سيليا بقات في شومبرتها ڨاع ماخرجتش بقات غير تخمم واش راح دير وفي الاخير اتخذت القرار وقررت تخبر معاذ
سيليا: شحال راهي ساعة (لقاتها 3 تع صباح) يكون راقد دك خلي غدوة نعيطلو
حطت تيليفون وبقات متكسلة وتشوف في السقف
فاتو 5 دقايق
سيليا: اففففف مانقدرش نصبر حتى غدوة
📞📞🎶🎶
....:الو وييي
سيليا:........
....:الووو
سيليا: ش..شكون نتي و....وينو معاذ
....: انا نارمين ،معاذ راهو راقد تحبي نوضو؟.....الوووو...الوووو
سيليا بقات مشوكيا شكون هاذي واش راهي دير مع معاذ واش راهو صاري فقدت اعصابها وبدات تكسر في اي حاجة تلقاها قدامها ناضت يمات سيليا مخلوعة راحت تجري عندها بقات تهدي فيها حتى تكالمات سيليا بقات تسقسي فيها واش بيها سيليا ماقالت حتى كلمة بقات غير ساكتة وتبكي
(في نفس الوقت عند معاذ ونارمين)
نارمين: معاذ نوض معاااذ .... معاذ سيليا عيطتلك
معاذ ناض يجري
نارمين: واش بيك مخلوع خلاص رفدت عليها وقتلها راك راقد
معاذ: رفدتي عليهاااا كفاش ترفدي عليها مهبولة نتي!! واش قاتلك
نارمين : والو كوپات
معاذ : نوضي نوضي
نارمين : ويييين اااي يدي وجعتني
معاذ: امشي وسكتي
.
.
.
نارمين: وين رانا هنا
معاذ: اقعدي هنا دك نجي بلاكي تتحركي منا
راح معاذ عند سيليا طبطب في الباب فتحتلو يماها
ام سيليا: معاذ واش كاين واش بيها سيليا واش جابك نتا دكا
معاذ ماجوبهاش راح يجري طلع عند سيليا لقاها قاعدة في الارض في كوانة وتبكي راح عندها عنقها طبعاتو سيليا بعداتو عليها
معاذ: سيليا عمري واش بيكي واش كاين
سيليا: روح ماتهدرش معايا نتا رخيس وماتسواش
معاذ: علاش راكي تقولي هكا واش درتلك
سيليا: واش درتلي وتزيد تسقسي وجهك صحيح ، نهار يا ربي نهار واحد ماقدرتش تصبر ،انا ڨاع واش درت فيا وبقيت فيدال ليك وجامي شفت في وحداخر ،بقيت كي الكلبة نتبع فيك ونجري موراك وصابرة، ونتا نهار واحد برك ماقدرتش تصبر
معاذ: والله راكي ظالمتني يا حبي والله ماشي كيما راكي فاهمة
سيليا: لالا كيما راني فاهمة مانيش حمارة نعيطلك على 3 تع صباح ترفد عليا وحدة، واش معنتها، معنتها كنت بايت معاها كاين تفسير وحداخر من غير هذا ؟!
معاذ: لالا صح كنت بايت معاها...قصدي ماكنتش بايت معاها افففف كفاش نفهمك ضركا والله ماشي كيما راكي حاسبة
نارمين: كان راقد في حضني كي عيطتيلو
معاذ: واش جابك يا المهبولة ماشي قتلك ماتتحركيش
سيليا: وزيد جبتها معاااك لهاذي الدرجة الوقاحة لهاذي الدرجة ماعنديش قيمة عندك
(معاذ وسيليا كانو في الارض ونارمين كانت متكيا على الباب ويديها مربعين)
نارمين : كان في حضني ويهترف باسمك ،نهار كامل وانا معاه نهار كامل وهو مغبون ويخمم فيك نهار كامل وانا نحلل فيه باش يقولي واش بيه وكي اخيرا قرر يحكيلي كانت هدرتو كامل عليك بقيت بسوايع وانا نسمع في حكاية سيليا وشحال معاذ يحب سيليا وبلي سيليا سمحت فيه وهو مايقدرش يعيش بلا بيها بقا يحكي ويبكي حتى رقد ،تحسبي كي رقد حبس؟ لالا بقا ينوم فيك ويهترف باسمك ،كي عيطتيلو كان راقد نوضتو ماحبش ينوض حتى قتلو سيليا عيطتلك باش ناض وناض يجري
(راحت نارمين عند سيليا وهبطت عندها ومدتلها يدها باش تسلم عليها)
نارمين : هاي انا نارمين تشرفنا سيليا
معاذ: خلاص نارمين روحي استنايني في الطونوبيل دك نجي
(تبسمت نارمين مع سيليا وراحت )
سيليا: شكون هاذي
معاذ: حكاية طويلة والله مباعد نحكيهالك بصح والله الحكابة ماشي كيما راهي في بالك انا نحبك نتي برك مستحيل نشوف في وحدة من غيرك
سيليا: كنت بايت في حضنها ودكا تقولها استنايني دك نجي
معاذ: علابالييي بصح والله ماشي كيما راكي متخيلة ديري فيا ثقة تعيشي والله مباعد نفهمك كلش
سيليا: روح عندها راهي تستنا فيك
معاذ: علابالي ماراكيش حاملتني وماراكيش حابة تشوفي وجهي بصح سيليا انا مانقدرش نعيش بلا بيك تعيشي ماديريليش هكذا والله نهبل بلا بيك
سيليا: .....
معاذ: ماعليش علابالي ماكيش حابة تحكي معايا من حقك خوذي راحتك بصح قاتلي نارمين عيطتيلي ،على الاقل قوليلي واش كنتي حابة تقوليلي
سيليا: خلاص بطلت ماكنت رح نقول والو
معاذ شدلها يدها باسهالها وحطها على خدو وغمض عينيه
معاذ: ماتحرمينيش من هاذ الاحساس سيليا ماتحرمينيش من الحنان تاعك ماتحرمينيش من حبك ماتحرمينيش من وجودك معايا ماتحطمينيش كثر ملي راني محطم بلا بيك كنت ضايع ماتخلينيش نعاود نضيع خلاص مانقدرش نتحمل كثر من هكا علابالي نتي تستاهلي واحد خير مني بصح الله غالب هاذي حاجة ماشي بيدي حاجة فوق طاقتي علابالك ندير كلش علاجالك غير باش نشوفك فرحانة بصح الله غالب انا ثاني انسان وربي خلقني هكذا خلاص مانيش قادر نتحمل كثر ارحميني
معاذ كان يبكي ويهدر سيليا ماقدرتش تزيد تقسي قلبها عليها شداتو عندها وعنقاتو معاذ عنقها بوحد الطريقة كان متمسك بيها كان كي الطفل الصغير لي خايف ينحولو حاجة تاعو سيليا باستو من راسو وبقات ضاماتو ليها
سيليا: انا اتخذت قرار ونتمنا تتقبلو
معاذ: نتقبل كلش ماتسمحيش فيا برك
سيليا: قررت نأجلو العرس حتى تتعالج
معاذ شاف فيها وعينيه يقولو لالا
سيليا: ماقتلكش ننفصلو قتلك نأجلو العرس برك وكي تتعالج نتزوجو ونكملو حياتنا عادي ماتخافش راح نكون معاك في فترة العلاج ماراحش نخليك وحدك
معاذ: ولوكان مانبراش لوكان نبقا هكا للابد راح تبقاي تستنايني للابد ولا راح تروحي وتخليني
سيليا: لالا راح تبرا انا راني مؤمنة بهاذا الشي ماتستسلمش كون قوي
معاذ: راح نبقا عايش بالخوف كل يوم نقول دك اليوم تسمح فيا
سيليا: معااااذ قتلك تبرااا
معاذ: خلاص ماعليش قابل ماتخلينيش برك
سيليا: وحكاية الخرية لي جات معاك اليوم مازالني نستنا في التفسير قتلي ديري فيا ثقة راني دايرة ثقة ونستنا
معاذ : نحبك
سيليا: هيا خلاص روح دكا مباعد نحكو
معاذ: نحبك
سيليا: الطفلة راهي تستنا روح
معاذ: سيليا نحبك
سيليا: ههههه هيه مام انا نحبك ونموت عليك ثاني
معاذ: خلاص راني رايح
سيليا: بالسلامة
معاذ: راني رايح
سيليا : هيه روح بالسلامة
معاذ: راني رااايح
سيليا: ياااه وشبيك
معاذ حكمها عندو وحكم شواربها بقا يمص فيهم ويعض قطعهملها سيليا بعداتو عليها
سيليا: معاذ وجعتني خلاص
معاذ عاود جبدها ليها وحط لسانو في فمها وبدا يلعب بلسانها ويمص ويلحس في لسانها وشواربها بقا هكاك حتى سيليا راحلها النفس ضرباتو لصدرو بعد عليها
معاذ: نحبك
ورفد روحو راح
.
.
.
البنات علابالي بارت واحد في السمانة قليل يتسما قررت نبدا نحط 2 واحد بالخميس ولاخر يكون عشوائي في اي نهار نقدر نحطو على حساب وقت فراغي وعلى حساب تحفيزكم ههههه
انشاء الله يكون عجبكم بارت اليوم
.
.
.
وبالنسبة لروايتي الجديد كنت حابة نحطها في شهر اوت قولولي واش رايكم نبداها ولا نخلي حتى نكمل هاذي مباعد نبداها
وقولولي اذا متشوقين ليها ولا لا
وهذا مكاااان
بااي نحبكم ❤️❤️❤️
