ضحية ماضي

الفصل الخامس والعشرون: أحب غيرها!

"يعني إيه ميت؟ اومال مين اللي بيعمل فينا كل ده انا هتجنن"
نطقت بها ليان بصدمة بعد ما قص عليهم آسر ماحدث فعلقت سما
"انا شاكة أن الشخص اللي بيعمل كل ده بيعمله عشان ينتقم مني انا لأني سمعت المديرة في الملجأ وهي بتقول الباشا الكبير لو عرف هنروح فيها كلنا فأكيد الباشا ده هو اللي دبر أني ابقى في الميتم بشخصية أسيل وهو نفسه اللي خطفني بردو"

ردت عليها ليان بحيرة من أمرها
"لأ انا مش حاسة كدا اومال مين اللي بعتلي ليلة الحادثة وقالي مش هسيبك في حالك والاغتصاب ده مجرد بداية وكان بيتكلم كأنه خالد ، مين عارف عن الموضوع ده غيري انا وخالد وحور عشان ينتحل شخصية خالد ويبتذني كدا"

هتف آسر بصدمة
"حور!"
تابع وكأنه فهم شيء ما
"مفيش غيرها طالما خالد ميت يبقى هي اللي بتعمل كل ده ممكن يكون اللي خطف سما واحد من رجالتها وأكيد لقب الباشا الكبير ده بيقولوه عشان منفهمش أنها حور"

وضعت ليان وجهها بين كفيها قائلة
"بس انا عملتلها إيه اصلًا عشان تكرهني كدا وتغل مني بالمنظر ده انا حبيتها من كل قلبي والله"

أجابها آسر قائلًا
"مش لازم تكوني عملتيلها حاجة الغل ده ملوش تبرير بيبقى نقص وعيب في الأنسان"

تدخلت سما في الحديث مردفة
"طب ما تخلي أبن عمك يجيبلنا عنوانها و.."

قاطعتها ليان باعتراض
"بس انا مش عايزة اقابلها ولا هستحمل اشوف وشها تاني"

ردت عليها سما وهي تربت على كفها
"متشغليش بالك انا هقابلها وهعمل نفسي مش عارفة حاجة وهقنعها أني في صفها بطريقتي"

نادى آسر النادل ليدفع الحساب وهو يقول بضيق محدثًا سما
"طب يلا نروح مش وقته نتكلم في الحاجات دي أنتِ أكيد تعبانة وزمان مامتك وباباكي قلقانين عليكي ولما طاهر يبعتلي العنوان هبقى اتصل عليكوا ونشوف هنعمل إيه"

اومأت برأسها وهي تنهض من مجلسها برفقة ليان ثم ركبوا السيارة متجهين إلى المنزل دون أن ينبس أيًا منهم ببنت شفة
وصلوا إلى المنزل فأردف آسر
"طب أدخلي أنتِ يا سما عشان عايز ليان في موضوع"

هزت رأسها بإيجاب وقد شعرت نفسها غير مستعدة لأي حديث مع والديها فدلفت إلى غرفتها مسرعة وأغلقت الباب بالمفتاح قبل قدومهم
بينما وقف آسر مع ليان في الحديقة الخلفية قائلًا بضيق
"أنتِ إيه؟ كل حاجة تعندي ومتسمعيش كلامي هو انا مليش لازمة للدرجادي قولتلك خدي سما وامشي ولا عبرتيني وخلتيني اهرب معاكوا"

صمتت ولم تجيبه فصرخ في وجهها
"ما تردي عليا أنتِ ساكتة ليه؟!"

ردت عليه بعصبية
"أنتَ اللي عايز تتحكم فيا طول الوقت وقاعد تقولي متنزليش ومتعمليش أنتَ مالك اصلًا"