نيران العشك

بارت4

#بارت 4

غزوان سحبها عليه:غير انهيج تطلعين بالشارع هيج وبهل الساعة

نيران توترت:اي هدني..

وظلت ترجف تذكرت ايدين محمد عليها وظلت تشوف غزوان محمد...ونفضت ايدها بخوف وتراجعت ليورى...

غزوان لاحظ رجفتها وخوفها:هاي شبيج

البنات واكفات عالدرج وخايفات يضربها...

نيران شوي وتبجي:بس خليني اروح بيتنه ماريد ابقه

غزوان انقهر من نفسه هيج قهرها وزعلها:نيران شبيج خايفة مني ماقصدت اضوجج جنت معصب منج..امشي رجعي يم البنات

نيران برفض وهزت راسها:لا اروح بيتنه لا تجي يمي

غزوان:وين ترحين هسة اهلج نايمين وشراح يكول عمي بهل الساعة للبيت وبلا عباية واعرف عمي عصبي راح يأذيج رجعي يم البنات يالله...

نيران سكتت وتذكرت معاملة ابوها الها وشكد تكره نفسها هي تحبه وهو مايهمه امرها ومرته وبته مسوينها خدامة...

نيران بعد مابيها طاقة وماتكدر تكتم عبراتها...

كعدت بالارض وحطت ايديها على وجها وظلت تبجي بحركة...

غزوان كلش انقهر من هالمنظر هالعيون الساحرته وليعشقهن ينزلن دموعهن بسببه..كعد يمها بعيد شوي..

غزوان:آسف والله ماجنت اقصد اطردج او...

كاطع حجيه جية البنات الها وظلن يشبكن بيها...

اول مرة يشوفون نيران تبجي طبعها ماتحجي ولاتحب تنزل دموعها كدام احد ابدا

(الي بحالة نيران لو جبل راح ينزلن دموعه ويضعف)

بتول بجت:نيران فدوة كافي بجي كومي

سارة لزمت دموعها:ولج على شنو البجي هسة شبيج

غزوان كام:اخذوها لغرفتكم لا يكعدون جدي وجدتي على بجيها...

كوموها البنات واخذوها للغرفة وهي اتجهت للفراش وغطت حتى وجها...

والبنات نامو يمها وشكثر كعدو يحاجونه...
بس ظلت مغطية راسها وتشهك وشوي سكتت...نامت وماحست بشي تكعد ويه الاذان وتكضي يومها كله شغل....

والبنات كلمن راحت  لفراشها ونامن...

غزوان ماكدر يغفى مايروح من باله منظرها وخوفها ورجفتها وبجيها وظل يلوم نفسه على اسلوبه وعصبيته عليها....

ظل يتكلب وينافخ...كام شعله جكارة وظل يدخن...........

الفجر كعدتهم ام يحيى للصلاة ورجعن نامن كلهن....

واكفة بمكان عالي وماتعرف وين بالظبط باوعت يمين ويسار شافت المكان ظلمة وموحش والهوى شوي عالي وهدوء بس اصوات مرعبة ومخيفة ماتعرف شنو هيه لا هو صريخ ناس لا هو صوت وحوش ماتعرف بس الاصوات مخيفة حيييل...