ثنيان مظلوم يا سياف

البارت الثالث والثلاثون؛

نطقت ليلى؛ تهقين..
سوير؛ احتمال.. يسوي له شيء بسيط ويهجد..
ليلى؛ وش توقعتس ل الشيء البسيط..
أشرت سوير بيدها ونطقت؛ كسر رأس.. طعن جسم.. حرق بيت.. كسر سياره.. ذبح .. وإلى شفتيه يكسر محله..
وسعت ليلى عيونها ونطقت؛ ذا البسيط يا سويروه..
سوير؛ دامه نهيان مكسر رجله ومحرق بيته.. عاد ثنيان مادري عنه..
انقهرت ليلى لما تكلمت سوير عن نهيان ووش سوا.. ونطقت بعدها سوير؛ بس ثنيان مايوسيها.. يسامح آخر شيء..
ليلى؛ بعد كلامتس عنه صرت خايفه منه..
هزت رأسها ب لا ونطقت؛ انا قلت لتس احتمال ماهو أكيد.. ليلى إلى مسويه ابوتس ماهو هين.. ضارب من قبلهم وثنيان ونهيان من بعده.. لا تحسبين كلنا راضين عن ابوتس سعود ينتظر متى يهد فكه ولا نسيتي سعود وش سوا فيه.. خليتس حليله معه ولا تذكرين سيره ابوتس عنده ولا ثنيان بسوء أن كان ودتس تقعدين بيت زوجتس وولدتس معتس .. سكتت ليلى تهوجس بكلام سوير وناظرت سعود الى ماسك ثوبه وناظرت ثنيان إلى ماسكه نهيان..الرؤية ماهي ذيك الزود.. عرفتهم من ثيابهم إلى شافتهم لابسينها الصباح..
...
عند الشباب.. صرخ بوجه اخوه الماسك فيه؛وخررر عنييي..
نهيان إلى ماسك فيه بقوه وصرخ ب أذنه؛ ابكك انت تشوتها ماتدري وين..
مسك يدين اخوه إلى ممسك فيه ورفعه ل فوق وطيحه على الأرض..تالم نهيان من قوه الطيحه وانصدم بنفس الوقت كيف قدر يشيله جت الكوره على جهه ثنيان وشاتها بقوه على جهه خالد.. انفجع خالد من الكره إلى تطير له ونزل جسمه ل الأرض بحيث تصقع إلى خلفه.. كان سعود خلفه على اليسار وصقعت برأسه.. داخ سعود من الكوره ومسك راسه يجلس على الأرض.. ضحك ضارب الصغير على ابوه.. ركض ثنيان له ونطق؛ المقصد خالد يابو ضارب..
شهق خالد بصدمه منه ونطق؛ أجل ودك بها من الله يا ثنيان..
اخذ سلطان ثوبه من الأرض ونطق؛ ياعيال جوعان..
تكلم نهيان إلى وقف على رجليه بقوه؛ أنت لو ينذبح قدامك عشرين ناقه ماتشبع..
أشر على ثنيان ونطق؛ ذا مخلي احد ياكل..من صبح ربي مقومني ياخذ مفتاح السياره..
ساعد ثنيان سعود يوقف ونطق بعدها؛ عاجبتك نومه الصبح انت..
سعود؛ تكفى ذا الاسطبل مخليه سنوات..
وسع عيونه بصدمه ونطق؛ أسألك بالله..
خالد؛ يارجال يروح له كل ثلاث شهور ويجلس ساعه ويرجع ابك مسرع شافه كله..
ثنيان؛ انتم مخلين اشغالكم ليه..
سلطان؛ عشانك..
ثنيان؛ وانا شدخلك بي..
سلطان؛ تهقى بعدك الحياه لها لون..
ثنيان بسخريه؛ لا يكون زوجتك وانا مدري..
ضحك الشباب على كلامه ونطق نهيان؛ سددله..
سلطان بسخريه؛ ماعليك مخلف ورع وده ببوه..المهمم جوعانننن
ضرب خالد صدره ونطق؛ ابشروبي يارجال عليكم غدا من يدين خالد..
وضرب سعود صدره ونطق؛ وابشروبي يارجال عليكم مسعف يطير بكم..
ونطق نهيان بضحكه؛ وعليكم دافن يدفنكم..
تكتف سلطان ونطق؛ لو تجيب انت وياه قرود اكلتها.. وقفت على طبخه..
مشى ثنيان يمسك يد ضارب الصغير الى يسمع لهم ونطق؛ داري انه مقرود من الله..
رفع خالد يدينه؛ يارب عليك بهم يارب اني دعوتك... اخذ سعود الكره من الأرض ورماها بقوه على جهه خالد.. صفقت الكره بوجه خالد المسكين.. وفسخ خالد نعاله ورماها على بطن سعود ونطق؛ ادعي الحين عليك.. تراه وقت استجابه..
سعود بسخريه؛ لا تكفى خلاص..
مشى الشباب ل بيت خالد راجعين بعد الغداء ل محل ضارب إلى صار له سنوات كثيره ما انفتح.. يعيدون ذكرياته القديمه فيه..
...
بيت خالد..
دخل خالد البيت بحكم ان امه ماهي موجوده الآيام ذي وهو وحيد أمه.. لا إخوان ولا أخوات له.. إخوانه إلى ماجبتهم امه هم  حمد ولد خالته ونمر ومصعب وسعود وعيال إخوانه.. علاقتهم ببعض حلوه والديره كلها تشهد على خوتهم.. مافارقتهم السنوات الماضية ولا الظروف يحلوها سواسيه ولا يتركون بعض... مشى ل غرفته وفسخ ثوبه لأجل يقدر يطبخ .. ناظر له سلطان ونطق وهو مثله مفسخ من سعود إلى قطع له ثوبه؛ تفنن للموت..
شمق له خالد ونطق؛ وانت شدراك.. ينزل لكم طبخ ماعمركم اكلتوه..
نهيان بسخريه معه؛ الا للجنه يا شباب..
خالد؛ تستخف انت ووجهك.. اشر نهيان على ثنيان إلى جلس قريب منه ونطق؛ تغلط على كأنك تغلط عليه لأني شبهه..
ناظر خالد له ونطق بعد ما ناظر ل نهيان؛ وجوهه تنكه..
هز ثنيان راسه له يوافق على كلامه ونطق بصدمه؛ تهز راسك لي..
ثنيان؛ شقول لك يعني.. صادق هو وجهه تنكه..
خالد؛ وانت وياه ..
ثنيان؛ مادري به..
ضحك سعود ونطق؛ جحدك يا ولد.. هز راسه يمين يسار لهم ونطق؛ داري والله اني داري.. صرخ سلطان على خالد؛ ورععع متىىى تطبخخ..
خالد بصراخ يدخل المطبخ؛ جايككك يابو و مطحسسس..
سعود بضحكه؛ انشهد تطحس بعشر..
سلطان؛ جعلها بوجهك..
ثنيان ناظر ل ضارب الصغير وهو ملاحظ سكوته دايم ونطق؛ ضارب تعال يمي..
مشى ضارب الصغير الى كان واقف قدام الباب يناظر بهم وجلس جنب عمه ثنيان..
نطق ثنيان بعدها؛ ودك شيء..
هز راسه ب لا.. وأكمل؛ بك شيء..
هز راسه برضو ب لا وأكمل؛ هاه وش بك..
ناظر له ونطق؛ مابوه سيء.. لف راسه ل سعود ونطق؛ اقول سعيد وغدك ذا دايمه ساكت..
انصدم سلطان ونطق بنفسه الوقت مع نهيان؛ مابه شيء ذا بالع راديو العالم كله..
التفت لكل واحد منهم ونطق؛ أجل علامه.. تكلم سعود بهدوء وهو فوق جواله؛ البيت غريب عنه لأجل كذا هاجد..هز راسه يناظر ل ضارب الصغير إلى يلعب بيدينه ورفع راسه ل باب المطبخ إلى صرخ منه خالد؛ ياجعل لكم شداد تراكض وراكم.. ابك اطبخ وانفخ لكم وانتم جالسين قم انت وياه عاوني..
صرخ سلطان معه؛ بيتك ومطبخك وعزيمتك دبر بها نفسك..
خرج خالد من مطبخه ونطق ياشر عليه ب السكين؛ انت يا سلطه تعال دامك مشلوح مثلي..
وسع عيونه بصدمه ونطق؛ ماهو يعني زيك اجيك..
تكتف خالد ونطق؛ احد منهم مفسخ لا مابوه الا انت.. قمم لا اجيك..
قام سلطان يتأفف على حظه.. وضحك الشباب عليه وعلى حلطمته إلى يسمعونها من داخل المطبخ.. بعد مده
صفق سلطان خالد على كتفه ب القدر ونطق بعصبيه؛ بطاط بطاط يامال الفقر..
ترك خالد السكين من يده وناظر ل سلطان بحده؛ تقول لي طماطم وشوله قلبت بطاط..
صفقه سلطان مره ثانيه ونطق؛ ب ط ا ط.. ط م ط ا ط م.. فرق فرق يابني آدم..
صفقه خالد بسكين إلى معه ونطق؛ اول شيء لا تصافق.. ثاني شيء ب ط ا ط ط م ط ا ط م.. كلها نفس الحروف فرق الباء والميم يا معرس..
دفه سلطان من كتفه ونطق؛ ابعد عني.. رح تعلم لك ابرك..
اخذ خالد معجون الطماطم من الثلاجه ونطق؛ جعل تبرك ناقه..
صفقهم ثنيان من رأسهم الاثنين ونطق بحده؛ والله وبالله وتالله.. إن ماقلبت وجهك انت وياه طبختكم..
مشى خالد وسلطان وهم للحين يتناقرون.. ناظر ثنيان بحيره ل الحوسه إلى سووها ونطق بسخريه؛ اطبخ لكم طبخه عمركم ما ذقتوها.. وينه يامروح وينه..
تنهد تنهيده طويله ومسك ثوبه يربطه على خصره ويشمر اكمامه.. وبدأ يخلص الحوسه إلى سووها الشباب..
...
دخلت سيارته الديره.. ومشى بطريقه ل بيت الجد سياف.. وقف سيارته قدام الباب ونزل منها وبحضنه بنته نغم.. نزلت الريم من الجاهه الثانيه ومشى لها أحمد يعطيها نغم.. أخذت نغم منه ومشى ل خلف سيارته يفتحها وينزل الشنطه منها.. مشت الريم ودقت الباب لأجل تفتح لها سوير.. ركضت سوير بعد ماشافت سياره أحمد في ديرتهم تنزل الدرج ثلاث ثلاث.. فتحت الباب بعد ماطغت .. ورحبت وهللت ب اختها إلى غابت عنها شهر ونص..
تركت الريم نغم وهي بدأت تمشي شوي شوي.. نطقت بعدها؛ وينهم وينهم..
سوير؛ قصدتس سعود وشلته.. توني نازله من السطح وشفتهم رايحين بيت خالد..
هزت رأسها لها ونطقت؛ وكيفه ثنيان..
سوير بضيق؛ ذا يبي له قعده ياوخيتي.. تركت سوير وراحت ل أحمد إلى ناداها ونطقت وهي تطل برأسها؛ إسمع الشباب ببيت خالد سير عليهم.. هز راسه ناطق؛ ابشري.. خذي ذي..
اخذت الشنطه منه ودخلت البيت تسكر الباب.. جنب سيارته بجانب سياره سياف إلى صارت مغبره ونزل منها يمشى ل بيت خالد..
...
بيت خالد..
هواش وصراخ من كل واحد منهم.. ضارب الصغير الى يهاوشه سلطان على تكسير جواله وهو ما يهتم له أو الأصح مغطى أذنيه عنه.. خالد إلى يسحب نهيان يلعب معه بلوت ونهيان منسدح على بطنه بتعب من طيحته.. وسعود إلى يهاوش سلطان على صراخه ب ولده.. ثنيان إلى جالس ب المطبخ يستغفر ربه منهم وعلى حالهم.. انطق الباب ووقف ثنيان يروح يشوف منهو إلى يطق.. فتح الباب بستغراب وناظر ل أحمد ونطق أحمد ب فرحه؛ حيييي بووو ضاربب..
أبتسم له ثنيان يضمه ونطق؛ حيي نباكك..
باس أحمد راسه ونطق؛ علومك يارجال وحالك..
ثنيان؛ أبد على مايسرك.. إلا انت العلم..
أحمد ياشر على قلبه ونطق؛ عالي الجودة عالي.. ضحك ثنيان عليه ونطق؛ دايمه.. اقلط حياك..
دخل أحمد ونطق؛ يبقيك... انصدم من الشوشره إلى تصير قدامه ونطق يلف ل ثنيان؛ ذولي وشو..
رفع اكتافه ب مدري ونطق؛ يمكن بعير..
شال احمد شماغه وحطه على كتفه وننطق؛ ابك البعير أهون يا رجال..
ومشى لهم رافع يده ينطق؛ سلام عليكم يا شيوخ..
لف الشباب بصدمه له ونطقو؛ وعليك السلام ورحمة..
نطق نهيان وهو متسدح؛ أحمد عان لي..
ضحك أحمد يجلس جنب سعود ونطق وهو يشيل المركي من جنبه يتركي عليه؛ وشوله أعاني لك..
نهيان؛ ضلع ضلوعي مكسور..
ونطق سلطان بسخريه؛ أن رد لي قلت هاكم ضلوعي كلها..
نطق نهيان وناظر له بطرف عين؛ تنكت أنت ووجهك.. البخ..
سلطان؛ البخ صدق..
...
بيت الجد سياف..
جلست بعد ماسلمت على ليلى ونطقت؛ ايه وش علمه ثنيان..
سوير؛ أبد الولد تغير تغير.. ماعاد اعرفه.. وجهه وكلامه وتصرفاته كلها يا ريمي..
الريم؛ تشرهين يا سويروه..
سوير؛ إيه اشره.. قبل اسبوع يقول لي وجودي ماهو عاجبتس.. ذا كلامه بالله عليتس..
هزت رأسها ب لا ونطقت؛ مير قلتي له شيء كد خاطره..
سوير؛ ماقلت له شيء غير أن مايسكت ولا يروح مجلسه.. وسعت عيونها بصدمه ونطقت؛ وذا يا سوير وتقولين ماقلتي..
تكتفت سوير ونطقت؛ عسى تحاسبيني يا ريم..
الريم؛ لا لا وشو احاسبتس.. إلا متى راجعين..
رفعت اكتافها ب مدري ولفت الريم ل ليلى ونطقت؛ وينه ضاربوه..
ليلى؛ خذاه سعود..
سكتت الريم وهي تشرب الفنجان حقها..
...
نزل ثنيان غداهم واكلو.. صب سلطان القهوه ب ما أنه أصغر واحد فيهم وعلى قول ثنيان الصغير يخدم القوم..
وصل عند سعود ومد له فنجانه ونطق يناظر ل ضارب الصغير الى معه جوال ابوه؛ وانت يا ضاربوه ودك..
رفع نظره له ونطق؛ لا...ضحك عليه سلطان وجلس ب مكانه بعد ما صب ل نفسه..
ونطق أحمد؛ الا شحالكم.. وش حال الشغل معكم..
هز سعود راسه ونطق؛ العزبه ماشيه حالها والمحل من أيامه مقفول..
خالد؛ أبد الشغل الشاغل..
ونطق نهيان؛ أن شاء الله المحلات كلها تنفتح بكره..
ونطق معه ثنيان؛ عهد الأولين يعود..
انفجر سلطان ونطق؛ يوه ياعيال تهرجون على الشغل.. ايام والله..
غمز له خالد ونطق؛ نجددها ماعليك..
ونطق ثنيان بسخريه؛ افتح اسطبلك ولا نقله هنا.. خلك من هرج ماله داعي..
سلطان؛ لا اشهد ان ذا تغير صدق.. ابشر نعود له..
ونطق خالد؛ هيه احمدو وينها ورعتك..
أحمد؛ ببيت امها..
خالد؛ قم تقلع جبها..
أحمد؛ تطردني من بيتك يا خالد افا يا ولد تركي ماهقيت..
خالد؛ إلى مايجيب نغمي مارحب به.. رفع ضارب الصغير راسه له ونطق بعد ماسمع اسم نغم؛ وانت سحلك بيها..
لف خالد له ونطق؛ مالي سحل ياولد سعود..
هز راسه له وناظر ل جوال ابوه يكمل الفديوه إلى يتابعه.. ونطق أحمد بضحك؛ سكتك والله..
شمق له خالد وأكمل فنجانه..
...
العشاء.. بعد ما رتب الشباب محل ضارب الأول وباقي لهم الاثنين الثانيه..
ضاق صدره وانكتم.. فز ياخذ من جيبه جهاز تنفس متنقل معه.. سحب سحبه طويله وقدر يتنفس بعدها شوي.. دخلت عليه الريم ومعها بنتها نغم وضحكت له ونطقت؛ ياهلا والله ب ثنيان.. رجع ثنيان الجهاز ب مخباه ونطق؛ ياهلا بك..
جلست الريم جنبه وابتسم ثنيان ل نغم ونطق؛ نغم..
هزت رأسها ب ايه ونطقت؛ أذكر انك تحبه حيل.. وسميت به هي..
ابتسم ل عمته ومد يده ل نغم تجيه.. قامت نغم من فوق امها وراحت ل ثنيان وضحكت له.. دخل نهيان يسحب شعر ضارب الصغير وراه صرخ ضارب الصغير أول ماشاف نغم فوق ثنيان وركض يفك نفسه من نهيان؛ وحرييييي عنههه.. انفجع ثنيان منه وترك نغم بسرعه ل عمته الريم.. نط فوقه ضارب الصغير وحضنه ونطق؛ حقي ماهو حقس..
بكت نغم منه ونطقت الريم بيأس؛ حالهم دايم..
ونطق ثنيان بصدمه؛ يغار..
جلس نهيان ونطق؛ يوه يوه ذا الغيره بعروقه.. مكثر جلسات مع سلطان..
ضحك ثنيان عليهم ونطقت الريم؛ ثنيان... همهم لها ثنيان وأكملت؛ أنت راضى..
مافهم وش تقصد ب كلامها ونطق؛ وش مافهمتس..
تنهدت ونطقت؛ انت راضى تجلس هنا..
فهم مقصدها الان.. راضى بجلسته ببيت إلى أنطرد منه.. ورأى بجلسته بديره ماعاد تعترف به.. هز راسه لها ونطق؛ راضى ومانيب براضى..
الريم وهي تسكت نغم؛ حدد يا ثنيان لا تكون متناقض..
ثنيان؛ وش توقعتس ياعميمه.. وش تشوفينه انتي...نهيان يسمع لهم وساكت عيونه تتنقل بين عمته الريم وثنيان.. ونطقت الريم تحاول تسحب منه كلام ؛ اطباعك وحالك يبين انك مانت براضى..
ثنيان؛ أجل يا عميمه مانيب براضى..
الريم؛ ومتى ترضى..
ثنيان؛ لاشفت مناور طايح قدامي..
الريم؛ وانت تسويها..
هز راسه ورفع أكتافه ب مدري ونطق؛ مادري..
سكتت الريم تفكر شوي.. ونطقت بعدها؛ ثنيان مشكلتك أنك متناقض.. ودك تدري عن الخافي بضارب.. وودك ماتدري عنه.. ودك تهد مناور وترد له الظلم ب الظلم.. وودك تأخذ الأجر وتسامح..
ونطق معها نهيان؛ وودك ترجع سنين الخوالي.. وودك تخفيها طول العمر.. وودك تهرج عن خاطرك.. وودك تسكت تخاف تزل..
سكت الاثنين بعدها ونطق ثنيان بعد دقائق؛ كل شيء بوقته حلو.. مير إني متناقض صدق.. بس رد الفعايل حامي..
هزت رأسها له ونطقت وهي تقوم وتخبط على كتفه بخفه؛ لاتهوجس مره هوجيس مرات ياولد ضارب..
مشت الريم ومعها نغم إلى للحين ماسكتت وناظر نهيان ل ضارب الصغير ونطق؛ قم..
قام ضارب الصغير وأكمل؛ تدل غرفه ابوك.. تقلع بها..
هز راسه له ومشى يطلع من المجلس وراح غرفه ابوه وأمه.. دق الباب وفتحت ليلى جزء منه وهي خلفه.. ودخل ضارب الصغير.. ناظرت ل ولدها ونطقت؛ وينه ابوك..
نطق ضارب الصغير؛ عند حالد..
ليلى؛ كلهم جو الا هو صح.. هز راسه ب لا ونطق؛ بس عمو نهان وعمو ثنان..
ليلى؛ ايه أجل نهيان وأخوه.. أكلت شيء..
هز راسه لها؛ إيه عمو ثنان استري لي..
ميلت شفايفها من ثنيان ونطقت؛ غير لبسك ونام طيب.. هز راسه بها ومشى يفتح الدولاب حقه ويغير ثوبه..
بنفس الوقت..
لف ل جهه اخوه وصفق فخذه ونطق؛ علامك..
ثنيان؛ والله ودي له أكله..
نهيان؛ مناور صح..
هز راسه ب ايه ونطق؛ باقي غيره..
رفع نهيان يده وناظر ساعته ونطق؛ الساعه ٦:٢٠ دقيقه.. باقي عشر دقائق وأذن العشاء حان وقته.. أمشى معي نسير عليه بعدها.. قام مع اخوه وأخذ شماغه من فوق المركى مشى هو ونهيان ل الباب الحوش وفتحوه وطلعو منه.. توجهه ل المسجد ينتظرون الصلاه وبعدها يروحون بيت ابو صويلح..
بعد مده..
انتهى الإمام من صلاه العشاء وجلس هو وأخوه دقائق يقرؤون فيها الأذكار.. مشى طالعين من المسجد يلبسون نعالهم ويستغفرون ربهم.. غيرو طريقهم من بيت الجد إلى بيت ابو صويلح..وصل هو وأخوه وتكى بجانب الباب ب مسافه قصيره..
مر الوقت شوي وجاء ابو صويلح.. وبدأ ثنيان يتكلم ويقصد؛
انحاش عن ناس تسوى الفضايح.. عاشت بسوء أخلاق كذب ونفاقى..
ناس تسرد للمشاكل شرايح.. تثور بين الإخوان الشقاقى..
كل الحياة  احلام والعمر رايح.. طرقى بها الدنيا وغيري طراقى..
...
نطق نهيان معه وهو مروق؛ انحاش عن ناس تسوى فضايح.. ناس تسرد للمشاكل شرايح عاشت بسوء أخلاق كذب ونفاقى.. أي بالله انك صادق.. صح لسانك ياخوي..
عصب ثنيان شماغه ونطق؛ صح بدنك ياخوك..
سمع كلامهم ابو صويلح وحس انهم يقصدونه مشى يكمل خطاه ل بيته وأخرج المفتاح لأجل يفتح به الباب.. فتح الطرق الأول وفتح الطرق الثاني ونطق ثنيان بضحكه؛ تشوف الأوادم يا مناور وماتقلط..
لف له أبو صويلح ونطق بعد ثواني؛ اقلط ناس ترمي الكلام قدام بيوت العربان..
تكتف ثنيان وتكى بضهره على الجدار ونطق؛ ونهرج عن ناس تعيش بكذب ووهام..
وأكمل نهيان؛ ناس تنقل أخبار وتقارير مزوره..
ونطق ثنيان؛ ولا نهرج عن ناس فرقت أهالي عن دارها.. وأكمل نهيان؛ ولا نهرج عن ناس تدور الزله وأن مالقت تصنع له..
ونطق ثنيان؛ ولا عن ناس قتلت أشخاص بريئه.. وأكمل الآخر؛ ولا عن ناس تعيش بدون ذمه وإنسانية...
ماقدر ابو صويلح يتكلم معهم ودخل بيته وسكر الباب بقوه من كلامهم إلى اهانه..  ناظر الإخوان للباب إلى تسكر وبعدها ناظرو بعض ومشى الإثنين بجانب بعض بهدوء..
تكلم ثنيان بعد مده؛ نهيان..
همهم له نهيان ونطق ثنيان؛ بخاطري اهج..
ناظر له نهيان ونطق؛ اهج بك وين ماودك.. يريحك ذا ياخوي..
هز راسه ونطق؛ هج بي بعيد عنهم يا نهيان.. إلى يصير يضيق صدري..
نهيان؛اصبر كم يوم بس..
بعد دقائق
وقف الاثنين قدام البيت ونطق نهيان وهو يفتح باب سيارته وناظر ل ثنيان إلى يطلع مفتاح البيت؛ تخاوي..
لف له ثنيان ونطق ب استغراب؛ وين..
نهيان؛ الرياض..
ثنيان؛ به شيء هناك.. هز راسه ب لا ونطق؛ نفرفر كذا وناخذ لك جوال.. هز راسه معه ومشى يركب بجانب اخوه.. ركب نهيان وشغل سيارته وحرك..
شافهم سعود يركبون السياره ويحركون بعدها.. تنهد ومشى للبيت وفتح الباب يدخل..
دخل وماشاف احد ونطق؛ يأهل البيت..
طلعت له الريم من الغرفه حقتهم وسوير معها.. ونطق؛ الريامه موجودة.. حي الله وخيتي..
تقدمت له تحضنه ونطقت؛ الله يحيك ياخوي..
باس رأسها ونطق؛ كيفتس عساتس بخيره..
ضحكت عليه ونطقت؛ الواضح انت وسوير ماسكين اللهجة.. أبد بخير..
سعود؛ جعله دوم.. تدرين بخوتس لا ضاق تحاكى بها.. وأشار إلى سوير؛ وذي منقعه عندي لأجل كذا سحبتها..
الريم : لأجل منهو ضايق..
سعود؛ لأجله.. وينها نغيم..
الريم؛ تكفى توها نايمه..
ضحك على تعابير وجهها ونطق كلامه ل سوير؛ عاد ودنا بشاهيتس..
سوير؛ إيه طول اليوم سافهني والحينه شايي..
تقدم يحضنها ونطق ؛ ليه التغلي يالغالي..
زفرت سوير وراحت تسوي لهم شاي ونطقت؛ ماهو لأجل سواد عيونك.. لأجل الريمي بس..
ضحك عليها ومشى تارك الريم تجهز لهم جلسه ب الحوش.. فتح باب غرفته وناظر ل ليلى إلى جالسه فوق السرير وجوالها بيدها ونطق؛ ليه مانتي بمعهم..
هزت رأسها ب لا ونطقت؛ كنت عندهم قبل شوي.. مشى يفتح دولابه ويأخذ له قميص.. بدل ثوبه ونطق يناظر بضارب الصغير وهو نايم؛ تعالي اجلسي معنا..
مشى سعود ومشت وراه ليلى بهدوء.. جلس بجانب الريم على اليسار ليلى قدامه.. بعد دقائق جت سوير ومعها صينيه الشاي صبت لكل واحد منهم وفتحت كيس المكسرات لأجل ياكلون منها.. ونطقت الريم؛ وينه سعود الجساري..
ابتسم سعود لها ونطق؛ موجود يأمن تنادى..
وتربعت سوير ونطقت؛ اقصدد ياسعود..
هز راسه لهم ونطق؛ مير كثير عنه لكن نقصد لتس.. اصبري خليني أرتب أفكاري..ونطق بعد ثواني..
انا طفح فيني الكيل والحيل..
وكلي تعب وارفض أوقف مساري..
استعجل الخطوه وانا واني الحيل..
واشب في درب المتاهات ناري..
واستقبل وقود الشعر والمواويل..
وارسم لها وجه يرد اعتباري..
...
انصدمت ليلى منه ونطقت؛ شاعر..
هز راسه ب لا ونطق؛ مانيب ذاك الزود.. احفظ الشعر والقيه..
صفقت سوير وقالت؛ طفح الكيل ياسعيدان..
ابتسم سعود بضيق ونطق؛ شعر ضارب يا أخته..
سكتت سوير ونطقت الريم ب استغرب؛ لقيت دفتره.. هز راسه لها ونطق؛ وياريت مالقيته.. كله شعر وقصايد عن ضيقه..
حست ليلى أن مالها داعي جنبهم وهم يهرجون عن شخص ماذيه ابوها.. ودها تقوم بس تعرف نظرات سعود إلى تخوفها لا جابو طاري ابوها.. 
نطقت سوير موجها كلامها ل الريم؛ ابوتس شاعر.. اخوتس ضارب والمقرود جسار شعار... وسعود ماخذ منهم ه ه  شوي..
ونطق سعود معها؛ وعيال اخوتس ضارب شعار..وعيال جسار ماهم شعار الا شعير..
ضحكت الريم على كلامهم ونطقت؛ أفا بس.. شعير ياسعود..
هز راسه ونطق؛ اي بالله شعير..
...
لف راسه ل نهيان إلى يسوق بيده اليسار وماسك فنجان الشاي ب اليمين.. وثم لف راسه ل الامام يناظر الطريق.. حس عليه نهيان ونطق؛ انطق وراك علم انت.. مارد عليه ثنيان وسكتت لف له نهيان ونطق؛ ودك بشيء... هز راسه ب لا واشر له يركز على الطريق.. ارجع انظاره ل الدركسون وثم ل الطريق.. بعد مده من السكوت وكل واحد منهم يهوجس.. نطق نهيان من بدأ يدخلون حدود الرياض؛ الأجواء ذي ود لها حائل وسامرها..
ناظر له ونطق وهو من عشاق السامري؛ صادق والله..
ضحك على وجهه من لف له ونطق؛ أدري لك بناس يابوي يا سامري حقهم سامري صدق..
نطق ثنيان بحماس؛ ودنا لهم..
هز راسه ب ايه ونطق؛ نمر عليهم تالي اليل..
هز راسه معه واكتفى ب السكوت...
بعد مده طويله..
وصل نهيان للمكان إلى وده به.. نزل من سيارته ونزل معه ثنيان.. ناظر ل محل الاتصالات.. ومشى بعد اخوه..دخل نهيان المحل ونطق بصوت مرتفع؛ بو علي..
جاء لهم شخص وهو مبتسم ينادونه بو علي لأسم ولد عمه المرحوم علي.. ونطق؛ يامرحبا بولد الغربان..إلى لا يجيك ولا يرسل لك..
ضحك نهيان ونطق وهو يخبط كتفه؛ على السموحه يابو علي.. إلا ودي منك جوال حلو لأخوي..
هز راسه له وأشار ل أحد الجولات ناطق؛  مسامح مسامح.. جوال منزل جديد وعلى كيف كيفك..
نهيان وهو يناظر له ونطق؛ هاته اتمعن به..
ضحك بو علي ومشى ينزله له.. نزله ومده ل نهيان. لف نهيان بجسمه ل ثنيان وتكى بضهره على الطاوله ونطق؛ جوالات بو علي ولا تعلى عليها أنت خذ وحن ندفع ضمان سنين قدام ارمي به من فوق طابق الخمسين ولا يكسر ..
أخذه ثنيان وبدأ يشوفه ونطق؛ مابه شيء..
ونطق نهيان؛ عجبك أخذه.. هز راسه ل نهيان ولف نهيان ل بو علي ونطق؛ تسويق التجاري ماعليك.. ضحك بو علي ونطق؛ دامه اخوك والتسويق التجاري إلى عندك حرام حرم الطلاق ماتدفع ريال..
انصدم نهيان منه ونطق؛ كدرت خاطري ياولد...تحرم ليه..
بو علي؛ متزوج مالي ثلاث شهور لاتخل أطلق..
ضحك نهيان ونطق بعد ما مد له الجوال ثنيان وحطه قدام بو علي؛ زبطنا يابو علي..
اشر بو علي على خشمه ونطق؛ على خشمي.. أخذ الجوال وفك الصق منه..وحدث نظامه.. اخرج نهيان من مخباه جوال ثنيان القديم إلى من سنين محد فتحه وحطه قدامه ونطق؛ أنقل إلى به داخل ذا.. هز راسه له ونطق؛ يبي له ساعه وشوي يا نهيان..
نهيان؛ خذ راحتك..أنا رايح مكان وجايك..
مشى نهيان  طالع من المحل ووقفه ثنيان قدام السياره ممسك يده؛ من وين جبته..
لف له نهيان ونطق؛ من اول معي.. أخذته بعد المحكمه..
ثنيان؛ وليه الخساير دامه موجود..
ركب نهيان سيارته ونطق؛ قديم ياخوك..
ثنيان؛ نهيان تستهبل على..
لف راسه له ونطق؛ ماعجبي ياخي.. ولا ودي يكون معك.. خذ لك جديد وخلاص..
سكت ثنيان ونطق بعد ثواني؛ أركب أركب..
مشى يركب بجانب اخوه.. حرك نهيان ل المكان الثاني وكان بيته إلى ب الرياض..
... بعد مده..
نزل هو وأخوه ونطق؛ ذا ياطويل العمر والسلامه بيتي.. ودك نسكن هنا ولا نهج روسيا..
نطق ثنيان بسرعه؛ هنا هنا..
مايقوي يترك وطنه.. الوطن إلى ولد فيه وعاش فيه ومن أصله ماوده يتركه ويبعد عنه .. هز راسه له ونطق؛ إلى ودك.. اخرج مفتاح الباب الأمامي وفتحه ودخل منه وثنيان وراه.. ناظر ل الحديقه الاماميه إلى ينظر لها اي شخص يدخل من الباب الحوش... ناظر الورد بكل أنواعه وألوانه..والمسبح بجانبهم بكم متر.. وثم ناظر ل نهيان إلى دخل من الباب الكبير ومشى وراه.. دخل وناظر ل الطابقين والأبواب الكثيره.. البيت كله كثير على شخصين مثلهم.. البيت يضم عائله كبيره..
أشر نهيان على الغرف كلها ونطق؛ أختار إلى ودك بها وخذها..
هز راسه له ومشى يجلس على الكنبه الموجوده قدامه.. وجلس جنبه نهيان ونطق ثنيان؛ الله يبارك لك به..
هز راسه ب لا ونطق؛ ذا بيتك..
انصدم من كلامه ونطق؛ وشو..
نهيان؛ وش وشو.. ذا البيت كله مسجل ب أسمك.. وسعته لك وكتبته ب أسمك انت.. ماهو حقي أنا..
هز راسه ب لا ونطق وهو ياشر بيده؛ ذا حقك ومن تعبك انا وش دخلي به..
نهيان؛ ذا نص يا خوي.. البيت ذا لك.. والشركه نص أسهمها لك..
الصدمات ورا بعض منه ونطق؛ شركه وشو..
نهيان؛ شركه عطور عالميه.. عندي بها فروع بكل مكان واكثر من فرع ب السعودية..
ثنيان؛ ماهو أنت طيار.. هز راسه ب ايه ونطق؛ ماخذ رخصه طيران لي..
ثنيان؛ وشوله تسوي ذا كله ياخوي..
نهيان؛ لأنك اخوي.. وما اظمن احد غيرك..
ثنيان؛ تكفى إلى سويته لي رجعه لك.. انا مالي الا ديرتي وشقاها..
نهيان؛ الديره تنساها.. تصير محامي مثل ماكان ودك..
ضحك بسخريه ونطق؛ خريج سجون يكون محامي.. أحلامك كبيره يا نهيان..
نهيان؛ من قال لك.. لا تحسب الدنيا صعبه أن مابه هنا اسوي لك مبنى محاماة ب روسيا..
أشر برأسه ب لا ونطق؛ كل إلى تسويه ماودي به.. خله لك..
نهيان بحده وماوده يصارخ عليه ويخرب كل شيء؛ وش يمنعك.. وشو إلى يمسكك.. تخاف ولا تتهرب..
ثنيان؛ لا خاف ولا تهرب.. ماودي بشوشرتك يا نهيان..
سكت نهيان يدري انه مارح يفهمه الحين وليه يسوي ذا كله لأجله..

...