ألا حانَ الموعد

" لقاء "

أرجعت همس بصرها نحو ذلك المكان الذى أشارت إليه الطفلة " ريم " فلم تجد أحدًا أعادت بصرها إلى ريم التى وقفت تنظر للمكان بحيرة طفولية و قالت : والله أنا مش بكذب كان فيه عمو هنا قالى أديكِ الوردة و أقولك تبطلى عياط

أبتسمت لها همس بتغصب و قالت : مش مهم يا حبيبتى يلا بينا أوصلك علشان مامتك متقلقش

هزت ريم رأسها ببسمة و أمسكت يدها فتحت معها عدة مواضيع كى تُلهيها ولا تبكى مجددًا و همس تتابعها ببسمة غير حقيقية تحاول مجاراتها حتي لا تُحزن الطفلة

حتى وقفت فى أحد الأماكن و أشارت نحو عمارة من العمارات الشاهقة قائلة ببسمة : أدينى وصلت بيتى يا هموس يلا باى و متعيطيش تانى

أبتسمت همس و لوحت لها بيدها و غادرت وهى تحاول جاهدةً أن لا تنساب دموعها مجددًا

وصلت منزلها وهى على وشك الإغماء فتحت لها والدتها الباب و أشفقت على منظر ابنتها الذى يُدمى القلب و قالت لها بحزن : يابنتى حرام عليكِ نفسك اللى بتعمليه ده ريم ربنا يرحمها مش كفاية وجع قلبى عليها هتوجعى قلبى عليكِ أنتِ كمان

قالت همس بحزن : أنا فى ايه فى ايدى اعمله يا ماما حاسة أن فيه جبل محطوط على قلبى
ريم ريم ماتت و سابتنى أنتِ عارفة ريم يعنى ايه بالنسبالى ؟
عمر ما حد فيكم هيحس ولا يفهم أنا حاسة بأيه من ساعة ما دخلت و شوفتها مرمية على السرير و جنبها علبة الدوا دى
أقولك أنا احساسى ايه كنت حاسة انى مش قادرة أتنفس كنت حاسة ان الدنيا حواليا وقفت مشيت معاكم للمستشفى وانا حاسة إنى مش فى وعيي و لما الدكتور قال إنها ماتت مشوفتش غير ذكرياتى معاها هو ده اللى جه قدامى لما دخلت اوضتها فى كل ركن بصيت فيه شوفت فيه ذكرى ليا معاها
مش هعرف أوصلك يا ماما أنا حاسة بأيه مش هعرف

تساقطت دموعها حزنًا على ابنتها و حزنًا على الأخرى التى فارقتهم تاركة إياهم فى متاهة لا يدرون من أين مخرجها

أحتضنتها والدتها و قالت بحنان : ربنا يصبرك و يربط على قلبك يا نور عينى ربنا ما يورينى فيكِ حاجة اكرهها ابدًا

أبتعدت عن أحضان والدتها و كفكفت دموعها و قالت بصوتٍ خافتٍ متحشرج إثر دموعها : هروح اتطمن على طنط و اجى

هزت والدتها رأسها بحزن و قالت : طب يلا انا جاية معاكِ

طرقت همس عدة طرقات على الباب حتى فتحت لها والدة ريم التى تبدلت إلى أخرى عقب وفاة ابنتها و أشارت لهم بالدخول
قالت همس وهى تجلس : خدتى أدويتك يا طنط

هزت رأسها بالنفى فعاتبتها همس قائلة : ليه يا طنط أنتِ عايزة تجرالك حاجة و تزعلى منى ريم

ردت والدة ريم بخفوت : يارب أروحلها قريب

ثم أعادت النظر إلى همس و قالت : أنا اللى قتلت بنتى يا همس