~يا هناي بعد عسّرات الليالي~

~٢٣~

بيت هذام
بعد ما هدأ الجو طلعوا البنات للصالة الثانية و يتبادلون السوالف و من سالفة الى اخرى انتبهت هناي للرسالة اللي وصلتها و بالتوقيت الدائم رفعت جوالها و انتبهت للنقطة من الرقم الدولي الغريب ولا تعرفه لكنه اخر فترة صار قريب بالنسبة لها و هالنقطة اللي يرسلها اصبحت روتينها و تنتظرها و ارسلت نقطة كالمعتاد و لا تنتظر غيرها ولا قد بادرت مع هالغريب سوى بالنقطة اللي يرسلها و ترد عليها و انتبهت لها ورد و نطقت : صاحب هالرقم ما يترك هالعادة ؟
هزت راسها بالنفي ونطقت : مدري بس لي 6 اشهر وتعودت عليه ولا ابيها تختفي هالعادة
ناظرتها بسخرية ونطقت : مدري احس وش هالجنون وليش صامل طول هالفترة ولا بادر بغيرها ؟
هزت راسها ونطقت : لا تدرين ولا احد فينا حاول يبادر
ناظرت لدخول غند ونطقت : عجيب صراحة
قاطعتها هناي ونطقت بتساؤل : كيف احوالك ؟
رفعت كتفها بمعنى ما ادري ونطقت : كلها واقفه عند هذال
ربتت على كتفها ونطقت : هذال ينحط على الراس ودام واقفه عليه فالامور بخير
قربت منهم غند ومعها ادوات القهوة اللي يبونها من يدين هناي و نزلتها ونطقت سمو : وحشتني قهوتك
ابتسمت غند ونطقت : وانا بعد وحشتني
ناظرتها ورد ونطقت : امس بعد ما طلبتي ارسلتها لك مع السواق متى وحشتك ؟
هزت راسها بالنفي وضربت كنف ورد ونطقت : ياغبيه اقصد هناي ما اقصد القهوة
ابتسمت هناي وهي ما توقعت هالكلام من غند ونطقت بمزح : حددي وحشتك ولا بتقلبين علي بعدها ؟
ابعدت من ورد و قربت لها ومسكت يدها ونطقت : انا اسفه على كل شي و نبدأ من جديد ؟ والله ما كنت اقصد ولا كنت اقصدك انتي انا اقصد حياتنا وكل شي حولنا
ربتت على يدها ونطقت : ما زعلت عليك عشان اسامحك تراك بنت عمي
زمت شفايفها و شتمت نفسها الف مرة انها ظلمت هناي و قربت منها وضمتها فجأة و ضحكت هناي و شدت عليها و بعدتها ونطقت : بتنزل لكم احلى قهوة على شرف عودة العلاقات

اخر الليل عند وضحى
جالسة مقابل الشباك و الخوف محتلها بهالمكان الغريب عليها وتنتظر جيته على احر من الجمر لو يخاصمها اهم شي يجي بخير و فزت من انفتح الباب و تركت الكوب اللي بيدها و رفعت الوشاح على كتفها و وقفت و تقدم لها و ملابسه كاسيها الغبار و تقدم ناحيتها وعلى انه هادي الا انها حست ان هالهدوء يسبق العاصفة و وقف قدامها وناظر ملامحها ونطق بعتب : ليه تجيبين الكلام لنفسك يا وضحى ؟
زمت شفايفها من نطقه لاسمها ولا ناداها كعادته ونطقت : ما عدت بنت مطلق ؟
رفع يدينه على كتفها ونطق : ليه يا بنت مطلق ؟
نزلت راسها و مسحت الدمعة اللي تمردت على خدها بعنف ونطقت : تنتهك عرضي و سمعتي كيف تبيني اتركها ؟
تنهد بغبنه من دمعتها اللي مسحتها و كملت : زعلان مني ؟
ضحك بسخرية و مد يده لذقنها و رفع وجهها و نطق : انا زعلان عليك ما ازعل منك يا بنت مطلق
تمردت عليها دموعها من حنيته و طاحت دمعتها على يده واحرقته و مسح دموعها و لا يقدر يواسيها الا بهالطريقه و صد عنها لكن مسكت ذراعه و التفت لها وما هي الا ثواني توسدت احضانها و توسعت عيونه بصدمة من مبادرتها وعلى انه شتم درة الا انه وده يحب راسها هالمرة و شد عليها و رد روحه و اجهشت بالبكاء على كتفه ونطقت :
كلهم يتعوضون الا انت
ابعدت عنه لكن لازال محاوطها بيدينه وكملت :
شفتني بعز ضيقتي مرتين وما هنت عليك ولا تركتني قول لي كيف اجازيك ؟
تحسس بيده وجنتها ونطق وهو واصل اعلى مراحل الهيام : كوني معي وهذا يكفي
تنهدت و نطقت : انا معك بس عطني وقت ممكن ؟
طبع قبلته على جبينها و ناظرها و رفع اصبعه على خشمه ونطق : لك العمر كله على خشمي
قربت من خشمه و ضربت خشمه بخشمها ونطقت : عليه الطيب
ضحك وزادت ضحكته من عفويتها ونطق : حيك يا بنت مطلق
ابتسمت له واشرت له بالجلوس ونطقت : حي نباك
وجلس وجلست بجانبه و مسك يدها وسرور الكون كله مجتمع في صدره ونطق : لسانك الحلو يطلع بالسنة مرة
ضحكت وبانت صفة اسنانها العلوية واردفت : انا دايم رايقه بس احب استفزك نفس ما كنت استفز سعد
تأملها و تأمل سوالفها وهو يجزم انه ما يدري وش تسولف فيه و وعى من نطقت : حاكم اكلمك وين سرحت من اخذك مني ؟
ابتسم بحب وهو وده لو ينطق ويقول حتى وانا معك مشغول فيك لكن نطق : ابد اسمعك سمي