معاذ قاعد في الرمل مقابل البحر يستنا في ردة فعل سيليا ، سيليا خملت صوالحها لبست حوايجها وخرجت عندو
سيليا: اديني لدارنا
معاذ: اوك اركبي نبدل حوايجي ونجي
معاذ قلبو تقطع بصح ماقدر يقولها والو من حقها ماتقبلش تكمل حياتها مع واحد كيفو بصح ماشي كانت تقول لي هي تحبو وماتقدرش تعيش بلا بيه ماشي تحملت كلش غير باش تكون معاه ماكانش متوقع ردة الفعل هاذي صراحة كان متمني تعنقو وتقولو راني معاك مانسمحش فيك هاذي المرة الثانية لي يغدرو فيها قلبو كان يقول هاذي هي الطفلة لي رح تحبو من قلبها وتتحدا كلش علاجالو بصح كان غالط
كمل لبس حوايجو وخرج راح للطونوبيل بخطوات متثاقلة فتح الباب قابلاتو سيليا ماكانتش تشوف فيه كانت مدورة وجهها شافها الدمعة طاحتلو ماقدرش يوقف على رجليه كان رح ينهار حرفيا بصح لالا مايقدرش يبان ضعيف اكثر قدامها مسح دمعتو وركب وقلعو للدار طريق كاملة كلمة ماقالوهاش
.
.
.
سليم ونور خرجو من دار رايحين للخدمة
سليم: مازالها تعيط بالاك كاشما بيها خلي نروح نشوفها
نور: وانا تحطني هنا ولا واش ( كانو في نص الطريق)
سليم: لالا حبيبي نوصلك ونروحلها
نور : اووووف خلاص ماعليش نزيد نصبر شوية وخلاص حتى طلقها و نتهنا منها
.
.
.
سليم: راني جيت واش كاين
كاترينا: وين كنت من صباح نعيطلك مكاشك
سليم : كنت في الخدمة
كاترينا: عيطتلهم في الخدمة قالولي مكاشك وماجيتش ڨاع
سليم: ايه كانت عندي خدمة برا ماشي في الشركة
كاترينا كان علابالها كان مع نور اصلا شمت فيه ريحة تع نسا بصح سكتت وماقالت والو المهم مازال راجلها مازالت على اسمو خير من أنها دير مشكل وتخسرو نهائيا
كاترينا: ماعليش عيطتلك مانيش حاسة روحي مليحة
سليم : والمطلوب مني!
كاترينا: اديني للسبيطار كفاش المطلوب منك
سليم : ايه وجدي روحك راني برا نسنا فيك
كاترينا : مانيش قادرة قتلك مانيش مليحة
سليم: قولي للخدامة تعاونك راني برا
سكتت كاترينا وناضت تلبس في حوايجها وتبكي واش ذنبها زوجها باباها براجل ماتعرفوش غير علاجال مصالحو وزيد من زهرها زوجوها براجل يعشق في مرا وحدوخرا مهما حاولت تخليه يحبها ماقدرتش وفوق هذا الشي كامل ماتقدرش تسمح فيه ، علاجال باباها ؟ لالا ماتقدرش تسمح علاخاطرها تحبو تحبو من كل اعماق قلبها مستعدة تموت وماتعيش بلا بيه بصح مع الاسف الشديد هو مايستهلش حبها وعمرو مارح يبادلها نفس الشعور
نظن جا الوقت باش تعرفو السر اللي كاتريتا طول عمرها مخبياتو على سليم
سليم هو حب طفولة كاتريتا كي راح سليم مع عايلتو لايطاليا كان صغير كيما علابالكم وكي التحق بالمدرسة كاترينا كانت في نفس المدرسة وهو لفت انتباهها من نهار اللول وبقا حبها ليه يزيد نهار بعد نهار حتى ولات تحبو حب افلاطوني
كاترينا وسليم كبرو وافترقو بصح كاترينا كانت دايمن متبعاتو ومتبعا اخبارو أول بأول حتى وحد النهار عرفت بلي بابات سليم رح يفلس واوضاعهم المالية كانت تتدهور
بابات كاترينا من اكبر رجال الاعمال في ايطاليا وعندو دراهم اضعاف المضاعفة على بابات سليم
كاترينا كي عرفت بالخبر راحت تجري عن باباها طلبت منو يساعد بابات سليم أو بالأحرى سليم نفسو واش يهمها هي في باباه وكانت أنانية شوية وطلبت انو يساعدهم بشرط ان سليم يتزوج كاترينا وبحكم كاترينا هي وحيدة باباها ومدللة تاعو ومايرفضلهاش طلب قبل يدير واش قالتلو المهم تكون بنتو فرحانة وماكانش عارف للاسف انو بنتو رح تتوجع بزاف في هذا الزواج
وهاذي هي قصة كاترينا وكفاش تزوجت سليم وهنا تقدرو تعرفو انو سليم مارحش يقدر يطلق كاترينا إلا إذا هي قبلت
.
.
.
سيليا وصلت لدارهم راحت تجري لشومبرتها وغلقت الباب على روحها ماكانتش تبكي بصح كانت مصدومة وفي حيرة ماعرفتش واش دير واش القرار لي تتخاذو
تكمل مع حب حياتها وتضحي بكلش علاجالو ولا تضحي بحبها وتحمي نفسها من الوحش لي مخبي في معاذ
معاذ كان شاد روحو بسيف غير نزلت سيليا بداو دموعو يسيلو حكم طريق وقعد غير يسوق ويبكي ماعلابالوش وين يروح الدنيا ضاقت بيه
.
.
.
.
.
.
البنات الرواية تاعنا راهي فيها قصتين
قصة نور وسليم وقصة سيليا ومعاذ
راني نخمم نزيد قصة ثالثة عندها علاقة بأم سيليا
واش رايكم نزيدها ولا القصتين يكفو
.
.
رح يكون بزاف مفاجآت في حكايتنا اتحمسو شوي
ماتنساوش تتفاعلوووو كثرو الكومنونتارات 😁😁
حبكم ❤️
