زهرة

زهرة فى مستنقع الرذيلة 30

زهرة_فى_مستنقع_الرذيلة
30
#جيهان_عيد
زهرة : خير يا عمو ؟!! خضتنى .
عبد الرحمن : عايدة طالبة الطلاق .
زهرة : إيه ؟ أنت بتتكلم جد ؟
عبد الرحمن وهو يبكى : لما قالت لى عملت زيك كدة ، كنت فاكرها بتهزر ، لقيتها فجأة اتحولت لبنى آدمة تانية ، قاسية وجاحدة ، مش عايدة اللي عشت معاها أكتر من تلاتين سنة ، بكيت وأتوسلت لها تتراجع ما رضيتش ، كنت هأبوس رجلها ، عرضت عليها أكتب لها كل أملاكى حتى اللى كنت ناوى أديه لكوا
ما رضيتش ، صممت على الطلاق وسابتنى ومشيت على بيت أهلها ، وقالت أنا مستنية ورقة الطلاق ، بدل ما أخلعك .
زهرة : أنا لحد دلوقتي مش مصدقة .
عبد الرحمن : أكيد فى حد آذينا أو عامل لنا سحر ، لو شوفتيها وهى بتتكلم هتقولي دى مستحيل تكون عايدة ، عايدة اللي ما كانتش بتستحمل عليا حاجة تمشى وتسيبنى وأنا مريض ما فكتش السلك ، عايدة اللى كانت ما بتستحملش تبعد عنى شوية وتتصل كل شوية تقول لى أنت وحشتنى ؛ تسيبنى وتمشى ، إزاي يا زهرة ؟
زهرة : يمكن عشان تعبت ، بس لا مش طنط عايدة اللي تعمل كدة ، ده إحنا كنا بنحلف بيكوا فى الحب .
زهرة : مش الحب بس يا زهرة ، العشرة ، عايدة بنت أصول وياما شافت وأتحملت معايا ، هى عشرة يوم وإلا اتنين ؟
زهرة : طب اهدى يا عمى عشان صحتك وأنا هاروح لها ، ولو زعلانة هأراضيها .
عبد الرحمن متوسلا : ما تجيش من غيرها يا زهرة ، أنا مستعد لأي ترضية ليها .

ذهبت زهرة لعايدة لكنها كانت كما قال عبد الرحمن شخصا آخر ، حاولت زهرة معها بكل الطرق ، فعلت المستحيل لإرضائها ، لكن عايدة رفضت التفاوض معها ، فعادت لعمها خائبة الرجاء ، ما تريده مستحيل حدوثه فى وجودك عبد الرحمن ، هى تريد دكتور خالد ، لن تفرط فيه بعد أن أعطى لها الضوء الأخضر للزواج منها ، لن تضيع من عمرها لحظة واحدة وهى بعيدة عنه ، ويكفيها شهور العدة .
فشل عبد الرحمن فى إعادة عايدة له ، كما فشل والدها وشقيقها فى إقناعها بذلك ووقع الطلاق فأصيب عبد الرحمن بأزمة قلبية ، لكن هذا لم يشفع له عندها ، ظلت زهرة ملازمة له ، كانت أحيانا تبيت معه فكانت فرصة ذهبية لعايدة التى لم تحترم عدتها وظلت على علاقتها القذرة بدكتور خالد ، يتعاملان كالأزواج لا ينقصهما سوى ورقة الزواج والتى لن تفرق كثيرا ، فزواجهما سيكون فى السر كما أشترط هو وقبلت هى بشروطه ، وزواج السر باطل لافتقاده أهم شرطين ، وهما الإشهار وشهادة الشهود .

قامت هند بعمل حساب على كل برنامج من برامج التواصل الاجتماعي باسمها الشخصي بمعرفة عادل ، انضمت للكثير من المجموعات الخاصة بالمطبخ والحمل وحتى وحتى الأبراج والحظ ، وعندما وجدت البعض يرد علي تعليقاتها ويفتح معها حوارا خافت أن يرى عادل هذه الحوارات ، لانه صديق عندها ، فقامت بعمل حساب آخر باسم وهمى ، كانت تعلق منه بكل حرية ، بل سمحت لبعضهم بالتحدث معها فى الخاص ، أقنعت نفسها أن من ترد شخص آخر وليس هى ، وأن كل ما يحدث تسلية لن تؤثر على علاقتها أو حبها لزوجها .