ذَروةُ العِشْقِ القَديِمْ

{البارت الثامن}

في مرحلة ما من عمرك ستدرك أن أشدُّ الأوجاع هي تلك التي لا يكشفها الطبيب ، ولا يستطيع أن يتحدث عنها المريض..! أشد الجروح ألماً ليست التي تبدو آثارها في ملامحنا ، بل التي تترك أثرا لا يشاهده أحدٌ في أعماقنا.
〰️〰️〰️〰️

لـروايتي:
#ذَروةُ_العِشْقِ_القَديِمْ
#بقلمي_بصره_الربيعية
#البارت_الثامن
20nana29
🥀🥀🥀

من طحت فتحت عيوني أباوع لايديه ورجليه برجفة !
أنا گاعدة گعدة على أرض البلكون ومغلقصة جوة الميز..

_دهر دهرچن كون يردن يشمرن بتي الحك يالخال

فززني صياح مرت خالي  درت راسي وچان تسطرني شحاطة خالي العاصية فرت راسي فر ،

_شهرتنا بالعمارة هسة الناس شتگول عليناااا ادبسزيااات
اليوم إلا انعللل ابوچننن لا ابو الخلفچننن والفاچننن

وكل وحدة بينه حصلت فد عشر شحاطات ووين اليوجعك دگ من خالي وانوب كلها تحچي علينا وتغلط
أمي بنين

_ولچن انتن شلون وياچن شلوووون ما تكعن ما تهيمن
الي احچي يدخل من ذان يطلع من الثانية والله مرمرتني

وهنا امي طاحتلنه خبز خبز خبزتنه خبز العباس ،
سحتنه للغرفة كملت كتلها وهوس ظلت بيد امها وأبوها

انا وحنونة وحدة منطية ضهرها للخ ونبچي
تالي سبحنه ومشطلتنا بنين جرت شعرنا جر ونمنه،

چانت الكتلة عبارة عن بنج عام أما هاي العشر ثواني
قبل لا اغفى كلش دعيت ربي بلسان طفلة وبعده مناشغ البچي بصدري:
"ربي بس رجعنه لبيتنا احلفلك والله بعد ما اكطع الصلاة"
ببداية غفوتي تخيلت روحي بحديقة بيت جدي
وعلي فوگ السدرة يشمرلي نبگ وانا اضحك بفرح
بعدها غطيت بالنوم...يمكن چان حلم؛

گعدت من النوم اتلمس الوجع الي بگصتي واحسها وارمة
طفرت باوعت بالمراية حتى عيوني مورمة من البچي

چانو كلهم نايمين تنسبلت بهدوء وطلعت امشي على أطراف أصابعي طلعت من الشقة كلها ونزلت الدرج
طلعت حتى من العمارة باوعت چان وكت العصر بس بعدها الشمس بس جو فد حلو اجواء العصرية قبل هذا الي يبيع چرك وكيك سوگ والبسطيات كدامنا من ذيج الجهة والشارع ازدحام هيج وكت ، چنت بوقتها حيل ضايجة
ووجهي مدلغم ومتعور ، گعدت برا على الرصيف
اخط بصبعي على خطوطه واباوع للي رايح والجاي،

شوية واشوف إيثار جاي من بعيد بس يحرك بايديه وكل شوي يتلفت مبينه عليه العصبية انا طفرت من مكاني گلت هسة اكيد سامع بالي سوينا مساع وجاي متحلف بيه ، ردت ادخل للعمارة ابن خالي طلع،
لفيت ورحت ختلت بالمنور الي يم المحل واباوع عليهم