صلي على الحبيب المصطفى محمد رسول الله صلى الله عليه وسلم.
صوتو للقصه وحطو تعليق حلو بين الفقرات
......
يلا نبدو
نضت وكانت الساعه 4:20
هدوء ولا صوت وكان الوضع غريب بعض الشيء خديت نقالي بنشوف الساعه لقيت رساله
(اني عمري ما فكرت نطعن حد فالظهر حت لو كان عدوي يا بالك شخص ليه جميل عليا وانقدني من الموت مانيش لايمك ع ولا حرف قلتيه لومي كله ع انك مش راضيه تسمعي مني اني جيتي كانت بس عشان نحكي معاك ورتبت مع عبيد الطلعه هدي لان عارفك مش رح ترضي تشوفيني برا يعلم الله اني موقف عشانك مليون موضوع لو ما تبيش تسمعي اللي صار تحكيلي قوليهالي من الصفحه ميه وخليني نتوكل لان ماعندي شي هني قاعد عشانه...)
عرفت انها من وائل خديت فوطي وحطيت نقالي فالشحن وطلعت للحمام واني طالعه سمعت وي صوت بكي في دار انوار بحكم انها مش بعيده ع دارنا وقريبه عالحمام والباب كان مش مسكر كويس ف الصوت مسموع قربت من الباب
هاشم: لو ما جيتيش وقعمزتي جنبي وقعدتي تهدرزي صدقيني كل يلي هني حيشوفه محمد اللي داير روحه راجل
فاطمه: حسبي الله فيك شن مزال تبي مني دمرتني خلي خوي في حاله
هاشم: كرهتك انتي ونقانك ودموعك هدا يلي عندي وكان يلعب بنقاله وفاطمه شاده في رجله تترجى فيه درت صوت ع اساس اني جايه طقيت عالباب ردت فاطمه: نعم
اني: فاطمه شن ديري هني وين انوار
فاطمه: مشت الكوجينه تو تجي
شفت بعيوني هاشم لابد ورا الباب طلعت وخشيت للحمام وخليتها وبمجرد ما خشيت الحمام سمت صوت الدار تسكر اااه كيف الواحد حقير هكي شن في بينهم لازم نعرف ولازم نعرف شن شاد علاها باش دالها هكي توضيت وطلعت صليت صبح وظهر مع بعض😂 ولبست وشاح وماغيرتش حوايجي وطلعت
اني: صباح الخير
جدي: صباح القايله شمستك عاليه
اني: سهرت امبارح يا جدي ومتغير عليا لمكان ماقدرتش نرقد ومشيت جنب امي وقعمزت ماهدرزتش ع ولا ولد من العيله بس نشوف ونفكر شن ممكن يكون صاير او كيف بنوصل لنقال هاشم وكيف بنطلع فاطمه من المشكله وليش داهم في محمد اااه شن دخلي اني يا لاهي في هم الناس طلعت مني بصوت عالي وااااك بنهبل اني بنختش
خالاتي ونساوين حوالي والبنات قعدو يضحكو
سماح: رغد التفكير بيهبلك رسمي حبيبتي هوناها تهون
اني: تسلميلي ياقلبي انشالله خير
وهني عرفت ان حت سماح عارفه القصه
ماما نبي نوض ناكل جعانه
ماما: غداك خليناهولك فالكوجينه فالكوشه مسلفر
اني: مانسيتونيش اليوم😂😂
ماما: تعلمت خلاص 😂😂
خشيت خليتهم يهدرزو وجوهم حلو طلعت الصونيه لقيت فيها عصبان حطيته بدون لا نسخنه وفتحت التلاجه ونزلت ندور في 🍋ليمونه لقيتها وين جيت واقفه نضربت في باب الفريز جت في جبهتي...
اسف وربي ماتوقعت توقفي فجأه
اني: حصل خيرر ولما كملتها الكلمه لفيت وائل وااه وائل ريحته ولا رموشه ولا عيونه ولا طوله يلي خلاني رافعه راسي فوق باش نتفرج ولا شعره يلي واضح انه مشفشف مش متمشط من لما جي لوهله نسيت نتنفس لين شرقت بديت نكح ابتسم واعطاني ميه يلي في يده شربت منها ورديتهاله شكرا😊
ضحك عليا وقالي
وائل: نضت قالولي خش لرغد تغديك معاها كان مافيهاش ازعاج وكليني معاك لو سمحتي
اني: ضحكت ع مصطلح وكليني معاك كان بتاكل مصقع تعالى بتقولي سخني ودوشه خود بروحك من الاخير
وائل: بايره فوق منها الله الله
اني: بايره لروحي وفالحه لروحي شن عندك فيا
وائل: بصاره خيرك عدائيه هكي
اني: جعانه بناكل ما تسكرليش نيتي ع رحمة ولديك
وائل: خدي كرسي جنبي وقعمزنا عالبار نعصر فالليم وسط المصران وناكل وهوا لين يتفحص شن فيه وياكل بكاشيك
اني: ع فكره جرب تاكل بيديك احلا راهو
وائل: اني اصلا ما نحبش العصبان غر من الجوع
لكن اهو تو نجرب قرب عالمصران يلي في يدي وكلي منه امممم بجد طلع طعمته مليحه
اني: شخيف معاش تاكل من حاجتي كول من قدامك شن هدا تقول تقرا ضف اول
وائل: توا بجد باهي
اني: اي
وائل: بعتلك رساله شن ردك علاها
اني: تمام احكي اخو نسمع فيك
وائل: رغد مش هني مانبي حد يسمع شي حت بالصدفه بعد لعشي مكان امبارح نهدرز عليك ولو تبي معانا عبيد باش ماتخنسيش
اني: حت لو مش عبيد انت خاكب مافيكش طميعه ولا شي ينفهم غلط كملت المصران يلي في يدي ونضت غسلت وطلعت قلت بنطلع لماما لان بجد ضاربني الخمول وقالقه مانعرفش من شنو غيرت حوايجي لبست سروال اسود وسوريه بيضه وقولف فوق من السوريه باللون الاسود بس قصير ولبست وشاح خفيف وسبيدرو ابيض وخديت نقالي وطلعت ولعت السياره نستنى فاها تسخن بنطلع فاتت اول عشره دقايق واني نسمع في الاغاني ونفكر الا شويه وركب بجنبي وائل
اني: هي وين ماشي
وائل: مش بتطلعي وبدل لا نولع سيارتي خلي نفوت معاك
اني: مانركبش في غرباء انزل
وائل: مش غريب اني
اني: من وين المعرفه انشالله
وائل: يا ودي ماتعرفينيش حدها اول صيدليه نبي ناخد مسكن لخوي اللي اعطيتيهوله امبارح مش قوي قعد الليل كله يتوجع
اني: ماكانش في بالي مكان معين بنمشيله فرحت لما قال صيدليه المهم مشوار احم باه انزل تو نجيبه اني
وائل: يا ودي شكله سواقتك تهبيك هدا باش خايفه نركب معاك
ماكملش كلامه وفتح الباب وخرت بالسياره وطلعت فتحت الجي بي اس ع اقرب صيدليه طلعت بعد 20كيلو
اني: لو الواحد يصير معاه شي مفاجئ في هالمكان المقطوع يبي اقل شي ساعه باش يوصل اقرب مستشفى 🏥يعني ماوصل لين مات شن هالمكان هدا
وائل: ع اساس حوشكم اقرب للمصحات ماهو نفس النظام
اني: حوشنا فيه دكتوره🙂
وائل: اي نسيت
اني: انت ديما تنسى اساسا
وائل: توا بجد باهي ليش متأكده ان اني يلي حرقت المزرعه متعكم
اني: شن رفعك لحوشنا هديكا الليله
وائل: حور قالت انها شافاتك فالعرس وانك عزمتاها وع اساس روحتي قبلها باش تتعرفو ولما رفعتها ونزلت كلمت يلي عالباب قالولي مزال ما روحتو ركبنا وروحنا
اني: والسياره بنفس الرقم لمن
وائل: هدي سيارة حور واني سقتها سيارتي اهيا يلي جيتكم فاها مانحبش نطلع باها لاماكن عامه هلبا واصلا تمت بنزينتها بعد مسافه قصيره واضطريت نكلم حد يجي يروح بينا
اني: وما فكرتش كيف حور تعرفت عليا كيف عرفتني رغم اني للان ماكنتش نعرف انك ولد منو
وائل: سكت ولا حرف ما سألتش
اني: حلو تبي تعرف كيف عرفتني
وائل: ياريت
اني: بنتكلم وتأكد ان كل كلمه حنقولها صارت لا تجي تسألني بعدها ولا تشهد عليا
وائل: تمام
اني: يوم خديتك من الاستراحه للحوش ما كنتش نعرفك ولا عمري ريتك وكنت في دمك غارق وحت كلبك مصاب خديت عالجتكم قعدت مده طويله ما مشيتش المستشفي بعد مده قررت نرجع نمارس شغلي وللصدفه كان تالت حاله تجيني حور ومعاها راجل هوا يسأل عليك وان جابو صورتي من الكام متع المراقبه يلي عندكم وان اني وين درتك وقتها انت كنت قاعد في حوشنا وقلتلهم بالحرف الواحد انك متت وحولتك المستشفى وفتحت محظر عند الضابط المسؤول ع قسم الجرائم لما الراجل قاللها حور عرفتها حبيبتك حت من غير ما تقولي انت او عبيد لانك لما كنت مصاب تنادي غر باسمها بعدها بفتره انت مشيت وكنت نحساب الامور تمت نعزمت ع عرس عبيد ولما مشيت نسمع في حبيبتك تتكلم.............................................وهدا كل يلي صار من وين بتجيها العزومه
وائل:............
اني: درست سيارتي انزل
وائل:بصدمه شنو
اني:وصلنا خيرك مش تبي صيدليه ودرت حركه براسي
وائل نزل ومقالش ولا حرف غاب خمسه دقايق وجي ركب: رغد
اني: نعم
وائل: انزلي عطيني مكانك
اني: اسف مافيش مكاني
وائل: بالتريس انزلي عجبتني سيارتك بنجربها
اني: سيارت بابا هدي اني سيارتي مش هكي
وائل: ابتسم انزلي
نزلت وغيرت قعمزت في الكرسي يلي جنب السواق لقيته كمل قدام شويه ودرس نزل ربع ساعه وجي جايب اكياس كبار في يده حطهم فالخلف ورجع ركب الغريب يلي ضحكني انه يتعامل مع السياره كأنها ليه لكن اكتشفت انك لو تبي تستمتع بالطريق ماتسوقش خليك يمين وتفرج روعة بلادي وجمالها شي تاني لو اني رسامه كنت حنرسم كل منظر زهي في عيني وشفت ع يساري كتلة جمال تتحرك يا ناس سوريته البيضه يلي مفتوحه من اول زرين ولا تنية كمه ولا حركة اصابعه يلي تعزف عالستيرسو مع اللحن ولا تمشيطة شعره الخطيره اححا نبيش نحكيلكم ع رموشه ولحيته لخفيفه وصلت لشفايفه بلعت ريقي خطرت ع بالي حنان لما تتغزل في راجلها ضحكت قلت خيرني هبلت زيها
وائل: مزال ما شبعتيش
اني: نعم
وائل: كان بتتفرجي تاني عادي ندرس وخودي راحتك
اني: ريت هالجمال كله ع بعضه شوية شعر ولحيه مصدق روحك
وائل: ضحك الليله بعد لعشي بنسهر شويه ومروح اني والعيله
اني: سلامتك
عليت فالاغاني واﻧسجمت في شباكي نتفرج عالطريق وصلنا ونزلت مشيت جيهة ماما والبنات
كانت الساعه 6يادوبك الجو بادي يتغير
ماما: وين مشيتي
اني: طلعت فالسياره مشوار الصيدلية وجيت
ماما: لما قلتي بنطلع في بالي انك ع رجليك
اني: لا عارفه اني مانتحملش نقعد في نفس المكان وقت طويل
ماما: تمام
انوار: وائل كان معاك قالتها بغل ونوع من الكره
اني: اي طلعت ومشي معاي للصيدليه عشان جبنا علاج لخوه
سماح: ربي يفتح عليك وشافت لامي سعدودك يا خالتي عندك دكتوره زي رغوده تهتم بيك لولاها كان وخيي ياعالم كيف صار فيه
قعدت تسلك باش طلعتني من اسئلة ماما شفت لانوار وقربتلها كانت مقعمزه جنب البنات في نفس لمكان بس بعيده ع امي شويه
اني: اني رغد مش فاطمه نصيحتي ليك ماتحطيش راسك من راسي لان ورب العباد يا انوار مانخلي في حياتك نور يشعل لو نحطك في راسي وبعدين خليك شطوره واسمعي كلام هاشم خوك احسن ما يعرف هاشم شجرة الخروع الساعه اربعه امبارح شن صار تحتها وقتها مش رح يحب
انوار: خافت وبدت حمرا والبنات قعدو يشوفولها مكانش قصدي شي بس ريتكم خاشين مع بعض
اني: خليك شاطره وابعدي ع طريقي قربت ع ودنها لان عندي صورات مهمات في نقالي كدليل
شفت فاطمه تشوفلي وفيها نوع من الغضب والحزن ومكس مشاعر
فتتهم ومشيت جنب جدي وكانت جنبه جداي ويحكو ع مواضيع ارض واقارب وكدا بس قعدت جنبهم ونتفرج عالاولاد يلي يولعو فالنار ونشوف لوائل يلي ينظف فالحوت يلي شراه
جداي: شوف يا حاج خو سماح قداش ناشط الله يبارك
جدي: اي والله لكن تعب بينظف هدا كله بروحه
جداي: قالو هوا بيدير لعشي وبيروحو امه بكري تهدرز
جدي: خيرهم علاش بيروحو في حد ضايقهم
جداي: لا والله بس قالو عندهم شغل ومايقدروش يقعدو اكتر
جدي: سلامتهم
جداي: نوضي سلم بنتي قولي لصغار خالك يساعدوه
اني: حاضر يا جداي
نضت خشيت للخيمه كان فاها كرسي ومفرشينها نجع تقول خاشه حوش بدوي السلام عليكم
الكل: وعليكم السلام ورحمة الله وبركاته
اني: قالتلكم جداي نوضو ساعدو وائل في تنضيف الحوت وساعدو اسلام ومعاد في النار وديرو معاهم فايده هما عالقين في كل شي
محمد: حاضر اهو طالعين
اني: يحظرلك الخير وطلعت في اللفه يلي بنرجع باها قعدت نسمع في الاولاد يحكو عليا
احمد: يا راجل البنت وربي الا قدعه وماتخنسش كان بناتنا ماحدش يخش للخيمه
محمد: هكي الصح مش متعودات يخشو مكان معبي ولاد
اصيل: شن خاشه لولاد شارعها هيا تي ماهو صغار خوالها
احمد: وربي حق يا اصيل فوته المتخلف هدا
اصيل: انت لو تعرف باها كيف كان ماتتجرأش تفكر تفكير سلبي
محمد: ما فكرت في شي لكن في منكم روسهم خبت لو تعرفه حت قباله ماتقابلكمش
احمد: لما تكون بنت تراس زي باها حطها بين سته دكوره تلقاها السابع
اصيل: علي ما يحكو بوي وعمامي وجدي زمان باها قبل لا يحول ويعزل روحه كان شخص كلمته ما تتناش واللي يقوله تم وكانو يجوه ناس من بعيد يحللهم في امورهم ومش بس هكي اللي عنده مشاكل فالورت والاراضي ما يمشيش لمحاكم الدوله يجيه لانه كلامه اعلا من الدوله يتبع النظام السابق وفي مره بوي كان حاضر هوا وجدي جوه اتنين خوت يتعاركو عالارض واحد يبي يبيع والتاني ساكن فاها ما يبيش يطلع قاله شن المشكله واحد يبي يطلع من البلاد بيغير مكانه والتاني ماعنداش وين يمشي شري الارض وقاله عيش فاها واهتم باها وعطاهم فلوس قعد الراجل فالارض قريب 18سنه بعد بني وكون مستقبله سلمهاله
توا انت غر ما شفتش ولاده تي عز التربيه
عبيد: انت غر هدا لو تشوف راجل عمتك يا محمد اوقف قدامه بس اللي داسه في بطنك يزبطه
احمد: باه ليش سكر حوشه ومشي سكن في مزرعه
عبيد: قالك بعد طاحت الدوله كترت عليه الدوه وطالبوه هلبا ناس ينظم ليهم هوا فضل يكون عيله بعيد عالدم والخنبه والقتل وما يبيش يخلط رزقه برزق حرام وللعلم يخدم راهو بعرقه مش تمشيط ودواوي فاضيه بوها يا محمد من نعم الناس انت تجرأ واغلط مع رغد وشوف كيف حتمسح بكرامتك الاراضي
اصيل: حت عمتي ديما تقول اني عندي تلاته ولاد مش اتنين
محمد طلع ولقاني في وجهه اني مش..
خليته ورجعت مكاني جنب جدي وجداي وبجد محمد ليش عدائي معاي واني يلي دافعت عليه من الاول مشيت جنب امي وقعدت في حضنها امي كانت قاعده عالصالون تحت المظله واني قعدت عالارض نحيت سبيدروي وشخشيري حطيتهم بعيد علي القعده وحطيت راسي ع فخد امي
ماما: خيرك بنتي
اني: ولا شي بس اتصلو من المستشفى
ماما: مش واخده اجازه ليش يتصلو
اني: في عمليه لازم نحظرها ليا هلبا نستنا فاها
ماما: باه خلاص نروح معاك
اني: لالا نحضر العمليه ونكملها يومين بالكتير ونرجع هني وبالك يجو معاي خوتي
ماما: تمام
خالاتي:قعدو يدعولي ربي يوفقك ويكون معاك
فاطمه: بجد بنفقدك
اني: هما يومين الله غالب الاوقات الحلوه ماتدومش
فات الوقت عادي بين هدرزه وضحك وكنت حاضره عالعشي معاهم
معاويه: هدي اول وجبه تاكلاها معانا
مروان: ديرولها بوصفر
اسلام: استلموك يا رغد
اني: عادي اصلا زي تكلمت زي لا فالنهايه بنطلع ماننفعش لهدا خليهم عادي مكانش عندي نيه ناكل بكل كل مره الاولاد يديرو سليطه ع حد استنيت دقايق
اني: دايمه
خالي نجاة: خيرك يابنتي صونيتك زي ما هيا مش تحبي الحوت
اني: الحمدلله والله شبعانه وبنخش نرقد
خالي عبدالعزيز: من توا يا بنتي
اني: بنوض بكري خالي عندي عمليه العشره يادوبك نلحق علاها
عدنان: خليك شويه ولاحقه عالنوم بتقنعيني ان لو رقدتي متاخر مش حتنوضي بكري
اني: لا بس عارف مسافة طريق وهكي
مروان: انتي بتقنعيني ان بسواقتك بتهمك مسافه للطريق او شي تي انتي ممكن تبي من هني للمستفى ساعه ونص بالكتير
بنرد تكلم وائل: صلي عالنبي يا راجل تو غدوه تقلبها لا سمح الله
ماما:عليه افضل الصلاة والسلام بعيد الشر ع بنيتي
ضحكو كلهم وتكلمت خالتي سهام
سهام: هدي بلعاني بتهرب من غسيل لماعين غر انتو ماتعرفوش
اني: والله لما نغسلهم اني لماعين اصلا اخر همي
وتروني دايريني في نصهم وكل واحد كلمه من تركينه حت لو بصاره بس مش كلهم نفس الشي مش كلهم بصاره في يلي يقول في كلام حق قعمزت مكاني تمو ماكله وكل وحده شدت مكان وقعدو يهدرزو هدرزه ودوه ونصها قرمه في خلق ربي بديت في تنظيف الصحون في اكياس نلوح فالفضلات وندخل للمطبخ بروحي والكاسات ومشيت لطاولت الرجاله وناض وائل ومروان ومعاد وعبيد ومعاويه وسندس وفاطمه يساعدو فيا نظفنا برا وخشيت داخل بنغسل الماعين قمت كمامي وبديت فيهم جلي وتنظيف ومع هدرزتهم جنبي تغير مزاجي
سندس: رغد انتي انسانه مزاجيه وربي
اسلام: زي التغطيه جوها يمشي ويجي
اني: مش مزاحيه بس مرات تكوني ماشيه بالنيه مع ناس معبيين خبت ف يشوفو عفويتك قلة ادب
وائل: فالحاله هدي اصدميهم بقلة ادبك باش يتوبو عاللي يديرو فيه
اني: مرات صح
كان يضحك تاني سرواله البيج ومروان مرقي سرواله الاسود وشادين يغسلو معاي وينضفو
ومعاويه وسندس يمسحو فالارضيه وفاطمه ترجع فالماعين في مكانهم وعبيد واسلام موفرين الدعم والتشجيع 😂😂
كملنا غسيل لماعين وطلعو برا واني خشيت غيرت حوايجي وخشيت سريري
جتني رساله (حطي يدك تحت وسادتك)
بسرعه حطيتها لقيتها شكلاطه
رديت(الشكلاطه تدير تسوس للاسنان ومضره بالصحه)
..(اممم سبب مقنع من دكتوره ممله)
اني(بما اني ممله برا لحورك فاها جو اكتر) سكرت نقالي ورقدت.......
نضت الساعه 5:30 دوشت وصليت حطيت ميك اب خفيف ولبست سروال جلد اسود وتيشرت نص كم ابيض دخلته فالسروال وفوقه كاب اسود لفوق الركبه وخديت وشاح ابيض ومعاه سبيدروي خديته في يدي خليت زوز توت مالبستهمش ع سرير فاطمه ولميت بضاعتي في شنطتي ونقالي وشحني درت دورتي عالمرايا ولما طلعت كانت الساعه6:40مشيت لسيارتي حطيت لبضاعه حسيت بعطش خشيت بنشرب كيف شديت الشيشه
محمد: اسف مش قاصد شي بدوة امس
اني: اسفك غير مقبول
محمد: اني مش قصدي انك ماتنفعيش اني...
اني: قبل لا تكمل وتبرر اللي قصدك قصدك لكن حطها في راسك اللي انت بتقوله ع اي بنت حينقال ع خواتك في وقت من الاوقات وهكي الدنيا يا داير يا لاقي طلعت وخليته واضح عليه مش راقد من الهالات اللي تحت عيونه محمد مايقلش جمال ع وائل ولكن شخصيته مافهمتهاش الحصيلو اقارب ماما كلهم طروف😂لكن خفة الدم واخدها مروان ومعاويه فقط😂والبنات سندس وتسنيم واماني الباقي دمهم رزين نوعا ما
كيف بنركب فالسياره لقيت وائل وخوه وعيلته كيف طالعين من الاستراحه وطلعت معاهم ماما وخالتي نجاة يسقدو فيهم وسماح وعبيد طالعين معاهم جو جيهتي
ماما: هكي بنتي بتمشي قبل لا تشوفيني
اني: قلت ارتاحو ليش نتعب فيكم
خالتي: والله ماهو تعب تمي شغلك فيسع وارتاحي
عجيليه ام سماح: معرفه طيبه غاليتي نتلاقو في اوقات طيبه انشالله
اني: تسلمي يا عمتي وفرصه سعيده تعرفت ع ناس زيكم ربي يحفظكم
سلمت عالباقي
سماح: تشرفنا يا قلبي خلي ديما تواصل بينا ماتقطعيش حبيتك بالك نستفيدو من خبراتك😂
اني: فوق من الخياطه والعلاج والله ما مستفيده مني😂😂
عبيد: اعطي لمرتي كورس اسعافات اوليه وسادها😂
اني: انشالله هي السلام عليكم نستأدنكم ركبت وشغلت المسجل قرأن لانه صبح وعليت فيه عدلت سرعتي وتوكلت ع ربي في طريقي للحوش شويه وفي سياره تجتاز بوش بلاك فاخره حبيت ضغطت عالبنزينه تحلم تفوتني اني نزيد وهوا يزيد الين ما خشينا للمدينه وعند اول سيمافرو فتح الشباك اللي بجنبه وكانت امه قعدت تضحك اني تحشمت درتلهم باي 🖐
سكرت الشباك وبعدها كل حد فينا مشي لمفرق وصلت حوشنا كانت الساعه 9:47 خشيت بوجهي للمطبخ كان جاي عبالي ندلع العيله درت شكشوكه عالنار وجهزت طن وجبنه وزيتون عسل وزبده وزيت زيتون وزعتر ومربى حطيت السفره وبديت نجهز فاها حطيت الشاهي ودرتله النعناع وطلعت بنوض خوتي وبمجرد ما نفتح دار منير نشوف منظر خلاني نحط يدي ع فمي.... 😳
يتبع
رايكم فالتعليقات
