الله ياغرامٍ اعذّب من قصيَد

32

جلس ذياب وقال : ياجدي متى بنقول للهنوف ؟
الجد بهدوء : بعد بكره اذا انتهى العزاء
عزيز باستغراب : وش معنى بعد بكره ؟
سلطان بضحكه : ياغبي آخر يوم عزاء
ابو محمد : عزيز قم صب لي قهوه
عزيز بسخرية : شو يعني قهوة ؟
ضحك سلطان : الله يلعنك تقلد الرياكشن ذاك ؟
ضحك عزيز وقام يصب لابوه
ابو فهد بجديه : عندي موضوع بكلمكم عنه
استغرب الكل من جدية ابو فهد وقال الجد : وشو ياراشد ؟
ابو فهد : جاني خطاب لريناد
رفع نظره بصدمه من على جواله ناظر فيه ذياب وهز راسه بالنفي ضغط على يده بقوه لين انكسر الفنجال ويده تصب دم على ثوبه الابيض ماحد لاحظه الا ذياب قام له واخذ شماغه ذياب وربط على يده
الجد بصدمه : لا ياراشد البنت صغيره عمرها ٢٠ !
ابو فهد : هذي هي اختها تزوجت وعمرها ٢٢
ذياب بحده : بس فيه فرق انا ولد عمها مو غريب
الجد : صادق ذياب تعطي البنت لغريب لا
ابو فهد : ماهو بغريب انا اعرف ابوه صديقي
ذياب انقهر على صقر وقال : حتى ولو غريب ياعمي
ابو فهد بحده : ذياب لا تتدخل
قام ذياب وقال : إلا لي دخل بنت عمي واخت زوجتي ، وماحد بيرضى من ال فهاد تزوجها غريب وهي باقي صغيره
ابتسم صقر من كلام ذياب ووقفته معه
ابو محمد : ذياب اجلس
هز راسه ذياب بالايجاب وجلس طبطب على كتف صقر ابتسم صقر وحضنه من على جنب
الجد بتساؤل : طيب من وين هم ؟
ابو فهد : من الرياض
الجد : اعتذر منهم
هز راسه بالايجاب وقام
ناظر سلطان يد صقر وقال : وش فيها يدك ؟
عزيز بضحك : وي لايكون لكمت ذياب
ذياب : مالك دخل انت وياه
محمد : ياعيال طفشت منكم
سلطان بسخريه : متزوج تراك رح عند زوجتك
محمد : ياخي طردتني نفسية حوامل
ضحك عزيز باقوى ماعنده وقال : سلطان تلاحظ اخواني منكرشين من زوجاتهم ؟
ضحك سلطان : اي والله من زمان ماشفنا الكناري سوا
ذياب ضحك وقال : هيا خذ اجتمعوا المتنمرين
سلطان : عزيز تدري من الوحيد اللي مابيكون بينهم مشاكل اذا تزوج ؟
ضحك عزيز وقال : معرررروف المثالي صقر
صقر بسخريه : اقول اسكت انت وشماغك ذا تقول كنه منديل
ضحكوا الكل وقال ذياب : صقر اعترف ماخذ كورسات ردود وذبات ؟
ضحك صقر وقال : اي ماخذها عند عزيزوه
عزيز بصدمه : مستحيل مني انا ؟ انا احتاج اساساً
ضحكوا وقاموا لبيتهم
< بعد يومين ، بالديرة >
آخر يوم عزاء طلعوا المعزيين وخلص العزاء جلس الجد ونطق : عزيز قفل البوابة وناد لي الهنوف والكل
هز راسه عزيز بالايجاب وراح يقفل البوابة ويناديهم
جلسوا الكل قدام الجد وهمست الهنوف لآلماس : غريبه ! وش يبي الجد فيني ؟
آلماس : مادري حتى انا استغربت
الجد : الهنوف يابنتي تعالي بجنبي
قامت الهنوف وجلست بجانب الجد مسك يدها وقال : فيه موضوع بكلمتس فيه وماعرف اذا بتتقبلين ولا لا
توترت الهنوف من شافت الكل يناظرها ومن حنية الجد عليها وكمل يقول : ادري انتس تقولين مامعي اخوان وام واب سند بس عندتس اخوان مثل الجبال رجال ، وعندتس ام واب مثل حنيتهم وطيبتهم مابتشوفين ، تعرفين من ؟
عقّدت حواجبها ناظروا البنات بصدمه ببعض هزت راسها الهنوف بالنفي وقال : انتِ يالهنوف اخت عيال حمد بالرضاعه يابنتي
انصدمت ونزلت دموعها تشوف اخوانها يبتسمون لها تجمعوا محمد وذياب وصقر وسلطان وعزيز وحضنوها بكت وقال ذياب وهو حاضنها : ليه الدموع يابنتي ؟
الجد بابتسامه وهو يشوفهم باحضان بعض قال : والجود اختس بس انها بالرياض
عزيز دمعت عيونه وقال : فاقد جودي الحمد لله عندي اخت زياده
ابتسمت آلماس من شافت صديقتها واختها الروح بالروح من يوم كانوا صغار اخت زوجها ناظر ذياب آلماس ابتسم من شافها فرحانه يدري بحبها للهنوف
صقر وهو حاضن الهنوف : ارحبي ياخيتي
استحت الهنوف وقال ابو محمد : يعني كل هالاحضان والحب لاخوانتس وابوتس وامتس مالهم شي ؟
ضحكت الهنوف وراحت لابوها باس راسها وقال :
حي الله الهنوف هلا بعيوني
الهنوف حست بغصه وقالت : الله يحيك
راحت وحضنت امها ونطقت : ارحبي يابعد روحي
بكت الهنوف بحضن امها طبطبت عليها ام محمد وقال عزيز بضحكه : عز الله جت اللي بتاخذ كل الدلع
ذياب : تستاهل الدلع الهنوف
ناظر صقر ريناد اللي بجانب امها وكانت لحظات وبتروح منه بس يحمد ربي ليل ونهار إن ذياب كان موجود حست بنظراته ناظرته وابتسمت شاف عيونها دليل انها مبتسمه ابتسم لها
قام عزيز وقال : اذا خلصت مشاعركم فأنا عندي مفاجأة
ضحك الجد : اشك فيك لايكون مقلب مو مفاجأة
عزيز : افا ياجدي لا والله مفاجأة
ذياب : طيب اخلص وشهي
سلطان : مايجي منك الخير ياعزيزوه
عزيز : اخوان للبيع ابيعكم حتى بحراج
ابو محمد : اخلص ياعزيز
عزيز : شفيكم معصبين ، انتظروني
راح يجيبها ضحكوا من شافوها قطوة بيضاء
الجد : ياصبي من وين جبت الجنيه ذي ؟
عزيز بصدمه : ياجدي مو جنيه حرام عليك اسمها مبروكة
سلطان بضحكه : وش الاسم ذا ؟
ضحك عزيز : والله حلو انقلع
قامت آلماس وقالت : عزيز عطني
عزيز ناظر بالقطوة وقال : هذي آلماس زوجة ذياب
ضحكت واخذتها حضنتها ونامت بحضن آلماس
الجوهرة : ياعزيز لايكون بتدخل معانا بالبيت !
عزيز : ايه ياعمه بخليها بالمقلط
الجد بحده : ياولد خلها بالحوش مابتدخل البيت
عزيز : ياجدي ! حرام بتبرد اذا خليتها
قام الجد : لا يكثر اقول الجنية مابتدخل
عزيز : ذا الجمال كله وجنيه اخ ياجدي
سلطان : جدي اي حيوان عنده جني وخلاص
عزيز : انت والله الجني اسكت
قام ذياب من جاه اتصال وقال عزيز بمزح : مين بتكلم اجلس هنا
ضربه بخفه على راسه خزّته آلماس بحده وهي تحسب بيكلمها حس صقر بآلماس وقال : يكلم ضيدان ماله بالسوالف ذي
هزت راسها بالايجاب وقامت راحت له تشوفه يضحك ويسولف بحماس سكت من شافها وقالت : ليه سكت كمل ؟
انصدم ذياب وحط ميوت وقال : شفيتس ضيدان ترا !
خزّته وراحت فتح الميوت وقال : هيا عرفت السالفة روح راضيها
ذياب بحماس : اقسم بالله مافكرت فيها يارجال !
ضيدان : الحمد لله اكون سبب صلاحكم
ذياب : الله يسعدك ياحبيبي ، ترا سفرتنا انا وهي لفرنسا بعد ثلاث ايام
ضيدان : روحوا انبسطوا وغيرو جو توصلون بالسلامه ياخوي
ذياب : الله يسلمك الله يحفظك ياحبيب قلبي
قفل ذياب من عرف بسالفة المكالمه ارسل لآلماس تجي شافها جايه وقال :
ارحبي عقب البطا والمشاكل والظروف
آلماس ببرود : وش تبي ؟
ذياب بابتسامه : بعلمتس سالفة المكالمه ذيك
عقّدت حواجبها وكمل : بالجنوب رحنا نتعشى انا وضيدان ونسيت جوالي على الطاولة وكان مفتوح وكانوا بنتين هناك المهم الواضح انها بتسبب مشاكل وسجلت رقمها وسمته حبيبتي بعد ماشافت رسايلنا وعرفت انتس زوجتي ، وبعدين تصاوبت بالدورة رحنا للمستشفى وكانت هي نفسها واخذت رقمي من سجل العساكر المُصابين اللي جو وعرفت اسمي كان على بدّلتي وحسبي الله
طنشت السالفة كلها وقالت : لحظة تصاوبت انت ؟
ضحك بخفه من اهتمامها وخوفها : ايه بس الحمد لله كانت خفيفه
نزلت دموعها بخوف وحضنته ونطقت : اساساً ماصدقت لانك ماتسويها فيني
ذياب : كل ذا والزعل وماصدقتي اجل كيف لو صدقتي ؟
ضحكت بخفه وتركته وقال : وعندي مفاجأه بعد
ابتسمت ونطقت : وشو ؟
ذياب : سفرة لفرنسا بعد ثلاث ايام
شهقت وقالت : تمززززح !
ذياب ضحك : والله
حضنته بفرحه حط وجهه برقبتها يستنشق عطرها استحت وقالت : هيا نروح نجلس معهم
مسك يدها ومشوا سوا عزيز بفرحه : رجعوا الكناري سوا
ضحكوا ذياب وآلماس وقال سلطان : اكبر فانز لكم عزيز
عزيز بحماس : اقسم بالله احلى كوبل قد شفتهم
ضحكت آلماس من كلام عزيز جلسوا ركضت مبروكه لحضن آلماس شالتها وحطتها بينها وبين ذياب
عزيز : ماش مبروكه حبّت آلماس اكثر مني انا ابوها طيب !
صقر بضحك : يعني انت حيوان !
ضحك عزيز بسخريه قام ابو محمد وقال : بنروح ننام حنا قفلوا الانوار بعدكم
سلطان : ياجماعه تبون نشوي دجاج وكباب ؟
وافقوا الكل وقام سلطان : عزيزوه قم تروح معي البقالة
هز راسه بالايجاب وقام وقال : يالكناري انتبهوا لمبروكة
صقر : جيبوا حطب معاكم
سلطان : يالله طيب قوموا جهزوا
< عند الجود وفهد >
طلعت بعد ماتروشت تناظره بالبلكونه اخذت جلالها وطلعت ابتسم من شافها جلست قدامه وقالت : متى نرجع الديرة ؟
فهد : والله مادري
الجود : نروح نسوي بيتزا ؟
فهد : اي والله اشتهيتها
صفقت بحماس وقام فهد يشيلها ضحكت بخفه : نزلني بطيح
دخلوا المطبخ طلعت الطحين اخذ بيده ورماه عليها صاحت وقالت : فهد ! توني متروشه
اخذت بيدها طحين ورمته على وجهه ضحك وقال : خلاص والله
خلصوا من البيتزا حطها على طاولة الطعام وجابت كولا وثلج وجلست بحماس تذوقها
فهد : وش تبين نشوف ؟
الجود : ابيك تسوالف بس
لعب بشعرها بخفه وقال : والله خواتي يقولون سوالفي خايسه
ضحكت ونطقت : لا والله حلوه
< بالديرة >
بعد ماتعشوا اجتمعوا مع شاهي يلعبون وقال عزيز : البنات فريق والعيال فريق تمام ؟
اجتمعوا البنات بجانب بعض ومقابلهم العيال قام عمر اللي بيسأل : اللعبة تجاوبون غلط
هزوا راسهم بالايجاب بحماس وقال عمر :
أين تقع السعودية ؟
عزيز بحماس : في قلبي
ضحكوا الكل وقال عمر : ١-٠ للعيال
عمر : لون التفاح ؟
الهنوف : ازرق
صارخوا البنات بفرحه وقال عمر : تعادل
عمر : وين مكان قلبك ؟
وهج : براسي
ضحكوا وقال عمر : ٢ - ١ للبنات
عمر : من وين نطلع النفط ؟
سلطان : من العزبة
ضحكوا وقال عمر : آخر سؤال وهو اللي بيحكم مين بيفوز
عمر : السباك وش يسوي ؟
ذياب : يغني
صفقوا العيال بفرحة وقام عزيز يرقص يقهرهم وقالت آلماس : ذياب خير ؟ كان خليتنا نفوز
عزيز بصدمه : حلوه ذي !
سلطان : ياخي الكناري ذولي مشكله
ذياب رماه بالمركى وقال : بنشوفك بعدين وش بتسوي
عزيز : مين اللي بتقبل فيه اصلاً
سلطان : انطم يابو مبروكة
عزيز : والله حلو الاسم
صقر : ذا البزر ابو مايصلح حده قطاوه يربي
عزيز : رجاءً يالمثالي لاتسب
ناظر ذياب لآلماس ابتسم وقام ولحقته تدخل البيت ونطقت : يعني غرفتك هنا مو بالحوش ؟
هز راسه بالايجاب وقال : ايه ماعاد صرنا بالحوش خلاص رجعت بغرفتي القديمه
آلماس بتساؤل : ليه ؟
ذياب بابتسامه : مارتحت هناك هنا احسن بين اهلي
هزت راسها بالايجاب وطلعوا لغرفة ذياب
آلماس : بروح اجيب اغراضي
سحبها وجلسها بحضنه وقال : لاتتهربين الشوق طاغي
غمضت عيونها وقامت : لا لازم اجيب اغراضي
تنهد وراحت آلماس قام يلبس بجامه ويتجهز للنوم طولت ماجت وانسدح ولحظات وغفى بنومه دخلت تشوفه نايم طلعت ملابسها تعلقهم بالدولاب بجانب ملابس ذياب اخذت بجامه وراحت للحمام تسوي روتينها اليومي رفعت شعرها واخذت كتابها تقرأ روايتها تذكرت انها مانزلت بارتات اليوم واخذت جوالها تعتذر عن البارتات قفلت جوالها ونامت بتعب 
< بالظهر ، بيت ابو محمد >
قامت تناظر مكانه فاضي رفعت شعرها وقامت الحمام طلعت وصلت اخذت لها جلابية وتعطرت ولبست جلالها ابتسمت من تسمع اصواتهم بالصالة نزلت وقالت : السلام عليكم
ردّوا السلام ناظرت ذياب وراحت تجلس بجانبهم
آلماس : قمت بدري ؟
ذياب : ايه من الصباح
هزت راسها بالايجاب
عزيز : يبه شف ذا البزر !
رفع نظره ابو محمد وقال : وش فيه ؟
عزيز : ماخذ مني الريموت وماشغل شي
نزل نظره ابو محمد على الجوال بعدم اهتمام تنهد عزيز
سلطان بضحكه : اقول رح عند مبروكه وينهي فيه ؟
عزيز : نايمه بفراشي بالمقلط
الجد بحده : كيف تراها حيوان ياصبي
عزيز : رجاءً لاحد يغلط عليها ماحد يحبني الا هي
محمد : والله انك بزر
آلماس بهمس لذياب : وين عمتي ؟
ذياب بابتسامه : بالمطبخ تسوي عريكه
ابتسمت آلماس ونطقت : بروح اساعدها
هز راسه بالايجاب وقامت تدخل المطبخ تشوف اصايل وام محمد
آلماس : اصايل روحي ارتاحي لاتتعبين نفستس تراتس حامل !
ام محمد : والله اني من اليوم اقول لها تروح مو راضيه
أصايل : بروح ارتاح اجل
آلماس : ياعمه وش تسوين عريكه ووش ؟
ام محمد : الحين اسوي مقرص العريكه اذا خلصت
آلماس بابتسامه : انا بسوي العريكه
ام محمد بصدمه : تعرفين ؟
آلماس : اي اكيد
ام محمد : بسم الله عليتس
ابتسمت آلماس ترفع جلابيتها من عند يدها وتاخذ العجينه تخبز واخذت براد الشاهي والقهوة تسوي وتحطهم على النار حطت الخبز وتفتفته بالصينيه واخذت التمر تصفه وبوسط العريكة سمن ابتسمت باعجاب تاخذ العسل وتصبه بعشوائية ناظرت ام محمد وقالت : ما شاء الله تبارك الرحمن
تجمعوا الكل حول السفرة
ام محمد : ترا العريكة مسويتها آلماس
اتسع مبسمها من شافت الكل يمدحون ونطق ذياب بهمس لآلماس : تسلم يمينتس ياحَرم ذياب ألذ عريكة قد ذقتها
آلماس بابتسامه : بالعافية ياحبيبي
عزيز : عادي اوكل مبروكه معانا ؟
صقر بضحكه : مستحيل عزيز يستأذن ؟
خزّه عزيز وقال الجد : هاذيك الجنيه لاعاد اشوفها
تنهد عزيز : ياجدي مو جنيه الله يخليك
ذياب : طيب خلاص مو جنيه الحين انت صادق بتأكلها عريكة ومقرص ؟
ضحك عزيز ونطق : عادي تصير مبروكه الجنوبيه
ضحكوا الكل وقال الجد : ذياب وش صار على سفرة الجنوب ؟
ذياب : بتكون بعد مانرجع انا وآلماس من فرنسا
عزيز بصدمه : اما تسافرون ؟! ليه انا مادري
ذياب : حلوه ذي ! ابوي عشان اعلمك ؟
صقر بضحكه : كلنا درينا ياعزيز انت آخر من تدري
سلطان : اول مره يفوت خبر كان نقال علوم اول باول
عزيز : جدي تكفى هيا انا وياك نسافر معهم
الجد اخذ الخبز وقال : انت حتى على سفرتهم تخاشرهم ! وبعدين وش يوديني لبلاد الاجانب ؟
عزيز : عادي بسافر مع زوجتي بس مابروح فرنسا ذي كلها فيران ، المهم انبسطوا يالكناري والصراحه للحين انا مصدوم البدّوي ذياب يروح لفرنسا !
ذياب بضحكه : ماني بدّوي لو سمحت حضري انا
ضحكت آلماس وضحك ذياب ونطق عزيز بصدمه : ياويلي جدي ابوي شوفوا وش يقول وهو حتى توه ماراح فرنسا
الجوهرة : عزيز شرايك انا وياك بس نسافر ؟
عزيز بفرحه : صدز ياعمه ؟
عمر : يمه ! ولدتس انا نسيتيني
عزيز بحده : اسكت يابزر انت
عمر : ماني بزر انا عمري ست سنوات لو سمحت
عزيز : ياحبيبي بوديك البقالة بعد شوي
قامت آلماس وقال ذياب : مافطرتي؟
آلماس بابتسامه : الحمد لله شبعت
راحت للصالة صبت لها شاهي وجلست على جوالها ابتسمت من شافت عمر يركض لها وقال : آلماس عادي اجلس معتس ؟
ضحكت من براءته واخذت يده تجلسه بجنبها
عمر : ليه تزوجتي ذياب ؟ انتِ حلوه مايستاهلتس
آلماس بابتسامه : نصيب وبعدين ليه ماتحب ذياب ؟
عمر نزل وجهه : دايم يهاوشني وعصبي مايحبني
آلماس وهي تلعب بشعره : وش دراك انه مايحبك ؟ بالعكس يحبك كثير وترا ذياب طيوب صح انه عصبي بس قلبه ابيض
عمر بابتسامه : والله انتس كيوت
ابتسمت وحضنته ونطقت : توني محمله لعبه جديده بجوالي نلعبها سوا ؟
هز راسه بالايجاب بفرحه فتحت جوالها واعطته وهي حاضنته من على جنب رفعت راسها من شافت ذياب جلس بجنبها وبينهم عمر وقال ذياب : شرايك تروح عند امك ؟
عمر وهو يلعب بحماس بالجوال : لا ابي مع آلماس
تنهد ذياب وطلع جواله يجلس عليه ناظر العيال وهم يضحكون وجايين عنده عزيز بضحك : ان شاء الله نشوف ولدكم يالكناري
ذياب بابتسامه : ان شاء الله
عزيز : ويطلع يشبهني
ذياب : لا ان شاء الله
عزيز بحده : وش تقصد ياذيابوه ؟
اخذ المخده ذياب ورماها على عزيز ابتسمت آلماس تشوف وهج جلست قامت آلماس لوهج ونطقت : كيفتس ياوهجنا ؟
وهج بأبتسامه : الحمد لله يآلماستنا
آلماس : متوظفه انتِ ؟
وهج : انقبلت الحمد لله بمستشفى بالرياض
آلماس : ما شاء الله الله يوفقتس
ابتسمت وهج وقامت من شافت رسالة من ضيدان وردت عليه : هلا ؟
اتسع مبسمها من شافت مصور رسمتها ومعلقها بنص البيت وارسلت : ما شاء الله ذا بيتك ؟
ضحك وارسل لها : اي قريب بتزوج وقاعد اغير الأثاث
انصدمت وارسلت : بتتزوج صدق ؟
ضيدان وهو قاصدها بس مافهمت ارسل : اي ليه انصدمتي ؟
وهج بهدوء : ولا شي ، الله يوفقك ويرزقك بنت الحلال
ضيدان : بنت الحلال موجوده بس مادري اذا هي تبيني او لا ؟
عقّدت حواجبها وارسلت : مين هي ؟
ابتسم من الفكره اللي جتّه ويبي يشوف اذا هي تحبه ولا لا ارسل : اخت زوجة ذياب لا تعلمين احد