تبتدي روايتنا بالديره ببيت ابو بدر كانت نوره بالمطبخ تدندن بعض الاغاني بصوت خفيف قاطعها دخول ابوها
سالم : اليوم عندنا غداء واكتبو الاغراض الي تبونها لبدر يجيبها او عطوني اياها
لطيفه : بس ماقلت لنا لمن الغداء
سالم : والله قلنا بنجتمع مع اخواتي عيالهم وزوجاتهم تتونسون
لطيفه : اي والله زين سويت يابو بدر واحشينا بالحيل
نطت نوره بفرحه : بيجون سلمى وشوق ؟
سالم بضحكه : اي يالخبله كلهم جايين بس الله الله بالغداء السنع
نوره : ابشر والله على خشمي
سالم : يالله انا طالع توصوني بشي اجيبه
لطيفه : برسل لك الاغراض بالواتس الله معاك
سالم : فمان الله
بجهه ثانيه عند بيت ابو يزيد
عبدالله : اي والله اليوم الغداء عند سالم وبعده بنجتمع كلنا عند ابوي وامي لنا اسبوع من زرناهم
زينب : زين سويتو والله واحشتني ام بدر بس البنات وين ؟
عبدالله : قلت لهم قبل شوي وراحو يجهزون
زينب : بروح اجهز مافي وقت
عبدالله : زين بس استعجلو
بعد ساعه عند سلمى وشهد
سلمى : شوق دامك مخلصه مكياج وخري الله لا يضيق علينا
شوق : وانتي وش عليك وين اقعد
تنهدت سلمى : اقعدي لو فوق راسي بس وخري معد فيه وقت
شوق : الا صدق يزيد المخفه وينه ماشفته اليوم
سلمى : تلقينه رايح يتسربت مع بدر محد يتسربت بعز الظهر غيرهم
شوق بضحكه : هههههه وانا اقول وين مختفي طلع مع بدر عشان كذا مايرد على اتصالاتي بس هين انا اوريه
سلمى وهي تعدل شعرها : اي تكفين عليك فيه غاثتني
زينب : يلا يابنات ترا ١٠ دقايق وحنا ماشيين استعجلو
سلمى : ابشري يمه خالصين
بعد نص ساعه ببيت ابو بدر
سالم : ياهلا والله ابطيتو
عبدالله تقدم يحضنه وهو يضحك : والله البنات اخرونا بس معليه قدنا موجودين
سالم تقدم يسلم على سلمى وشهد
سلمى وهي تقبل يده : اعذرنا ياعم تاخرنا شوي
سالم باس راسها : يامرحبا فيكم متى ماجيتو والله
شهد بتمثيل للزعل : زعلت الترحيب والتهليل كله لسلمى
تقدم سالم بضحكه : جت جت شيختي والله انه نور البيت
شهد تقدمت تحب راسه بابتسامه : بنور اهله
سالم : الا وين امك ماسلمت عليها
شهد بتذكر : جايبه جح ومشت تدخله تقول ثقيل بحطه لا اطيحه
سالم : ليه متكلفين
لف عبدالله لسالم يقابله وجه لوجه : مامن كلافه وانا اخوك ، بيجي محسن وزوجته ؟
تقدمو البنات وهم داخلين بيساعدون بتحضير الغداء
سالم بتذمر قلب عيونه : كلمته وفصل بوجهي تعرف اخوك مافي اقشر منه
عبدالله بصدمه : راعي الطبع مايخلي طبعه ماكلين حلاله وحنا ماندري
سالم : اندري عنه
عند البنات تقدمو بفرح يسلمون على عمتهم عايشه ونوره
نوره : هلا باللي مبطيين عنا
سلمى بضحكه : والله تونا نفضى
نوره : معليه اهم شي جيتو نتونس ونسولف العلوم متراكمه
تقدمت شوق بهمس للبنات : يبي لنا جلسه حش بعد الغداء بالحوش قولو تم
البنات بحماس : تم هههههه
عايشه : بنات حطو الغداء وصلو يزيد وبدر
نوره : ابشري يمه
خلصو البنات وحطو الغداء
نوره بمناداه لبدر من عند الباب : بدر الغداء
تقدم بدل ياخذ الصحن منها : من عندكم
نوره : عندنا عمتي وبناتها
بدر بأستغراب : غريبه ماجا عمي محسن وزوجته
نوره : لا تسأل كلنا منصدمين بس محد يبيه ان جا خرب الجمعه بنفسيته
بدر وهو يحاول يمسك ضحكته : هههههه اسكتي لحد يسمعك
نوره : الغدا بيبرد اخلص
بدر : يلا ماشي
بعد ساعه بالحوش عند البنات
نوره : تدورن ان عبد العزيز وهنوف مخطوبين
سلمى بأستغراب : صادقه ، متى صار هالكلام
نوره , مدري توني سامعه الحريم يتكلمون
شوق بتصفيق وحماس : حلو يعني جاينا عرس اخيراً
نوره بابتسامه : عاد ذا الي مفرحني
سلمى : العرس هنا ولا بالرياض
نوره بشك : والله مدري اشك انه بالرياض
سلمى : وجدي وجدتي ماهم مسافرين يمكن يسوونه هنا
نوره : ذا اللي مشككني بس بننتظر ونشوف
شوق : غريبه يزيد ماقال لنا
نوره ؛ حتنى استغربت بدر ماقال بس شكل الموضوع توه صار ولاهم عارفين
بجهه ثانيه بمزرعه الجد الي بنفس الديره
ختيه : ياعمه فيه شي يعورك ؟
منيره بألم : لا يابنتي بس احس اني مكتومه
ختيه : تبين علاج ولا شي
منيره : سمعت ان المشي يفيد بقوم امشي مر اليوم وانا منسدحه
ختيه : مايخالف ياعمه واذا بغيتي شي ناديني
منيره تقدمت تمسك حافه السرير عشان توقف : ماتقصرين يابنتي
مشت منيره خطوتين تمشي بالبيت حست بنبضات قلبها سريعه حاولت تتمسك باقرب شي عندها لما حست بصداع قوي ماقدرت تقاوم اكثر طاحت مغشيه على الارض
صاحت ختيه اول ماشافتها لمحسن وعمها كسار : عمتي اغمى عليها الحقو
تقدمو مسرعين لها بخوف امتلك قلوبهم كسار الي كان يتفقد نبضها وشاف ان فيه نبض ارتاح
كسار : شفيها
ختيه بصياح : كانت تقول لي انها مكتومه بتمشي وجيت على طيحتها
كسار : محسن اسبقي للسياره شغلها وحنا جايينك
محسن : استعجل يبه
عند سالم وعبدالله جا لسالم اتصال من ابوه رد عليه كسار : تعال انت وعبدالله المستشفى امكم اغمى عليها وللحين ماطلع الطبيب
سالم بريبه : يلا جايين
عبدالله بقلق : شفيه وجهك انقلب
سالم : أمي بالمستشفى
عبدالله بصدمه : ليه شفيها امي
سالم بأستعجال : مدري والله امش بنروح لهم
بعد ساعتين بالمستشفى وصلو كل ابناء منيره بعد اتصال كسار عليهم كانو كلهم بدون استثناء متوترين كانو عند امهم من اسبوع ماكان فيها شي قاطع سرحانهم الطبيب : الحمدلله المريضه صحت
سالم : الحمدلله يارب نقدر نشوفها
الطبيب : امكم عندها مرض بالقلب من متى وهو عندها
اعتلت ملامحهم الصدمه تقدم كسار : بس زوجتي ماعندها القلب
الطبيب : مع الفحوصات باين لنا ان عندها القلب شكله عندها من فتره بسيطه وتوكم تكتشفونه
عبدالله بقلق : تقدر ترجع المزرعه ولا بتقعد بالمستشفى ؟
الطبيب : عادي توها بدايات المرض وصفت لها علاجاتها والباقي عليكم
ناظر كسار لحاله عياله وقعد يفكر بينه وبين نفسه كيف يصارح بناته وهم عايشين بالرياض خاف من رده فعلهم خاف يتأثرون لان بناته اكثر ابناءه تعلقاً بامهم استصعب قوله لهم لمثل هالخبر لذلك وصى سالم انه هو الي يخبرهم
—
بالرياض تحديدا ببيت ابو عبدالعزيز
نجد باستغراب : يمه جوالك يدق
عايشه : ماني فاضيه والله الحين بس مين الي يدق
نجد : خالي سالم ومنه مكالمات قبلها بس الظاهر مارديتي عليها
عايشه بتوتر تركت كل شغلتها وركضت ترد على الجوال بقلق : هلا والله اعذرني انشغلت شفتك مفجر جوالي اتصالات صاير شي
سالم : امي طاحت علينا اليوم وطلع عندها القلب قالي ابوي اخبركم انتي وحصه
عايشه بصيحه : وش تقول انت امي مافيها الا العافيه توني امس مكلمتها
سالم : والله مدري قايل الدكتور ان المرض من فتره عندها بس انها الحين طيبه وراجعه للمزرعه
عايشه : حصه داريه ؟
تنهد سالم : اي توني فاصل منها المهم لاتخوفون اعماركم هذاهي طيبه وفمان الله مشغول الحين بعدين بكلمك
سكرت عايشه الخط وهي تصيح امها مريضه ، توها امس مكلمتها تضحك معها وتسولف كيف بيوم وليله تتعب مسكت راسها للصداع الي اجتاحها فجاءه سمعت صوت رنه جوالها للمره الثانيه التفت تمسك الجوال وتمسح دموعها بهدوء ترد عالمكالمه
حصه بقلق : وصلك العلم
عايشه : اي والله وصلني
حصه : اسمعي توني مكلمه زوجي يوم درا بمرض امي اقنعته نروح المزرعه عندها اهتم فيها لا ينشغل بالك عليها
عايشه بتفكير : لا والله ان كان حد رايح ف هي انا
حصه : يابنت الحلال قدنا خالصين وبنمشي بكره قلت لك عشان ماتشيلين هم
وقفت عايشه وهي ماسكه راسها برفض تام : لا والله وانا جايه امي كيف تبيني اهدا وانا بعيده عنها فتره مرضها ، بكلم مطلق بالموضوع
حصه : يصير خير ان شاء الله
توجهت عايشه مسرعه لمطلق
مطلق : عسا ماشر خوفتيني
عايشه بصياح : امي عندها القلب يامطلق توها طايحه اليوم عليهم ابروح عندها اهتم فيها انا طالبتك يامطلق
مطلق بخوف : ابشري والله ، بس شغلي هنا بالرياض ما اقدر اخليه واروح صعبه
عايشه : بنروح انا ونجد وعبد العزيز وهادي وانت خلك هنا ومتى ماجتك اجازه تعال المزرعه
مطلق بتفكير تقدم يحب راسها : الله يكتب الي فيه الخير قومو جهزو شناطكم
قامت عايشه بفرح واستعجال ترض لغرفه نجد
عايشه : نجد يمه قومي جهزي ملابسك بنروح المزرعه لامي
نجد وملامح الصدمه اجتاحت وجهها : ليه فيها شي جدتي ؟
عايشه : اي قالو تعبانه وكشفو طلع فيها القلب ، وترا حنا وخالتك كلنا ماشيين
نجد : مايصير خاطرك الا طيب الحين بجهز الشناط
مر اليوم بخيره وشره وكل البيتين يجهزون للروحه لمزرعه الجد
بعد مرور يوم ببيت مطلق
مطلق : يعيال خالصين ؟
عبد العزيز : اي والله بس باقي بروح اشغل السياره انتظرهم لين يجون ونتوكل على الله
تنهد مطلق : وعمك مصلح مشو ولا باقي ؟
عبد العزيز : اي توني مكلمهم ماشيين لهم ساعه
مطلق : الله يستر عليكم
بعد عشر دقايق
عايشه : نجد ، هادي يلا ترانا ماشيين لنا ساعه نحتريكم
نجد : يلا جايه يمه
عايشه : وهادي وينه
نجد : مضيع جواله يدورله
عايشه : يلا استعجلو
