#بطل_الحكايه32
مها حولي الزاكي
بعد يومين جا و قال لي ناس عمتي جايننا زياره، قلت ليهو و ها حـ تجيبهم جوه هنا تقفلهم معاي في الغرفه ولا حـ تقفلنا في الهول؟ قال لي في المكان البعجبك، المهم بعد صلاة الضهر ناس عمتو جوه داخلين، جات عمتو و وحده من بناتها و حلا و بتها و أختها علا، طبعاً يونس كان مجهز كل شي من ضيافه لـ غيرو، حلا دخلت معاي المطبخ وشالت الضيافه طلعتها ليهم برا و أنا جبت العصير و عشان ما عايزا أقعد معاهم دخلت المطبخ و بديت أعمل في الشاي و الجبنه، جات حلا لاحقاني و قالت لي أنا حـ أعمل الجبنه و انتِ اعملي الشاي أو العكس، قلت ليها لا لا بعملهم الإتنين انتِ ارتاحي، قالت لي والله بقيت مشتهيه الحركه و شغل البيت لأنو ياسر الكبايه ما بخليني أرفعها بقول لي انتِ حامل، قلت ليها كلااامو صح، بعدها بقينا ناخد و ندي في الكلام، قالت لي انتِ و يونس حليتو الخلاف البيناتكم؟قلت ليها ايوه، قالت لي الحمدلله لأنو الطريقه الطلعت بيها من بيتك بالجد حسيتني إنو الخلاف البينك و بين يونس كبير شديد، لمن اتصلت عليك كنت عايزا افهم منك الحصل، قلت ليها التلفون ذاتو ما معاي، خاتاهو في الدرج و ما شغاله بيهو، قالت لي ايوااا عشان كدا، والله أنا و يامن فكرنا نجي نشوفكم و نقعد معاكم و نعرف مشكلتكم شنو بس ياسر ما خلانا و قال لينا ما تدخلوا، لو ما براهم حكوا ليكم ما تمشوا ليهم و تقعدوا تسألوهم، قلت ليها والله بس اتناقشنا في موضوع و الإتنين زعلنا من بعض فـ قررت أطلع و أخلي ليهو البيت، قالت لي عليك الله مهما يحصل بينك و بينو ما تعملي كدا تاني، نحنا ملاحظين ليكم من يوم كنتوا في المستشفى كان ظاهر إنو في خلاف بيناتكم، في البدايه قلنا يمكن يونس متضايق بسبب البيبي الراح، حتى إنو ياسر و يامن اتكلموا معاهو بخصوص الموضوع دا و قالوا ليهو لا تلومها لا تقسى عليها دي إرادة ربنا، لكن الظاهر إنو دا ما سبب خلافكم، المهم ما عايزا أعرف السبب و ما عايزا اضغط عليك عشان تحكي لي، البهمني إنو انتوا الإتنين تكونوا متفاهمين ، يونس ما ليهو زول غيرك في الدنيا دي زي ما ياسر ما ليهو غيري، ديل تلات أيتام يا مها أمهم ماتت خلتهم صغار و بعد ما كبروا شويه أبوهم اتوفى، عمتهم هي الربتهم رغم اعتراض راجلها على قعادهم هم التلاته في بيتو، صح إنها ما قصرت منهم بس ماف زول بقدر ياخد مكانة الأم و الأب و يملى خانتهم، كبروا و كل واحد بقى مشغول بحياتو و شغلو، ايوه ياسر ما ليهو غير أخوانو و أخوانو ما ليهو غيرو بس اكيد كل واحد مصيرو يعرس و يكون أسره و ينشغل عن أخوانو، مثلاً الفتره السافر فيها يامن عشان يقرا برا السودان و يونس كان مشغول و نادراً ما يجينا ديك أكتر فتره حسيت فيها بوحدة ياسر، حسيتو زي التايه و في حاجه رايحه ليهو، كان بنزل السودان من فتره للتانيه و مرات بسافر و يونس دا بعينو ما بشوفو بسبب انشغالو، نفس إحساس الوحده و الضياع الكنت بشوفو في عيون ياسر شفتو في عيون يونس لمن كان ياسر يسافر، يعني أخوانو الإتنين بعاد عنو، ياسر على الأقل أنا معاهو و مهما اتناقشنا مستحيل أطلع و أخلي ليهو البيت و للحقيقه أصلاً ما قاعده تحصل نقاشات بيناتنا لأنو هو في حالة سفر و لمن يرجع بكون مبسوطه بيهو و عايزا أسعدو بأي طريقه قبل ما يسافر مره تانيه، ما عارفه حـ تقدري تفهميني ولا لا بس الراجل مهما كان قوي و شجاع بحتاج مراه تقيف معاهو و تكون جنبو، ايوه يونس مرات بكون طبعو حاد و كلامو ناشف و يمكن يظهر ليك عدم مبالاتو بس هو عكس كدا، و أنا شايفه إنو هو متمسك بيك شديد، انتِ ما شفتيهو في اليوم داك لمن طلعتي و خليتي البيت، اتصل علينا واحد واحد يسأل إذا جيتي علينا أو اتصلتي بواحد مننا، قلب الدنيا قلب لحد ما لقاك، ساقنا معاهو عشان قال انك زعلانه و ما حـ ترضي تسمعي كلامو و تجي معاهو عشان كدا خلانا أنا و يامن نتكلم معاك، يعني الوحده لو عرفت و اتأكدت إنو راجلها بحبها و بموت فيها، و ما بقدر بلاها و مستعد يعمل أي شي عشانها معقوله ما تستحمل النقاش معاهو؟ ما تستحمل طبعو و هي عارفه إنو بحبها و بحترمها؟! مثلاً أنا ياسر دا لو جا يوم و اتشاكلت معاهو و أصواتنا وصلت نهاية الشارع والله مهما كانت ردة فعلو ما بطلع أخلي البيت، بزعل و بقعد في بيتي لأني عارفه إنو ماف بيت ما بكون فيهو نقاشات و مشاكل و لأني عارفه إنو النقاشات ما معناها نهاية العلاقه أو الطلاق و الأهم إني عارفه إنو هو ما بقدر بدوني ولا أنا بقدر بدونو عشان كدا ما كنت حـ أطلع من البيت و هو ان شاء الله أزعل منو شهر بس ما حـ أزيد الوضع سوء و أطلع من البيت ... في سري قلت ليها انتِ ما عارفه سبب المشكله ولا عارفه الكلام الجارح القالو لي يونس.... قلت ليها كلامك صح، قلت ليها ما تضايقي من كلامي أنا بس عايزا مصلحتكم، قلت ليها ايوه عارفه ...المهم جهزنا الشاي و الجبنه و طلعنا بيهم الهول، أول ما قعدت كدا عمة يونس قالت لي قالوا لينا شردتي من البيت!... طبعاً ما قلت ليها حاجه، حلا قالت ليها طلعت في لحظة زعل بس يا عمتي، قالت ليها لو قالوا أي وحده تزعل تطلع و تخلي بيتها ما كان في مراه هسي قاعده مع راجلها! هسي في وحده نصيحه بتعمل تصرف زي دا!! تشيلي شنطتك و تمشي تلفي في الشوارع!... طبعاً انتبهت في اللحظه دي إنو حلا عاينت لـ علا بغيظ كدا و كانت بتحمر ليها فـ فهمت إنو علا هي الكلمت عمة يونس بالحصل و علا أكيد عرفت من حلا لأنها أختها!!... طبعاً لساني حسيتو كان مربوط و ما قدرت أرد على عمة يونس، واصلت كلامها و قالت لي هسي لو كان عندك أهل كنتِ حـ تتصرفي تصرف زي دا؟؟... طبعاً اللحظه ديك أنا بالجد زعلت و كنت حـ أرد عليها بس يونس سبقني و قال ليها تصرفها دا لو صح أو غلط ما ليهو علاقه بإذا كان عندها أهل أو لا، هي زعلت و اتضايقت مني و طلعت من البيت و أنا مشيت جبتها و راضيتها و الموضوع انتهى! مشكله و حليناها!.... طبعاً في سري قلت ليهو يا كذاااب يا منافق!
عمتو قالت ليهو بري منك بقيت ما بتستحمل أي كلام و قاعد على الهبشه خاااصة لو الكلام موجه لـ دي 👈...هسي كلامي دا فيهو شنو؟؟ عيب يعني إذا اتكلمت معاها و غلطتها و نصحتها؟؟
قال ليها ما عيب يا عمتي لكن دا في حال إنو أنا أو هي جينا شكينا ليكم، لكن الموضوع كان بيناتنا و حليناهو و انتهينا! قالت ليهو لو كان بيناتكم انتوا الإتنين بس ما كان وصلنا، لو كان حدو سور بيتكم ما كان دخل بيوتنا و بعدين الغلط دا غلط، أنا من الله خلقني ما سمعت لي بمراه اتشاكلت مع راجلها فـ شالت شنطتها و مشت حامت في الشوارع و في الآخر مشت ليها مسجد عشان تنوم فيهو!! ... هنا رديت عليها و قلت ليها طبيعي أحوم في الشوارع و أقعد في المساجد لأنو ما عندي أهل! انتوا ناسين إني بت ميتم؟!!
بت عمة يونس قالت لي لا لا ما ناسين عشاااان كدا ما استغربنا من تصرفك، يونس قال ليهم انتوا جايين تزورونا و تسلموا علينا ولا جاين تعاتبوها؟؟
هنا طواالي عمتو وقفت على حيلها و قالت ليهو أنا ذاتي ما عندي موضوع الجابني ليك شنو و انت ما بتسمع كلامي! معليش والله عشان اتدخلت في حياتك.... قومن يا بنات و خلننا نتخارج من هنا ، علا اتكلمت و قالت لي يونس حرام عليك دي عمتك! وين المشكله لو جات نصحتكم و اتكلمت معاكم؟ انت بينك و بين نفسك عارف إنو العملتو مرتك غلط و حاجه مبااالغه فيها و عمتك ليها الحق تزعل و تجي تعاتبكم؟لاحظ إنو نحنا ما اتكلمنا في الموضوع دا لأنو ما بخصنا لكن عمتك بخصها و بما انها في مقام أمك فـ ليها الحق تتكلم، عمتو قالت ليها اسكتي منو، دا بقى ضيل مرتو.... قالت كدا و طوالي طلعت و بتها وراها، علا مدت يدها لـ حلا و قومتها، حلا قبل ما تمشي قالت لـ يونس ما تضايق من كلامها، هز ليها راسو بس، طبعاً عمتو حلفت ما تقعد دقيقه واحده و أصرت تمشي بالمواصلات، طبعاً ياسر مكلمهم إنو لمن يكونوا راجعين يتصلوا عليهو عشان يجيهم و عمتهم قالت ما بتنتظروا فلمن أصروا عليها قالت خلاص بتنتظرو لكن برا الشارع ما جوه البيت، بعد ما مشوا يونس جا داخل لقاني قاعده في الهول، قعد و الإتنين بقينا ساكتين، كسرت الصمت و قلت ليهو ما كنت تتكلم بالطريقه دي مع عمتك! لو أنا الرديت معليش لأنها ما بتقربني، بس انت دي عمتك الربتك و الليها أفضال كتيره عليك فـ ما كان تتكلم معاها كدا عشان وحده بت ميتم و انت مخليها معاك في البيت عشان بتكرها و عايز تعذبها، قال لي ما رديت عشانك، كل القصه إني ما عايز زول يتدخل، قلت ليهو ما عايزهم يشمتوا فيك و يقولوا ليك دي البت الميتم الإخترتها و شاكلتنا عشانها!...قال لي ايواااا كويس انك فهمتي علي ☺️
سكت مسااافه بعدها قمت من مكاني و مشيت قعدت جنبو، مسكت يدو و قلت ليهو لمن كنا في المطبخ حلا اتكلمت معاي في الموضوع، و عرفت غلطي و إنو ما كان لازم أطلع و أخلي البيت بس عشان كلامك جرحني أنا طلعت! للحظه دي أنا لسه زعلانه و تصرفاتك البتعملها ليها دي بقت تخوفني منك، و هي السبب الخلاني اقتنع إنو أنا و انت ما لقينا مستقبل مع بعض ، انت عايز تعاقبني صح ؟؟طيب عقابك لي دا حـ يخلص متين؟؟ قال لي إلى الأبد، قلت ليهو قدامك خيارين، يا تجيب مسدسك و ترصصني هسي و ترتاح مني يا تخليني أمشي من هنا و تاني لا تشوفني لا أشوفك، قال لي عايزاني أخليك تمشي بالبساطه دي؟؟
قلت ليهو بساطه؟؟ يونس انت قافلني في الغرفه و بتعاملني بقساوه و بتهددني بمسدس و معيشني في حالة رعب لدرجة إني ما بقدر أنوم براحه و دا غير الألم النفسي السببو لي كلامك و صدمتي و خيبتي فيك وتجي بعد دا كلو تقول لي ببساطه؟؟
سكت ما رد علي ...يونس أنا بالجد حبيتك و كوني أخسرك دا أكبر عقاب لي ... طبعاً في اللحظه دي هو عاين لي، واصلت كلامي و قلت ليهو انت كنت نفسي الطالع و النازل، حبيتك أكتر من أي حاجه في الدنيا دي بس للأسف خيبت ظني فيك و أبداً ما اتخيلتك تطلع بالوحشيه دي.... غمضت عيوني مسااافه و لمن فتحتهم عاينت لجيبو، قال لي بما إنو المسدس مخوفك للدرجه دي معناها تاني 24ساعه حأكون ماسكو في يدي، اتنهدت و بتردد مديت ليهو يدي و قلت ليهو أنا غلطت في حقك سامحني و خلينا ننسى الحصل و نبدا من جديد وبوعدك إني ما أكرر العملتو مره تانيه... قول دا ضعف مني، قول دا خوف منك المهم انك تقبل تسامحني، و إذا ما حـ تقبل رجاءً خلينا أمشي من هنا 💔
طبعاً عاين لـ يدي بإستهزاء كدا و قال لي معقوله القطه الشرسه استسلمت بالبساطه دي ! سحبت يدي و قلت ليهو انت لا بعجبك العجب لا الصيام في رجب! لو قويت راسي و عاندتك مشكله و لو لينت قلبي و رخيت الحبل و اتنازلت مشكله تانيه!!
يونس انت بالجد عايز مني شنو ؟؟ عايز توصل علاقتنا لـ وين؟؟ إذا دا كلو عشان نصل لنقطة الطلاق قول لي عادي و طلقني أصلاً ما حـ أنصدم فيك لأنك صدمتني فيك أكتر من مرهـ!!
ما رد علي قام من مكانو و طلع طوالي و قفل باب الهول من برا، بس المساء لمن جا داخل الغرفه لمحتو لمن خت لي تلفوني على الدرج و طلع، قايلني ما شفتو، انبسطت إنو تلفوني رجع لي فـ طوالي مشيت شلتو و دخلت الفيس، لاقاني بوست لـ يونس كاتب فيهو:
في علاقات زي اللعنه، لا بتقدر تتخلص منها لا بتقدر تواصل فيها، حـ تعيشك في جحيمها و تضوقك مرارتها و تدفعك ضريبة على كل ثانيه بتقضيها فيها، و حـ تخليك تسأل نفسك كل يوم أنا الكان عاجبني في العلاقه دي شنو؟!
حـ تفهم وقتها إنو ما كل حاجه بتلمع معناها دهب، و ما أي حاجه بتعجبنا معناها لازم نقرب منها و نمتلكها، لأنو في أشياء أو أشخاص الأفضل إنو ما نقرب منهم خالص ونكتفي بس بإننا نتفرج عليهم من بعيد و نستمتع ببريقهم و لمعانهم لأنو أول ما نشيل نفسنا و نقرب منهم حـ نكتشف انهم زيف أو مجرد سراب!... أحياناً كتيره يصان الود بالإبتعاد!
