ذَروةُ العِشْقِ القَديِمْ

{البارت الرابع}

_ إحنا نستاهل ،
ناسَ مُليانة حَنية وحُب .
ناسَ مُعدها سَوالف الكَبريِاء وغيِرها .
ناسَ تحُارب حَتى تَبقى يِمنا .
ناسَ تَدريّ بنفسَها شِكد مُحَظوظة .
- لأن إحَنا مُوجَودين بحَياتهم ♥️.
〰️〰️〰️〰️〰️
لـروايتي:
#ذَروةُ_العِشْقِ_القَديِمْ
#بقلمي_بصره_الربيعية
#البارت_الرابع
20nana29
🥀🥀🥀

چانت وكاحتي المفرطة وجرأة علي سبب الشر الثاني
بابتعادنه وخرابنه ويه بيت عمي وجدي بعد ابوي،
أما السبب الثالث چان خير النا لأن رجعنا ويه أمي ؛

بذاك اليوم عرفت انُ أرشد اخو علي هذا الي بعد الچبير
من شايفنه نلعب وسامعنه هيچ نحچي رايح وگايل لامه
وسامع عمي وعمي حاچي هاي السالفة بگعدتهم،

أخذوها حجة على أمي لأن مالگو عليها ثغرة
چان الغلط كله من أبوي فمن ظلو يحچون على تربيتنا
وعلى أساس هي ما عرفت تربينا خالي گال عني
طفلة ما تربون انتو ولدكم ، صار صياح
وزادت المشكلة بهالكلام،

عمي گال احنه نربيهن يبقن عدنا ما قبلت أمي وأبوي أصلا ما رادنه وجدي وبيبي كبار ونسوان عمي منو تتحمل جهال غيرها كلمن عدها جوكة مال فروخ ،

مصيرنا نرجع ويه أمي واحنه أصلا مكيفين
تعودنا عليها حتى لو ما ظل النا بيت ولا خيمة
لو حتى ما ظل النا وطن ، امي هي العمود وهي الخيمة
وهي وطنه.

گعدنه أنا وحنونة وحدة تذكر الثانية شلون چنه
نلعب من چنه نروح لبيت جدي تذكرنه الدرب
الي چنه نمر عليه بالسيارة ، ذكريات فلا تنسي ابد،

لو نظرات علي الي واگف يباوعلنا من الباب
ايدينه مكتفة وصافن ونظراته تشرح موقفه
بس ما تفتهمه عقل الطفلة الي عندي ،

تخلدت وتلبدت بذاك العمق الي بروحي
ما چانت وداعية مألوفة لأحد بين طفلين
عاشو طفولتهم سويه بلعب ومرح وحب!

ما فد يوم واحد أذى الثاني الإثنين چانو حيل مخلصين
بس چان حكم الچبير يطغي ويسيطر على الصغير الضعيف بلا حول ولا قوه مثل حكم القوي على الضعيف،

أذكر چان جدي واگف ورا محاوط وجهه وهو نظراته معلگة عليه لمن ادنيت حضنت جدو هو حچه
واحلى ما حچا من گال "تينة" وهو يودعني،

ومشيت وحدث هذا الموقف عاش بروحي
جذوره نبتت بعمق گلبي صارت تخضر ويه كل حنة للذكريات ويه كل سالفة نگولها عن قبل ؛

طلعنه بشويه زعل وشوية رضا
الي يشوف چوالاتنه الي ورانه والحمار يسحب
بعربانتنا الي محملتهن،يظل يباوع علينه،

ما حملنه هم وأمي موجودة چنه نحسها مثل ظل الامان
الي يغطينا ، لمن وصلنا بيت خالي أو بالأحرى شقة خالي