#الحلقة_26
#مكتوبة_على_إسمي
#بقلمي_ملك_إبراهيم
ازيك يا فارس عامل ايه؟
رد فارس بجمود: الحمدلله.
هدير اتوترت من رده البارد عليها وفكرت تسأله عن عمه عشان يكون في سبب لوقوفها معاه: كنت عايزة اسألك عن عمك عرفان.. هو عامل ايه دلوقتي؟
فارس بصلها بدهشة وقالها: عمي عرفان!! هو انتي متعرفيش ان عمي عرفان مات!
هدير شهقت بصدمة: مااات!!!
فارس بصلها بدهشة وسابها ومشي وهدير وقفت تستوعب الخبر واختها هزتها ب ايديها عشان تخرجها من شروها وقالتلها: هو انتي مكنتيش تعرفي ان عم عرفان مات؟
هدير بصت ل اختها بصدمة وسألتها: هو مات امتى؟
ردت اخت هدير وهي بتعوج فمها بحسرة: تاني يوم من هروب بنته آيات.. دا صباح مرات ابوها فضحاها في البلد كلها.
هدير بصت لاختها بصدمة: فضحاها في البلد كلها ازاي؟
اخت هدير قالت بثقة: تعالي وانا احكيلك في الطريق واحنا مروحين.
رواية مكتوبة على إسمي بقلمي ملك إبراهيم.
قدام فيلا الجارحى.
وقف الشخص اللي صباح بعتته عشان يخلصها من آيات.
شاف حرس قدام الفيلا وتأمين كامل للفيلا من جميع الاتجاهات وفهم ان صاحب الفيلا شخص مش عادي وعرف ان المهمة اللي هو جاي ينفذها هتكون صعبه وشبه مستحيلة.
اتكلم مع سيد في التليفون وعرفه ان المهمة اللي اتفقوا عليها طلعت اصعب ما كان متخيل وهيحتاج ضعف المبلغ اللي اتفقوا عليه عشان ينفذ.
.....
في بيت عزيز.
ميرنا نزلت من غرفتها ودخلت ل باباها غرفة المكتب وقالت بتوتر: بابا انا عايزة فلوس.
عزيز ساب الورق اللي قدامه وبصلها بغضب وقال: فلوس ايه!! انتي مش لسه واخده مني 500جنيه من اسبوع!
ردت ميرنا بحسرة: 500جنيه ايه يا بابا دا انا اشتريت بيهم شامبو لشعري!! دا انا كنت باخد من عامر 20 الف اخلصهم في يومين!
عزيز بصلها بغضب وقال: وهي فين ايام عامر!! وميسرة كمان بقالها كام يوم مش بتتكلم ولا قالتلي هي عملت ايه مع مرات عامر!
واخد تليفونه واتصل على ميسرة.
......
عند ميسرة كانت قاعدة في غرفتها واول لما شافت اسم عزيز علي شاشة تليفونها اتوترت وخافت ترد عليه وتقوله انها لسه مبدأتش في تنفيذ خطته!
.....
عزيز قفل تليفونه بعد ما اعلن عن عدم الرد وقال بغضب: ودي مبتردش هي كمان ليه!! قلبي مش مطمن.
ميرنا بصتله بتوتر وقالت: المهم يا بابا انا عايزة فلوس اعمل ايه؟
عزيز زعق فيها بكل صوته: وانا اجبلك فلوس منين دلوقتي!! ميسرة عند ابنها وكل الفلوس اللي كنت باخدها من ورا ابنها اتوقفت!!
ميرنا بغضب: وانا ذنبي ايه يا بابا.. انا بنتك ومسؤولة منك وكنت بنفذ كل اللي بتقولي عليه!
عزيز بصلها بغضب: لو كنتي بتنفذي اللي بقولك عليه كنتي عرفتي تدبسي عامر في جوازه منك.. هي البنت اللي اتجوزها دي فيها ايه زيادة عنك غير انها ناصحة وعرفت توقعه!
