ذَروةُ العِشْقِ القَديِمْ

{البارت الحادي عشر}

ما رهمت ويانه تكول ماعيش
بـ محكمة القدر طلگنا الافراح
طيور الخير هجن عافن البيت
وغراب الفگر بمجانهن صَاح
مسودن بختنا وحظنا مشلول
ومتكثر الحزن منهم عَ راح
على الجاهل گبل نتنگب نگاب
هسه يموت ابونا نكول يرتاح
مدام الموت أَرحم لليموتون
دمشونه لعد كل احنا نرتاح .
- جبار رشيد -

لـروايتي:
#ذَروةُ_العِشْقِ_القَديِمْ
#بقلمي_بصره_الربيعية
#البارت_الحادي_عشر
20nana29
🥀🥀🥀

گاعدة بترك البيت قريب يحل الظلام عليه
دنيا مغربية چانت ودموعي تنزل بحرارة على خدودي ما اريد ابچي بصوت وتسمعني أمي وخواني عبالهم گاعدة اللعب بس أنا احس نفسي كبرت بذاك اليوم احس بيها انحنا ظهري ورجلية ما شالتني رغم صغيرة بس الموقف چان اكبر مني واثقل من حجمي ، ومشهد ذاك اليوم
ما يروح من كدام عيوني انطبع براسي؛

هيأتها ومنظرها الأخير الي شفناها بي ما چان يوحي هي بخير بس ما افتهمنه ما فهمناها ولا هي حچت ،

احچي بگلبي واطك بروحي بقهر واصيح بين بچيي
يا الله يا الله شگد چانت صعبة عليه ذيچ الفترة
لسه اذكر من رجعنا من ذاك الطريق الي چان لامنا ويمشينا ويجيبنا سوالفنا وضحنا ومشاغباتنا ،رجعنا واحنا محملين طن من الكآبة ولتر من الدموع يا سبحان الله الوحيدة الي چان طريقها مخالف لطريقنا هسة هم راحت بغير طريق لـطريق الموت!

ورا ما عرف بـ الي صاير أيسر اذكر سحبني بخوف من المكان وحتى صيح عليه لأن ما ردت أرجع بس ما عبالك اسمعه چنت كل الي اسمعه صريخ الناس أهلها ؟!

بعديش يبچون عليها بعد ما ضيعوها بنفسهم
بعد ماكو مشمشة خل يرتاحون كلها تحالفت عليها وضيعوها راحت طفلة بعمر الورد
تكطعت وصلة وصلة ونشمرت بعلاگة ملفوفة بعبايتها
بجنطة المدرسة!

هم استغاثت هم بچت حيل بخوف هم صرخت
ليش محد سمعهاا ليش محد نقذها ، بعدها صغيرة يا الله طفلة طفلة شلون هانت عليهم هيچ يكتلوها وفوكاها يذبحوها ويگطعوها؟

شنو من نفسية معفنة عدهم معقولة الي يسوي هيچ محسوب على البشر من يا طينة چا همه؟

بنين_وينچ أنتِ هناا وندور عليچ بالبيت؟!
تعالي گومي

التفتت عليها شافت عيوني المغورگة بالدموع
غضنت حواجبها وادنت عليه

بنين_شبيچ عمري بعدچ حزنانة على صاحبتچ

زحفت إلها وشبگت رجلها وضليت ابچي من كل گلبي
عبالك من گالت هيچ كالت ابچي

هي باستني على راسي وتواسيني
_لا تضوجين ترا راحت لمكان احسن من هذا العالم
راحت لربها تدرين هسة هي طير حلو بالجنة