ငါ့ရဲ့နူးညံ့တဲ့ဇနီးလေးဘယ်ရောက်သွားလဲ

chapter 104

Chapter 104 Delicate little wife
December 15, 2023
Chapter 104

Extra 1.3.1

ရှဲ့ယွင်နန်က မြင့်မြတ်မြို့တော်သို့ ပြန်လာလိုက်သည်။

တစ်ဖက်အဖွဲ့က သူ့ကို လုပ်ကြံရန် ဤတစ်ကြိမ်တွင် လူအင်အားအများအပြား သုံးခဲ့သည့်တိုင် အကြံအစည် ကျဆုံးခဲ့ဆဲပင်။

သူတို့အတွက်လည်း ဤကဲ့သို့ အကြီးအကျယ် လုပ်ကြံသတ်ဖြတ်ရန်မှာ မလွယ်ကူလှရာ သူ့ကို အလွှတ်ပေးနိုင်မည် မဟုတ်ချေ။

သူ မသေသေးကြောင်း သိလိုက်ရပါလျှင် နောက်တစ်ကြိမ် ထပ်ရောက်လာကြမည် ဖြစ်သည်။

ရှဲ့ယွင်နန်၏ ဒဏ်ရာများမှာ အလွန် ပြင်းထန်လှသည်။ သူ ပြန်ရောက်လာသည်နှင့် တစ်ပြိုင်နက် ဆရာဝန်က ချက်ခြင်း စမ်းသပ်စစ်ဆေးပေးကာ ဆေးစစ်ချက်အရ သူ အသက်ရှင်နေခြင်းကပင်လျှင် အံ့ဖွယ်ဖြစ်ရပ်တစ်ခု ဖြစ်နေပြီဟု ပြောလာခဲ့သည်။

သူ့အတွင်းအင်္ဂါအားလုံး ပျက်စီးသွားခဲ့၏။

သူ့ကို အရေးပေါ်ခန်းထဲ ဆွဲထည့်ကာ ဆရာဝန်က အသုံးပြု၍ ရသမျှ ဆေးအားလုံးကို ပေးခဲ့သော်လည်း သူ့ခန္ဓာကိုယ်မှာ အနည်းငယ်ပင် ပြန်သက်သာမလာခဲ့။ ထို့ကြောင့် အရေးပေါ်ခန်းမှ ပြန်ထုတ်လာခဲ့ရတော့သည်။

ခွဲစိတ်ခန်းတံခါး ပွင့်လာသည့်အခါ ရှဲ့ယွင်နန်က သူ့ကို အပြင်ဘက်တွင် ထိုင်စောင့်နေသူများအား ပြုံးပြလိုက်သည်။

ရှချင်၊ လုရှောင်ရန်နှင့် အခြားစောင့်နေသူများအားလုံးမှာ မျက်လုံးများ နီရဲနေကြသော်ငြား သူတို့၏ အမူအယာကို ထိန်းချုပ်ထားကြသည်။ အရူးလေး တစ်ဦးတည်းကသာ ဝမ်းနည်းပက်လက် ငိုကြွေးရင်း သူ့ထံ ပြေးဝင်လာ၏။

သို့သော် လုရှောင်ရန်က သူ့အင်္ကျီကော်လာစကို ဆွဲကိုင်ထားသည်။ လုရှောင်ရန်က အရူးလေးကို ရှဲ့ယွင်နန်ထံမှ ဆွဲခွါရန် သူ့ဟက်စကီး အရူးကောင်အား ထိန်းချုပ်ရန် သင်ယူထားခဲ့သည့် နည်းလမ်းများကို အသုံးပြုခဲ့၏။

အရူးလေးက အော်ဟစ်နေဆဲပင်။

“လာပါ .. ခင် .. ခင်ဗျား မသေရဘူး ...”