قَدَر

part 2 البيت وناسه

كُل ساقي سَيُسقى بما سَقى به ولو بعد حين ولا يظلم ربك أحداً
--------------------
صدح صوت جرس الباب :
دلفت حنان إلى غرفة زوجها دامعة العينين : عاوزينك بره يا ابو فريده
اغلق مصطفى عينيه وتنهد ثم خرج للخارج وأرسل غزل إلى الغرفه لتجلس مع أختها
_ أستاذ مصطفى لو سمحت كننا عايزينك تمضي باستلامك للرساله دي هنا
_حاضر بس هو محتواها ايه ممكن اعرف
_محتواها تحذير يا استاذ مصطفى
تسلّم مصطفى التحذير ومضى ليؤكد استلامه
وذهب الشخص الغريب لتخرج الأم من الغرفه مع بناتها واللواتي بدى عليهم جميعهم ملامح التوتر وما أحزن مصطفى وجعله قلقاً أكثر هي رؤيته لدموع غزل ابنته الصغيره فقام بإحتضانها: ايه يا غزالتي بقا عيون الغزاله الجميله دي تدمع كد
_ يا بابا هو فيه حاجه
_لا يا حبيبه قلب بابا مفيش انتي بتدمعي ليه بس
_حاضر مش هدمع بس هاتلي ايس كريم بقا
ليضحك و يقوي احتاضنه لها :حاضر يا حبيبتي بس كد احلى ايس كريم لاحلى غزل
تتحدث حنان بنبره جاده : يلا يا بنات على اوضتكم يلا
تنظر فريده إلى عين والدها ليتحدث هو قائلا : ديدا خلصي بدري في  مزاكرتك علشان هنخرج النهارده
لترد عليه وهي تبتسم بشده :اوعى تقول فسحه
_ايوا يا ام لسانين فسحه
لتقفذ من مكانها كما الاطفال وتتمايل وتتراقص
ضحك مصطفى وحنان عليها ورجعت البهجه للمنزل مره اخرى
________________
_ماما أنا نازل الجامع اجيبلك حاجه وأنا راجع
_اه يا آدم هات معاك كيلو ونص طماطم ونقيها جامده يا آدم و هات
ليقاطعها آدم:استوب ياما ايه يا ست الكل انتي لي سقف طموحك بيعلى كده لحد مهيقع فوق راسك طماطم ايه وجامده ايه فيه ايه يا سعاد هو انتي شايفاني سوسن اوي كده
_بكره ياخويا نشوف اللي مش سوسن وهو راجع من بره جايبلها لانشون وبيض وجبنه وفينو
_وشوكولاته وشيبسي ياماما هو أنا مقولتلكيش
_لا مقولتليش قول بقا
_اصلي هتجوزها طفله يا ماما هجيبلها مولتو وبلالين
قامت سعاد بتصويب محفظتها ناحيته بهدف إصابته
ليتفاداها ويمسك بها: ياااه كمان بتديني فلوس قد ايه انتي ست عظيمه أنا بحبك بحبك
وقام بأخد 300 جنيه لتصرخ الأم في وجهه : ليه ليه ليه هي الطماطم غليت اوي كده
_لا وانتي الصادقه ده مش الطماطم ده الشوكولاته
_يبني احترم سنك ده انت في كليه اللي قدك اتجوز وخلف
_خلف ايه يا غاليه ده انا لسه في تانيه كليه حتة 20سنه
وعارفه بقا اللي يحرق الدم أن أول مالشوكولاته بتيجي حضرتك بتفترسيها
ليضحك كلا منهما
_طب أنا نازل بقا الحق الصلاه
_________
بمجرد نزوله من المنزل دلفت سعاد إلى غرفه زوجها 
_صبري
_ تعالي يا سعاد عايزك في موضوع هو آدم لسه متضايق
_اكيد لسه متضايق مهو اللي انت عملته مش قليل يا صبري ده الحق
_ يتحدث والده بندم والله غصب عني أنا عمري ما مديت ايدي على آدم بس غصب عني الموقف كان صعب إني اسمعه وافوته عادي وقتها يا سعاد
_ بس مش لدرجه انك تمد إيدك عليه قدام وليد وعيلته يا صبري
_انا أبوه واعترفت اني غلطت خلاص بقا ميكبرهاش هو
_هو مش مكبرها يا صبري بس انت حكمت عليه من غير متسمع منه ودي اكتر حاجه وجعته
_طب لما يرجع من الصلاه يحلها الحلال يسعاد أن شاءالله
_ آدم غلبان يا صبري انت مربيه كويس متقلقش
___________
في منزل الجزار تحديدا في الطابق الثاني من المنزل
يقف مصطفى أمام شقه اخوه الكبير «حجاج» ويشرع في رن الجرس لتخرج «ناديه» زوجه حجاج لتفتح الباب : أهلا اتفضل ي مصطفى ياخويا اتفضل
_تسلمي تسلمي يا ام حسن
_اقعد يا خويا هو انت غريب ده بيتك ثواني هناديلك حجاج اهو
ليخرج حجاج ويحتضن اخوه :ازيك يا مصطفى بقا يا جدع مع بعض في بيت واحد ومشوفكش 3 ايام
_ معلشي يا اخويا ظروف غصب عني ولله
ويجلس مصطفى صامتاً ليفهم حجاج أن مصطفى يريد التحدث معه منفرداً
_قومي اعملي حاجه نشربها يا ناديه
_حاضر يا ابو حسن
_ كنت يا حجاج يا اخويا عايز اتكلم معاك بس محروج الصراحه
_محروج محروج من مين يا مصطفى من اخوك الكبير يا جدع ده احنا ملناش غير بعض نشيل بعض ونسند بعض أنا من يوم ما انت اتولدت يا مصطفى وانا بالرغم من اني كنت لسه صغير بس وعدت ربنا إني عمري مهبعد عنك ودايما هشيل مسؤوليتك
_كتر خيرك يا حجاج ربنا وحده اعلم انت عندي غالي ازاي وانا بحبك قد ايه
_اتكلم يا مصطفى
_كنت الصراحه محتاج منك مبلغ كده وان شاء الله هرجعهملك والله
_عنيا ليك يا خويا بس انت مش غريب والله كل ما أملكه دلوقت مش معدي ال 20الف جنيه فشوف انت محتاج منهم كام وعنيا ليك .
_ليسرح مصطفى في المبلغ الذي يريده ويتذكر أن حتى المبلغ الذي عرضه عليه اخوه ماهو اللا مبلغ رمزي لما يحتاجه ثم يعود مره اخرى لوعيه : لا يا حجاج يا خويا اللي انت تديهولي يبقا كتر خيرك وزياده
_يدلف حجاج إلى غرفته وينادي زوجته لتحضر له المال
_حجاج اخوك شكله مزنوق والصراحه عمرنا ماشوفنا منه حاجه وحشه وياما وقف جنبنا وانا كمان بقدره زياده من ساعه وقفته جنبنا في المواقف بتاعت حسن ابننا ابسطها وآخرها موقف جوازه
_هو انتي اللي هتوصيني على اخويا يا ناديه مصطفى مش اخويا لا ده ابني
_ربنا يحبب قلبكم على بعض
_خرج حجاج من غرفته حاملا 15الف جنيه ووضعهم في يد أخاه
لينظر إليه مصطفى بعين دامعه : ربنا يخليك ليا وميحرمنيش منك والله لولا الظروف زادت مكنت طلبت منك يا حجاج
ليقم حجاج بممازحته وضربه ضربه خفيفه على ظهره :بطل هبل ياولا
بقولك يا مصطفى هات البنات وأمهم واطلع النهارده ونجيب حسن ومراته ورنجه ونقضي وقت سوا
_ ربنا يخليك لينا وتفضل في وسطنا وساندنا كده يا حجاج من عنيا حاضر هجيبهم ونطلع اهه
______________
يدخل مصطفى على زوجته ويقوم بإعطائها المال
_متزعلش يا مصطفى هتفرج من عند ربك والله بس اصبر
_ونعم بالله  اعملي حسابك الغدا عند حجاج النهارده
_ الصراحه يبختك باخوك الإخوات في زمننا ده بقوا بياكلو بعض ربنا يخليكم لبعض
___________
بعدما انتهت صلاه الجمعه رجع آدم إلى منزله حاملا عده اكياس في يده ونادى على والدته : يا سعاد بت يا سعاد تعالي هنا يبت
لتخرج والدته وتضربه على ظهره بت مين يا ولا احترم نفسك ده انا امك
_ ايوا مشوفتش برضو مشكله المهم يلا يستي جبتلك طماطم لا واي مش طماطم بس لاقيت الخيار حلو وسعره حلو جبتلك كيلو ومش كد وبس آدم مفجآته مبتخلصش نص كيلو لمون والمفاجأة الكبيره بقا جبتلك التفاح اللي بتحبيه
قامت والدته باحتضانه ربنا يخليك يا حبيبي بس متحسسنيش انك صارف عليا فلوسهم انت واخدهم من قبل متخرج وزياده كمان
_نينينينيني بس يا ماما
يجد آدم أحدهم يحتضن قدمه ليقول إلى أمه : اوعي تكوني اللي في بالي
ليجد طفله صغيره تقهقه وتنظر إليها ببراءه الاطفال
بيان حبيبه قلب خالو يا ناس اوعا يكون ابوكي وامك اللي ميتطاقوش دول بره
لترد « اميره »اخته :لا يخويا أنا بس اللي هنا جوزي مش هيجي
ليأفأف آدم : قال يعني لما تقولي كد هفرح منا مش طايقك برضو سيبيلي بيان ويلا سكه السلامه
لتتحدث اميره : والله مهرد بس وريني كده التفاح ده بيقول ايه
_بيقولك بقا يا بيان اللي عندو دم احسن من اللي عنده عماره أنا بقا معايا شوكولاته
لتنظر إليه الطفله وتتفوه بكلام غير مفهوم كليا لكن فهم آدم مضمونه: اه امك رخمه اه ازاي تمد أيدها عليكي بس اصبري شوفي هعملك اي فيها
________________
في منطقه أخرى
_منه قومي من النوم يلا كفايه كده علشان هنروح عند خالك النهارده
_يوه يا ماما أنا مبحبش اروح هناك واقعد مع الملزقه اللي إسمها فريده دي
_ولا أنا والله بطيقها ولا هي ولا الصغيره طالعين لأمهم
_احنا هنروح ليه أصلا
_ خالك حجاج هو اللي كلمني وقالي هاتي عيالك وتعالي النهارده
_طب أنا هقوم ألبس أهو صحي الأول ياختي  يونس و عمار أحسن دول نومهم نوم أهل الكهف
_ هما صحيوا وجهزوا كلنا مستنينك إنتي
_طب أنا خلاص قايمه أهو