زهرة

زهرة فى مستنقع الرذيلة 34

انتهى كل شيء كما خططت زهرة ، وراحت عايدة بخطيئتها ، لم تتح لها فرصة التوبة ، لم يعلم عبد الرحمن بسرها ، ربما كان هذا لحكمة لا يعلمها إلا الله ، ربما لو علم لسامحها ، خصوصا بعد وفاتها ، ربما أراد الله أن 'تحاسب على ذنبها كاملا بلا عفو أو غفران من صاحب الحق في ذلك .

عاد دكتور خالد إلى زهرة بعد انتهاء عزاء عايدة ، وفور دخوله الشقة هبت واقفة ، قالت لدكتور خالد دون أن تنظر إليه : بعد ما الموضوع ده يعدى بهدوء كدة ومن غير فضايح طلقنى .
د/خالد : فى إيه يا زهرة ؟
دخلت زهرة حجرة أخرى غير حجرتهما وأغلقت الباب .
زهرة : أنا قولت اللى عندى ، ولولا خايفة عمى ياخد باله كنت مشيت حالا دلوقتي .
د/خالد : افتحي يا زهرة واسمعينى .
زهرة : هتقول إيه بعد اللى شوفته ؟ على فكرة دى مش أول مرة ، أنا جيت البيت قبل كدة وكان معاك واحدة فى سريرى ، وما كانتش عايدة ، يومها خرجت وسيبتك وأتصلت بيك أقول لك إنى جاية عشان تمشيها .
د/خالد : أنا بأعترف إن كان ليا نزوات ، غلطة وأوعدك مش هتتكرر ، وحياة زهرة ما هتتكرر .
زهرة : ما تحلفش بحياتى ، حياتي أنت دمرتها ، عملت لك إيه عشان توجعني كل الوجع ده؟ ده أنا حبيتك وأتحديت عمى عشانك ، من يوم ما أتجوزتك ما شوفتش رجل غيرك ، أستحملت نظرات الناس اللى فاكرانى طمعانة فيك ، كنت بأشوف الرغبة فى عيون معظم الرجالة اللى حواليا ، كل اللى يشوفنى ويعرف إنى جوزى أكبر منى باتنين وعشرين سنة يطمع فيا ، كنت بأصدهم رغم إن الخيانة محوطانى من كل إتجاه ، حتى أخوك الرجل المحترم اللى دقنه طول كدة ، وكل كلامه قال الله وقال الرسول ، واللى كان معارض جوازك منى وما حضرش جوازنا ، ولما زارنا سمعته بودنى وهو بيتكلم فى حق ماما ، لكن بعد ما شافنى وهو خارج حليت فى عينه ، جانى تانى يوم وأنت مش موجود وحاول يتحرش بيا وهو عامل إنه بيطبطب عليا ، يظهر إن كلكوا عجينة واحدة ، أنت داير على حل شعرك مع الستات ، حتى الست اللى فى مقام والدتى ما استحرمتش علاقتك بيها ، وأخوك أكيد زيك ، وأختك تخصص شات ، والناس مخدوعة فيكوا ، فاكرين إنكوا أشراف ، طبعا لإنكم أغنيا ، مع أنهم بيقتلوا غيركم بالكلام من غير ما يغلطوا .
د/خالد : افتحي يا زهرة وتعالى نتكلم بهدوء .
زهرة : مش فاتحة ، ولحد ما يحصل الطلاق مافيش بينا كلام ولا تعامل خالص .
د/خالد : من حقك تشكى فيا ، بس أنا لو على علاقة بعايدة هأسيب الدنيا كلها وأجيبها هنا ؟ واحدة بتقول لى تعبانة وعايزة أكشف أقول لها لأ ، أنتى عارفة إنى ما بأرتحش لها وسبق وقولت لك الكلام ده ، أنا وافقت بس عشان خاطرك ، لإنى لو كنت رفضت كنتي هتزعلى .
زهرة : كان فى آثار جماع على عايدة .
د/خالد : وأنا مالى ؟ حد قال لك إن أنا اللى كنت معاها ؟ ما يمكن اتجوزت ، هى مش عدتها خلصت ؟
زهرة : عايدة ما كانتش لابسة ملابسها الداخلية .
د/خالد : أنا دكتور إيه يا زهرة ؟ واحدة جاية تكشف نسا عشان عندها التهابات ، هتكشف بلبسها الداخلى ؟
زهرة : يعنى مش أنت اللي كنت معاها ؟
د/خالد : لأ طبعا ، أنا أصلا ما بأطيقهاش ، حكمى عقلك يا زهرة ، معقولة أبص لها ؟ طب لو مش عشانك عشان عمك صديق العمر .
تذكّرت زهرة عندما رأت عايدة مع شاب فى سيارته ، ربما تزوجته فور انتهاء عدتها .