صلو على الحبيب محمد صلى الله عليه وسلّم
وخلو تعليقات حلوه بين الفقرات واعجاب وتصويت للقصه
.....
يلا نبدو..
انا رغد 😊عمري 24سنه جايه من عيله بسيطه😇 زوز ولاد وبنت وحده تربيت ع اني الولد التالت مش مسترجله لا لا بس القيم والشهامه اللي عند التريس زرعها فيا بوي متفوقه في دراستي الحمدلله وتفوقت ع دفعتي تخصص جراحه عامه وهدا كله بفضل ربي وجهود عيلتي اللي وقفو معاي وساندوني اني متوسطه خوتي اكبر مني بدر وعمره 30سنه واصغر مني منير وعمره22 سنه امي وبوي احني عيله مترابطه بس بابا ما يحبش الازدحام والاختلاط بالناس عشان هكي عايشين في مزرعه بعيده عالناس نوعا ما مانمشوش للناس هلبا ولا يجونا زيارات اصلا الا قله قليله نهتمو بالارض مع بابا وزراعتها وفي عندنا فالمزرعه منحل و ابقار واغنام وابل ودجاج وارانب وكلاب حراسه وكلب اليف وارانب ومن الاشجار حدت ولا حرج وكان حوشنا كبير مقارنه بعددنا واني كنت نهتم بالحيوانات اللي في مزرعتنا وخاصه الخيل كانت نوع من هواياتي ركوبها وترويض الخيول المشاغبه وكنا من وقت للتاني نديرو مسابقات خيل مع خوتي اللي هما قراب مني وكنا اصحاب مش غر اخوه عادين
بدر مهندس معماري رافض فكرة الزواج كليا رغم اصرار ماما وبابا عليه تحسه متربي مرتين محترم جدا وقنوع
منير انسان تافه فالح في لبنات والسهر والدوه الفاضيه والقرايا اخر همه يقرا في كلية المحاسبه بس عنده العيله رقم واحد بابا يوسف عنده شركة استيراد وتصدير اغلب انتاج المزرعه نصدرو فيه يعني مش كبيره هلبا الشركه بس مشهوره وتعتبر معروفه لان منتجاتنا او انتاج مزرعتنا طبيعي بدون تدخل خارجي زي المحسنات او المتعارف بعبارت صوبات
امي مريم مهندسه زراعيه بس ماتخدمش فالدوله تقدر تقول افضل ربة منزل 🏠فالكون كله مهتمه بينا وبالحوش وبالمزرعه وجميله جدا وجمالنا خديناه من امي
في حوشنا حب وتفاهم صح يصير مشاكل بس عمره ما بابا قلل من ماما قدامنا او ماما طولت لسانها ع بابا كل شي يصير تندهم استراتيجية لحله ومايتحشمش بابا في انه يعبر عن حبه واحترامه لامي وهدا الشي قله وين نشوفوه في مجتمعنا تربينا ع ان كلمة الحق تنقال ولو ع رقبتك سيف وتعلمنا مهما كان حجم الغلط اللي درته او وقعت فيه الجأ لعيلتك تصلحه معاك ماتوتقش لا في صاحب ولا قريب لان حت لو صدفت ووقف معاك حيعايرك بيه يوم تاني نديرو اصدقاء مختلطين ومن الجنسين بس في حدود للدراسه ومش اللي يصير ينحكى حياتي الشخصيه صندوق مغلق خاص بيا مش كل شي ينعرض للعلن علاقتي بالانترنت علاقه مضحكه مانستخدمش فيه بشكل كبير يعني في وقت فراغي ومرات بالاشهر مانفتحش نت عادي
اسمي رغد طولي160 وزني 68بشرتي بيضه بس فيها شوية نمش عيوني لون العسل الصافي فمي مش صغير ولا كبير متوسط بس الشفه التحتيه اكبر شوي ومنفوخات نمتلك اصابع رفيعه وجميله فالعاده يقولولي اصحاب شركات الاكسسورز ناخدوك مودل عشان نعرضو لبضاعه ونفس الوقت تحسهم نولدو مع بركه فيهم سحر اي عمليه نخشها تنجح والحمدلله نسافر من وقت للتاني عشان نمط خدمتي بس مش بروحي اكيد يا يكون معاي بدر يا منير وفي بعض الاحيان بابا وماما اما في بلادي ف اني ملتزمه بمواعيد محدده ونطلع بروحي ونسوق فالسياره اكيد وسيارتي حديته اخر طراز مجهزه بكل الكماليات وفيها كميرة مراقبه تسجل 360درجه داخل وخارج السياره وهدا كان شرط من الوالد مانعرفش ليش بس وافقت فالاول كنت متقيده في حركاتي بس مع الوقت تأقلمت وعدرته لان نمشي في مسافات بعيده اكتر من 86كيلو ف قلت معليش يجوز للطمأنينه عليا وحت نسيت الفكره
حوشنا كبير كبير كبير ممكن يتسمى حت فيله عالكبر متعه ويتكون من تلاته طوابق بس مانستخدموش فيه كله برا من الحوش في مخازن لتخزين منتجات الارض والحيوانات وغيرها وغيراتها والمخازن كانت قريبه ع بعض بس في بينهم مسافات ويختلفو من الداخل في درجات الحراره متع التخزين عندنا غير الزرايب والحضاير في اسطبل والشي هدا كان مخلي الاقارب يتنمرو علينا يقولو جو متاعين الزرايب ويقولولي يع كيف تعيشي مع حيوانات وهما لو يعلمو ان حت فضلات الحيوانات اللي يهينو فاها تنباع وتجيب في فلوس وتدير في فوائد خير منهم ينتحرو😂 ما علينا المهم راهو الناس اللي تمتلك رزق مش شرط تكون مش متحضره او جاهله بطلو تفكير رجعي 🙂
حياتي كانت مليانه سلام لعند في يوم كنت توكه وكان يوم خدمتي في مستشفى بعيد مش ضروري نقول اسمه وكنت مفروض اني نبات غادي بس وقتها تعبت وبدلت مع الدكتور المناوب وشد مكاني واني بنروح قطعت مسافه كبيره وفالطريق نشوف في كلب مصاب بس ينبح والكلب نوعه غالي فتوقعت ان يكون يستنجد لصاحبه والدم يلي في رجله يأكد هالشي نزلت من السياره وشفته كان مضروب بطلقه في رجله قلبي نغزني وفكرت في اني نتراجع ركبت سيارتي بس لا اراديا لقيت روحي نتبع في الكلب لين وصلنا في استراحه وكان في واحد مصاب وملوح والكلب قعد ينبح عليع ويضرب ع صدره قربت منه لقيت انه مزال فيه نبض جبت علبة الاسعافات يلي فالسياره وحاولت اني ندير الاجراءات بدون لا ندكرها بس لحت نسيطر عالوضع كان متصاوب بطلقه في كتفه الايمن وطلقه في رجله اليمنى هدا غير الندوب والجروح والكدمات يلي في وجهه لا اراديا لقيت روحي نعالج اللي قدرت عليه وربي عطاني قدره كيف نجره السياره هوا وكلبه وكملت للحوش وصلت وناديت ع بابا وخوتي وساعدوني في تنزيله رغم تدمر منير اللي قعد يعيط بس بابا كان ساكت طلعنا الرصاص وعالجناه هوا وكلبه وكانو في داري وبعد لا كملت كان الفجر يأدن طلعت دوشت وخشيت الصاله صليت وكانت العيله مقعمزين يستنو فيا نتكلم في رايهم اني جبتلهم مصيبه لعندهم واني ما قدرتش ننكر بس واجب وناداني مش حندير روحي حوله
بابا: رغد تكلمي يا بنتي قولي يلي صار
كانو كلهم قاعدين عالصالون وكنت اني عالسجاده تحتهم
يابابا............ حكيت اللي صار بالحرف
ماما: مالك ومال المشاكل يا بنتي
بدر: يا اختي كنتي تقدري تتصلي بالشرطه باي حد ليش تجيبي فالمشاكل لينا
منير: ماهو هدي احيانا مخها يفصل وتبدا معاش تفهم خلاص
اني: منزله راسي لوطى ودموعي ع وشك ينزلو فكرت في هدا كله احني في منطقه شبه مقطوعه لو اتصلت بالشرطه من بنكلم وهوا حت الشرطه ماعندناش جيش موحد احتمال يطلع عدوهم ويصفوه لو كلمت الاسعاف لعند ما وصلو حيكون مان لو مشيت وسيبته كنت حنكون اني مدنبه وكاني اني يلي قتلته فكر معاي هي هدا انسب خيار لقيته يا بابا اني مستعده نتحمل العواقب اللي حتصير هدي خدمتي وما نقدرش ندير اني ما شفتش انسان محتاج مساعده ولو كنت مكاني حتدير يلي درته
بابا: انشالله خير يا بنتي نوضي ارقدي ومن هني لين يصحى يحلها الف حلال
منير: قصدك بترقد وفي حوشك اشبح يكون مجرم ولا مليشياوي
بابا: اسكت وخش دارك ماهمك في شي المواضيع هدي مش ليك
بدر: نوضي سلم اختي خشي داري وارقدي الليله مادوري شي اكيد تعبتي
اني: لا يا قلبي خليني هني مرتاحه واصلا مش جايني نوم عشان نرقد
ماما: جت حضنتني ربي يرضى عليك يا بنتي اني في ظهرك مهما صار ماتفكري في شي وكل واحد لداره خلاص مزال ساعتين او اوقل ونبدو يومنا طبيعي ويوصلو العمال والخدامه متع الارض طلعت للسياره نضفت الدم يلي فاها ومسحتها من اي اتر وخشيت داري فتحتها بناخد حوايج لقيته عارق ويقول في كلام مش مفهوم والكلب متعه يحاول يدير شي قربت منه حرارته مرتفعه خفت عليه جبت خافض ركبته وقعدت ندير في كمادات وكان شاد يدي بقوه وكأنه كان في حد بياخدني منه ويسحب فاها لعند صدره استغربت تصرفه وقلت هدا من تأتير الحراره بعد اكتر من ساعه نحيت التغديه من يده اسقرت حرارته شوي شفت رجل كلبه وكان لطيف معاي لو البشر تملك شويه من وفائهم بس فتحت دولابي طلعت لبسه ليا وطلعت وبوجهي لدار الضيوف عشان نغير وكانت الساعه ما تقارب 8:18 الصبح ف بدي لليوم طبيعي ونسمع في صوت تهاني تعطي في الاوامر للي معاها وتقسم فالشغل عليهم طلعتلها نظفو اللي تبوه بس داري ماحدش يتجرأ ويخشلها اليوم واللي يخالف يعرف انه حينفصل وانت. عارفين ان كميرات المراقبه في كل مكان مافيش داعي ندكركم وطلعت طبعا الحوش كله من برا كميرات بس داخل ما في شي خفت نسبب لعيلتي مشكله هما في غنا عنها ومش ناقصهم وزي ما تعرفو العاملات يمشو ولسانهم يمشو معاهم وهما مش هلبا اللي يخدمو في حوشنا تهاني وسميه وزينب تهاني وسميه كبار في العمر بس زينب ماتعجبش فيا هلبا عمرها في 35سنه تقريبا يهتمو بنطافة الحوش ومايجوش كل يوم تهاني بس معانا يوميا ونحبها لانها معاي من لما صرت عالدنيا طلعت قعمزت برا وراسي بيتفجر مش عارفه شن درت ولا شن خلاني نتعب فجأه ونروح ونلق الراجل هدا في طريقي ورغم اني كنت تعبانه ماحسيتش تعب وكملت تفكير لين قاطع تفكيري حطت يد ع كتفي.......
رايكم فالمقدمه.
