ذَروةُ العِشْقِ القَديِمْ

{البارت السادس}

"أخاف أن أستأنس مجددًا
بأشياء.....ستتركني."
〰️〰️〰️〰️
#من_روايتي:
#ذَروةُ_العِشْقِ_القَديِمْ
#بقلمي_بصره_الربيعية
#البارت_السادس

20nana29
🥀🥀🥀

_شكوووو...شعدچن نازلات؟!!!

وتين: التفتنه على صوت ابن خالي وعرفنه ليش هيچ بحلقت هوس عثاري من الخوف!

صرنا عبارة عن عيون منططة ولا وحدة بينا حچت
لأن نلزمنا،

هوس بسرعة التفت واجت تركض نعال خالي ظل وراها نزلت خمطته ورجعت ركضت سوت الدرج شبختين

انا وحنونة ظلينه مصفصفات نريد ندور ونرجع
بس ابن خالي بسرعة صاح
_ايثار هذني خواتك مدري شيريدن

يحچي هيچ وبنبرته نبرة غطرسة عود مفتخر هو لازمنه،
دخل إيثار يباوعلنه يستفسر عن نزلتنه بس چان اكو دخان يطلع من حلگه وهو يحچي حتى مچان اكو برد
أصلا بعده الشتا ما اجه؛

إيثار_شتردن ما تحچن ؟

أنا ام لسان بسرعة تلاحگتنه وگتله بتاتأه
_ءءنــريد نشتري

زمخ بينا
_ امشن امشن وكت مشترى هسة صعدن گدامي
لا ارگع راس براس ، على فلوسنا الزايدة حتى يشترن

ظل يتمتم ويا روحه بعصبية،
ضجنه من اسلوبه لزمت بايد حنونة وصعدنا ثنينه
من على الدرج باوعتله من فوك چاي يدور عيبت عليه
وسويتله حركات بوجهي يالله ارتاحيت ودخلت

چان لحد هذاك اليوم بالنسبة للأحداث الي مرت ويانه
كلشي طبيعي أصلا لأن چنه صغار هيچ نگول
بعدنا ما وعينه على الدنيا وضگنه المر الحقيقي

اجه يوم الثاني الصبح من وكت گعدنه
أمي لابسة العباية والجواريب والچيزدان بأيدها
فاتحته تحوس بي ، أنا بسرعة طفرت

_يمه وين رايحة لبيت جدي
_ لا يمة وين لبيت جدج ، عندي شغلة هنا بالسوگ
أروح واجي ما وصيچن وحدة تلزم ايد الثانية
ما اريد سالفة البارحة تنعاد،

گعدت توصي بينه وتحذر وأكثر من مره عادت الكلام،
رحنه للمدرسة والتقيت ويا مشمشة بالباب
بس مشمشة ضايجة ولابسة اليوم عباية!

_مشمشة شبيچ
چانت مشمشة حلوة طويلة وعبالك اكبر من عدنه
بس چانت عدها ضروس متقدمة عن اسنانها
يعني اسنانها مطعوجة ليگدام بس مميزتها
هو يگولون كل حلو بي لولة هذا الشي ينطبق على مشمشة الي چان حتى طريقة كلامها تختلف عنه
بحيث كل شوي اطلع لسانها وتبلل شفايفها،

مشمشة_تعالي خلِ يجن البنات واسولفلچن

دخلنه للصف ذبينه الجنط ضمت مشمشة عبايتها
وطلعنه قبل ليدگ الجرس لأن چنه جايين من وقت