صلو عالنبي وادكرو الله وادكروني بدعوة خير وخلو تعليق فيه التاريخ والساعه يلي قريتو فيه الحلقه وكم خدت منكم وقت باش كملتوها.
فاتو الايام بعد هدي الليله هدوء عارم ايامي روتينيه خطبنا لبدر البنت يلي يباها طلعت اخت صاحبه وافقو العيله بعد اسبوع وخطبو نسرين رسمي ورفعنا بيان لبيلسان خطيبة بدر وجابو بيان كبير لنسرين وكانت فرحانه بطير وعلاقتي بحور عاديه واساسا بعد اخر موقف بيني وبينها وبعد كلام وائل علاها مافيش سبب نعاديها وهيا حبه الوحيد وزي ما قلت للمره المليون الحاجه يلي مش ليا مستحيل نستنزف فيها طاقه نحكو في اوقات معينه وكنت مقرره نكمل عرس منير ونسرين ونطلق على طول وتواصلت مع محاميه تجهزلي الاوراق واموري كانت واضحه فات ع زواجنا اكتر من خمسة اشهر تعودت ع وائل وعالعيله ودفاهم وحبيتهم كلهم لانهم حبوني وبالاخص عمي عمار كان يستنى فيا غر ننزل باش يلعب معاي ويغير جوه ونحبه زي بابا
بدر خوي يستنى في بيلسان تكمل قرايتها قبل لا يتزوجها اما منير ف مش طايقه صبر ف قرر يديرو العرس مشترك وزي كل مره بس هالمره العرس في حوش عمي عمار مش بابا نفس الطقوس والتحضيرات باختلاف ان الاتنين يحبو بعض وعاشقين لبعض
يوم التلات الصبح الساعه8:15
كنت راقده ع سريري خش وائل من برا
وائل: شن منوضك بكري
اني: ولا شي بس بننزل نجهز مع عمتي وامي امور الفطور مسكينات تعبو والعاملات لو ماتوقفش ع راسهم مايديروش كل شي في مكانه
وائل: اممم محلاك وانتي جديه تعرفي
اني: ماشي معاي الدور
وائل: اي دور
اني: دور الكنه الفالحه
نضت واني نضم في شعري كنت لابسه بيجامة كحله ستان خشيت الحمام ومستمره فالهدرزه معاه
اليوم الحمام متع اختك شن مقرر تهديها
لحقني وقف قدام الباب ويتفرج عليا تو نعطاها فلوس
واني نجلي في سنوني شفتله من فوق للوطه مضمضت فمي من المعجون توا باللهي هناك من اخته عروس يعطاها فلوس شن قالولك خوي ماعنداش منين يصرف متلا
وائل وهوا يشوفلي شن تبي نديرلها اقترحي عليا يا فالحه
توا يمشو هما للحمام وعماتك قالو هما يلي بيطيبو مقطعة اختك مش الشيف نعول معاهم شويه بعد الغدي والحوسه تعالى ارفعني تو نختار معاك ليها حاجة دهب نازكه علاها القيمه فالليل لما بتخش لحنتها اهديهالها راك غالي عندها
قرب وائل زي المتخلف باس ع راسي وطلع من الحمام قالي ربي يخليك لينا عمري ما حسيت بشعور العيله الا معاك لفيت شعري كعكه توضيت وصليت الصبح وغيرت لبست سروال جينز ازرق وسوريه بيضا ونزلت معاهم لبسو لبنات كلهم ومشو مع لعروسه وزعت المهام عالعاميلات واهتمينا بالضيوف وكان الجو ولا اروع روحت نوسه باللبس البودري ودارت جلسة التصوير مع خوي وكانو يجننو عين الله تحميهم وتحرسهم طلعت مع وائل ومشينا لمحل الدهب واول ما خشيت في حديده فيها قلبين ونجمه عيني جت علاها بس ماتكلمتش خدينا لنوسه تعليقه دهب تجنن تاخد العقل وطول الطريق واني نشوف لوائل كاني نودع فيه فالليل لبست قفطان باللون الاسود منفوخ وقصير وبدون ظهر وشعري درته بالفير لبست معاه ابيض مش دهب ومكياجي كالعاده درته بروحي ولا اقدعها مزينه تعرف اطلعني زي مانطلع في روحي ولبست معاه كعب عالي باللون الفضي ورقصت مع لبنات ورقصت مع حور يلي بدورها تتقرب مني وبجد للمره الالف بنقول متغيره وكانها مش هيا جتني العامله تقول ان وائل فالمطبخ يبيني
مشيت وراها طلعت لقيته مقعمز ع حوض الزريعه او الشجره وصلت لعنده نعم
وائل: متنح فيا نعم
اني: مش تبيني. منادي عليا
وائل: تصدقي نسيت شن نبي
اني: ضحكت لو ماعندك شي بنخش
وائل: وقف تعالي بنقولك شي
اني: شن هوا الشي
وائل: حضني للامانه جي في بالي نشوفك بس حضني
اني حبيت حضنه اساسا ادمنته في نص الحضن قالي طالعه طرف الله يعين الناضرين بس
رديت عليه واني نضحك وقلبي بيقلع اصلا اني ديما طرف
عضني من كتفي ومشي للرجاله ورجعت للبنات
جي وقت الحنه والحنايات والكلام هدا وحده من كناين عمته
غفران: يا رغد شني مافيش حويجه فالطريق
اني: حويجة شني
غفران: بيبي عويل ليك قريب سته شهور مهناك شي
اني: انتو هكي عادي يعني
غفران: كيف عادي
اني: تدخلو في حجات ماليكمش فاها
غفران تحشمت: لا والله بس حابه نطمن
اني: اطمني سليمه مليون فالميه وائل راجل عشره مليون فالميه بس مزال نبو نستمتعو بحياتنا بكري ع دوشة الصغار
عمت وائل: حق يابنتي خاصه انتي تخدمي والله صاعب الصغار مع خدمه عيشي حياتك قاعده صغيره
اني: الوقت معاي صح نستأدنكم تو نجي
ركبت لداري غيرت حوايجي لبست بيجامه شورط وتيشرت لفيت شعري كعكه وخشيت لسريري ودرت نقالي 🔇 ونحاول نرقد مليت من الناس وكلامهم اقسم بالله كل مره تطلعلي وحده ليش الجو هدا اني ماندخل في حيات حد ليش يدخلو في حياتي نقوللهم مصار بينا شي نقوللهم نحبه وهوا يحب غيري نقوللهم قدامه بديت ماعنديش سلطه حت ع روحي شن هوا يلي بنحكيه بالضبط طق الباب درت روحي راقده
حور: رغد عادي نخش اني حور
اني: خشي حور
خشت وقعمزت عالسرير بجنبي نضت اتكيت ع ظهر السرير
حور: اتضايقتي من كلام غفران صح
اني: عادي
حور: لازم ماتكوني وقحه باش يوقفو عند حدهم
اني: وانتي ليش جايه
حور: باش نوقف بجنبك لاني عالغالب ديما كنت نبكي بروحي وماحدش كان يمسح دمعتي المهم خليك مني توا نوضي انزلي معاي باش تحني
اني: تحكي من جدك انتي
حور: عمري ما ريت وائل متريح ومبسوط زي توا وعيلته اجتمعو علي حبك وحت اني رغم يلي صار بينا والله غيرتيني وحبيتك وانتي صاحبتي الوحيده من يوم جابتني امي لولا انك ضربتيني ونصحتيني كانو الناس يكرهو حت يقعدو معاي بس توا تنوض وحده تقعد وحده
اني حضنتها ربي يهديك حور صدقيني كل شي حيتصلح مسألة وقت بس
حور شدتني تنوض فيا نوضي ع فكره راجلك لوطى هوا وخوته ومعششين عليهم زي الدبان
لبست بيجامة الحنه متع عرسي ونزلت معاها واغلب يلي شافونا نازلين جميع نضحكو جتهم صدمه تلاتية الابعاد عادي يعني الناس يتغيرو وهيا تغيرت وربي هداها وصلنا للمكان المخصص للحنه وبالفعل كلهم يحكو مع لولاد ودايرين بيهم جيت سحبت وائل من يده معليشي هدا حصتي ماتقربوشي ابعدو عليه هوينا عندكم مراد وليد هدرزو معاهم يمشي وائل يتحمس يقيمني في حضنه ويقوللهم تصبحو علي خير ويرجع بيا للدار بين عياطات البنات وضحك خوته يلي هربو بعد كلام وائل
اني: مجنون انت هبلت
وائل: مش اني حصتك
اني: اهاا اي غر قدام اقاربك بس باش ماتكترش الدوه
نزلني وائل خلاص
قعمز بيا عالسرير واني مازلت في حضنه قالي: رغد معاش تديري روحك قويه قدامي نعرف شن يلي قاعد يصير ونعرف انك كل مره تسمعي حد يحكي عليك بطريقه شكل حكتلي سماح يلي صار قبل شويه واني اسف كان يتكلم ويمسح ع خدودي بيديه اتدكرت انهم اخر ايام ليا معاه هربت دمعه من بين عيوني عجزت اني ندسها ونسيطر علاها باس ع راسي معاش من ينزل دمعتك واني راجلك ضحكت في عز بكيتي ودفنت راسي في صدره وسكرت عيوني نتنفس في ريحته وهوا يلعب بشعراتي وسافرت مانعرفش لوين بس سافرت بين يديه نضت لقيت روحي راقده في حضنه وبيني وبينه صفر مسافه قعدت نتأمل في وجهه وجماله تأكدت مليون مره انه مزال راقد قربت بشويه لشفايفه خنبت بوسه صغيره منهم سطحيه وهربت نجري للحمام طلعت لبست قفطان احمر ربع كم وطويل للكاحل معاه شبشب عالي شويه بقدم لونه شفاف وخليت شعري ملفوف بس درتله بروش من الوسط لان حتكون زحمه لوطه ومكيجت مكياج يليق بالوقت يلي اني فيه وحطيت روج احمر فاقع ورشيت عطري اللي مستحيل يتغير وخطرت عبالي حاجه قربت من وائل وهوا راقد طبعتله من روجي ع رقبته وطلعت وسكرت الدار وراي نزلت والكل يصبح وعمتي عجيليه وامي جنب بعض كانو يشرفو عالشيفيه اللي يديرو في لغدي ونسرين تتفرج ع حنتها اللي الله يبارك سوده فحمه وسماح معاها في كل شي حلو لما يكون عندك وخيه تم الغدي بعد العصر من كترة الزحمه وقرو الفاتحه وجي الليل والقنديل وكان في عزايز زمنيات مع الفرقه يلي جايبينها والزمزامات يبرمو فيه ويغنو عليه في (بوطويل)
طبعا اليوم هدا اني لبست الصدره واولي عرس والكل طاير بيا اكتر حت من لعروس وخشو لولاد وبوهم وصورنا جميع صور عائليه وكل يوم اني نطلع احلا من يلي قبله طلعنا بالقنديل الصدارات والعزابيات والمتزوجات وكلنا طلعنا ندربكو ونغنو عليه وكنت اني يلي شاداته لان في نضرهم اني اكتر وحده سعدها قوي ويباها تجي زيني واني شاده القنديل والع والزمزامات من جيهه والاولاد يلي معاهم الزكره من جيهه تانيه ونشوف لوائل من بعيد ونبتسم وهوا يشوفلي ويبتسم في وحده مانعرفش من هيا تدفني ولاني لابسه عالي في رجليا نميل وع شوي طحت ماطحتش بس في شظية نار طاحت ع رداي ولان لحرير فيسع يولع ركبت فيه النار بسرعه وماعرفتش نتصرف لان قنديل البنت مش باهي ينطفى ف شاده بيد ونطفي بالتانيه وكلهم يتفرجو مافيش وحده قربت الا حور يلي اني نصدمت فاها اصلا طفينا النار يلي فيا بيديا اني وحور وصل فينا وائل ونقوله اني بخير ما تخافش اطمن هوا مش داري بيا اصلا هوا شد يدين حور يشوف فيهم قدام الكل اني هني خلاص عطيت القنديل لسماح وخديت بعضي وخشيت الفيلا شدتني ماما وعمتي عجيليه وهما يقولو عوينه وطارت سيبتهم وخشيت لداري وبصدرتي وبكل مافيا تحت الدوش ومصدومه يعطيني امل ويرجع ياخده هما يومين بس مزالو مايقدرش يتحملهم معقوله بعد ساعتين واني تحت الميه نسمع في نقالي يتصل طلعت بميتي ونتفاجئ بوائل عالسرير مقعمز شديت نقالي وكانت ماما رديت علاها وقالتلي هي بنيتي انزلي الكل بيطمن عليك رديت علاها باهي
وائل: مصدوم في منظري رغد خيرك
اني: ابعد عليا كرهتني في روحي اقسم بالله كرهتني عيشتي وحياتي كنت نبررلك بحور وانها تضحك عليك وتستغل فيك بس توا البنت تغيرت معاش نقدر نضحك ع روحي البنت مادنبها شي انت ااخيانه في طبعك في تصرفاتك في قلبك وفي عقلك وبما ان حور في قلبك ما يحقلكش تقرب مني لا بلمسه لا بحضن ولا حت كلمه خديت قفطان اسود طويل ونص كم فيه حزام دهبي من الدولاب اول شي جي قدامي وخديت ملابس داخليه وخشيت الحمام نحيت كل شي بعشوائيه حت الدهب يلي كنت لابساته خليته فالحمام كانت فخدتي محروقه حرق عميق شويه والسروال متع الصدره زي النايبو ف لما نحيته تنحى بجلدتي ويدي حكم الكف كله ماشي حروق داويت روحي فخدي ويدي وجففت شعري وطلعت تحمدولي عالسلامه واني شكرت حور عالمساعده بعد ما عرفت ان وائل رفعها للمصحه داواها ورجع ادكر عنده مرا
اني: قالي تعالي قتله مش مستاهله كلها حرق بسيط
استادنتهم وطلعت لبابا وخوتي وعمي وسلافي كانو يستنو فيا عشان يطمنو عليا هدرزت معاهم شويه وتغير جوي وضحكت
وليد: بسوط واطي الليله في سهريه بالتريس لقطي بنات العيله وجيبيهم خلي بالك نتزوزو حت احني قالها بطريقه اضحك
اني تمام
بدر: زعما نحصلو حت احني
اني: الو بيلسان راجلك خاين
منير ومراد ماتو عليه ضحك جت الساعه 2:30طلعت اني ولبنات وحور للجنان كانو لولاد وفيهم ولاد خالاتي وعماتي وخوالهم وعمامهم مخلطه بالليبي طبعا كنا لابسين حجابنا واني كنت لابسه سروال واسع ابيض وسوريه كحله وشاح ابيض وقعمزنا بدو يتعرفو ويهدرزو هدا طقس عندهم وديما بعد كل عرس يصير يخطبو بعدهم اقل شي اربعه خمسه ولاد من عيلة لعريس والعروس المهم كان سيد الحفله وليد يلي يغني ويعزف عالقيتار كان يغني في اغنية جورج وسوف سبت كل الناس على شانو... على شانو تحملت اللوم
ازاي بعد ده كله يسبني.. انا مارتحتش بعدك يوم
ولما شفت لوائل يلي مقعمز بجنبي لقيته يشوف لحور يلي مربوطين يداها وتبتسمله
كمل وليد وصفقله الكل
منير: في معانا وحده تعزف حلو وصوتها احلا منك اقل شي
الكل يحساب نسرين
بدر: اختك يدها ماتقدرش تعزف
اني: عادي هات القيتار
بمجرد مابديت نعزف اللحن كان حلو وحزين ويخش للقلب وكنت نفكر شن بنغني الين ما بروحه لكلام بدي يطلع
يامن هواه اعزه وادلني...
كيف السبيل الى وصالك دُلني😔
انت اللذي حلفتني وحلفت لي..
وحلفت انك لا تخون فخنتني💔
وحلفت انك لا تمي مع الهوى..
اين اليمين واين ما عاهدتني 🥺
تركتني حيران صبا نائما...
ارعى النجوم وانت في عيشٍ هنيء🤫
