ثمن الماضي 🥀🥀

البارت السادس

صوتو ⭐⭐⭐

علقو ......

البارت السادس

ثمن الماضي 🥀

ندى البياتي

.....

حمدي : اشبيك تنفخ بين نفسك فرحان شوي جدام الناس

خالد : اشوكت تخلص هاي المهزلة

حمدي : تحمل شغلنا اهم من هاي المهزلة

خالد : شلون اتحمل والي ردناه ماحصلناه  جدي انت مقتنع بالي يصير مدين بشنو يفيدنا

حمدي : مدين الأخ الوحيد لعماد يعني اكيد ما راح يخلي شي يصيبه وراح يغطي علينا لخاطر حط رجليك بالمي احنى يجينا الصافي

خالد : نشوف

كمل كلامه رجع عينه على  جوانة وامه  لازمة رجلها وتدردم وياه بصوت ناصي حتى محد يسمعها

سعاد : انت ظل ساكت لاتحجي شي شوف بنتك تدمر حياتهة وانت ولايهمك، الله لاينطي السبب الي ورطني بواحد اخرس واطرش مثلك مابيك اي خير

اجت اسيا لطاولتهم تسألها

اسيا : ان شاالله عجبتكم الحفلة

ابتسمت بوجه اسيا ورادت تبين الهة ان هي فرحانة بالحفلة : كلش حلوة عاشت ايدكم الديكور يجنن

اسيا : ان شاء الله بخطوبة خالد تسون احلى منها

سعاد : ان شاء الله بس كون يتنحنح ويكول يا الله ههههههه

اسيا : هههههه هاي البنات هنا هواي خل يختار وان شالله بيها قسمة

سعاد : ان شا الله، ان شا الله

اسيا : يلا اني استأذن

سعادة : اخذي راحتج عيوني

رجعت بوزت بوجه رجلها الي مايعرف شكو ما اكو بالدنيا بس يباوع بالوجه

مثل ما خالد ماشال عيونه من جوانه ، شيماء هم ما وخرت وجهة من عماد كل شوي فازة لما يجي احد يبارك الهم،

بعدين شغلوا اغنية رومانسية رقصوا عليها جانوا حلوين وهمة سوة فكرت ويا نفسي هم يجي يوم واكون بهذا المكان بصفتي عروس واگف وياي زوجي

مو مجرد ضيفة محد انتبه لها، بعدين ضحكت على حلمي هذا مستحيل منو راح يقبل بوحدة يتيمة قضت عمرها بالميتم وماتعرف شي عن اهلها، وهاي اذا جانت بنت اصل او لا

اجت كعدت يمي مرة عجوز مبين عليها التعب  رمت حذائهة وحجت بدون مقدمات  وهي تفرگ برجليها

صفية : الكعب للشابات مو الجنة احنى العجايز وينا وين الكعب كل  مفاصلنا  وفقراتنا مطكطكات   هههههه

حتى ضحكتهة جانت متعوبة وتحاول تتعايش وياهة  بالگوة ومتبين نفسهة تعبانة

رديت  : الله يساعدج خالة اني هم ما احب الكعب  بس مجبورة اللبسه علمود الستايل يضبط  هسة لو ما عيب انزعه وابقى حفيانة لان رجلي كامن يوجعني