛ أقلب وجهك انت وياه..
ضحك الإثنين عليه ومشو يركبون سياراتهم ويروحون بيتهم ونطق مصعب قبل يمشى؛ ناشبين ناشبين يابو ملهم..
ومشى بعدها ونمر وراه.. استغفر ربه منهم ولف ل ثنيان ونطق؛ كنت أدري جاي لأجله..
دخل بيته وسكر ثنيان باب سيارته ومشى وراه..
جلس العم وسيم وجلس ثنيان معه.. سكت الإثنين دقائق ونطق العم وسيم؛ أنطق..
ثنيان؛ به علم عندي..قاتلين ابوي تحوم علينا انا ونهيان.. ابوي وشهي قصته كامله يا عم وسيم.. والشيخ يقول غادرو الديره
تنهد العم وسيم ونطق؛ جاهز تسمع كل قصته ابوه...
هز راسه له ونطق؛ ايه..
العم وسيم؛ الحكايه كلها ياولدي من بعد ما أبوك شاف مناور يقتل وتستر عليه..سكت العم وسيم يناظر له يعدل جلسته ويحط ذقنه فوق يدينه وحواجبه معقوده.. تذكر لوهله ضارب.. نفس الجلسه والحركة تنهد بضيق ونطق بعدها؛ أنا محكى قبل لك عن ستر ابوك ل مناور.. قاطعت حكى ومشيت يا ولد ضارب.. ابوك من بعد طرده يا ثنيان.. أهل المقتول رجعو ل الديره مره ثانيه.. مير ضارب ماعاد هو موجود وأبو المقتول يا ثنيان قلب الديره كلها فوق الشيخ جميل.. والشيخ جميل ماكان مصدق الكلام إلى يقولونه على ضارب ولا هو قادر يسكتهم دامه جدك وعمك محمد مصدقين ومعترفين..
تعذر منه الشيخ ومارضى يقول له وين غدى ضارب..بعدها ابو المقتول جلس كم سنه ب الديره يحاول يدري وينه ضارب وعياله و أقاربه معه.. اعمامه واخواله وأبوه وإخوانه وعيال عمامه واخواله.. القبيله كلها ياولدي كانت تدور عن ابوك.. إلى من جوا يدورون وإلى من برا.. الشيخ اليوم ذاك معطى ابو مناحي رساله ل ضارب من أمه والشيخ جميل ماكان يفتح الرسايل إلى تعطيها جدتك ابوك و لو فتحها ماكان أعطاها هي.. جدتك كانت تعطيه أحوالك واخبارك ومنها أحوال أهله الباقين وحكت به أنه تعبانه وودها شوفته.. وضارب ابوك ماتحمل طلب أمه..
ذاك اليوم رجع  الديره بعد ما جدتك الله يرحمها تعبت تعب لأجله.. ابوك كان يحب جدتك حب مايتوصف كان عنده كل شيء  هو رضى أمه عنه.. كانت الساعه  ١٠:٣٠ اليل..  وانت تدري الديره ذاك الوقت الكل نايم.. شافه مناور يدخل بيت جدك وهرول يعلم أهل المقتول.. من درى أبوه وإخوانه مشى بعد مناور ومعه سلاحه.. انتظر كم ساعه حتى صارت الساعه ثلاث الفجر وطلع ضارب من بيت جدك وياريته ماطلع من البيت قابله أبو المقتول وعياله معه.. بدون أي كلام يا ثنيان صوب السلاح قدام وجه أبوك وأطلق عليه الرصاص وعياله يطلقون معه.. جدتك سمعت صوت الطلق وماقدرت تتحمل الصوت وركضت للباب بدون غطاها وجدك واعمامك معها.. شافها أهل المقتول ومناور ومشو يهربون من الديره كلها بعد ما انتقمو من ضارب.. ١٧ طلقه يا ثنيان.. ١٧ طلقه جت ل ابوك ظلم.. قتلوه ومادرو أن قاتل ولدهم معهم.. غدر به مناور وعلم الغريب عنه.. جدتك من الأيام ذيك وهي تردد احرقوني ب ضارب.. وقد سمعتها يا ثنيان..
ألديره بعد الصوت الى سموعه الصوت كان كبير وانت تدري بصوت الطلق كيف يصير لاهو هدوء.. تجمعو كلهم قدام بيت جدك ولا رف لهم جفن على ابوك.. ما شالوه من أرضه وأكرموه بدفنه.. استحقرو جدك به.. وقالو له ذا جزاه يا سياف.. جزاء القاتل لا قتل إنسان من غير ذنب.. حتى سياف كان مصدق لهم سياف كان شخص يكره السمعه السيئه لا لمسته بصله.. دخل البيت يا ثنيان وهو يسحب جدتك من فوق ضارب..استحى منها ومن شكلها قدامهم ومن ضارب إلى مات قدام بيته.. محد دفن أبوك الا أنا وابو مناحي والشيخ جميل وجسار.. عمك جسار كان حيل متعلق ببوك.. يحبه كثير كان حياته كلها تحت كلام ضارب.. بيتكم تدهور حاله وجدك ماقدر يتحمل و طلق جدتك الطلق الأول وبعدها جدتك مارجعت له إلا بعد سنتين يا ثنيان..
يشهد الله على وعلى كلامي إني ماكذبت لك بحرف واحد يا ثنيان.. الشيخ يقول لك تغادر من الديره لأجل خوفه عليك.. ماقدر يحمي ابوك ووده لو يحميكم منهم.. إلى مايخاف ربه خاف منه يا ثنيان.. أنت مانت بخايف على نفسك خاف على نهيان وسلطان وسعود من بعدك.. خاف عليهم يا ثنيان.. خاف وش إلى بيصير بهم جسار ومحمد كل  واحد مشى بخطاه هاربين.. سعود إلى تعدو له قبل سنين منهم يا ثنيان.. ماهم هم إلى طعنوه.. من الى داهمو عزبه جدك وكسرو رجلك يا ثنيان.. ما فكرت ليه مسوين لكم ذي السوات.. أنت مافكرت منهو عدوك وانت مابه لك أعداء.. لأجل كذا يا ولدي والله أننا خايفين عليكم.. المنظر إلى شفته ماودي به يتكرر يا ثنيان.. اسمع منى ولو انك ماعاد تغليني.. انت امانه برقبتي امانه انت واخوك من ابوك.. حس ابوك انه بيموت ذيك الايام ورسل لي رساله قبلها ب يومين يقول لي ياعم أن غبت عن دنياي عيالي امانه لك.. ثنيان ونهيان مانيب بمرتاح وهم عند أهلهم.. كان حاس حاس انك رح تتعذب مع محمد وحس أن نهيان بيهينه الجد عبدالله.. لأنه يدري طباع أهل زوجته وأهله كيفهم ياولدي.. ذي قصه مقتل ابوك وغدر مناور به.... أخذ نفس عميق وبعدها زفره.. طلع جواله من مخباه وقفل تسجل المقطع الصوتي.. قفل جواله وتركه بحضنه يهوجس ويربط الأفكار والحبال إلى كانت معقوده.. ونطق بصدمه ؛ مناور غادر ببوي.. الرساله إلى شايفها نهيان ببيته..
استغرب العم وسيم ونطق؛ وشهي من رساله يا ثنيان..
ثنيان؛ نهيان محكى عن رساله شافها فوق طاوله مناور ومكتوب بها.. إلى مسويه له شيء بسيط ودنا بشيء كبير وطلبك كله عندك..
استغرب العم وسيم أكثر ونطق؛يمكن ماهي عن ابوك..
ثنيان بتكشيره؛ ياعمي نهيان شايف بعيونه.. الموضوع به صله والله..
العم وسيم؛ والله يا ولدي مالي بها علم... سكت ثنيان يهوجس أكثر وأكثر وقاطع هواجيسه جواله إلى رن والمتصل نهيان.. نسى اخوه ونسى كل شيء ونطق وهو قايم؛ السموحه ياعمي وعدته اخلص الشغل اليوم ونسيته..
هز العم وسيم راسه له ونطق؛ روح يا ثنيان وانتبه لنفسك واخوك..
مشى ثنيان يركض لأجل يعلم اخوه ويسمعه السالفه كلها.. ركب سيارته وحرك ل السوق..
..
وصل السوق ووقف سيارته قدام محل ابوه ونزل منها بسرعه وناظر ل نهيان إلى يشرب شاهيه ونطق؛ الساعه ٢:٢٨ دقيقه.. ساعه وين هجيت بها..جلس ثنيان جنبه ونطق ياخذ الشاي..
وشرب منه شوي ونطق؛ أسمع العلم.. طلع جواله من مخباه وفتح التسجيل الصوتي وسمع من بدايه الصوت وكلام العم وسيم وثنيان.. بعد مده.. انتهى التسجيل الصوتي والصدمه ماليه نهيان ونطق بعد ما تذكر؛ به سياره تحلاقني من يومين..
ثنيان؛ جو وراك.. هز راسه ب ايه ونطق؛ ووقفو وراي عند البيت..تنهد ثنيان ونطق؛ العلم الحين وشو..
نهيان؛ أسمع ذي ود لها سعود وخبرته.. ونطق ثنيان؛ وينه سعود الآن تلاقيه ب العزبه..
هز  راسه ب لا ونطق؛ جاي وراي..
نرجع قبل وقت..
طلع من الحمام وهو لابس سرواله والفنيله حقته.. حط يده فوق صدره من شاف سعود وانفجع منه.. سعود إلى جالس ومتكى على الجدار ونطق؛ بدري عليك أنت..
نهيان؛ احد قايل لك انك ثور..
سعود؛ خلك من العلم ذا وش صار معك..
نهيان؛ إلى طالبه جاي..
سعود؛ متأكد يا نهيان..
اخذ له نهيان ثوب اسود من الدولاب ولبسه بدون غتره ولا شماغ ونطق؛ سعود يطلب ونهيان يخيب عيب والله.. هز سعود راسه له ووقف ونطق نهيان بعدها؛ ثنيان ينتظرني ب المحل..خلص امورك وأسري..
مشى عد كلامه الأخير له وطلع من البيت رايح المحل.. مشى سعود رايح ل غرفته وفتح الباب يناظر ليلى إلى صارت اربع وعشرين ساعه ب غرفتها وماتطلع بسبب الشباب.. ناظرت ليلى له ونطقت بقهر؛ ماهو ناسي أن عندك زوجه..
سعود ب استغراب؛ وش مسوي لتس..
ليلى؛ مكثر طلعات مع عيال إخوانك وناسي زوجتك... حتى ولدك ماخذه معك ولا تاركهم معهم..
نطق سعود بهدوء؛ اهاها.. ماهو مخبرتس عيال إخواني لا تجيبين طاري لهم..
ليلى بقهر؛ سعود ل.. قاطعها سعود بحده ناطق؛ لا تحسبين إني ما انزلتس من سماتس واخسف بتس الارض.. لا ترفعين قدرتس كثير يابنت مناور.. عدت لتس كثير وطفح الكيل منتس.. عيال إخواني لا تذكرين بسوء عنهم وخصوصا ثنيان ضاربوه يسرح ويمرح مع اعمامه وانا واثق بهم مايهم شورتس لا بغى يروح معهم وانا موجود.. لا تنسين منهو بنيته أنتي.. مشى سعود بعد كلامه ل العيال.. ودمعت عيون ليلى تشوف سعود القديم يرجع.. بدأت تشوفه يتغير من طلع ثنيان من السجن.. ونطقت؛ حسبي الله عليك يا ثنيان الله ياخذك وافتك.. كله منك الله ياخذك مثل أبوك.. جلست على السرير وتبكي بقهر من ثنيان إلى خرب عليها كل شيء ماتدري ان ذا طبع سعود لا غلط أحد عن عيال إخوانه.. ماتدري ان سعود كان متزوج قبلها بوحده وإهانت سلطان وسياف.. وسعود طلقها لأجلهم.. عيال إخوانه خط أحمر عنده.. يسوي المستحيل لأجلهم.. حتى لو قالو له موت لهم يموت..
..
ناظر الاخوان سعود إلى دخل ومسكه نهيان يسحبه بعد ما شاف نفس الشخص الى يلاحقه وسكر باب المحل.. استغرب سعود من فعله ونطق؛ ورع انهبلت أنت..
هز نهيان راسه ب لا وشغل ثنيان التسجيل الصوتي. سمع سعود صوت ثنيان وصوت العم وسيم ب البدايه ونطق يلف راسه له؛ ذا العم وسيم.. هز راسه له ومسك نهيان رأس سعود يلف لأجل يسمع التسجيل الصوتي.. انتهى التسجيل ونطق ثنيان ومعه نهيان بسرعه؛ إلى شاف المحل هو الى يلاحق بنا.. انصدم سعود ونطق بعد دقائق؛ ذولا ودهم بك انت وياه.. هز رأسهم الاثنين ونطق سعود؛ وش تفكرون..
ثنيان؛ أنتقم..
نهيان؛ مثله..
سعود بتفكير؛ كلنا ودنا ننتقم.. مانترك دم ضارب يروح هدر.. ونطق ثنيان؛ وش كلامك..
سعود؛ كلامي يا ثنيان أن مناور يكون له نصيب معهم..
ثنيان؛ بس القاتلين ماهو هو..
لف له نهيان ونطق؛ مهبول أنت وشوله تحكى كذا... ونطق سعود يدري بشخصيته؛ ماودك تاذيه وتوصل للقتل صح.. ودك تقتلهم هم.. هز راسه ب ايه وانصدم نهيان منه وكيف انه مسامح ونطق؛ مسامح مناور يا ثنيان.. مارد ثنيان يناظر له ونطق  نهيان متفاعل ؛ لا انهبلت صدق.. انت براسك عقل مسوي لك ولي ولي ابونا أشياء لا تعد ولا تحصى وانت تسامح.. أي قلب معك ياشيخ.. ركز يرحم والديك ركز مناور السبب بقتله..
ثنيان بهدوء؛ حتى لو هو.. إلى سويته له يكفيه يا نهيان..
نهيان بنفس التفاعل؛ أنت يا ثنيان ضعيف شخصيه..  ضعيف عقل وقلب غبي.. طيبتك تهزمك دايم تحسب الدنيا سهلة مثل دنياك ولا وشو.. أنت على نياتك غيرك مسود نياته يا غبي.. خلك جالس الين يجي يوم ومناور يقول ذا هو اقتلوه..
ثنيان؛ ماهي طباع الرجال ترد .. صرخ مقاطعه؛ أوه فاهم المرجله غلط أنت.. تحسب المرجله مسامحه يا ثنيان اصحى على نفسك وجهز ل صاحب ديرتك قبل عدوك الفخاخ..
ونطق سعود له بهدوء؛اتعب أقدامك ولا تتعب لسانك معه..
لف له نهيان ونطق بصدمه؛ لا تقول انك موافق له..
سعود؛ الدنيآ مهود وسهود عنده.. طبعه وادري به يا اخوه..
مسك نهيان راسه بصدمه منهم ومن كلامهم إلى شوي ويجيب الجلطه له.. ونطق بعد مده  طويله من السكوت إلى صار؛ دامك مصمم على رأيك أنا معك.. بس تغير أشياء بسيطه..
هز راسه له وأكمل؛ تقدم على خطوه عليهم وتقسم السهم ل مناور.. أن ماتحركت انت انا بنفسي طسيت له..
ثنيان؛ نقدم خطوه له لكن قتل لا..
...
أذان العصر.. خرج من المسجد ومشى ل جهه بيت ابو صويلح.. لف راسه وناظر الشخص إلى يمشى متلطم وراه.. وصل بيت ابو صويلح بعد دقائق و دق الباب..
ناظر الباب إلى انفتح بدون لايبين منه الفاتح.. ومشى يدخل.. دخل البيت ولف ل جهه سعود ونطق؛ وراي..
هز سعود راسه له ومشى الاثنين يدخلون البيت..  داهم سعود بيت ابو مصويلح وهو يدري ان مابه احد يعيش به.. سوا مناور وولده بعد موت زوجته وزوج بناته..
انتظر سعود وثنيان ابو صويلح وصويلح حتى يجون من المسجد.. مرت دقائق ودخل صويلح البيت.. فتح باب الحوش ودخل منه.. مشى متوجهه للمطبخ يشرب مويا.. طلع منه وتوجه ل داخل المجالس ياخذ أغراض تاركها.. سعود إلى كان ورا الباب اول ما تقدم صويلح خطوه صفق سعود الباب على جسمه.. ون بألم وانفجع وانصدم بنفس الوقت وطل برأسه ل خلف الباب يشوف وش سبب الصفقه و صفقه سعود مره ثانيه وجت برأسه صارخ من الضربه وجلس على الأرض ممسك برأسه.. نط سعود ورا ضهره ومسك يدينه وربطها بسرعه ونطق؛ حركه وحده ياولد مناور تنسيك أسمك.. رد صويلح مصدوم منه؛ وش سويت لك..
مارد سعود عليه وسحبه معه ل زاويه المجلس..  بعد مده دخل ابو صويلح بعدها ونطق بحده؛ وينك يا السربوت..
مارد صويلح بسبب سعود إلى مغطى فمه بيده.. وصارخ ابو صويلح؛ صويلحوه وعزه الله أن ماجيت ذبحتك.. مرت ثواني ومشى ابو صويلح يفتح غرفت ولده لكن مابها احد.. ومشى للمطبخ ومابه احد.. ومشى يفتح غرف بناته وغرفته هو ومابه احد.. مشى للمجلس وهو يحلف أن ماهو موجود ذبحه.. أول ما دخل المجلس وناظر سعود إلى واقف ب الزاوية وممسك ب صويلح .. أخذ له صفقه على رأسه من ثنيان وداخ منها.. طاح ابو صويلح على الأرض بسبب صفقه ثنيان له ب الخشبه.. توسعت عيون صويلح من ثنيان إلى صفق ابوه وناظر له سعود ونطق؛ ماشفت شيء توك..
سحب ثنيان ابو صويلح ل نص المجلس.. ودق جواله وناظر المتصل وكان نهيان ورد عليه.. تكلم نهيان؛ به ثلاث رجال قدام البيت.. ثنيان؛ تمام .. سكر من اخوه وحط جواله ب مخباه ناطق؛ ثلاث قدام البيت ياسعود..
سكت سعود يفكر ونطق؛ الصفقه قويه ولا..
هز راسه ب لا ونطق؛ ماهي ذيك الزود.. دقائق وصحى..
بعد ٢٠ دقيقه.. صحى ابو صويلح يحس بألم برأسه .. مسك راسه من الخلف وناظر الدم إلى ب أصابعه لف ل جهه ثنيان بعد ماتكلم؛سهل الحكى عليناا يا مناور..
استغرب ابو صويلح ونطق؛ وش ودك يا ولد ضارب..
ثنيان؛ مير انك غادر أبوي يا مناور..أهل المقتول إلى قتلته منهم..
بلع ريقه من كلامه إلى صار له سنين ونطق؛ منهم أهله.. ونطق ثنيان بهدوء؛ لا تراوغني يا مناور.. أهل المقتول منهم..
ابو صويلح؛ ومنهم يا ولد ضارب..
صرخ سعود بوجه؛ هو يسألك ماهو انت تسأله.. ناظر ابو صويلح له ونطق ثنيان؛ إلى غدرت ابوي معهم برا بيتك يا مناور.. ان كانك تناسى أمره لا تنسيه ل مصلحتك ومصلحة ولدك..
خاف ابو صويلح من ذكر ثنيان انهم قدام بيته.. ونطق بهدوء؛ ما درى عن حد..
ضحك ثنيان وهز برأسه ووقف يتقدم من صويلح ومعه الخشبه.. ابعد سعود عن صويلح ب مسافه ووسع عيونه صويلح من ثنيان إلى يمشى له ونطق؛ تكفى يا ثنيان مالي ذنب..
ثنيان؛ مالك ذنب انت لكن ابوك له الذنوب وأكمل يناظر ابو صويلح؛ يا تنطق يا مناور يا ولدك ياخذ إثم سويته.. وثم رفع يده لفوق وماسك الخشبه .. نزل يده وهو كان ناوي يضربه بها  صويلح .. و صرخ ابو صويلح؛ لا تضربهه..
لف راسه له ويده معلقه ب الهواء وأكمل ؛ لا تمسه يا ولد ضارب طالبك..
مارد ثنيان عليه وضرب صويلح بقوه على كتفه.. صارخ صويلح بألم من قوه الضربه وصرخ معه ابو صويلح؛ طالبككك لا تمسههه.. بحكى لك والله لا احكى..
لف له ثنيان ؛ أنطق..
ابو صويلح؛ هم من معارف ال فيصل و لهم صله ب عبدالله..إلى قتلته يا ثنيان إسمه؛ شهيب بن عبد الرحمن..وأهله ال خليفة.. ذا إلى ادري به.. تكفى يا ثنيان لا تمس صويلح بشيء..
هز راسه وأخذ جواله من مخباه وسجل الاسم ل نهيان..
شهيب بن عبد الرحمن آل خليفه.. لهم صله ب ال فيصل وخصوصا الجد عبدالله..
...