راحت بيت ابوها بس بقت للصبح تنحب بغرفتها...وغزوان ماغمضت عينه ابد...
مرت يومين ونيران بيت ابوها وماتاكل وابوها يصيح عليها لأن هيج تسوي بروحها...
ومنا سلمى تاكل بكلبها بحجي يغث وهي الي بيها مكفيها لذلك تغلس عنها...
مشتاقة لغزوان ولحبه الها وكلماته الحلوة وابتسامته الي تغمرها بسعادة العالم من تشوفه يبتسم الها وتحس وره هل الابتسامة عشك ماله حدود الها...
كاعدة بهل الغرفة التعيسة الموحشة والغربة تارسها بدونه...
دمعت عيونها وطاحن بألم...وتردد احبك مشتاقتلك...
وكل شوي تتفقد ظهوره بكل البرامج تشوفه وتطمن بوجوده...
من تشوفه نشط او متصل دموعها تنزل وتشتاقله حيل...
غزوان يحس بالغربة بدونها بس كرامته ماتسمحله يرجعها وكأنه ولا شي صار
فتحت تلفونها ماكو شي لا رسالة ولا مكالمة ودخلت على برفايله وشافته نشط قبل دقايق...
ترددت تكتبله او لا...بقت مترددة وحيرانة...وبعد صراع ويه شوقها دزتله...
نيران:ليش مافتقدتني ليش عفتني هيج ليش تخليت عن حبي بسرعة..آسفة حيل آسفة وندمانة عالصار ياريت تسامحني فدوة كول مسامحني على شكي بيك..فدوة مشتاقتلك احبك وحق ربي احبك...
غزوان جان كاعد يم الولد وضايج يفتقدها بكل ثانية ومشتاقلها...
سمع اشعار تلفونه ماهتم ولا فتح الرسالة مايريد شي مابيه حبيبته..كام من يمهم...
فهد:ها خالي كمت
غزوان:اريد اروح ارتاح تعبت من الكعدة
فهد:اساعدك
غزوان:لا اكدر امشي بحدي...تصبحون على خير
الكل:تصبح على خير..وراح ومشه وراح دخل لغرفة امه لكاها نايمة...
حط مبايله عالميز...
نزع الدشداشة بصعوبة وبألم..راح تمدد يمها بهدوء وباس جبينها...
غزوان همس:فداج روحي يمه شكد حلو وجودج بحياتنا..من اجمل عطايا ربي ورحمته علينه بوجودج..لولاج شنو هي الدنيا..وغمض عيونه وحس بيدها تمسح على شعره..
اخذ ايدها وباسها...
ام يحيى:يمه بعد رويحتي نام وارتاح يبعد امك
غزوان:يمه اريد ارجع صغيير بحضنج
ام يحيى ضحكت:اي ابقه بحضني راح تبقى بعيوني ذاك الصغير الي جنت اسهرله الليالي وما امل ابدا ولا اضوج.. وانجرح من تنجرح وابجي اذا تبجي واحزن اذا تحزن ومانام ابدا اذا يوجعك شي..بعيوني انته بعدك ذاك الصغيير
(احتويك بضلوعي يمه لو احتويك بكلبي ونبضه... لو تريد رموشي تصيرلك فراش وغطه...وبجفوني تتمدد وترتاح تبقه... خاف تزعجك دموعي خليك بكلبي تنام وتغفه...❤)
