زهرة

زهرة فى مستنقع الرذيلة

حسن : الحقينى يا مدام زهرة ، مصيبة وحطت على دماغي .
زهرة : خير ؟
حسن : مراتى لقت على موبايل ابنى معاذ اللى عنده عشر سنين فديوهات وحشة ، أفلام إباحية وياريتها جات على كدة ، دى فيها أفلام شذوذ وعنف جنسى . 
زهرة : لا حول ولا قوة الا بالله ، وعملت إيه؟
حسن : أنا لسة ما شوفتهوش ، أنا خلصت شغلى هنا وروحت على شغلى الإضافى ، هى  عرفتنى لما رجعت وهو كان نايم ، كنت عايز أدخل أقتله ، مراتى قالت استنى لما يخلص امتحانات وحاسبه ، والصبح هو خرج بدرى قبل ما أشوفه ، كل اللى عملته خليتها خدت منه الموبايل.
زهرة : ممكن نتكلم بالراحة ؟
حسن : هتقولي إيه ؟ إن كل الأطفال دلوقتي بقوا كدة ، زى ما هو قال لأمه ، لا يا مدام زهرة أنا عندي أقتله ولا إنه يعمل كدة .
زهرة : عايزين نتكلم بهدوء .
حسن : هدوء إيه يا مدام زهرة ؟ دى لقت يجي خمسين مقطع عنده ، ده وصل لمرحلة الإدمان ، اتاريه نزل النص وعلى طول تايه ومستواه فى الدراسة بقى زى الزفت ، خلاص فاضل له مادتين ويخلص وهيشوف منى أيام سودة .
زهرة : غلط ، العنف غلط ، العقاب الشديد هيخليه يعاند وتبقى عنده رغبة فى الانتقام منكوا بإنه يعمل الشئ اللى انضرب عشانه .
حسن : مش هيمسك موبايل تاني فى إيده .
زهرة : وهتقدر تمنعه إنه يشوف الحاجة دى على موبايلات زمايله ؟
حسن : طب والحل إيه ؟
زهرة : هتقعد تتكلم مع ابنك بالراحة ، اوعي توبخه أو تضربه ، فهمه إن اللى شافه شئ طبيعي بين الرجل والست ، لكن لازم يكون فى إطار شرعى ، بالجواز يعنى ، وإن الحاجة دى لها وقتها وما يصحش يتفرج عليها دلوقتي ، وحرام أى حد يتفرج عليها حتى لو متجوز ، دينا نهانا عن إننا نشوف عورة بعض .
حسن : أنا لسة هأدادى ؟ 
زهرة : أيوه دادى ، طمنه ، صاحبه ، اسمعه ، وأعرف منه جاب الحاجات دى منين ؟ لو من أصحابه حاول تبعده عنهم بالتدريج ، وخليه هو اللى يعمل كدة ، لما هتوضح له إن الفرجة على  الحاجات دى غلط واللى بيتفرج عليها بيعصى ربنا ، لو أنت زارع جواه الخوف من ربنا هو بنفسه هيبعد عنهم ، اشركه في أي نشاط رياضي أو علمه موسيقى خليه يشغل وقت فراغه فى هواية بيحبها ، وإياك تفهمه إن ده عقاب عشان ما يعاندش .
حسن : ده جيل فاقد .
زهرة : بالحوار تقدر تعدى بابنك المحنة دى ، اوعده إنك مش هتعاقبه ، ولا تحرمه حتى من  الموبايل بشرط إنه يوعدك إنه مش هيكررها مرة تانية ، قول له أنت رجل والرجل لازم يحترم وعده .
حسن : الله يخرب بيت اللى اخترع الموبايل على اللى اخترع النت ، كنا مرتاحين من الكلام ده .
زهرة : الكلام ده مش هيفيد ، التكنولوجيا فرضت علينا حاجات  بقت أمر واقع لازم نتعامل معاها بحرص .
#زهرة_فى_مستنقع_الرذيلة
#جيهان_عيد