للغَيم قدرها

الجزء 24

كل شي يمر لكن ليس كل شي ينسى 🦅🤍

للغيم قدرها &♥️

الكاتبة :- زهرة آل جبر 🪐
____________

غَيـــــــــم ...

اجا غيث فات من يمي حجه بصوت خافت
غيث ، ب 7 بليل اخابر اهلج اتفقت ويه صديقي اليمهم
من الفرحة حسيت فراشات بگلبي
غيم ، صدك والله
غيث ، باوع عليه عود يكول لا تنتبه غسق و ابتسم وهز راسه يعني اي

صار وقت صلاة المغرب صلينه وتعشينه كل هذا وبعدها ب 6 ونص   لان شتاء
احلام ، يمه شبيج عينج ع الساعة
غيم ، هيج خالة
غيث باوع عليه وابتسم واني من قلق الانتظار والفرحة الابتسامة ما فاركت وجهي
نفس كليوم نكعد بالصالة وسوالف وضحك العائلة كلها لحد ما عمي وخالتي ينامون تنتهي الكعدة

غيث ، اكلك بوية سولفلنه شلون تعرفت ع امي
سعد ، باوع ع خالتي وضحك
احلام ، يمه منين جبت هل سؤال
سعد ، بااوع
غيث ، تربع   ايي باوعت
سعد ، عمي يضحك ويسولف جنت ملازم
بعدني اول بدايتي بالتعين ولد شاب بعدني صغير وحلوو
احلام ، اممم
سعد ، ها جذب ؟؟
غيث ، يابه دكمل
سعد ، المهم بيوم جان عندي شغل بسيطرة يم جامعة  جانت السيطرة فارغة بيومها واكو غرفة  اني جنت كاعد الوحدي لان اصلا السيطرة بعد محد موجود بس ولد عسكري ودزيته بشغلة. ما اشوف الا  الباب اندفر حيل دخلت عليها وحده تركض رفعت راسي وشوفلك وحده بس شللون وحده
زينة ، فدييت جمال امي
سعد ، انجبي خل اكمل    سدت الباب و فحطانة من الركض وجها احمررر  رفعت راسي انصدمت هذه بنية وشابة شمدخلها هنا
كتلها منو انتِ شسوين هنا جان تكلي بصوت عالي وتاشر  الچلب يركض وراي
اني عبالي واحد ادبسز وخالس البنية خذتني الغيرة وبعدني ملازم جديد الفخر ماليني واكضلك المسدس واطلع كلت اليوم اسحل كرامته بالشارع جان اطلع واشوفه چلب وياريته جبير واني ضحكت ضحك من كل گلبي. خطية هي بس تباوع عليه وخايفة
كلتلها عمي دامشي امشي خل اوصلج وين رايحه خايفة من جلب
بعدها عرفت هي طالبة جامعة قريبة علينه وابو الخط ما جايها وهي عود بطلة وراجعة الوحدها
غيث ، انوب شصار
سعد ، صعدتها بسيارة ورجعت لشغلي بس ما نسيتها بقت ابالي ضليت  اباوع عليها من بعيد من تجي للجامعة بس ما يوم حاجيتها ترددت لحد ما اتاكدت اني حبيتها
زينة ، اييي كمل
سعد ، اي رحت حاجيت ابوي كالي بعدك صغير وبداية شغلك ومسؤولية ومن هل كلام بقيت اسبوعين الح ع ابوي الا وافق بس شرط عليه احاجيها  واتاكد هي اموافقه علمود لا انحرج اذا رفضوني واني مناك شهر اباوع عليها من بعيد
واجاني نقل لغير مكان
زينة ، لاااا
سعد ، ايي والله
زينة ، وبعدين التقيت بيها لو لا
يابة من حجت هيج خربنه ضحك
غيث ، شهل عقل لعد شلون احنى انولدنه
زينة ، ياا هم صدك
غيم ، اي عمو كمل
سعد ، اي بنيتي بقيت اطلع من الدوام اروح ع جامعة ومرات اخذ اجازة بس علمود اشوفها.  لحد ما يوم كلت لازم اندل بيتها راقبتها واندليته
غيث ، والله يابة معدل
غيم ، خل يكمل لا تقاطعه
غيث ، حاضر سيدي
انتبهت متاخرة اني جفصت بس غلست
سعد ، ايي بعدها بشهرين صاحبي كالي انت اذا بقيت ساكت ياخذها غيرك لا تصير جبان اني اقتنعت ورحت الها. اول ما شفتها من التوتر بدون سلام كتلها انتِ متزوجة جان تكلي وانت شعليك شلون يهز راسه من يقلد عليها يخرب ضحك
اني خجلت كلش كتلها لاا بس
جان تكلي حقهم يكولون ع الضباط ادبسزية هاي لان ساعدتني هيج لزكت يابة اني بيومهاشصار بيه حجيت بعصبية كتلها اني ما مسويلج شي ع شنو تجاوزين جلن تكلي وشحدك تسوي المهم تعاركنه وماكدرت اعترف
احلام ، انت استفزيتني
سعد ، انت كابه بوجه الناس
غيم. هسه شنو تتعاركون لو تكملون
سعد ، اي ورا اسبوع رجعت بس جان النقاش اكثر هدوء اعترفتلها بحبي وهي كيفت كامت تهلهل بالجامعة
احلام ، هاا هاا ع كيفك. كتلك اني ما عندي سوالف حب  وغيرها ولا ادنك راس ابوي
سعد. ، صح والله. كتلها اني زلمة رايدج بالحلال مو مراهق ولا جاي العب رايدج زواج  هي وافقت ورحت خطبتها
غيث ، بنفس اليوم وافقت
سعد ،لاا شلعت گلبي اسبوعين الا وافقت وابوها اسبوعين الا رد الخبر هاي شهر واني مناك اشهر اراقبها واتاملها
غيث ، عمت عيني عليك بوية ثاري مو بس اني مشولع گلبي يباوع عليه ويحجي
سعد ، احح احح ايي
عود يكله انتبه ع كلامك ما يدري بابنه باليوم الف مرة يذكرني هو يحبني ويا ويلي اذا خذت غيره