#الحلقة_38
#مكتوبة_على_إسمي
#بقلمي_ملك_إبراهيم
هو حضرتك بتتكلم معاها كده بصفتك ايه بالظبط!!
عزيز بصله بثقة وقال ببرود: حضرتك إللي بتتكلم معايا بصفتك إيه بالظبط.. علي الاقل انا جوز مامته وانا المسؤول عن كل املاك عامر وفلوسه لحد ما يرجع.
امجد بصله بغضب وآيات قالت بإصرار: انا مش هسيب بيت جوزي.
عزيز ابتسم ببرود وقالها: وانا هعيش في الفيلا من النهاردة والشركة وكل املاك عامر هتبقى تحت سيطرتي لحد ما يرجع.
آيات بصتله بثبات وقالت بصوت قوي: مش هيحصل.
عزيز بصلها بصدمة وامجد استغرب نبرة صوتها القوية ووقفتها الواثقة قدام عزيز وكملت كلامها بثبات: لما عامر كان موجود كان مانعك تقرب من بيته او شغله.. ولحد ما يرجع مش هسمحلك تتخطى الحدود إللي عامر حطهالك.
عزيز اتفاجئ من قوتها وثقتها في نفسها وهي بتتكلم.. صدمته كانت كبيرة لأنه مكنش عامل حسابها ولا حاطتها في حساباته وكان فاكر انها بنت ضعيفه هيقدر يخوفها ويرجعها عند اهلها!!
ميرفت ابتسمت رغم حزنها علي ابنها لما شافت قوة آيات اللي فاجأت الجميع وعزيز بلع ريقه بتوتر وقالها: بس انا جوز امه و...
امجد قاطعه بقوة عشان يساند آيات: كويس ان حضرتك قولتها بنفسك.. انت جوز امه يعني مش ابوه ولا تقرب ل عامر حتى من بعيد لكن آيات مراته ومكتوبه علي اسمه وهي احق واحدة تحافظ على فلوس جوزها لحد ما يرجع.
عزيز رفع صوته للأعلى عشان يخوفهم وقال: لااا دا انتوا عصابه بقى...
وقرب من ميسرة اللي كانت بتبكي ومش مهتمه بكلامهم وقال بصوت أعلى: امه هي احق بفلوسه.
رد امجد عليه بغضب: هو مش ورث حضرتك! عامر عايش وان شاء الله هيرجع بالسلامة.
آيات بصت ل ميسرة اللي كانت بتبكي ومش فارق معاها اي حاجة بيتكلموا فيها وقالت ببكاء: انا عايزة ابني.. اعملوا اي حاجة ورجعهولي.
عزيز بص ل آيات وقالها بغضب: متفكريش انك هتقدري تقفي قصادي...
وبص ل امجد وكمل كلامه بتهديد: ولا حد هيقدر يحميكي مني.
وجذب ميسرة من ايديها وقالها: خلينا نمشي.
واخد ميسرة ومشي وامجد بص ل آيات وقالها: متقلقيش يا آيات انا معاكي ومش هسيبك.
آيات كانت حاسه انها ضعيفه و وحيدة من غير عامر لكنها لازم تظهر قوتها قدام الجميع عشان تقدر تحافظ على فلوس عامر وتعبه ومتسمحش ل عزيز او غيره انهم يسرقوا تعبه ويهدو كل اللي بناه.
آيات هزت راسها بحزن وشكرت امجد علي وقوفه معاها ودعمه ليها قدام عزيز وبصت علي ميرفت إللي كان واضح عليها التعب والاجهاد وقالتلها بهدوء: حضرتك كويسه ؟ شكلك تعبانه.
ميرفت هزت راسها وقالت بحزن: انا كويسه يا حبيبتي.. بس عايزة ارتاح شويه.. احجزولي أوضة هنا في المستشفى تكون قريبه من شريف.
