#بطل_الحكايه30
مها حولي الزاكي
شلت شنطتي حقت اليد و جريت الشنطه التانيه حقت الملابس و بقيت ماره ، أول ما فتحت الباب اتفاجأت بـ واحد واقف قدامي و كان رافع يدو عايز يضغط على الجرس و وراهو عربيه بوكسي فيها أربع ملثمين شايلين أسلحه! قال لي السلام عليكم انتِ مها صح ؟؟ قلت ليهو بإستغراب ايوه! طلع لي بطاقتو الوضحة لي إنو محقق ، و كان جايب معاهو أمر قبض، قال لي حـ تضطري تجي معانا للتحقيق،قلت ليهو ليه في شنو عملت شنو أنا ؟؟
قال لي ماف شي ، تحقيق بسيط ، حـ نسألك كم سؤال كدا و ياريت تكوني متعاونه معانا! بقيت أعاين ليهم بخوف و ما عرفت أتصرف كيف ! عاين لشنطة و قال لي كنتِ ماشه وين ؟؟ سكت ما رديت عليهو قال لي ياريت تتفضلي معانا بدون أي جرجره ، قلت ليهو ما فاهمه عايزين مني شنو انتوا! قال لي يا أستاذه زي ما قلت ليك تحقيق بسيط و لو حابه اتصلي على زوجك كلميهو أو أي زول تاني، طبعاً من قال لي لو حابه اتصلي على زوجك طوالي قلت ليهو ماف داعي حـ أمشي معاكم ، فتح لي الباب القدام و قال لي اتفضلي ، عاينت لـ شنطة و قلت ليهو خليني أشيل شنطتي معاي ، ما قال لي شي بس شال الشنطه و ختاها ورا في صندوق العربيه ، ركبت معاهم و طوالي العربيه إتحركت ، عقلي بقى يودي و يجيب و كنت خايفه شديد و محتاجه زول يقيف معاي بس ما اتصلت على أي زول ولا حـ اتصل في يوم، الطمني شويه انو هم فعلاً عناصر أمن و المعاهم دا ضابط محقق، بس ما كنت عارفه هم عايزين مني شنو ، عايزين يسألوني عن شنو ، قلت يمكن عرفوا إني من ميتم إيمان و عايزين يسألوني عن الميتم! قلت إحتمال يونس عارف انهم حـ يحققوا معاي!بس لو عارف الضابط ما كان حـ يقول لي اتصلي على زوجك! ياربي هم بعرفوا يونس؟ المهم ساقوني و العربيه وقفت جنب مبنى كبير كدا بـ اللون الأزرق ، المهم نزلوني و دخلوني جوه ، شايفه ناس داخله و طالعه و في واحد برضو جوا سايقنوا بعربيه ، المهم المحقق دخلني غرفه فاضيه ، فيها تربيزه و كرسيين مقابلات بعض ، قال لي اتفضلي اقعدي ، قعدت و أنا متردده ، في كباية مويه كان مختوته على التربيزه ، قال لي اشربي ليك مويه و حاولي تتخلصي من توترك دا ، أنا عايز احقق معاك ما عايز أسجنك فـ ماف داعي للخوف دا ، قلت ليهو طيب التحقيق دا حـ يخلصص متين و بخصوص شنو ؟؟قال لي مدة التحقيق بتعتمد على تعاونك معاي و ردك على كل سؤال ، أما التحقيق بخصوص شنو هسي حـ تعرفي ، شلت كباية المويه شلت منها بقه و رجعتها محلها ، قال لي مها نوح ، بت مجهولة الأبوين ، من دار إيمان لرعاية و كفالة الأطفال ، متزوج من يونس عمر الخطاب، معلوماتي دي صح ولا غلط؟
هويت ليهو راسي بمعنى ايوه و أصلاً هو أكيد ما معتمد على جوابي للسؤال دا لأنو عارف الإجابه، قال لي بتعرفي يونس من وين؟قلت ليهو ما بعرفوا جمعتنا الصدف ، قال لي و بعدها حبيتو بعض و عرستو!! عايني نحنا ما في مسلسل عشان تقولي كلامك دا ، قلت ليهو والله دي الحقيقه و انت هسي براك قلت لي متزوجه من يونس ! قال لي ايوه و عايز أعرف هو عرسك ليه ؟؟
قلت ليهو معناها كان مفروض تحقق معاهو هو ما معاي هنا! قال لي شايف خوفك اتبخر و بقيتي تردي طوالي! يمكن منظري يوحي ليك إني انسان هادي و متفهم بس صدقيني أنا عكس كدا تماماً، قلت ليهو لو انت هادي أو لا دي الحقيقه و كلامي ما بعتمد على صفاتك الشخصيه!
عاين لي كدااا بعدها قال لي للمره التانيه يونس اتزوجك ليه؟اتفقتوا على شنو؟ قلت ليهو يعني العرس إلا بإتفاق؟ضروري يكون في شي من وراهو؟ قال لي في حالتكم ايوه في ، قلت ليهو خلاص قول لي الشي دا شنو ؟؟
خلى الموضوع دا و مسك لي في موضوع الميتم و بقى يسألني عن المسؤولين منو، و كيف بتتم كفالة الأطفال و الناس البكبروا و ما بتتم كفالتهم بحصل ليهم شنو و و و .... يعني اسئلتو كانت اسئلة زول عارف البحصل شنو في الميتم! كل التفاصيل دي أنا قلتها قبل كدا لـ يونس لمن سألني الأسئله دي و المحقق دا واضح إنو عارف كل شي طيب تاني عايز مني شنو ! طبعاً ما قلت ليهو إنو بابا حازم ببيع البنات و بستغل الأولاد و الكلام داك كلو لأنو حـ يسأل أنا عرفت من وين و جرجرني ساي و أصلاً هو عارف و أنا حالياً بإعتباري مواطنه مدنيه عاديه قاعدين يحققو معاها ،جاوبت على اسئلتو كلها و قلت ليهو البعرفو و طبعاً ما غالطني في أي معلومه لأنو سلفاً عارفها و متأكد منها، بعدها تااااني رجع لموضوعي أنا و يونس و قال لي ما قادر استوعب إنو في زول بمشي يعرس من ميتم! يونس كيف قدر يمشي و يعرسك و ليه خلى بنات الناس ديل كلهم و مشى يعرسك انتِ؟؟العرس دا تم كيف و منو هم الشهود!
طبعاً كلامو دا ذكرني بالكلام الجارح القالو لي يونس ، طبعاً أصلاً عيوني كانت مليانه دموع فـ لمن معنى كلام المحقق كان مطابق لـ معنى الكلام القالو يونس دموعي جات نازله،قال لي الحاله إني بتكلم معاك بكل هدوء؟ لو كان اتعاملت معاك بأسلوب تاني كنتِ حـ تعملي شنو طيب؟مسحتها و قلت ليهو انت عايز مني شنو؟ جاوبتك على اسئلتك كلها و ما كذبت في أي سؤال ، ما عارفه انت عايز تصل لشنو و ليه حاسي إنو مفروض يكون في سبب عشان يونس يعرسني! ما عارفه انت عايز تسمع مني أي جواب! اتنين اتعرفوا على بعض و عرسوا ، مفروض يكون في سبب ورا زواجهم يعني ولا عشان أنا بت ميتم ؟؟ يعني شنو لو كنت مجهولة أبوين؟ يعني شنو لو اتربيت في ميتم؟ يعني شنو لو ما عندي أصل و فصل هل دي حاجه بتنقص حقوقي ولا بتخليني أقل إنسانيه؟هل دي حاجات بتحرمني أكون زي باقي الناس أعرس و اشتغل! قول لي طيب شنو هي الحاجات البتناسب مجهولين الأبوين؟ قول لي شنو هي البيئه أو مواصفات المجتمع المفروض نحنا نعيش فيهو؟؟
طبعاً للحظات حسيت كأني بقول الكلام دا لـ يونس، قال لي وين تم الزواج و منو كانوا الشهود؟ قلت ليهو برأيك مجهولين الأبوين ديل حـ يمشوا يعرسوا وين؟بالنسبه للشهود ما بعرفهم، أنا بت ميتم و ما بعرف إلا ناس الميتم المعاي☺️
طبعاً بعدها اسئلتو كلها بقت عن يونس بطلع متين و برجع الساعه كم و بمشي وين و شكل حياتو عامل كيف، منو أصحابو و منو القاعد يجيهو في البيت ... قلت ليهو الأفضل تجيب يونس ذاتو و تسألو عن أصحابو، قلت ليك أنا ما بعرف أي زول غير ناس الميتم تبعي و ما محتكه بالناس لأني بت ميتم ، قال لي خلاص فهمنا انك بت ميتم و الأفضل تجاوبي بكل صراحه على سؤالي، استحاله ما تكوني عارفه ولا زول من معارف راجلك! قلت ليهو مش انت محقق؟ عرفت اسمي و وين كنت عايشه و متزوجه منو معقوله يغلبك تعرف معارف يونس و أصحابو!!؟؟طبعاً هنا غضب، وقف على حيلو و ضرب لي التربيزه و قال لي أنا البطرح الأسئلة هنا ما انتِ، طبعاً بقى يجوط فيني و أنا بعاين ليهو بإستخفاف و ما كسرت نظرتي ليهو مع إنو شغال لي اكسري نظرك ، طبعاً كان بجوط بصوت عالي، فجأه سمعنا صوت طرق على الباب و بعدها جا واحد كدا داخل، نادى المحقق لمن طلع ليهو سمعتو قال ليهو صوتك واصل الشارع، ما تنسى إنو دي زوجة يونس و هو زول زميل و ليهو هيبه و مكانه في شغلو فـ احسن معاملتها!... ما قال ليهو شي جاني راجع و استمر في تحقيقو معاي، لمن اقتنع إني بالجد ما عارفه حاجه أو خلفيه عن شغل يونس وين بمشي و بقابل منو خلاني، المهم لمن طلعت من غرفة التحقيق بقيت أفتش عليهو عشان يرجع لي حاجاتي الشالوهم مني، لمحتو داخل مكتب من المكاتب فـ وقفتو و قلت ليهو عايزا الشنطه حقتي، طبعاً شاميني شمه! كأنو كان عايزين أقول ليهو كلام معين و ما قلتو ليهو! نادى ضابط كدا بزهج و قال ليهو شوفها عايزا شنو و طوالي مشى! المهم الضابط دا جاب لي الشنطه حقتي ، طبعاً لاحظت انها مفتوحه بالجنبه، لمن فتحتها لقيت الملابس مبشتنه و في جزو منهم ماف فـ عرفتهم فتشوها! ما سألت زول! جريت شنطتي بس و طلعت، أول ما طلعت من المبنى إتلاقيت مع صديق صاحب يونس جنب الباب! طبعاً استغرب لمن شافني ، سلم علي و قال لي بتعملي شنو هنا يونس معاك؟ قلت ليهو لا و حكيت ليهو الحصل بإختصار! قال لي يعني يونس ما عارف!؟ ليه ما اتصلتي عليهو؟! قلت ليهو لأنهم بس عايزين يحققوا معاي يعني ماف شي خطير ، عاين للشنطه و قال لي الشنطه دي هم شالوها من البيت ولا شنو؟ قلت ليهو ايوه... طبعاً ما صدقني و هو أصلاً كان على بالو يقول لي ماشه وين بالشنطه دي بس سألني بطريقه تانيه!لمن طلع تلفونو حسيتو حـ يتصل على يونس ، قلت ليهو عن إذنك حـ أمشي بعد دا ، قال لي ثواني خليني اتصل على الزول دا ، قلت ليهو خليهو حـ أكلمو أنا ، المهم حـ أمشي يلا مع السلامه ، طبعاً طوالي إتحركت من جنبو بإستعجال أول ركشه لقيتها في طريقي ركبتها عشان حسيت إنو يمكن صديق يجي لاحقني ، ما عايزا أشوف يونس دا تاني و ما عايزا أكون معاهو في نفس المكان ....
__________________________
