#بطل_الحكايه7
مها حولي الزاكي
طبعاً بقيت أعاين ليهو و أنا متفاجئه ! قلت ليهو لا لا أكيد انت فيك شي ! عقلك ما تمام !... قال لي هسي كلامي دا فيهو شنو غلط ؟!
قلت ليهو عن إذنك وراي شغل ، خليتو قاعد و مشيت واصلت شغلي .... لمن دخلت المطبخ لقيت سالم و حذيفه بتكلمو عنو ، قالو لي زولك دا الليله حـ ياكل الأكل دا كلو كيف ؟ قلت ليهم دي شنو زولك دي !؟ سالم قال دا شكلو بياكلو بـ عيونو !! ماف زول طبيعي بطلب أكل قدر دا ! قلت ليهم ما عندنا بيهو شغله المهم حـ يدفع الحساب كلو....
المهم بعدها واصلت شغلي ، بعد حكاية ساعه كدا لمن طلعت و عاينت لـ الطاوله الكان موجود فيها يونس لقيتو ماف و الأطباق زي ما هي ، شكلو أكل صنف واحد بس ، ناديت حذيفه و قلت ليهو الزبون الكان قاعد في الطاوله ديك دفع الحساب ؟؟ قال لي ايوه دفعو و بـ زياده كمان !! الراجل دا شكلو حيران و ما عارف يعمل شنو في قروشو دي عشان كدا شغال إسراف سااااي ، في سري قلت ليهو عااااد لو ما خلى كل الناس تعرف إنو برجوازي ما برتاح !.... طبعاً دي ذكرني لما لاقيتو في السوق ، يعني إذا هو برجوازي غني و عندو عربيه فـ شنو البخليهو يركب مواصلات ! قلت عادي يمكن كان في عطل في عربيتو أو يمكن حب يجرب المواصلات دي عامله كيف ! عاد هو بكون من الله خلقو ما ركب مواصلات !
المهم و نحنا في المطبخ جسار كان بتكلم مع سالم و حذيفه و قال ليهم عايز أبيع تلفوني ، سالم قال ليهو معقوله ضاقت عليك للدرجه دي ! قال ليهو لا بس عايز اغير تلفوني ، ابيع دا و اتم الناقص و أشتري تلفون جديد !
فجأه كدا جسار قال لي انتِ يا مها اشتريتي ليك تلفون ولا لسه ؟! قلت ليهو لسه والله ، قال لي رايك شنو أبيع ليك تلفوني دا ، كويس و استعمالو خفيف ، قلت ليهو والله لو عندي قروش كنت اشتريتو منك طوالي ، قال لي يا زوله ماف مشكله جيبي العندك بس ، ضحكت و قلت ليهو اقسم بالله مفلسه ، قال لي خلاص شيليهو و لمن تاخدي مرتبك أديني حقي ، قلت ليهو أنا ما معروف حـ أواصل في الشغل دا ولا لا ، الشهر دا عشان اثبت فيهو نفسي و خلاااص انتهى باقي تقيم المدير لـ شغلي ، لو وافق اشتغل معاكم بشتري منك و إذا لا فـ خلاص خيرها في غيرها ، فريال قالت لي لا ياخ كيف يعني تشتغلي شهر كامل من دون مقابل ! قلت ليها أنا الطلبت كدا من المدير عشان يخليني اشتغل و أثبت ليهو نفسي ، جسار قال لي لو طردتك كلناااا حـ نعمل وقفه احتجاجيه قدام باب مكتبو ، حذيفه قال ليهو عشان ننطرد معاها صح ، وحده اسمها ود قالت لي غيتو مجتبى صعب لكن لو شغلك عجبو ما بطردك ، هو زول حقاااني و ما بحب يظلم زول .... فجأه جانا صوت بقول خير يا شباب مناسبة الإجتماع شنو ؟؟
حذيفه قال ليهو ولا شي ، معظم الهنا ديل خلص دوامهم عشان كدا بتونسوا ، هز ليهو راسو و قال الباقين يمشوا على شغلهم ، عاين لي و قال لي ألحقيني في المكتب ، مشى و مشيت وراهو ، لمن وصلنا المكتب قال لي تقريباً الشهر خلص ولا لسه باقي عليهو شويه ما متأكد بس المرتبات حـ تنزل بكرا ، بما انك زوله نشيطه و شغلك كويس و عندك أسلوب في التعامل فـ تستاهلي تشتغلي معانا ، طبعاً لمن قال لي كدااا فرحت ! قلت ليهو يعني قدرت أقنعك ؟! قال لي ايوه و بالمناسبه حـ تاخدي راتب الشهر دا ، قلت ليهو بس أنا قلت ليك حـ اشتغل مجان ، قال لي و أنا ما بتذكر إني قلت ليك اشتغلي مجان ! قلت ليهو لكن.... قال لي عشان بعدين تقولي صاحب المطعم ظالم و ما أداني حقي ! قلت ليهو لا لااا مستحيل أقول كدا والله ، لمن عاينت ليهو لقيتو ما جادي في كلامو و كان بهظرر لمن قال لي :"عشان بعدين تقولي صاحب المطعم ظالم " طبعاً ما كنت قادره أعبر عن سعادتي ، قلت ليهو شكراً شكرررراً ليك ! قال لي أمشي لـ مالك وقع معاهو العقد و أديهو رقم حسابك و باقي التفاصيل عشان يدخلهم في السستم و ينزل ليك راتبك ... طبعاً هنا سكت و ما عرفت أقول ليهو شنو ، هزيت ليهو راسي بس و طلعت لقيت فريال و جسار في وشي ، قالوا لي خير ؟ فـ حكيت ليهم قالوا لي والله دا خبر طيب حلووو شديد و أهلاً وسهلاً بيك مره تانيه! المهم هم مشوا و أنا تااااني رجعت لمكتب المدير ، شربكت أصابعي و قلت ليهو ممكن آخد القروش كاش ! قال لي ماف مشكله ، بكرا تعالي لـ مالك و أخديهم و أنا أديتو خبر ، قلت ليهو تماااام و طلعت منو و أنا عاااايز اطير من الفرح ، آخيراً حـ اقبض راتب ، المهم قبل ما أطلع جسار جا و مد لي تلفونو ، قال لي اووول ما تستلمي راتبك تدفعي لي فاااهمه ولا لا ؟! قلت ليهو يعني مُصر تشيلني تلفونك دا بالغصب !😂 قال لي يعني ما عايزاهو ! خلاص يا زوله ، قلت ليهو لا لا عايزاهو لكن كدي قول لي بكم حـ تبيعو لي ؟! قال لي خاتي ليهو 65ألف ، بس حـ ابيعو ليك بـ 60ألف .... صراحة سعر التلفون كان كويس و مناسب و التلفون حلو و استخدامو خفيف يستاهل أكتر من كدا ، قلت ليهو أنا ما عارفه الراتب كم! قال لي ااا انتِ لسه ما وقعتي العقد ! المهم الراتب 120ألف ، طبعاً نططت عيوني ! بالنسبه لي دا مبلغ كويس شديد ! أول مره في حياتي يكون راتبي قدر دا !! قلت ليهو طيب طيب حـ اشتريهو منك ، شلت منو التلفون و قلت ليهو بكرا ان شاء الله بديك قروشك ، قال لي تمام ، المهم رجعت الميتم و انا مبسوطه شديد و حكيت للبنات اتفاجؤا و انبسطوا معاااي شديييد و شالوا التلفون و بقوا يشوفوا فيهو ، و كل وحده شغاله لي واااي التلفون رهيب ! رماح قالت لي لاااازم تعزينا عزه تماااام ، قلت ليها أكيد ، حـ اعزمكم في المطعم ، قالت لي يا سلاااام ياريت والله ، طبعاً كلهم أيدوا الفكره دي و حبوها ، ليلى قالت لي و اها بت تاخدي راتبك حـ تخلي الشغل دا ولا كيف عشان جايك واحد غيرو و براتب احسن منو!☺️
سماح قالت لي صحييي بابا حازم قال لقى ليك شغل في مول ! قلت ليها هو ما قال لقاهو لي ، قال حـ يجي و معاهو فرصة عمل و عرض زواج ، ليلى قالت لي معروف لـ منو ماف وحده غيرك هنا عايزا تشتغل ، قلت ليها عايني عليك الله أنا ما فاضيه لكلامك المسيخ و الفارغ دا ، المهم لفيت الميتم افتش لي في شريحه ، سألت بكري لو عندو شرحتين قال لي عندي واااحده بس ، فجأه اتذكرت المخزن ، مشيت دخلتو و بقيت افتش لأني متأكده قبل كدا شفت فيهو شريحتين ، قعدت أفتش كدا لحد ما فتحت درج وسخان و مكسور كدا و لقيت فيهو شريحه ! طبعاً المخزن دا بلقى فيهو معظم الحاجات العايزاها ، مرات بلقى فيهو ورق فـ بشيلو و برسم فيهو ، المهم شلت الشريحه و طلعت و دخلتها في التلفون ، عرفت الرقم و طلعت حولت فيهو رصيد و جيت نشطت و عملت لي حساب جديد في الفيس و الواتس ، البنات جوا اتلموا فيني و قالوا لي عايزين نشوف معاك ، أديتهم التلفون فـ بقوا مره يلعبوا بيهو و مره يشوفوا فيديوهات التيك توك ، سجى قالت لي شغلك دا سمح والله ! رماح قالت ليها اهاااا عايزا تزوغي من العرس ؟! قالت ليها لا لا بس شغلها عجبني و الراتب سمح شديد ، ما معروف يمكن بعد العرس اشتغل ، أكون ضربت عصفورين بحجر واحد ، عرس و شغل ، فدوى قالت أنا شبه بديت أغير رأيي ، من قبيل فكرة الشغل دي بقت لافه لي في راسي ، قلت ليهم طواالي كلموا بابا حازم ، والله حـ يلقى ليكم شغل أو اطلعوا معاي أفتش ليكم ، و لو سمعتهم في المطعم قالوا عايزين يوظفوا ناس جداد حـ ارشحكم ليهم 😍
المهم نهاية اليوم مشيت حوش الأولاد ، لقيت مصطفى بلعب مع الشفع ، جا هيثم و قال لي قالوا جبتي ليك تلفون ! قلت ليهو فعلاً تلفون مستعمل لكن ماشي حالو ، قال لي المهم تلفون و قعد يسألني عن سعرو و جبتو من وين ، المهم حكيت ليهو بعدها قلت ليهو شفت الشغل دا سمح كيف !؟ والله لو لقيت طريقه تشتغلوا بيها معاي في المطعم طوااالي بكلمكم ، قال لي باباك حازم قال لقى لينا شغل ، قلت ليهو بالجد !! وين ؟؟ قال لي في المصانع ، الأفران ، الدكاكين ، كل واحد يشوف البناسبو عشان يشتغل فيهو ، قلت ليهو حلووو احسن من القعاد الساي ، قال لي احسن ذاتو عشان الواحد يتفكفك من المكان دا ، قلت ليهو لسه قدامك سنه عشان تطلع من هنا ، ان شاء الله لمن عمرك يبقى 18 تكون قدرت تكون نفسك .... طبعاً هنا الأولاد لو ما تمت كفالتهم مسموح ليهم يقعدوا في الدار لحد عمر 18 بعدها بمشوا من هنا و كل واحد بشق طريقو براهو ، عشان كدا بابا حازم بحاول يساعدهم و يشغلهم عشان لمن يطلعوا من هنا يكون عندهم مصدر دخل ، أما البنات ما عندهم عمر معين عشان يمشوا فيهو من الدار ، هنا البكبروا و ما بتجي أسره عشان تتكفل بيهم ، يا يعرسوا و يمشوا مع أزواجهم يا يشتغل و يكونوا نفسهم و بعدها يمشوا من الدار ، كتير بنات من زماااان اشتغلوا و مشوا من هنا ، و كتير منهم اختاروا العرس و برضو مشوا من هنا ، في البدايات كانوا بتواصلوا معانا و بورونا أخبارهم بس بعدها التواصل إنقطع ...
تاني يوم جهزت نفسي و مشيت شغلي
___________________
