وصلت كاترينا للسبيطار مع سليم
سليم: روحي ماطوليش
كاترينا: ندخل وحدي؟
سليم: ايه نسناك هنا انا
دخلت كاترينا وحدها تمشي بسيف الدوخة حاكمتها دخلت عند الطبيبة كانت تحكي معاها بالإنجليزية فحصتها وهنا كانت الصدمة
الطبيبة: مبروك عليك مادام راكي حامل
كاترينا بقات مشوكيا المشاعر تخلطولها الفرحة مع الخوف مع الحزن بقات ساكتة
الطبيبة: ماتخافيش مادام هذا الشي طبيعي في بداية الحمل رح تعاني شوية معاه لازمك تصبري
كاترينا: اوك
الطبيبة: راني نشوف فيك ماراكيش فرحانة راكي خايفة ؟ ماتخفيش مام انا كي عرفت راني حامل اول مرة حسيت هذا الاحساس بصح كي تشوفي البيبي تاعك قدامك صدقيني احساس مانقدرش نوصفهولك اجمل حاجة تقدر تصرالك في حياتك ،راني كتبتلك هنا بعض المكملات برك باش توقفي على رجليك ماتبقايش هكذا فاشلة وتحسي روحك مليحة وبلا مانوصيك ماتعبيش روحك وبعدي على الزعاف بالاكي على روحك قدر المستطاع وبعدي على العلاقة مع راجلك لفترة الرحم تاعك راه متضرر وهذا الشي رح يأثر على الجنين لازمك تحافظي على روحك الماكسموم وفي الفترة هاذي لازم تولي جي عندي بزاف كونترول حتى يبرا الرحم تاعك ويولي كلش في بلاصتو وحاولي تبقاي في الفراش ماتتحركيش بزاف يكون احسن
شكرت كاترينا الطبيب وخرجت تمشي وتخمم كفاش دير دك هذا الطفل هو اجمل حاجة صراتلها في حياتها بصح سليم ماراحش يفرح بيه ،لكان يقولها مانسحقوش طيحيه كفاش دير ؟ مستحيل تقدر دير حاجة كيما هاذي ،كفاش دير تقولو ولا ماتقولوش
سليم: خلاص كملتي
كاترينا: ايه
سليم: واش بيك واش قالولك
كاترينا : والو شوية دوخة برك
سليم: علاجال شوية دوخة جايبتني هنا
كاترينا : المرة الجاية نجي وحدي مانتعبكش
سليم: علاه كاين مرة جاية تاني ؟
كاترينا: ايه قاتلي عاودي ولي
سليم : مصيبة وخلاص
.
.
.
راحت كاترينا للدار وبقات تخمم تخمم تخمم وفي الاخير قررت ماتقولوش على الرغم من انها قد ما خبات عليه رح يعرف يعرف هاذي حاجة ماتتخباش
سليم راح للشركة دخل ديراكت عند نور راح عنقها وبدا يبوس فيها وهي عاجبها الحال
سليم: وليت مانحملش نقعد معاها خلاص كرهتها راني حاب نبقا غير معاك
نور: دك تطلقها وتتهنا منها ونعيشو انا وياك
سليم: ايييه بصح صعيبة كفاش رح ندير ، انا بابا وراني نخمم كفاش نقولو بلا مانلحق لباباها هي ڨاع
نور: وجه الشر ملي شفتها ماشفتش الخير ربي بلاني بيها
.
.
.
معاذ كان قاعد وحدو مقابل البحر وسارح في افكارو كفاش رح يدير واش رح يصرا لعلاقتهم واهم حاجة ردة فعل سيليا لي ماكانش ڨاع متوقعها كان الهم باين على وجهو وهو هكذاك حتى انحطت يد على كتفو لقاها طفلة
الطفلة: ماعليش نقعد معاك
معاذ ماجاوبهاش
الطفلة: السكوت علامة الرضا هههه
قعدت قدامو ومدتلو يدها تسلم عليه
الطفلة: هاي انا نارمين ونتا؟
معاذ ماجاوبهاش ماشافش اصلا فيها
نارمين: ممممم ماعليش انا نخيرلك اسم نعيطلك بيه مممممم🤔 ااااا لقيتها نسميك المغبون ههههه
شباب عجبك ؟
معاذ:......
نارمين: السكوووووت علامة الرضااااا ههههه
الحياة جميلة بحلوها ومرها ماتبقاش غابن روحك تمرض في روحك مكاش لي حياتو راهي مثالية (غزرت في معاذ) waaaaaait a minute ماتقوليييش طفلة دارتلك هكذا noooo waaay من نيتك راك تبكي علاجال طفلة هههههه عيشاتك خيبة امل واقيلا ،واش درتلك واش خدعاتك ؟ سمحت فيك؟ والله مقود نتا 😂😂 واقيلا نتا بهلول على روحك 😂😂 رانا في 2024 مازالتو تأمنو بالحب ياو ماكاش منوووو
معاذ: تهدري بزاف اسكتي ولا نوضي
نارمين: يااااه تهدر كنت حاسباتك عڨون 😂😂
معاذ غزر فيها غزرة تخوف
نارمين : يا مامااا مخييف خلاص خلاص راني ساكتة
.
بعد نصف ساعة
.
نارمين : البارح جنازة تع بابا انا اصلا ماما ماتت كي كنت صغيرة ودك زاد راح بابا
معاذ:....
نارمين: هي الواحد كي يموت باباه الاحساس باين واش يكون بصح كي يكون مات مقتول ولي قتلو هو خويا واش هو الاحساس؟ وكي يكون قتلو علاجالي باش يسلكني منو واش هو الاحساس ؟؟ راني نسقسي فيك علاخاطرني مانيش عارفة واش نحس ههههه راني نحس روحي عديمة المشاعر ماعلاباليش اذا البروبلام فيا ولا وين
كان عندي اب و اخ في هاذي الدنيا دكا بابا راه تحت التراب وخويا راه في الحبس بقيت وحدي ،مانضنش الموقف لي غبنك نتا رح يكون اسوء من الموقف لي راني فيه انا
(شافت في معاذ) واش رايك ؟ انا اسوء ولا نتا؟
معاذ: علاش قتلو
نارمين: اغتصبني ههههه
معاذ: (بصدمة) وراكي تضحكي!! مهبولة نتي ولا بعقلك ؟
نارمين : نضحك علاخاطرها حاجة تضحك🤷🏻♀️ اب يغتصب بنتو ، تحسها نكتة لا ؟ انا لوكان جاو حكاوهالي نحسبها نكتة مستحيل تكون حقيقة انا عشتها ومازالني ماشي مصدقتها
هيا السي الشباب ونتا واش حكايتك حكيهالي انا حكيتلك حكايتي
معاذ: ماشي انا قتلك احكيلي
نارمين : ههههه اوك ماعليش ماتحكيليش راني جيعانة نروحو ناكلو حاجة؟
معاذ: مع السلامة كولي وحدك بصحتك
نارمين : يااااه واقيلا نتا دايها في روحك بزاف تحسب راني حابة ناكل معاك ،ماعنديش دراهم برك من بارح ماكليت والو
معاذ: وانا واش دخلني
نارمين : شوية انسانية يا ناس شوية انسانية يا عالم انا اتألم بطنييييي يتألم مانغيضكش؟ فتاة جميلة متشردة جائعة
يااااه مازال قاعد هيا نوض نوض نوض
بقات تحكم فيه من يدو و تنوض فيه حتى ناض
نارمين : وين راهي طونوبيلتك ماتقوليش ماعندكش طونوبيل لا تبان مرفه باينة عندك وين راهي
معاذ: تهدري بزاااااف
نارمين: من صباح وانا نمشي وااااش عييت
ركبو في الطونوبيل
نارمين : الله يبااارك طونوبيلتك شابة، واش تخدم اااااا ولا باباك شراهالك امممم صحااااا
معاذ:....
نارمين: وين رانا رايحين واش رح ناكلو قولي قولي قولي انا حابة بيزا
معاذ: راكي سير نتي باباك اغتصبك
نارمين : لا ماشي غتصبني غتصبني كان يغتصب فيا مباعد جا خويا كوپاهالو في النص يعني نصف اغتصاب
معاذ:(شاد الضحكة) ايه المهم راكي سير نصف غتاصبوك
نارمين : ايه علاش
معاذ: راكي راكبة مع راجل ماتعرفيهش وماعلابالكش وين راه دايك
نارمين: ااااا لالا تبان ناس ملاح نتا ديجا عندي حاسة سادسة انا علابالي ماديرلي والو ، ولا رح تغتصبني نتا ثان؟ اذا رح تغتصبني بليييييز خليها حتى مور ما ناكلو بلييييز
معاذ بدا يضحك
نارمين : واخيييرا شفنا هذيك الضحكة الزينة هههههه
.
.
.
.
.
.
لبنات راني قررت ماندخلش حكاية تع ام سيليا
واش رايكم في الشخصية الجديدة حبيتوها ؟ واش تتوقعو رح يكون دورها في القصة ؟ وكاترينا تظنو اتخذت القرار الصحيح؟ نور نحس شخصيتها ولات شريرة واش رايكم ؟اعطوني رايكم وتوقعاتكم
تفاعلووووو يا قوم هههههه
هيا نتلاقاو في البارت الجاي ان شاء الله
تششششاو ❤️❤️
