وَجْـــد - WAJD

السـادس عـشـر

و اخيرًا..  رجع شغفي و رجعت اكتب.. حابة اقول ان الرواية على أبواب النهاية..
بارت مكون من ١٠٤٢٧ كلمة..
اتمنى يعجبكم..

صباح اليوم التالي..

فتحت عيونها و هي حاسة بجسد بين احضانها.. شدت على حضنها يوم تذكرت اللي صار الليلة الماضية..

بعد يوم متعب رمت اثير نفسها على السرير.. اخذت نفس عميق قبل لا تستقيم و تبدأ تغير ملابسها لملابس اريح
سحبت كم قطنة مع مزيل و بدت تمسح الميكب اللي كان على وجهها.. يوم وصلت لشفايفها بدت تتحسسها بخفة و هي تستذكر ملمس شفايف شهد بخاصتها.. ارتفعت ابتسامتها قبل لا تغسل وجهها و ترد لسريرها.. و غفت بدون لا تحس على نفسها..

مرت اول كم ساعة بهدوء قبل لا تصحى من نومتها على صوت رنة جوالها.. مدت يدها و حطته على اذنها بعد ما ردت على الاتصال

"هاا"
قالت اثير اللي واضح على صوتها النوم

"ا..اثير"
ردت عليها من بين شهقاتها

اثير فزت بسرعة يوم سمعت صوت حبيبة قلبها مليان خوف
"شهد قلبي فيك شي؟"

"خ..خايفة يا اث..ثير حلمت فيهم م..مره ثانية.."
قالت شهد و هي تشد على نفسها اكثر

اثير بدون تفكير قامت من على سريرها و سحبت مفتاح سيارتها و هي طالعة
"جايتك حبيبتي عطيني دقايق بس و انا عندك"
كانت فاهمة شهد و فاهمة احلامها بما انها كانت بالمستشفى دايم تجيها هالاحلام و تكون اثير عندها و جنبها

"ل..لا تسكرين ابي اسمع صوتك ا..اتطمن.."
قالت شهد و شهقاتها بدت تخف شوي شوي

"مابسكر يانظر عيني تطمني انا معاك بس تذكري اللي كنا نسويه مع بعض اخذي نفس عميق و لا تخلين هذي الافكار تسيطر على بالك تراه مجرد حلم"
ردت عليها اثير و هي تشغل سيارتها و تتحرك بسرعة لبيت الثانية

"ا..ادري انه مجرد ح..حلم بس الشعور نفسه جاني.. نفس الضيقة و الخوف.."
قطعت كلامها و هي تكمل بكي

اثير عضت على شفتها تحاول تخفف توترها ماتبغى خوف الثانية ينعكس عليها بشكل سلبي هي عارفتها و عارفة كيف انها تتعامل مع خوفها بعنف..

"شهد حبيبتي تنفسي معاي يلا"
قالتها اثير قبل لا تاخذ نفس تحبسه لثواني و تطلعه

شهد قلدتها و واضح على انفاسها الارتجاف

اثير ابتسمت يوم حست بالثانية تستجيب معها و بنفس الوقت وصلت لبيتها اللي ماكان يبعد مره عن بيت اثير و اهلها..

نزلت بسرعة و تركت السيارة وراها ولا حتى فكرت تسكرها

"انا تحت عند باب البيت ياعيوني"
قالت اثير و هي تحاول تفتح الباب اللي استوعبت بعدين انه مقفول