زهرة

زهرة فى مستنقع الرذيلة 10

#زهرة_فى_مستنقع_الرزيلة
#جيهان_عيد
10
وما أن أعطى عبد الرحمن الضوء الأخضر لدكتور خالد بالموافقة حتى أصبح يذهب إلى زهرة بالكلية من آن لآخر ، وما أن علم عبد الرحمن بذلك حتى ثار وغضب غضبا شديدا .
عبد الرحمن : أنا وافقت على جوازك منه بالعافية ، وحددت شروط إنه ما يجيش هنا ويعطلك ، يقوم يروح لك الكلية كل شوية ده اللي مش هأسامح فيه .
زهرة : أنا آسفة يا عمو ، هو ما جاش غير مرتين وطلب يوصلنى وأنا رفضت ، وما وقعدتش معاه أكتر من ربع ساعة .
عبد الرحمن : أتمنى الموضوع ده ما يتكررش وإلا وربى اللى خلقنى ألغى أى اتفاق .
زهرة : خلاص يا عمو ، أوعدك مش هتتكرر .

المحزن أن زهرة لم تف_ بوعدها وظلت تقابل دكتور خالد بدون علم عمها .
لكن الشئ الذي حرص عليه دكتور خالد أنه لم يحاول أبدا أن يلمس زهرة .
تكررت لقاءات دكتور خالد وعايدة وهى كالجارية له ، تلبى كل رغباته وتنفذ كل أوامره ، وفى كل مرة يبصق عليها ويطردها ، لكنها كانت بلا كرامة ، الغريب أنها كانت تغضب من أقل كلمة لعبد الرحمن ، حتى لو كانت كلمة قيلت بعفوية وبدون قصد، ويظل عبد الرحمن يسترضيها بكل الطرق    .

فى الجامعة
صفية : فين زهرة ؟ عندي لكوا خبر بمليون جنيه ، أنا أتخطبت . 
هند : بجد ألف مبروك .
صفية : الله يبارك فيكى ، عقبالكوا جميعا .
نادية : زهرة تقريبا كدة بتعط مع حبيب القلب .
فاتن : اتخطبتى أمتى يا ندلة ؟ إحنا ما غبناش عن بعض إلا يومين .
صفية : والله كل حاجة جات بسرعة ، كنت فى فرح حد قريبنا يوم الخميس ، فوجئنا بيهم جايين إمبارح ومصممين يقروا فاتحة ، والجواز بعد الامتحانات على طول .
نادية : العريس بقى شغال إيه ؟
صفية : ما هى دى المفاجأة ، العريس مهندس وابن الشيخ عيسى حمدى  .
هند : عيسى حمدى اللى بيجى على قناة الناس ؟
صفية : أيوه ، هو بعينه .
فاتن : بتهزرى ، إزاى وأبوه كل حلقة يتكلم عن الحجاب ، وحتى لما استضافوه على قناة تانية اشترط إن المذيعة تلبس حجاب ؟
صفية : والله ما أعرف ، أنا كنت مستغربة زيكوا ، وكنت ناوية أرفض بس الواد طلع موز قوى ، طول بعرض بحلاوة بشياكة .
هند : بكرة يلبسك نقاب .
صفية : لا يا حبيبتي ، مش صفية اللي حد يفرض عليها حاجة ، أنا قولت له مش هألبس الحجاب إلا بمزاجى وهو احترم رغبتى .
فاتن : بكرة نشوف .
نادية : بس يا بت ده أنتى ما بتعمريش فى علاقة ، افرضى اتجوزتي وزهقتى منه ؟
صفية : عادي اطلق ، أنا هأخسر إيه ؟!  ربنا حلل لنا الطلاق والجواز .
نادية : لا يا حبيبتي ربنا ما حللناش الطلاق عشان كل واحدة تزهق تتطلق ، ده حللوا للى العشرة بيهم استحالت .
صفية : يا جماعة أنا بأرد على افتراضكوا ، إن شاء الله مش هيحصل ، الواد شكله حلو وحبوب ، وشيك وعصرى ، أنا كنت فاكرة أولاد الشيوخ دول معقدين .
هند : ألف مبروك يا حبيبتي .
صفية : هو بس عندي مشكلة صغيرة ، بس إن شاء الله هأحلها .
فاتن : اوعي يكون عود الكبريت .
صفية :  يخرب عقلك ، هو فعلا .
هند : وهتعملى إيه ؟
صفية : ولا حاجة ، زي ما قولت لكوا عملية ، وكل حاجة ترجع زى ما هى ، واحدة معرفة هتجيب لى عنوان دكتور هيخلص كل حاجة .