ثنيان مظلوم يا سياف

السابع والأربعون الأخير؛

اليوم الثاني.. الساعة ١٠:٢٣ صباحاً..
مسح وجهه من كثر تعرقه ب اللحظات ذي.. يسمع صراخ سعود وصوت الشيخ وهو يفك السحر منه.. وليلى إلى تبكي وتشاهق من هول المنظر إلى قدامها.. سياف إلى على أعصابه لا يصيب شيء ل سعود..
هم أخذوه ل الشيخ.. بعد ما ودوه المستشفى يعطونه دم وبعد ما هدد سياف ليلى بكل أنواع التهديد.. ولا أنها تخاف وكثير من سياف أعترفت لهم أن السحر مع أخوها صويلح.. وأنها ماتدري عن مكان دفنه..
وتوجه سلطان ل الديره بسيارته وبسرعه جنونيه.. ناوي شر على صويلح وأبو صويلح مناور..
...
قبل ساعات..
وصل الديره وكله حقد وشر على آل موسى.. مناور.. صويلح.. صيته.. ليلى.. كلهم حاقد عليهم وكارههم.. ولو وده ذبح وشرب من دمهم.. وقف سيارته قدام بيت أبو صويلح ونزل بسرعه وطق الباب بقوه.. فتح له أبو صويلح وهو منزعج؛ ووجع يامال الوجع..
صر سلطان على أسنانه ونطق؛ وينه ولدك..
ابو صويلح ب استغراب؛ وليه يا ولد محمد..
سلطان؛ والله والله لو ما يطلع لي ال **********.. لا يشوف شيء مايسره..
دفه ابو صويلح بخفه ونطق؛ روح يا سلطان روح..
تقدم سلطان ومسكه من يده ولفها له ونطق بحده؛ يدك ذي ما تطول على..
تألم أبو صويلح ونطق؛ أكفني شرك يا ولد محمد.. جالس ببيتي وجيت أنت لي..
سلطان بصراخ؛ أنا ما جيتك.. انا جيت لولدك..
صرخ ابو صويلح معه؛ عانه ب المحل.. جعل تلاحقك أنت وياه مسبع..
أبعد سلطان عن أبو صويلح وركض متوجه ل سوق الديره.. مسك أبو صويلح يده بألم ونطق؛ جيل ما يحترم كبير السن.. أي والله... دخل داخل بيته ماهو مهتم بولده ولا مهتم لأي شيء غير المخدرات إلى إليوم بيوزعها..
بعد دقائق من ركضه وصل ل محل أبو صويلح.. ناظر ل صويلح إلى يرتب البضائع... تقدم له ومسك من رقبته وسحبه وراه.. انصدم صويلح ورفع راسه يشوف وجهه سلطان وصرخ ينفض نفسه منه.. لف سلطان له بقوه وصرخ مع صراخه؛ والله ل أوريك العجايب.. والله إلى رفع سماء ونزل أرض لا أخليك تحب التراب من ندمك..انت يا*****.. آخرتها تسحر.. وساحر سعود..
انصدم صويلح من كلامه.. ونطق يبعد عنه الشبهات مايدري أنه شاف كلامه ل أخته؛ وش تقول أنت وش سحره ما سحره.. تقدم سلطان يمسكه من رقبته ويشد عليه ونطق؛ لا تسوي نفسك ماتدري بشيء.. والله والله لا أنسيك أسمك واسم الى خلفوك..
ابعد صويلح سلطان عنه وصارخ عليه؛ أنت جاي تبتلى على..
قاطعه سلطان إلى لكمه لكمه طيحته عليه الأرض مغمى عليه من قوتها.. ناظر سلطان ل أهل الديره إلى كل واحد بدأ يرمي كلمه..
؛ أنت يا سلطان تتعدى على ولد مناور..
؛ وش سوا لك.. مير أبوك ماعرف يربيك..
؛ صويلح مابه أحسن منه.. وش إلى جاك تضربه..
؛أي بالله أنه ولد صالح على إسمه..
؛ رجال وش كبرك تسحبه من محله..
؛ الله يرحمك يا سياف خلفت لك رخوم وعيالهم رخوم..
؛ خلك هنا لا جاك مناور لا تنحاش وتخاف..
؛ منحاشين من الديره كلها.. مير الحين من مناور..
؛ ساد وجههم من فضايح ولد ضارب وضارب..
؛ وش نرتجي منهم.. الله لا يبلانا بس..
صارخ سلطان ما يتحمل أكثر.. كلامهم إلى يدقونه به.. وكلامهم عن ميتين.. نرفزه وقهره..؛ كنت محترم كبر سنك أنت وياه.. لكن ألحين والله ما أحترم.. أستحو على وجيهكم والشيب خاط كل شعره لكم.. تهرجون ب ميت راحت روحه عند رب العالمين.. تبتلون ناس ميته ميته.. وتدخلون برجوله.. أي رجوله وأنت وأنت وكلكم مابكم ذره رجوله.. تمشون وترمون الكلام مثل الحريم.. وش بقيتم لهم.. وأشار على صويلح ونطق بقهر؛ ذا إلى مابه أحسن منه.. وصالح ومدري وشهو.. ذا ساحر.. ساحر تدري وش ساحر أنت وياه.. ساحر له سعود ولد ديرتكم.. وساحر من قبله ولد اخوه هزاع.. هاه عاجبكم الطالح الفالح حقكم.. سكت أهل الديره بصدمه من كلامه.. أنقهر سلطان من سكوتهم وناظر ل الشيخ جميل إلى جاء من بعيد يمشي لهم ورفع صوته من قرب الشيخ جميل منهم؛ هقواتي بكم يا آل دريتي كل مالها تطيح.. تعزويت وتحاميت بكم لكن والله أنكم طيحتو وجهي وتعزواتي .. رفع يده ل رأسه ورما شماغه بين رجولهم ونطق؛ هذا هو جاهي بين رجولكم.. طالبكم يا ديره الضباب لا عاد تذكرون صيت آل مطلق بين هرجكم.. فز ابو مناحي يأخذ شماغ سلطان من الأرض ورفع راسه بيتكلم لكن قفاه سبقه..
ومشى سلطان وهو يسحب صويلح من رجله وكله غضب وكره ل ديرته.. الديره إلى تربى بها وعاش بها وولد بها.. هي أكبر سبب ل حالهم الآن.. لو ان بها ناس صاحيه كان عمه ضارب الحين عايش ومرتاح.. لو أن بها ناس تمشى ورا الخير كان ثنيان يضحك بوسطهم.. لو أن بها ناس تدور الحق عن الظلم ماكان مناور وأهله عايشين بهآ..
..
..
هزاع بحده؛ ولد سلطان قمم.. الرجال ماليين المجالس..
لارد من سلطان النايم.. استغفر هزاع من نوم سلطان الثقيل وإلى يجي ب أوقات غلط دايم.. رفسه بقوه على رجله ومشى طالع من الغرفه ووقف قدام الباب ونطق؛ ناسي اليوم ترقيه سعود.. والله إن ما قمت لا يجيك عمي محمد ب الخيزران.. وصفق الباب بقوه..
..
ناظر سعود إلى نايم داخل سيارته وبجانبه ضارب الصغير.. مسك رأسه من الصداع إلى له أيام ماراح منه.. نزل رأسه ونطق بهدوء ل ليلى إلى جالسه بعيده عنه بكم متر؛ وش سواته لك..
رفعت رأسها من سمعته يكلمها.. ما ردت عليه ونطق هو بهدوء يخوفها؛ سألتك وش سواته..
ليه تسوين به كذا.. صرخ عليها تنقلب لهجته ؛ وش غاصبتس عنه.. وش كرهتس به..
فزت من صراخه ونطقت بخوف؛ ولا شيء..
قرب منها وهو يربط شماغه على رأسه ما يتحمل وجعه ولا يتحمل جلوسها وكذبها المستمر عليهم؛ بنت مناور وش أرتجي منتس.. هذاني حالف لتس.. والله واللي خلقتس وخلق كل شيء لا أندمتس على فعلتس به.. أحسن لتس تنطقين وش غايتس من سحره وتنكيس حالته.. يكفي أنه متنكس معنا وتزيدينه انتي بسحرتس.. صد عنها يأخذ نفس طويل.. عض شفايفه ما يتحمل أكثر.. لف لها ونطق مأكد ل كلامه؛ يدي ماقد طالت على الجدال.. مير والله لا أطولها عليتس .. ومير محد منجدتس مني.. وانتي أدري بوضعتس الحينه وشهو..
بلعت ريقها بصعوبة ونطقت تتحاشى نظر عيونه؛ غرت منه..
عقد حواجبه ب استغراب من جملتها... وأكملت ليلى بدموع؛ غرت من حبه ل ثنيان وكيف أنه مهتم به.. غرت من كثر شوفي له يهتم ويخاف عليه طول السنوات ذيك..
وسع عيونه بصدمه من كلامها.. وشلون تغار وشلون.. تغار من ثنيان.. ثنيان إلى أبوها كان سبب ب حياته وظلمه.. وشلون تقدر تقولها قدامه كذا.. نطق ما يستوعب كلامها؛ عقلتس ماهوب براستس.. أي بالله ماهوب براستس.. ماغرتي من الهنوف.. وغرتي من ثنيان.. انتي فاهمه وش تنطق به لسانتس..
رفعت نظرها له ونطقت بحرقه وبكى؛ كان يوجعني ب الحيل.. شوفته دايم يسولف علي ثنيان وخوفه عليه.. وضحك ثنيان وطلع ثنيان وجاء ثنيان وقال ثنيان..وأكل ثنيان ونام ثنيان.. انا وش ذنبي يحبه أكثر مني..
صرخ بجنون عليها؛ ابوتس ********* السبب.. ابوتس يابنت الحرام.. وش ذنبتس حبه وما حبتس.. انتي من يحبتس ويحب ابوتس وعايلتس.. أنتم حرام عليكم قطر مويا.. ماهو حب..
تسحرينه عشان يحبتس.. تسحرينه ليه.. وش استفدتي.. أشر بيده على سيارته ونطق؛ كاه مغمى عليه من تعبه.. ضرب صدره بوجع على عمه؛مايكفي حرق ابوتس لنا..مايكفي ثنيان.. مايكفي عمي ضارب.. تقدم منها موجوع؛ أنا ندمان.. ندمان إني كذبت وظلمت ثنيان.. تدرين منهو ثنيان لي.. تدرين وش اسم ثنيان لي.. أخوي الكبير.. اخوي إلى كنت اقتدي به وودي أصير مثله.. اخوي إلى ما جابته أمي..لف رأسه بخوف من سمع صرخه ضارب الصغير على أبوه إلى يكح دم .. ركض بسرعه ل سيارته وفتح الباب الخلفي ونطق بصدمه وخوف؛ سعود.. سعود..
أستمر سعود يكح والدم يطلع من فمه وخشمه.. انجن سياف هنا وفز يمسك ليلى ويركبها بجانب السائق.. ركب هو ب مكانه وحرك سيارته بسرعه ل المستشفى.. نطق بقهر من سعود إلى منعهم أول يودونه؛ عييت على اوديك.. عييت يا سعود..
ضارب الصغير إلى كان يمسح على وجه أبوه من الدم.. وليلى إلى تبكي من حاله..
..
المحكمه..
رفع نهيان قضيه قتل على آل خليفه.. وقضيه اعتداء وتحريض وقضيه سرقه.. ماقدر يصبر أكثر من كذا.. سنوات كثيره مرت وراحت وصارت من الماضي.. هو لأجل اللحظات ذي ماصبر كم يوم أو شهور ..دري الجميع أن سعود أنسحر من زوجته ومساعده صويلح لها.. رفع رأسه يناظر حمد إلى تقدم ببشته.. ونطق؛ توكلنا على الله..
وقف نهيان ونطق معه؛ توكلنا على الله.. دخل حمد ودخل وراه الشباب.. جلس الشباب على الكراسي صدورهم منشرحهه.. هم انزاح من على صدورهم.. وخوف وقلق بينتهي من الدقائق إلى تمر.. ناظر نهيان بحقد ل ابو صويلح إلى جالس وبجانبه شهاب وعيال عمه.. وبعد مده قصيره دخل القاضي.. سمح القاضي ل حمد يبدأ.. وبدأ حمد ب مهنته بكل احترافيه..
كان يسمع له وكيف انه يحاول يطلع أبوه من الظلم إلى جاه بسبب مناور وقتله المحرم بسبب شهاب.. ماهو مصدق أن خلاص بينتهي كل شيء الآن.. بينتهي عهد مناور بن علي آل موسى.. بينتهي إلى زرع لهم الكره والسمعه السيئه بكل مكان ومجلس وناس.. وبينتهي معه ظلمه إلى دام ل سنوات كثيره.. وشهاب.. شهاب قاتل أبوه وعيال عمه إلى شاركو ب قتل مظلوم.. هو بقى له آل فيصل لكن مايهتم لهم كثر ما يهتم ل مناور وآل خليفه كلهم..
حمد؛ حيث أن مناور بن علي ال موسى... متعاون بقتل الضحيه ضارب بن سياف آل مطلق مع شهاب بن عبدالرحمن آل خليفه.. وتستر شهم بن عبدالرحمن الأخ الأكبر ل شهاب.. على قتل أخوه ل ضارب..
كما أن سيدي القاضي مناور ال موسى مروج مخدرات وتاجر كبير ب سوق الممنوعات.. ومغتصب ومتحرش أيضاً.. فعل المحرمات جميعها سيدي القاضي.. أشر على نهيان ونطق بغصه يحاول يخفيها؛ وكما أنه قتل إبن الضحيه الأكبر.. وشهاب آل خليفه حاول قتل الابن الآخر..
سيدي القاضي تعرضت عائله الضحيه ل أضرار كبيرة جداً.. وسُلب منهم حقوقهم.. سيدي القاضي تطلب عائله الضحية ب قصاص مناور آل موسى وشهاب آل خليفه.. وبغرامة لا تقل عن ***********..
انصدم جميع الحضور من الغرامة إلى كانت شبه مستحيله على مناور وشهاب.. هز راسه عبد الرحمن باسف على حالهم الآن.. ضحك منافي بخفه وهو يصور من اول.. ناظر أسر إلى واقف مع عساكر وضباط خلف كراسي آل خليفه ومناور ل هذال ونطق؛ المحامي إلى معهم ل الزينه بس.. ضحك هذال وهمس؛ وش يدافع عنه الله يسعدك.. حمد ما بقى كلمه ما قالها..
تنهد أسر ونطق؛ ولد تميم..
خالد إلى كان معجب ب كلام حمد ومفتخر انه ولد خالته.. ونمر ومصعب إلى كانو جالسين والبسمه شاقه من الأذن إلى الأذن.. ونهيان إلى كان ممتن له وكثير وهو كبر بعينه من قضيه ثنيان قبل سبع سنوات.. والآن قضيته وقضيه أبوه..
تكلم القاضي معلن مصير مناور وآل خليفه؛ المتهم مناور بن علي ال موسى.. والمتهم شهاب بن عبد الرحمن آل خليفه.. سجن عشر سنوات مع **********.. جلده.. وغرامة مالية قدرها *********.. ل عائله الضحيه.. سكت القاضي من فز حمد بصدمه وابتسم يكمل كلامه؛ قصاص بعد إنتهاء مده السجن.. ضرب القاضي المطرقه ثلاث مرات معلن انتهاء المحكمه..
زفر حمد براحه نفسيه من آخر كلامه.. ومسك هذال مناور ومشى خلف العساكر إلى اخذو هادي وفادي.. ومسك أسر شهاب ونطق بسخريه؛ دمعه أبوك أشوفها من بعد أمتار.. ومشى هو الثاني وراهم.. قام الكل يخرج من المحكمه..
خارج المحكمه..
مسح نهيان دموع عيونه من فرط الشعور إلى حسه.. وتقدم خالد يضحك وينشد بصوته؛
بن زربان هاض الشجون.. واسترسل بدمع العيون..
ساهر مايذوق الكرا.. والدنيا معه قابعه..
حضنه وشد عليه ونطق يكمل؛ ياليل العنا طول.. طول مهما طلت ماني ملول..
لأحد ينشدني وش جرى نفسي بالزهق شابعه...
تقدم حمد والفرحه ماليه وجهه ونطق وهو يصفق بيدينه؛ ياسالين بالله خبروني بما تسلون.. ابا اسلا من هموم على متن الاكتافي.. يا وش عله الصاحي لي أصبح وهو مجنون.. يدوس الجمر بالقدم غصباً وهو حافي..
أبتعد نهيان عن خالد ونطق يشكر حمد؛ أنشهد أنك رجال من صلب رجال.. وقفتك معي م انساها دامني حيي.. بيض الله وجهك يا حمد والله إن مقامك عندي عالي.. ثم لف ل منافي إلى يصور؛ وانت يا منافي يا ولد الاجواد والله مانسيت فضلك على يوم مسكته..
ثم لف ل الشباب ونطق؛ اخوياء شد ظهره بكم ومات وهو يدري أن وراه عزوه وسند بتاخذ حقه معه.. الله يشهد علي أن وقفتكم يا شباب جنبي ما أنساها لكم اي بالله.. وأنها من طيب اصلكم ومعدنكم.. رما نمر شماغه من على راسه ونطق؛ احتزمم والله لو تقول طب بناري طبيت.. ابك انت علامك يا ولد تثني علينا.. ماحن مسوين شيء بكبير.. نطق مصعب يكمل عنه ويضرب صدره؛ أخونا ولو أنه ماهو من الدم لكنه أخونا ويشهد الله أنه رجال وقف معانا بظروف صعبة وساندنا كلنا ولا به قصور للجميع..
وأكمل خالد؛ اي بالله أنه رجال وفعوله ما تنسى يا نهيان.. وقفنا معك من حر ما حسينا به ولا نرضى الظلم له ولا المظلمه..
منافي؛ فضله كبير علينا كلنا اي بالله.. إنه كبير ولا حد يجي مقامه.. ثنيان اخ لنا ولا هو برفيق عادي..
ضحك حمد على كلامهم إلى قلب رسميات ونطق؛ كان منتف الا انه وقف مع عشر..
ضحك نهيان معه...
...
فز بخوف من المويا إلى أنكبت عليه.. ناظر ثنيان إلى واضح من تعابير وجهه أنه معصب ونطق؛ الرجال وصلو وأنت للحين نايم.. سلطان ودي أفهم أنت ناوي على موتك اليوم..
مارد عليه سلطان ونطق ثنيان يهدده؛ معك عشر دقائق والله إن ماشفتك تحت لا أعلم جدي..
مشى من غرفته وصفق الباب بقوه نفس هزاع.. مسح سلطان على وجهه بخوف من الحلم الغريب إلى جاه.. فز يمسك جواله وناظر التاريخ.. الخميس ..202‪4/7/11
زفر بخوف وقلق من الحلم.. ومشى ل الحمام يأخذ له دش سريع.. خرج من الحمام وركض يأخذ له ملابس داخلية من سمع صوت جده إلى يرحب ب الرجال.. أخذ له ثوب ابيض وشماغه لبس ساعته وتعطر بسرعه ومشى يخرج من غرفته.. خرج من البيت حقهم ومشى ل الحوش الكبير.. يسمع جده إلى يرحب ب الرجال إلى دخلو أرض ال مطلق.. لف وجهه ل صقر إلى ضحك ونطق؛ ولد علامك مطفوق..
هز راسه ب لا وهو للحين مصدوم من الحلم.. همس ل صقر ب صدمه؛ وش السالفه...
أستغرب صقر منه ونطق؛ سعود اليوم ترقى ل فريق أول.. أبك الصوره ذيك كلها وما شفتها..
رفع رأسه وناظر ل الآفاته الكبيره ومكتوب عليها..ترقيه الفريق أول سعود بن سياف آل مطلق.. وصوره سعود وهو بلبس العساكر.. تنهد يناظر ابوه إلى بجانبه سياف وعمه جسار وهزاع إلى يخزه بنظراته..وثم لف نظره ل هذال ومنافي وأسر ومطلق.. ناظر إخوان جده وعيالهم.. وابو صويلح وصويلح... وأهل الديره.. كل شيء كان حلم..
حلم مخيف بنسبه له..
لف وجهه ل السيارات إلى دخلت وكانت سياره سعود ب المقدمه وخلفه سياره عمه ضارب وسياره نهيان إلى ملصق صور ل سعود وكاتب.. ترقيه تليق ب عمي سعود.. .. وخالد ومصعب ونمر.. لف من سمع صوت السماعات الكبير إلى شغلها حمد وبدأت كلمات شيله.. قبيلتي محزمي..
لو كان ودي لفرش الطرقات من ذهب..
من شان منهو سار للمحفل وله ذهب..
نلفت له النظر من قوه القدر..
من قبل مقلاط الضيوف المجلس الوسيع..
اصدورنا تاسع لكم حيا الله الجميع..
والليالي طايلي واسمع لما يلي..
رفع صوته من رفع جده الصوت وال مطلق إلى يرحبون ب سعود وب الضيوف؛
يامرحبا ترحيبه البدو للعيد تباشرو به حين شافو هلاله..
امرحبا مليون وان زاد لاباس والزود لأهل الزود يستاهلونه..
يا مرحبا بكم عد ماهلت مزون وإعداد طير السماء حلق وحامة..
سكت الجد سياف يسمح ل ولده محمد يكمل عنه؛
هلا بكم يارجال المطاليق والشاهمة..
ويا مرحبا بكم ترحيبه بداوه ل نجم سهيل وسحابه..
يا مرحبا ياريحه الورد والهيل.. لاهبت النسمه وتطاير عطرها وفاح للكل مرحباً به..
سكت محمد وبدأ جسار يرحب؛
مرحب تراحيب كيف بها راع الضرام..
لا سمعها من زينها يسكر ولوما ودها..
ترحيبه من خاطري تروي العطاشا والحيام..
ترحيبه منسوبه من جدها لي جدها..
ثم نطق شاعرهم ضارب وأصغر عيال الجد سياف؛
يا مرحبا ترحيب ينشر ب الأخبار..
ترحيب من شاعر تحرك شعوره..
يامرحبا ترحيب يكتب الأنوار..
والنور عم المنتدى مع حظوره..
أسمكم مثل برق يبشر ب الأمطار..
والقلب بوجودكم تزايد سروره..
والطيبين بين الناس ماهم بمنكورين..
واللي يزور الناس وجب عليك تزوره..
هذا محلكم وأبدى معكم مشوار..
على الوفا والطيب تكتب سطورها..
من الفرح رحبت بكم نثر وأشعار..
يا مرحبا باللي يشرف حظورهم..
تنحنح ثنيان وبدأ يشل بصوته ونهيان يشل معه؛
يا مرحبا ترحيبه ترفع الرأس.. نفخر وتذكر في وجود النشاما..
ترحيبه من قلب وشعور واحساس.. ريح النفل منها وريح الخزاما..
ياهلا فيكم واهلين وسهلا بكم.. خطوه بالف خطوه عزيزه علينا..
أنورت وأسفرت مراحب بكل الحلا.. والله جيتكم علينا اسعدتنا وهلتنا..