نيران العشك
مرت يومين وهل يومين اسوء يومين على الكل غزوان يحجي وحالته احسن..
نيران جابها يحيى زارته بس ماقبل يستقبلها كال ماريد اشوفها هسة...
بس سأل عنها خو مابيها شي كلوله مابيها شي...
وسأل عن فردوس مايريد عمه يعرف..مو حبا بيها بس راح تصير فجوة بينه وبين بيت عمه وراح تظل هل السالفة بذهنهم لأن الساقطة تعرت كدام زوج اختها مو شويه هاي ولا هينة بمجتمع مثل مجتمعهم سمعتهم طول عمرها طيبة بين الناس وراسهم مرفوع دوم.....
كلوله ماكو شي لا تفكر بس هو كلبه ناغزه اكو شي يحس عمه يعرف من اجه زاره صح ماحجه بالموضوع بس حس بيه...
ماكلوله الي صار خوفا على صحته...
اما نيران اموته نفسها بجي لان ماقبل يستقبلها واصلا تندمت راحتله لان خايفة عليه...
وراحت بيت ابوها...
اما صخوم مارضه ابو سعد تجي البيت مايريد يشوف شكلها بعد يكول خل تبقه بيت جدها هو يربيها...
الجد طيح حظ فردوس وكلهم بعد مبايل ماكو ولا طلعة واي واحد يخطبها تزوجوها لا تكسر ظهرنا اكثر...
اليوم غزوان طلع من المستشفى...
ومابقه واحد ما اجه زاره بس نيران ماراحت زارته وحزت بكلبه صار الليل وماشافها اجت مشتاقلها بس صعبانة عليه شكت بيه وماصدكته...
حس اكو شي بكلبه تبدد وانملأ خذلان💔...
فردوس استخفت وصايرة تتصرف بشكل غريب...
(عساج ارده 😒)
وكله بغرفة جدتها ماتتحرك شبر وماتاكل..
وسلمى عرايك هي وابو سعد تريد تشوف فردوس يكلها روحي تشوفيها وكبل طلعي لبيت اخوج الصايع مهند ولا ترجعين...
وهي تخاف ماتريد يطلكها بعد هل العمر وهمه حياتهم صايرة عالطرف...
وكلبها بارد ولا كأنه بتها مسويه مصيبة من يطلع ابو سعد تدردم وتحجي وتدعي على غزوان ونيران وتاكل بكلب نيران وهي ماترد عليها الي بيها مكفيها ومابيها طاقة ترد على فصم سلمى...
(مثل مايكولون دعوة تخيب ودعوة تصيب ودعوة تكطع النصيب...والي يدعي يرجع عليه دعواته حتى دعوات الخير لذلك احذرو تدعون على احد...اذا ظلمكم شخص كولو حسبي الله ونعم الوكيل ولو الكم حق تاخذونه عند الله مو من ادعون على احد)
بالليل خفو الزوار حتى الأهل راحو بعد تأخر الوقت...
غزوان من مساع اخذه يحيى داخل يرتاح...
وابو يحيى والجد ويحيى كاعدين بالديوان...
وجانو كلهم هناك سرمد وفهد بس طلعهم جدهم ابو يحيى واخوان نيران هم كاعدين وزوج اسماء انسان كتوم ومايحجي عليهم ابدا ودوم يحجون كلشي كدامه...
