මගේ ඇට්ටේරියා මල ❤️ [ BL ]

Part 6 (මගේ ඇට්ටේරියා මල)

නැවතුනා විතරක්ම නෙවෙයි. ඉස්සරහට තබපු අඩි ආයෙත් පිටිපස්සට ගියා. හදවත නතර වුණා. මිනිස්සුම මවපු හීන ලෝක හරි ඉක්මනට අපෙන් විනාඩියට දෙකට උදුරන හැටි එක මොහොතකින් සඳදෙව් ඇස් පනාපිටම දැක්කා.

තමාට අයිතිය ලියාගත් ඒ දෙතොල් වෙන දෙතොල් වල පහසින් මත්ව හිටි හැටි දකිද්දී හදවත මැදින් පිහි දාරයක් අරගෙන යනවා වගේ.

ඔව් ! විහස් නෙත්දුල නම් දැන් වැව රවුමේ බංකුවක ප්‍රේම පරාදීසක මත් වුණු වන බඹරෙක් ගාණට මත් වෙලා කාන්තාවකගේ දෙතොල් පැහැරගෙන හිටියා . ඒකත් සඳදෙව්ගෙම පන්තියෙ තිසෙව්ලි ආකර්ශා ජයමාන්න එක්ක .

සඳදෙව් රිදෙන පපුවත් අරගෙන ආයෙම යන්නම හැදුවත් තවදුරටත් රැවටිලිකාර මේ ප්‍රේමවන්තයා ඉදිරියේ තමා නොරැවටෙන බව ඔහුට අඟවන්නට ඕනම වුණා . ඉතින් ,

" අප්පටසිරි තිසෙව්ලියෝ ! මම මේ හීනයක් ද බං දකින්නෙ?"

ඉතින් තිසෙව්ලි ඒ හඬට ගැස්සුනේ නොහිතපු වෙලාවක ඉස්කෝලෙ යාලුවෙක් මෙහෙම මුණ ගැසුණු නිසා වුණත් විහස් ඒ කටහඬට ගැස්සිලා ඇස් ලොකු කරගෙන බලන් හිටියෙ නොහිතපු වෙලාවක ඇහුණු කටහඬ නිසාම ද ?

" I'm really sorry . අපිට ඉතින් හැදියාව නෑනෙ. ඊටත් එහා ඉස්කෝලෙ කොල්ලෙක් එක්ක යාලු වෙයි කියල හිතන්නවත් බැරි චරිතනෙ උඹල . ඉතින් නොදැක්කා වගේ යන්න බෑනෙ බං . "

" ඒ සඳදෙව් මේවා ඉස්කෝලෙ ගිහිල්ලා කාටවත් කියන්න එපා බං . "

" බය වෙන්න එපා . මම අදිස්ට ඇරෙන්න කාටවත් කියන්නෙ නෑ . " එහෙම කියල සඳදෙව් බොරු හිනාවක් මවා ගත්තා.

" සඳදෙව් පිස්සු ද ඕයි . නැති ප්‍රශ්න මට හදල දීල යන්න එපා බං . " එහෙම කියල තිසෙව්ලි කියද්දී ,

" මම ඉතින් එහෙම කිව්වට උඹේ boy friend ට ගාණක්වත් නෑනේ ඒ මොකක්ද කියල අහන්නවත් . ගත මේ ලෝකෙ තියල උඹේ මිනිහ හිත කොහෙද බං තියන් ඉන්නෙ . "

" මො..මොකක්ද ? " ඉතින් වචනත් පැටලි පැටලි විහස් එච්චරයි කිව්වෙ . මොකුත් කතා නොකර අහක බලන් හිටියා .

" බලහන් ඉතින් අපිත් රැවටිලානෙ තිසෙව්ලියෝ ! බලපං ඉතින් විශ්වාස කරන්නත් පුළුවන් ද උඹව මෙහෙම හම්බවෙයි කියල . මිනිස්සුන් වෙස්මූණු වලට අපි රැවටෙන තරමක් බං . "