وفات شهر زواج عليا واني شبه متجاهله وائل وعلاقتي مع خواته وامه وخوته تقوا وبدت علاقتي بسهم حلوه رجعت للشغل بس مش زي قبل كل يوم بديت نخدم يوم بيوم ومرات تلاته ايام فالاسبوع بس والوضع هادي ومستقر
نوض الصبح نشرب قهوتي مع عمي وعمتي لعشيه نفوت الوقت مع مراد ونسرين لو يبو شي في قرايتهم نساعدهم فيه وباقي اليوم يفوت عادي هدا في الايام يلي مانخدمش فيهم لو كان خدمه نوض الصبح ناخد معاهم قهوة الصبح ولليل باش نتلاقو ومرات مانروحش
وائل رجع للخدمه بس برغم انه كان مهناش طول اليوم توا بدي يجي وقليل ما يغيب عليهم وحور بعد هداكا اليوم نقطعت اخبارها كليا علينا وحت علي العيله وماهمتنيش اصلا للامانه علاقة عيلتي بأهل وائل قويه كل خميس يا عيلتي يجو يا اهل وائل يمشولهم...
نضت الساعه9:30ص
دوشت وصليت لبست بدله رسميه سروال وجاكيت باللون الابيض وتحتهم سوريه باللون الابيض دخلتها فالسروال ولبست كندره بكعب باللون الاسود وشنطه سوده حطيت فيها بودره وروج ومرايا وبلاشر وحطيت وشاح خفيف اسود مكياجي كان خفيف وحلو وقمت يدي بنحط عطر شدها وائل يلي كيف خاش من باب الدار
وائل: وين؟!
اني: عمل اليوم
وائل: رغد
اني: نعم
وائل: مش ملاحظه انك متحتاجيش
اني: عفوا
وائل: ريحتك حلوه ماتحطيش شي وانتي طالعه
اني: علاش وائل يومي طويل وبنتحرك اكيد اقل شي تقعد ريحتي حلوه
وائل: اوك بس مش ريحتك
اني: 😒🤔
وائل: حطي من عطري
اني: ريحه رجاليه مستحيل
وائل: ماتحطيش ريحه نهائي
اني: نحي باللهي عليك متأخره وانت شكلك مش صاحي اصلا
وائل: كيف مش صاحي😒
اني: وائل نحي مش وقتك
وائل: امت وقتي
سكتت وكيف بنرش العطر خداه ولوحه بعيد
اني: مريض انت سخيف بعد
وائل: قعد يقرب واني تابته ع اساس ولا حركه وبصراحه قلبي داير حرب ودق طبول داخل مد يده لفمي ومسح من ع شفافي الروج بصوابعه الزوز كانه يقرص فيهم وجعني واني تابته عيني في عيونه
لشن تبي توصل
هوا: لهوا وحط يده جيهة قلبي
اني: هدا غالي ع اشكال زيك
هوا: بما انه غالي يعني حقه فلوس وماعجزتش نشري شي من قبل قداش تبي
اني: ههه قلبي حقه مش فلوس لكن اغلا من انك تسكن فيه
هوا: حيجي يوم ونسكنه وصدقيني وقتها حتندمي ع كل لحظه صديتيني فاها
طلع واني ع طول قعمزت عالكرسي هدا شن يحب يدير حطيت يدي ع قلبي ونحاول نهدي فيه لان قرب وائل مني مخليني متوتره وخاصه لما يكون يتكلم بهدوء او بحنيه بعكس لما يعيط ويكسر ويسب مرو عليا هلبا مواقف لوائل حلوه معاملته مع خواته امه كيف مع الناس شكل ومعاي شكل مختلف يبدا يعيط ومتعصب وكل شي بمجرد ما يوقف بجنبي يهدا ويتكلم عادي واكتر من ليله يجيني ينوضني يطلب انه يرقد في حضني مرات نرفض مرات نقبل
حسيت بحيره كبيره واكتر خوف ساكني اني نتعمق نحبه وهوا ما يفكرش فيا💔وقلبه مع غيري واللي يقهر انه حت في نومه احيانا يقول في اسمها
طلعت شربت قهوتي مع عمي وعمتي زي كل مره وتلاقيت مع وليد واني طالعه
اني: صباح الورد
وليد: صباح النور رورو كيف الحال
اني: بخير الحمدلله وين طالع بكري اليوم
وليد: طالع مع الجماعه بنمشو الجبل
اني: وبتمشي معاهم ولا في سيارتك
وليد: في سيارتي مانحبش نركب مع حد ليش السؤال
اني: توا سيارتك مساويه عاللوطى واكيد هدي اولك مره تمشي للحبل وماتعرفش الطريق
وليد: اول مره صح كيف عرفتي
اني: واضحه لو انك ماشي من قبل مش حتقول بنمشي في سيارتي
وليد: اهاا علاش خيرها الطريق غادي
-اني: برا خود سياره عاليه جبل يا غالي نصها مطبات والنص التاني بيستا ((كسار)(طريق تراب ورشاد))
وليد: شافلي بنص عين
اني: تحلم تركب سيارتي ابعد عليا برا خود سيارة وائل
وليد: حقير ما يعطيش فاها
اني: تعرف كيف خود سيارتي وبرا معاش دورني
وليد: خودي مفتاحي
اني: لا يا غالي خلاها عندك تو يوصلني وائل
وليد: ياعيني عالرومانسيه يا عيني
اني: يبارد تو نشوفك لما تتزوج
وليد: تحشم هي مالا مرت خوي نتلاقو
اني: دير بالك من روحك ونتمنالك طيح في بنت من الجبل اطلعلك عيونك
وليد: ضحك ولع وطلع واني قعدت مقعمزه فوق كوفيني سيارة وائل ونحكي مع خوتي في لقروب وقالي منير انه بيمشي مع وليد يستنا فيه يجيه بياخده وبيطلعو مع بعض وبدر كان يبيني نمهد لماما يبي يتزوج الاستاذ
واني في عز ضحكي ع بدر كيف مش قادر يحكي بروحه موضوع بسيط زي هدا طلع وائل لابس بدله عسكريه اول مره نشوفه لابس هكي تنحت فيه من لما طلع من الباب الين ماوصل فيا ياربي هالجمال هدا حلالي ومش قادره نملكه اااه يا قهره وخلاص سكرلي فمي بيده ف شرقت لان لوهله نسيت حت كيف نتنفس والاكسجين معاش وصل لريتي قعدت نكح وهوا فاللحظه هدي قعد يضحك حضني ويمسح ع ظهري ويخبط خبطات خفاف يحسابني بيبي هديت شوي بس تخدرت من ريحته اللي تقتل طلعت مني بدون وعي: اني امنعني نحط عطر وانت دوش بيه
وائل: اني عطري عادي لكن عطرك لما يمتزج مع جسمك يبدا مش عادي
اني: بعد بعد راجل القهره بنشرق بنموت وهوا بدل لا يجيبلي ميه او يبعد يخليني نتنفس زايد خانقني ويخبط ع ظهري يحسابني بيبي
وائل بعد من عليا وحط يديه ع جنبي وحده يمين وحده يسار وكانه حاضني بس بعيد ولانه متكي كان راسه في مستوى صدري واني عشان نرد عليه لازم ما نزل راسي ونشوف لعيونه وهوا يشوف فوق ويشوف لفمي ويدير في حركه تدهب الشيره في نص الكلام يلي نقول فيه مركز مع حركة شفافي ويلحس في شفافه وبعدين يعض شفته السفليه بالحركه هدي معاش نعرف نكمل كلامي
وائل:اممم الظاهر اللبوه بدت قطوس وسكتت قوليلي توا علاش انتي ع سيارتي
اني:وصلني
وائل:مستحيل عندي جمع بعد ساعه
اني:حسيت بالاحراج اوك تو نتصرف
وائل:وين سيارتك
اني:مش مهم خلاص برا احسن مانعطلك ع شغلك نزلت من ع كوفينو السياره بدت مصوره في حضنه
حضني وتكلم يحليلي من الزعلان يلي يتوردو خدوده في تواني
اني: بعد عليا انت مولي غر تبي تحضن وخلاص بعد واني ندف فيه وهوا يضحك
وائل: شوفيلي
اني: قمت راسي لانه اطول مني
وائل: نزل وباسني ع خدي
اني حسيت الدم رقي يجري وتجمع في خدودي
فتحلي باب السياره تفضلي مدام رغد
ركبت واني حرارتي الف قعدت نرتب في شكلي وطلعنا طبعا دردشنا شويه وحكالي انه حيتم شغله ويمر عليا ياخدني بما انه ماعنديش سياره واني مش مبيت الليله وقتله لما توصل كلمني طبعا مش بينا الكلام هدا فالعاده لكني قلتها ابتسم وائل وقالي: بداية الحب اهتمام وشكلنا حبينا
اني: امم اكيد مش حنجادلك لانك خبره في مواضيع الحب
وائل: لازم ما يخش النكد فالنص لااازم
اني: شفت جيهة الشباك وضحكت
وصلنا البركيدجو متع المستشفى وكان في مجموعه من الدكاتره والدكتورات واقفين وكأنهم ينتظرو في شخص او حد جاي لبس وائل نظارته ونزل فتحلي الباب وشد في يدي لما بننزل وطول الانظار توجهت لينا والاغلب جو جيهتنا عرفتهم ع رائل وهوا تعرف عالاغلبيه والدكتورات عيونهم بيطلعو فيه والشي هدا ضايقني شديت ع يده
اني: وائل توكل ع ربي عشان ما تتأخرش ع موعدك
وائل: بنظرة شر اوك حبيبي ديري بالك من روحك واول ما نطلع حنجيك
وفي عيون تبعاته الين ما ركب سيارته وفات
اني: انشالله خير ليش التجمع هدا
وفاء: الدكتور وليد بيداوم اليوم والمدير امر انه نستقبلوه
مريم: قالو اعزب انشالله يطلع غر حلو زي راجلك يا رغد
اني: ربي يهديكم انشالله بس
مراد: حت الدكتورات ركبتهم حاله نفسيه بعد شافو راجلك
تهاني: كيف طحتي فيه راجلك
اني: حملته من الاب ستور
جبريل: 😂😂😂😂
اني: هي سلامتكم نتلاقو ومشيت نص الطريق
مريم: رغد خليك استقبلي معانا دكتور وليد
اني: ماتعودتش نستقبل حد ونستناه من قبل كملت طريقي خشيت لحجرتي غيرت حوايجي بس نحيت الجاكيت ولبست البالطو عدلت مظهري وكلمت الممرضه امال تبدا تدخل المرضى وبديت في الكشف والمعاينه ماحسيتش بالوقت لين لقيتها الساعه قريب 3:40 العصر
اني: امال قداش مزال حاله
امال: سبعه حالات
اني: ليش عاطيه ارقام هلبا اليوم
امال: لو تبي نلغيهم عادي بس الاغلبيه تاعبين هلبا ولما يبدا اسمك في لائحة الدكاتره المتواجدين تزيد الزحمه
اني: تمام نطلع ناخد قهوه وحاجه حلوه ونرجع لاني معاش قادره نركز السكر بيهبطلي
امال: تمام دكتوره رغد حنقوللهم نص ساعه وترجع الدكتوره
وقفت طلعت فلوس وعطيتهم لامال
اني: خودي انتي وياهم عصاير اقل شي اكيد بدون ماكله قاعدين
امال: شكرا يا احلا دكتوره فالكون كله
اني: ههه نحبك تخدمي معاي عشان لسانك
امال: والله دكتوره نحبك بدون نفاق وكلامي ليك طالع من قلبي وانتي قدوتي اساسا🥺
اني: خلاص حبيبه نص ساعه نتلاقو هني وديري في حسابك معاش تاخدي حالات تاني لاني مروحه
طلعت ومشيت للكفتيريا خديت قهوه عربيه بدون سكر وخديت معاها بان كيك بالعسل واللوز طلعت بيهم للجردينه قعمزت ع طاوله فتحت نقالي لقيت وائل باعتلي عالواتس
وائل: وصلت😂
اني: الحمدلله عالسلامه🙂
وائل: توا!!
اني: شنو
وائل: توا تفكرتي تردي
اني: عندي زحمه هدا وين فضيت
وائل: ربي يعاونك
اني: الله يسلمك
وائل: تغديتي؟!
اني: كيف خديت قهوه وحاجه حلوه مافيش وقت
وائل: هدا فطور ولا غدي
اني: زوز في واحد
وائل: اها صحتين
اني: سلمك
وائل: حت اني ماتغديتش
اني: شن خصني فيك
وائل: مش تغاري عليا بكري جنب صحباتك وين مشت الغيره توا
اني: شن دخل الغيره في غداك
وائل: الغيره حب والحب اهتمام اهتمي بيا ولا نسيتي
اني: تجاهلت كل شي ليش ماتغديتش
وائل: ناخدها رسالة بداية حب واهتمام ولا بس فضول
اني: ضحكت وبعتتله فضول
وائل: المكان يلي اني فيه خالي من المطاعم واللي جايبينه يطيب تقول ماكلة مستشفى
اني: 😂😂😂😂مستشفى صار
وين انت يلي مافيش مطاعم؟!
وائل: بعتلي اللوكيشن
السلام عليكم دكتورتنا الشغوفه
رفعت راسي وكان دكتور وليد: وعليكم السلام ورحمة الله وبركاته
قعمز دكتور وليد: كيف الحال
_تمام الحمدلله وانت
-شن اخبارك شن دايره
_الحمدلله بخير لحظه بس من فضلك
شفت للنقال باعت اربع مسجات ورا بعض وبعدها الوووووو رديت عليه ان جي جنبي دكتور وليد ومضطره نمشي عشان بنرجع للحالات وسكرت نقالي بابتسامه بعد ريت 🫂🤗
مجنون وربي هالانسان
وليد: الف مبروك رغد قالولي تزوجتي
اني: اي الله يبارك فيك
_ تقليدي ولا حب
- شن تقول انت في نظرك
_ اكيد تقليدي
- واضح يعني انت شن اخبارك وانشالله تفاهمت مع المستشفى متعنا وعجبك
_ يعني مزال نبي وقت باش نتأقلم وخديت يومين فالمستشفى معاكم بالرسمي وحناخد اكتر عدد ممكن من العمليات لان الوضع كارتي
- اهم شي خلي المساعد متاعك يختارلك المرضى بدمه وضمير مش نظام الواسطات
_ كيف؟!
- النوع من العمليات هدا يكلف ولانك بديرهم في عامه فالعاده المساعد يبدا يعطي فاها للاقرب تلقى انه ماتغير شي الاغنياء هما يلي يستفادو منها ورقاد الارياح رايحه فيهم وملفاتهم لين ياكلها التراب عالرف
_ اهاااا باهي من ترشحيلي
- خلاها توا نحكو في موضوع هدا وقت تاني توا اعدرني بنكمل حالاتي يستنو ومديتله البان كيك يلي ماكليتش منه شب وخديت قهوتي ووقفت كول هدا واعتبره احتفال بحضورك وانضمامك معانا
_ وقف تسلمي رغد بس لازم نحكو فالموضوع في اقرب وقت
- بعون الله
التفتت بنخش لقيت الدكتورات العزابيات يشوفولي بحقد والمتزوجات نضرات استغراب
تهاني: تعرفيه الدكتور وليد
اني: اي صديقي
تهاني: وبما انه صديقك ليش رفضتي تستقبليه
اني: ما رفضتش استقباله بدون تحريف اني رفضت الانتظار في مكان لا يليق بيا بينما عارفه اني حنتلاقى معاه في مكان ما ونرحب بيه بطريقتي
تهاني: وراجلك علي درايه بالموضوع
اني: اها انتي هكي نظامك ناديت وليد تعالى شويه
وليد: جي يمشي بخطوات كلها تبات وياكل في البان كيك متاعي نعم رغد
اني: وليد الدكتورات زميلاتي اتارهم الفضول حول علاقتي بيك والظاهر متحسسين شوي من الموضوع
وليد:رغد صديقتي الغاليه وانتم مني عشان تتحسسو من شي ماليكمش فيه
تهاني: مش حساسيه رغد فهمتنا غلط احني بس نتساءلو عالموضوع بس وخاصه انك بروفيسور وعايش برا
اني: اسمي دكتوره رغد لو سمحتي مش مقربه كفايه عشان تشيلي الكلفه ما بينا
وليد: اني يلي ليا الشرف اني نعرف رغد مش العكس وعلى كلا في مجالنا مسموح بجميع انواع التعاطي فلو وصلتو للمرحله هدي وانتو تحكو ع بعض ف انتو مازلتو في مراحل الجهل الاولى
اني: شكرا وليد كلامك هدا يعنيلي وبمناسبة انضمام وليد لمشفانا اني حندير وليمة عشاء ع حسابي وحنعلمكم بالمكان والزمان عن طريق امال
خشيت وخليتهم بيموتو مني
كملت حالاتي وكانت الساعه 9:20م
غيرت حوايجي وعدلت مكياجي وطلعت
_ امال تعالي
امال: نعم دكتوره
اني: الصبح غدوه شن عندك
امال: ولا شي بنفصل من هني بنروح نرقد ساعتين وبعدها بنمشي نداوم في مصحة......
امال: خودي اجازه من من المصحه اني ندفعلك حقها وتعالي معاي فالحوش باش نشوف كيف بنحل الموضوع يلي دخلت فيه روحي
وكملنا هدرزه واحني طالعين رن نقالي وكان وائل
وائل: اهلين بالحب
اني: اهلين بيك
وائل: اني فالبركيدجو نستنى فيك يا عمري كملي وتعالي
اني: اوك جايه فالطريق
استغربت كلامه وتحشمت نرد رد غير لائق قدام امال بس حبيت في نفس الوقت
كملت معاي امال واول ما وصلت عرفت سبب الاسلوب كانو جنبه مجموعه من الممرضات والدكتورات واول ما شافني جاني خدي شنطي
وائل: كيف كان يومك حبيبي
اني: عادي بس متعب شوي
وائل: مدايرلك مفاجأة حتنسيك التعب صدقيني وغمزلي
اني: شكرا حبيبي كلك دوق استأذنت من اللي واقفين بعد لا فتحلي باب السياره وركب وطلعنا تحت عيون فرحانتلي وعيون حاسده وحاقده وغيرها
وائل: باللهي شن رايك خليتلك هديكا الصفرا بتموت
اني: ممتاز من اول يوم وصلتني فيه خليتني اكتسبت كدس عداوات
وائل: يا شيخه هيا لو اهتمامها بتفاصيل حيات البشر زي اهتمامها بشعرها راهو مولي حلو مش تقول شاده فيش كهرباء
اني: ضحكت وقعدنا نتبادلو فالاحاديت بين كل شي وقلتله عالموقف يلي صار واني اضطريت نعطي كلمه استضافت وليد عندي وقالي اني جهزي قائمة المعازيم بالاضافه للعيلتين عيلتي وعيلته وهوا رح يرتب كل شي وحبيت الشي هدا في نفسي وصلنا الحوش خشينا لقينا حور وامها واختها
سلمت واستئدنت عشان نغير حوايجي ونرجع
ماننكرش اني اضايقت من وجودها بس بما انه عمتي تبيهم ماعندي ما ندير نحيت وشاحي وكندرتي وقعمزت ورقدت عالسرير بس مش كلني يعني رجليا عالارض وباقي جسمي ممتد عالسرير
خشت نسرين: مرت خوي الغاليه يلي نموت فيها
اني: اهلين حبيبتي تعالي
نسرين: اتكي يا قلبي ارتاحي مافيش داعي تقعمزي عشاني
اني: نحب نرقد في حضنها البنت هدي تدير في مساج خطير ف حطيت راسي ع رجلاها وهيا فهمت الباقي كيف كان يومك
نسرين: عادي مافي شي جديد وكساد هلبا
اني: طبعا ماهو حبيب القلب طالع مع خوك ف طبيعي مش حتقدري تكلميه
نسرين: ضربتني ع جبهتي اسكتي معاش تحرجيني
اني: عادي يا روحي انشالله ربي يوفقكم ويجمع بينكم بحلاله وع فكره مش حيطول موضوعكم
نسرين: تبصري
اني: بدر كلمني يبي يخطب وبهكي بلكي نزوجوكم الزوز مع بعض
نسرين: شدت خدودي والفرحه في عيونها تقتل يا قلبي تعرفي اني حبيتك من لما شفتك فالرحله والله هي تمنيتك وقتها تكوني لخوي
اني: اني مع خوك بس خوك مش ليا راهو ما يمشيش عليك الجو هدا لان بس قدام العالم اما في قلبه حور بس
نسرين: صدقيني لا لان خوي اللي داره معاك عمره ما داره مع غيرك
اني: كيف
نسرين: قبل لا يتزوجك وائل عمره ما قعد يوم تام فالحوش او قعد معانا ع وجبه وحت علاقته مع بابا كانت مش كويسه هوا وليد عمرهم ماجتمعو ع سفره من اول يوم ليك هنايا اجتمعو بسببك وحكو انتي متخيله ان اني لليوم عمره ما سمعني او حن عليا صح يعطي فيا فلوس وكدا بس عمره ما عرف اني شن نحب وشن نكره ليوم خشيتي حياتنا بدي يتغير مش متخيله انه يقعد طول اليوم معانا
اني: السبب!؟
نسرين: من غير مانقولك واضح وحت توا راجعه لان عندها مشاكل مع راجلها وامها بتقعد معانا لان حوشهم باعوه لما سكنو مع حور بعد لا تزوجت
اني: ااه نسرين اااه تعرفي مستعده نحرق اي بنت تفكر تقرب من وائل بس مش مستعده ندير حرب مع وحده هوا يلي قربها
نسرين: ارجوك رغد ماتتخليش ع خوي ما تخليشي يرجعلها
اني: لو خوك رجع اني مش رح نمنعه
نسرين: هي غيري وانزلي دايرتلكم بشاميل وشربة عدس
اني: اوك نغير ونجي نحط معاك العشي ع طول
طلعت واني وجعني خاطري لأمت كابوس حور مكانش في بالي ابدا اني في يوم من الايام يكون زواجي هكي بكل الدلع والدلال والعز وكلمتي عمرها ماتكررت وطلبي عمره ما نرد او رفضوه نوصل لمرحلة عايشه مع راجل يحب غيري ولا يتزوجني عشانها هزلت ورب الكعبه
خديت دوش سريع لبست توته باللون الاسود سروال وتيشرت فيه كبوس شعري مبلول ماعنديش بال نجففه ف اكتفيف اني نلفه كعكه كان وجهي طبيعي بدون ولا نقطة مكياج خديت نقالي ولبست شبشب للحوش ونزلت لقيت عمتي وام حور (زينب) واختها(حنين) ونسرين فالصالون سلمت وطلعت برا وزي ماتوقعت لقيت حور وائل يحكو وائل شاد يد حور 💔 قعدت لفتره نشوف ليديهم ومن بعدها خشيت وخليتهم لقيت عمي مكسد ع نقاله فالركن التاني من الصاله ومراد يلعب بالبلايستيشن قاعد قدام الشاشه
اني: حاج عمار
عمي: هههههه انشالله نحجو
اني: شن رايك توا في لعبة شطرنج وطاسة شاهي من تحت يديا
عمي: الله الله جيتي عالجرح
اني: عشره دقايق ندير الشاهي ونجي
عمي: ليش اتعبي في روحك تو وحده من العاملات يديروه
اني: من يديا احلا يا عمي حت بابا يقولي شاهيك لا يعلى عليه
عمي: نضوقو علاش لا
اني: دقايق ونجيب الشاهي
عمي: نسرين جيبيلي الشطرنج من المكتب
مشيت درت الشاهي عالنار ونشوف لوائل من شباك المطبخ خلاص قلبي بدي يتعلق بيه بشكل كبير وجودي معاه بيدمرني اني بس رفعت راسي لفوق يارب كون معاي وماتعلقش قلبي بشي مش ليا
فات وقت عبيت طاستين شاهي ورجعت للصاله لقيت وائل مقعمز جنب عمي وحور تبتسمله من بعيد شفتله باشمئزاز وقعمزت قدام عمي وحطيت طاسته بجنبه
عمي: شرب منه الله الله بجد يسلمو يديك كل يوم نبي منها هدي
اني: تدلل يا عمو كل يوم تاخد احلا شاهي مني
وائل: مانحصلوش حني
اني: هي عمي تبدا ولا نبدا
عمي: السيدات اولا
بدي لعب وكنت مستمتعه شويه واندمجت وبدي الموضوع حماسي لدرجه مراد سيب لعبته وجي يتفرج وع اخر لحظه قبل لا نفوزه اتدكرت محمد منين حفاظ علي غرور جدي خسرت درت نفس اللقطه وربح عمي وماتلعطش خاسره لما شد يدي وبدي يقولي الفوز عمره مافارقني وديما حليفي عرفت وقتها لو خسرت كنت حنضيع احلا ابتسامه واحلا شعور ممكن نعيشه
اني: الف مبروك يا عمي تعرف اني صعب نخسر وخسرت قدامك وهدا دليل ع انك قوي جدا ودكي جدا
وائل: حت هوا بوي باش تعرفي بس
اني: ياريتك خديت من صفاته شويه
مراد: جبهتك يا برو طارت
عمي: ناض يكلم في بابا ويقوله شن صار واني خشيت المطبخ مع نسرين نجهزو في العشي سخنت معاها وجهزو العاملات الطاوله وحطيت اول ما مشيت للصاله نجيب في نقالي لانه رن رجعت لقيت حور مقعمزه بجنب وائل قعمزت جنب نسرين وبديت بشربة العدس
اني: يسلمو يديك نوسه عسل
نسرين: الله يسلمك صحتين يا عمري
اكتفيت نبتسم الماكله يادوب تنزل من رقبتي بالعافيه
استئدنت ونضت طلعت برا من الحوش كله لقيت الكلب يلي عالجته جي يجري
اني: ياريت صاحبك وفي زيك
لعبت عليه شويه وناض
وائل: خيرك ماتعشيتيش كويس
اني: شبعت
وائل: مضايقه من وجود حور
اني: متهمنيش
وائل: باهي ليش بكري لما طلعتي قعدتي تتفرجي ماجيتيش
اني: يعني ريتني
وائل: اي شفتك
اني: نجي شن بندير نشوفك وانت تبوس فاها
وائل: رغد ليش الغلط
اني: كنت شاد يدها وتشوف لعيونها وهايم بنظره عمرك ماشفتلي باها راهو مش نقارن في روحي او نغار ولا شي لالا بس وضعي عمره مكان هكي اللي ليا قبل عمره ما شاركني في بنادم بس الظاهر دوام الحال من المحال الله يسامح منير بس
وائل: مسكت يدها عشان شكرتها انها جابتلي اوراق لازمتني من طليقها واشياء تفيدني مافيها شي
اني: امت لحقت تطلق كيف تطلق وهيا حامل
وائل: العيل طاح لان ضربها لما حاولت تنقلي اخباره واشياء تخليه يمشي ورا الشمس وبعد لا رمت طلقها من يجي تلاته ايام طلعت من المستشفى
اني: والمطلقه عندها عده ماتقابلش فيها الرجاله ولا اني غالطه
وائل: اني مش اي حد
اني: انت حبيبها صح
نضت وخليته مشيت خطوات وقتله لو تبي نفضيلك الجناح الليله عادي
جت امال وتفاهمنا العزومه حتكون في مزرعة اهلي وحتكون الاحتفاليه الرجال بروحهم والنساء بروحهم والبطاقات توزعت ع كل شخص يجيب معاه عيلته وبعد جت حور بدي تواجدي مع العيله يقل باش تقل المشاكل
واغلب وقتي فالشغل وحالتي النفسيه تسوء بس مش مبينه لحد جي يوم الاحتفال بالدكتور وليد المعازيم كانو 15شخص من الرجال المدير ورئساء الاقسام بالاضافه الى4دكتورات و5ممرضات وامال مع عائلات الدكاتره في ازدحام بسيط بدت الحفله وكان للرجاله طاولات برا الحوش قدام المسبح والكل مبسوط وليد سلفي ومنير كانو مسؤولين ع كل شي خاص بضيافة الرجاله وكان في كادر كامل من فندق مهتم بالموضوع هدا عنصر رجالي للرجال وعنصر نسائي لينا والاكل بوفي مفتوح نزلت من الدروج متع الحوش كنت لابسه قفطان احمر بدون اكمام كان من الظهر مفتوح كل مافيه سبته تتسكر عالرقبه وكان مرسوم عالجسم رسم وشعري كان مغطي ظهري اللي الكوافيرا دارتهولي ويفي ومكياجي كان يجنن وكندره باللون الاسود وكان لقفطاني ديل طويل يتنافس لون القفطات مع بياض جسمي
