عامر بصله بستغراب وقال بصوته الرجولي القوي: ما تظبط يا انتي ولا انت ولا نوعك ايه بالظبط.. انت بتعمل ايه هنا اصلا!
خرجت ميرنا وهي رافعه فستانها وكان الفستان قصير وعريا ن جدا وتقريبا نص جسمها باين وقربت من عامر بحماس وقالت: عامر ايه رأيك؟
عامر وهو بيبصلها بصدمة: انتي لسه ملبستيش!
ميرنا بدهشة: هظبط الميكب بس وكوكو هيحط لمسته الاخيره واكون جاهزة.
عامر بدهشة: كوكو مين؟؟
رد الشاب اللي معاهم في الاوضه بصوت ناعم: انا كوكو.
عامر بستغراب: اه يعني كوكو ده راجل ولا ست؟!
ردت ميرنا بثقة: راجل طبعا يا بيبي.
عامر بصدمة: ينهار ابوكي مش فايت والراجل ده بيعمل معاكي ايه هنا لوحدكم وانتي باللبس العريا*ن ده!!
ميرنا بزعل: بس كوكو مش راجل.. كوكو صاحبي.
عامر: انا قولت من الاول ان ده مش راجل طب نوعه ايه!! افهم بس.
رد كوكو بصوته الناعم: انت متعصب ليه يا بيبي مش عايز عروستك تبقى احلي واحدة في الحفلة!
عامر بعصبيه: ماتنشف ياد وانت بتتكلم كده وبعدين انت مالك انت بالموضوع ده ومن امتى الجمال بيكون باللبس العريا*ن!!
ردت ميرنا بغيظ: عامر انت متعرفش انا عملت ايه عشان اقدر اجيب الفستان ده من باريس وكل المصورين منتظرين يصوروني بيه وهيبقى اهم حدث في عالم الموضه الايام الجايه.
اتكلم كوكو بتأكيد على كلامها: صح يا ميرو وكل البنات هتتجنن عليه.
عامر هز راسه برفض وقال: انا عارف من الاول ان الجوازة دي مش هتكمل وقولت كده محدش صدقني.
ولسه بيلف بجسمه عشان يمشي لكن والدته وقفته وهي بتقرب منهم وقالت بستغراب: إيه يا ولاد أنتوا لسه مجهزتوش!
اتكلم عامر بغضب: مفيش خطوبة وقولي للناس يروحوا.
شهقت والدته بصدمة: ليه كده يا عامر!
عامر بغضب: بصي الهانم إللي عايزاني اخطبها عامله ايه في نفسها.. بقى انا عامر الجارحى انزل افرج الناس علي جسم بنت وهي ماسكه في أيدي عشان المجلات تصور ويبقى جسمها معروض بسعر المجله اللي بتتباع في الشارع!! في رخص اكتر من كده!
اتكلمت ميرنا: عجبك كلامه ده يا طنط ؟
والدته بصت ل ميرنا وغمزت لها وقالت ل عامر: معلش يا حبيبي انت عارف ان ميرنا اكيد مش قصدها ومتعرفش ان انت بتحبها للدرجادي وبتغير عليها.
همس عامر جواه بغضب: انا لا بحبها ولا زفت انا نفسي الخطوبه دي تخلص بأي طريقه.
واتكلم بصوت مسموع: نزول معايا باللبس ده مش هيحصل ومش فاهم انا ايه اللي عاجبها في الفستان ده دا فستان كوكو احسن منه.
