#بطل_الحكايه26
مها حولي الزاكي
جاني قريب و قال لي كيفك و مد لي يدو !... من دون ما أمد ليهو يدي قلت ليهو كويسه و انت ؟... طبعاً اتفاجأ من ردة فعلي ، قايلني حـ اعصب و أصرخ فيهو و هو ما عارف إني من زماااان اتجاوزتو و حتى لو ما كان اتجاوزتو مستحيل احسسو بالحاجه دي !
نزل يدو و قال لي بعد زمن طويل شفنا بعض ! لمن أنا و أمي جينا بيت ياسر في اليوم داك صدقي إني في البدايه ما عرفتك ! اتغيرتي شديد! قلت ليهو للأسف هنا ما عندي ملابس أو اي حاجه ليها علاقه بالرجال ، قصدي الذكور ، أمشي المحل البعد محلي دا على يدك الشمال و ان شاء الله حـ تلقى طلبك عندهم ، قال لي ممكن نطلع و نتكلم ؟... قلت ليهو اففف نتكلم في شنو يا ود الناس ، رفعت ليهو يدي و قلت ليهو شايف الحنه دي ولا لا ؟! عارف معناها شنو لا لا ؟ بتعرف يونس ولا لا ؟ احترم نفسك و أمشي من هنا و ياريت ما ترسل لي تاني و تبطل حركاتك دي مفهوم ؟
قال لي ارسل ليك شنو ؟؟ طلعت فتحت تلفوني و قلت ليهو دا رقمك ولا لا !... قال لي أبداً والله ! قلت ليهو عاين ما تكذب ، قال لي والله العظيم دا ما رقمي و أصلاً أنا حـ اجيب رقمك من وين ! لو كنت عارف وين أراضيك كان جيتك طوالي زي ما عملت هسي ! قلت ليهو جاي عشان تعمل شنو ؟ قال لي عايز أعتذر و أوضح ليك ، قلت ليهو ماف داعي والله لأنك بقيت ما بتهمني ، حالياً أنا لا زعلانه لا غضبانه منك ، ما عندي ليك أي نوع من أنواع المشاعر لا غضب لا لوم عشان كدا أمشي الله معاك ، قال لي معقوله قدرتي تنسيني بالسرعه دي و تحبي غيري ؟؟
قلت ليهو بالسرعه دي ؟؟ أحسب دي كم سنه عليك الله و ايوه قدرت انساك ، عليك الله اتخارج عشان ما اضطر استخدم معاك أسلوب تاني ، قلت كدا و مشيت وقفت ليهو جنب الباب و قلت ليهو اتفضل برا ، قال لي الوقت داك أمي ضغطت علي شديد لأنها ما كانت راضيه و ما قبلانه بيك ، خيرتني بينك و بينها ، بين حبك و عفوها و رضاها ، فـ اخترتها هي و عفوها و رضاها لأنها أمي يا مها ، كنت قايل نفسي حـ اقدر عليها ، قايل عنادي حـ يخليها تلين و تقبل بيك بس كانت رااافضه و خطبت لي بدون رضاي ، قلت ليهو عليك الله هسي ما بتخجل تقول خطبت لي بدون رضاي !! قال لي لمن زهجت و حسيت إني خسرتك و ما بقدر اكسر كلمت أمي و في نفس الوقت ما بقدر اكمل مع غيرك خليت كل شي وراي و سافرت البلد ، قلت ليهو حسام ما.... سكت و اتفاجأت لمن شفت يونس واقف جنب الباب ، حسام ذاتو إتلفت و شايف يونس و إرتبك ، يونس كان بعاين لي أنا بعدها غير نظرو عاين لـ حسام و قال ليهو خير يا حسام كنت بتقول في شنو ؟؟
طبعاً أنا و حسام ألسنتنا إتربطت ، بقى يعاين لي و أنا أعاين ليهو و يونس واقف و منتظر واحد فينا يتكلم ، فجأه أنا و حسام اتكلمنا في نفس الوقت و قلنا ليهو ماف شي !!...قلنا كدا و عاين لبعض عشان قلنا نفس الجمله في نفس الوقت!!
حسام قال لينا عن إذنكم و طوالي طلع و قبل ما يتخطى يونس ، يونس مسكو و قال ليهو وين وين ما جاوبت على سؤالي!
قلت ليهو ماف شي كان بسأل عن محل الـ.... قبل ما أكمل كلامي يونس قاطعني و قال لي أنا ما سألتك انتِ خليك ساكته لحد ما يجي دورك ☺️
طبعاً بعد كلامو دا حسيت الوضع إتوتر ! لمن ما لقى رد من حسام قالو ليهو أبسط عليك الموضوع ، أنا سمعت الكلام القلتو! و فهمت منو انكم كنتوا بتعرفوا بعض قبل كدا ، سؤالي الأهم انت عايز منها شنو بعد دا ؟؟ عندك عندها شنو عشان تلحقها لـ هنا ؟؟ طبعاً حسام حسيتو حس نفسو قدر السمسمه و اتحرج شديد ، لمن يونس كرر ليهو السؤال تاني ، قال ليهو انت فاهم غلط أنا بس جيت اعتذر منها ، يونس قال ليهو تعتذر على شنو و فايدة اعتذار شنو ؟... اقسم بالله لو ما القرابه البينا يا حسام كنت حـ اتصرف معاك تصرف تاني ، أمشي و ما تخليني اشوفك تاني بتقاطع يمين ولا شمال هنا ، أول ما حسام اتحرك ، يونس قال ليهو على فكره مرتك و أولادك منتظرنك تحت قبل شويه سألوني عنك ... طبعاً لمن قال كدا أنا استغربت لأنو هسي حسام شابكني لمن ما قدرت أكمل مع غيرك سافرت و هو عرس و بأولادو كمان !... طبعاً يونس قال كدا و عاين لي و هو متقصد يخليني أعرف المعلومه دي ! حسام مشى و يونس كان متابعني بنظراتو ، لمن داخل المحل قلت ليهو عاين ما تعاين لي كدا كأني عملت حاجه ، حسام قصه و انتهت ، ماضي و طويت صفحتو ، قال لي عشان كدا جا لاحقك ! قلت ليهو هو الجاني ما أنا المشيت ليهو و بعدين انت المزعلك شنو أنا عايزا أفهم ! قال لي المزعلني شنو ؟؟ كمان بتسأل المزعلني شنو؟ قلت ليهو كويس إنو حسام جا ، كويس انك سمعت القالو و فهمت إنو نحنا كنا بنحب بعض عشان تجربي إحساسي عشان تعرف يعني شنو غيره و يعني شنو قلبك يوجعك لمن تحس إنو في زول مشاركك في حاجه بتخصك ، انت زعلت و اتضايقت الضيق دا كلو بسبب انك بس سمعت جزو بسيط و كلام عادي من القالو حسام بس اتخيل أنا يا يونس ، أنا الكل يوم إعجاب و حب بت جديده ليك ، ما عارفه ألمك و أغطيك من منو و أخلي منو ! من البنات الفي حسابك ولا من علا ولا من بنات عمتك ولا من البنات الهنا البتضاحكوا ليك لمن تجي داخل ولا من منار صحبتي المعاي في البيت ولا من ليلى ! ليلى الإنت لحد آخر لحظه ما كنت ناوي تمسح رقمها و تحظرها ! الحسيتو انت هسي يا يونس ولااا بساوي ربع الأنا بحسو و بعاني منو بسببك كل يوم ! يعني أنا مكتوب علي أقعد عمري كلو احاول أطير منك البنات ولا اقيف اتفرج و أنا قلبي محروق !؟ عارف يعني شنو تكون بتحب حاجه وكل الناس بتحبها معاك ؟ عارف يعني شنو تكون ملكك حاجه بس هي ما حقتك براك ؟ لا أكيد ما عارف و مستحيل تحس بي و تفهم معاناتي.... طبعاً بقى يعاين لي بإستغراب بعدها قال لي عمري ما نظرت الموضوع للناحيه دي ! ما متخيل الحاجه دي مضايقاك للدرجه دي !... ما رديت عليهو ، جو كم زبونه كدا مشيتهم و هو لسه واقف ، لمن قعدت جا قعد جنبي و قال لي أنا جد آسف والله! قلت ليهو بالجدد كويس إنو حسام جا و خلاك تضوق نقطة وجع من بحر الأوجاع الأنا سابحه فيهو دا !... سكت مسافه بعدها قال لي: لي كم يوم بفكر في موضوع كدا جيت هسي عشان أشاورك ، أول شي نعمل عرس و نعزم كل الناس و تاني حاجه ننتقل لـ بيت جديد ، صحبتك بقت مسؤوليتنا ، ما عندها مكان تمشي ليهو ولا أنا لا انتِ بنقدر نقول ليها أمشي من هنا ، بس في البيت الجديد حـ افصل ليها جزو صغير كدا تقعد فيهو براها و نحنا في بيتنا براها ، كدا لا أنا حـ اشوفها لا هي حـ تشوفني لا انتِ حـ تزعلي ، علا أنا ما عندي ليها شي و هي عارفه الحاجه دي كويس و قبل كدا إقترحوها علي و رفضتها ، بنات عمتي أنا أصلاً شايفهم زي أخواتي و عمري ما فكرت أعرس وحده منهم ، ما عارف انتِ من اللمح ليك أو قال ليك إنو وحده فيهم عايزاني أو عشمانه فيني !... أما البنات الفي حسابي أنا ما بعرفهم و تعليقاتهم لا بتضر لا بتنفع ، يعني شنو لو جات وحده لا بعرفها لا بتعرفني إلا من خلال حسابي و الشي البقدمو و قالت لي أنا بحبك أو معجبه بيك ؟! شوفي أنا بكتب و برسم و دا المخلي الناس تتابعني ، في الفيس أنا شخصيه عامه عندها كمية متابعين و معظمهم بنات فـ طبيعي تشوفي تعليقات زي دي بس والله ما عندها معنى !
قلت ليهو طيب ، ليه عايز ترحلنا من البيت و حـ نمشي وين ؟؟ قال لي البيت دا ضيق و ماف زول ماخد راحتو فيهو ، لقيت بيت في الرياض واسع و ممكن ينفصل ... طبعاً في نفسي قلت دا أنسب حل لأنو ما معقوله منار تقعد معانا في نفس البيت العمر كلو ! ايوه هي صحبتي و أنا متعاطفه معاها بس برضو ما بقدر استحمل انها لسنوات طويله تقعد معانا في البيت ! و غير كدا يونس بدا يزهج و ليهو حق لأنو دائماً بضطر يطلع من البيت بسببها و أصلاً أنا من يوم شفتها بتشوف في الفيديوهات ديك ما ارتحت ليها و حسيتها غريبه عني ، ما بقدر أعاتبها ولا هي شافعه عشان أشاكلها و أقعد أوريها الصح من الغلط ، أنا شايفه إنو الأفضل منار تبعد عننا ...
المهم تاني يونس قال لي إنو عازم صحبو غدا في البيت قال لي خليكم جاهزين حـ يجي الساعه أربعه ، قلت ليهو في مشكله و هي إني ما بعرف أطبخ فـ خايفه الأكل يطلع ما ظابط فـ تنحرج قدام صحبك ! قال لي حـ اجيب أكل جاهز ، منار سمعتنا و جات قالت ليهو أنا يعني ما شاطره شديد في المطبخ لأنو زي ما عارف كنا في ميتم و في حاجات كتيره ما عارفنها لكن على قدر البعرفو ممكن اظبط ليكم كم أكله كدا ، قلت ليها لا ماف داعي يونس حـ يجيب أكل جاهز ، على أساس كلامي دا يونس جاب أكل جاهز و أنا عملت شاي بنعناع و كبيتو في السيرمس و خلطت عصير منقا ، المهم بعد العصر لمن صحبو صديق جانا طوالي اتذكرتو ، شفتو لمن كان عرسنا في المحكمه ، لمن سلم علي قال لي حمدلله على السلامه مفروض أقولها ليك من بدري بس ما جات فرصه عشان نتلاقى تاني ، قلت ليهو الله يسلمك و ماف أي مشكله ، المهم ختيت الصحاني على الصينيه و ناديت يونس عشان يجي يشيلها ، مصطفى ذاتو مشى قعد معاهم عشان يتغدا ، ناديت منار و قلت ليها تعالي نتغدا في المطبخ بس قالت ما عايزا ، حسيتها زعلانه ، المهم بعد الغدا أديتهم العصير و ناديت مصطفى ، أديتو صينيه صغيره و قلت ليهو أمشي دخلها لمنار جوه ، قال لي طيب و بعديها أنا ماشي ألعب ، قلت ليهو كويس ، طبعاً يونس و صحبو شالو ليهم كراسي و مشوا قعدوا في الحوش ، شلت الشاي و لمن وصلت باب الهول كنت عايزا أنادي يونس عشان يمسك مني الصينيه ، قبل ما أعمل كدا سمعت صحبو قال ليهو : شوف أنا بساعدك بأي شي ما عندي مانع بس يااا ود الخطاب ما تشتغل براك و تمسك قضيه ما قضيتك ولا انت موكل بحلها ! أيوه أنا شاهد و عارف الإنت عملتو و البسببو اتسلطع الضوء على دار إيمان و البسببو حالياً سراج طه يلاحق و البسببو كتير من البنات و الأولاد في الدار حـ يعيشوا في سلام بعيداً عن الإستغلال و البيع الكان ممكن يحصل ليهم في وجود سراج طه ، بس صدقني الإستخبارات لو عرفت انك عملت دا كلو من وراهم كل مجهودات العملتها دي ما حـ يشوفوها و حتكون في نظرهم واحد مخالف و يمكن ينقال عليك خاين ، براك عارف إنو كتار منتظرنك تغلط غلطه زي دي عشان يستغلوها ضدك يا يونس فما تديهم فرصه !... يونس قال ليهو ما بتراجع بعد ما قطعت الشوط دا كلو ، حالياً ساكي الموضوع التاني القلتو ليك ، ها روما وافقت ؟؟ أنا أصلاً ما كلمتها لأنو شايف علاقتها عميقه بـ سعيد فـ لو استعنا بيها و حكينا ليها سعيد حـ يعرف ، يونس قال ليهو دي مشكله دي ! أجيب بت موثوقه من وين عشان تتعامل لي مع الناس ديل ! صحبو قال ليهو حالياً كل البنات البنعرفهم و الممكن يكونوا محل ثقه ليهم علاقه بالإستخبارات و ما بقدروا يتعاملوا معاك انت كـ فرد شغال براك !... اسمع ليلى لو طلبت منها مساعده ما حـ توافق ؟!... يونس قال ليهو حـ تقعد تسأل دا شنو و في شنو و بعدين أنا ذاتي ما عارف اجيب البت ديك من وين عشان أخلي ليلى تتعامل معاها ، أنا شاكي و عايز اتأكد !... صحبو سكت مساااافه بعدها قال ليهو الموضوع دا بدا مع مرتك فـ ليه ما تخليها تواصل فيهو و تعرف هدف البت ديك شنو بما إنو أصلاً مرتك بقت عارفه طبيعة شغلك !
يونس قال ليهو انت مجنووون !! لا لا أنسى الفكره ، مستحييل أدخلها في أي حاجه ليها علاقه بشغلي و البت الإسمها نمارق دي عاجلاً أم آجلاً حـ أعرف اصل ليها و اعرف هدفها شنو حتى لو اضطريت في الآخر إني استعين بـ ليلى .... طبعاً أنا اتغظتت و زعلت لأنو لسه بتعامل مع ليلى و لسه لمن يحتاج مساعده بلجأ ليها هي !
طلعت طوالي و أنا شايله الصينيه و هم سكتوا ، طبعاً يونس من قال اسم نمارق أنا شبه فهمت الموضوع و إنو هو شاكي إنو في شي وراها ، يونس وقف شال مني الصينيه و قال لي كنتِ تناديني ، شال الصينيه و ختاها على التربيزه و قعد و أنا لسه كنت واقفه فـ إتلفتوا عاينوا لي ، يونس قال لي عايزا حاجه ؟؟ قلت ليهو صراحة أنا بالصدفه سمعت كلامكم و فهمت انك شاكي في نمارق ما عارفه مفروض اعمل شنو أو كيف حـ أفيدك بس انا جاهزه ، اتجاهل كلاااامي و قال لي خشي جوه ، قلت ليهو بس أنا ما .... قال لي بعدين حـ نتناقش في الموضوع ☺️
المهم بليل زي الساعه 9 كدا يونس جا داخل البيت لأنو طلع مع صحبو و ياداب دي دخلتو ، لقاني برسم ساااي ، دخل استحم و بدل ملابسو بعدها جا قعد جنبي و شال قلم و بقى يرسم معاي على الإسكيتش ، طبعاً أنا منتظراهو يتكلم معاي بخصوص موضوع قبيل بس عمل رايح ، قلت ليهو يونس ! قال لي حياتي !.... قلت ليهو انت ناسي نحنا مفروض نتكلم عن شنو ؟؟... قال لي عن شنو ؟؟ طبعاً لسه كان برسم ! شلت الـ Skitch و ختيتو على جنب و قلت ليهو قبيل مش قلت لي نتناقش بعدين ؟؟!
قال لي نتناقش في شنو يا مها و الموضوع منتهي! ما تدخلي نفسك في حاجات ما تخصك ، دي ما لعبه عشان تقولي عايزا تشاركي فيها ، قلت ليهو أنا واثقه من نفسي ، انت بس جرب و شوف ، نفسسي والله اشارك في حاجات زي دي ، قال لي دا ما فلم ولا مسلسل عشان تقولي نفسك تشاركي فيها ، قلت ليهو يووونس عليك الله ، حلفتك بـ الله خليني اساعدك ، قال لي لا و الموضوع منتهي... نزلت من السرير و قلت ليهو عندك مشكله تلجأ لي بس ما عندك مشكله تلجأ لـ ليلى ، أي حاجه ليلى ليان ليلى ليان كرهتني !!... انت وقت بتحبها للدرجه دي المانعك تكون معاها شنو ؟؟ المانعك تطلقني و تمشي تعرسها شنو ؟؟ قال لي دائماً بتلفي و تدوري و ترجعي لنفس النقطه الأنا شرحتها ليك و بررتها ليك مية مره !... قلت ليهو ممكن تقدر تغشني بس ما بتقدر تغش نفسك ، ايوه ليان كانت كذبه و كل قصتها كانت زيف بس الحقيقه انك اتأثرت بيها ! قلت انك لمن عرفت حقيقتها كنت بتمثل عليها و عامل نفسك حابيها و انت جد جد كنت حابيها !! انت لحد اللحظه دي ما قدرت تشيلها من بالك ، لحد اللحظه دي انت ضعيف قدامها و أول ما تتصل عليك طوالي بتقوم جاري ليها بدون ما تتردد ، قايلني مغفله ولا ما بفهم ولا ما بشوف !؟
قال لي مدام دي طريقة تفكيرك العمرها ما حـ تتغير فـ أنا ما مجبور كل مره أقعد ابرر ليك و احاول أخليك تثقي فيني ، قلت ليهو ما مجبور تبرر ولا ما قادر تكذب أكتر و انت في نفسك عاااارف إنو ليلى لسه معشعشه في عقلك !... قال لي ما بس معشعشه في عقلي ، دي ساكنه جوه قلبي .... طبعاً لمن قال لي كدا اتخلعت و بقيت أعاين ليهو ، قال لي للسبب دا أنا بفضلها عليك ، للسبب دا حـ ألجأ ليها هي و انتِ لا ، بعد سكوت لحظات قلت ليهو كويس انك بقيت شجاع و قلت الحقيقه ، بعدها الإتنين سكتنا و بقينا نعاين لبعض ، بعدها هو طلع من الغرفه و قفل الباب بكل قوه لمن خلعني !
طبعاً بعدها بقى ما بتكلم معاي خالص ، مر أسبوع و هو متجاهلني ، حتى بقى يمشي ينوم في غرفه تانيه ، ما جا إتكلم معاي إلا لمن كنا حـ نرحل تاني يوم ، جاب ناس نقلوا العفش كلو في نفس اليوم و لمن رتبو لينا البيت داك ، يونس ساقنا ودانا الرياض ، جدعنا هناك و تاني لا اتصل علي لا رجع البيت ، جا تاني يوم الصباح و طوالي طلع ، طبعاً البيت زي ما قال كان واسع و فصل جزو منو صغير كدا لمنار غرفه و برنده و طلب مني أنا أقول ليها انتِ حـ تسكن هنا و نحنا بهناك ، طبعاً ما قالت شي بس واااضح انها زعلت و صراحة زعلها ما هماني بالعكس خلاني أغضب زياده منها ، يعني فوق ما نحنا مخلنها معانا و ما مقصرين منها و أنا مستحمله قلة أدبها كمان جايه تزعل عشان أدوها جزو من البيت براها !!.... المهم بعد الرحول بتلات أيام يونس آخيراً جا راجع البيت الساعه 10 لمن شفتو حسيت إنو لي سنه ما شفتو ، طبعاً كالعاده بتجاهلني ، دخل استحم و جا طالع وقف قدامي المرآيه سرح شعرو و اتعطر و لبس ساعتو و كان حـ يطلع بس وقفت في وشو و قلت ليهو ماشي وين ؟؟
قال لي عندي شغل ، أول ما اتحرك من جنبي مسكتو من يدو و قلت ليهو انت لسه زعلان مني ؟؟ هسي منو المفروض يزعل ؟ انت ولا أنا القلتي لي انك بتحب لي و بتفضلها علي ، شال يدي عن يدو و قال لي لو صدقتي كلامي القلتو كان زعلتي بس بما انك ما زعلانه معناها عارفه كلامي حقيقه و مع ذلك في أي نقاش بتجيبي لي سيرة ليان و بتصري على نقطة إني حابيها! رجعت مسكت يدو تاني و قلت ليهو طيب أنا آسفه ! ما رد علي ، ختيت راسي على صدرو و قلت ليهو عشان انت في أي شي بخص شغلك بتدخل ليلى ! قال لي و مفروض تفهمي إني من خوفي عليك ما عايزا تدخلي في القصه دي ، و ليلى دي أنا لو طلبت مساعدتها بطلبها بمقابل ، أكيد لو وافقت ما حـ توافق ببلاش ! ... قلت ليهو انت ما عارف البت دي في الميتم كانت بتعمل لي مشاكل قدر شنو ، يومياً أنا و هي بنتناقش و ما بنطيق بعض خاااالص ... طبعاً قعد أحكي ليهو عن مواقفي مع ليلى مره يضحك و مره يتفاجأ فيني ، في الآخر قال لي انتِ ذاتك طلعتي ما هينه ! قلت ليهو ايوه و عشان بحس إني فتاة خارقه زي ما بتقول لي ليلى حااابه أساعدك 😎
قال لي حاولي تفهميني أنا ما.... قاطعتو و قلت ليهو مش انت معاي ؟ أنا متأكده إنو ما حـ يصيبني شي ، عليك الله يا يونس خليني اجرب لمره واحده احساس إني جاسوسه أو عميله ، قال لي ياخي أنا ما.... قاطعتو و قلت ليهو يوووونس حبييييبي وافق عليك الله ما حـ تجيني عوجه ! سكت ما رد ، قلت ليهو يعني أكيد ما مطلوب مني أشيل مسدس و أقتل زول صح ! مش انت عايز تشوف نمارق دي بتعمل في شنو و ليه خاشه للبنات في الخاص و بتصاحبهم ؟! إذًا ماف شي خطير ، خليني أرجع تاني و اتعامل معاها عشان أشوف فهمها شنو ، عليك الله يا يونس ، بلييييييز خليني أجرب الشعور دا ، والله متحمسه شديد و وعد مني لو الموضوع بقى خطير حـ أنسحب طوالي ، عليك الله يا يونس يا حبيييبي ما تقول لي لا !
قال لي حبيبي ؟؟... عايزا تاكلي عقلي بالكلمه دي صح و تخليني أوافق بسببها ! مع انها عجبتني والله بس برضو لا معناها لا ... ما قلت ليهو شي بس بالجد زعلت ، أول ما إتحركت من جنبو قال لي اهااا قمتي على الزعل ، تاني شهر شهرين لقدام حـ تخاصميني صح !... ما قلت ليهو شي و واصلت مشي ، ما وقفت إلا لمن قال لي إذا مشيتي كيف حـ تعرفي مفروض تتعاملي كيف مع نمارق يا عميله سريه !... لمن قال لي كدا إتلفت عليهو و أنا متحمسه ، مشيت وقفت قدامو و قلت ليهو جاااادي انت ؟؟ وافقت يعني ؟؟ قال لي مجبور اعمل شنو يعني ، ما بقدر اتحمل خصامك و زعلك !
قلت ليهو يلاااا يلاااا قولي لي مفروض اعمل شنو ، متحمسه لأول مهمه لي ، قال لي البسمعك بقول حيكون عندك مهمه تانيه و تالته و رابعه ! على فكره دي أول و آخر مره بعدها لا تسأليني عن شي بخص شغلي لا تقولي عايزا تدخلي نفسك مفهوم ؟... قلت ليهو المهم هسسسسي قول لي ، يلاااا عشان نرسم مخطط ظابط ... قال لي تمام اسمعي ....
