"ညနေကျရင် Jeno နဲ့ ကော်ဖီသောက်ဖို့ ချိန်းထားတယ်"
"WHAT "
Mark Hyung က ထအော်သည်။
Lee Haechan ကတော့ အံ့ဩဟန်မပြပေ။
ပြီးမှ Chenle ကို ကြည့်ပြီး တစ်ခွန်းပြောလိုက်သည်။
"Chenle ရေ ဟို တစ်နေ့က Lee Jeno က Huang Renjun အပိုင်လို့ ပြောလိုက်တယ်လေ"
"အင်း ဘာဖြစ်လို့လဲ Hyung "
"အဲ့ဒါ အဆက် ကျန်သေးတယ်"
အားလုံး ငြိမ်သက်စွာ နားထောင်နေကြသည်။
"Huang Renjun ကလည်း Lee Jeno အပိုင်ပဲ"
Haechan ကတော့ မဟုတ်တာပြောပြီးပြေးတော့သည်။
*
ကော်ဖီဆိုင်ရောက်တော့ ကော်ဖီတွေလာချသည်အထိ Jeno က ဘာစကားမှမပြောပေ။
ဘာလဲနော်။ အတန်းဆင်းတော့ တီချယ်ထွက်သွားတာနဲ့ သူ့ဘေးကို ချက်ချင်းရောက်လာပြီး အရေးတကြီးပြောစရာရှိတာလိုလိုလုပ်ပြီး အခုတော့ ငြိမ်နေပြန်သည်။
"Jeno က ငါ့ကိုဘာပြောစရာရှိလို့လဲ"
မပြောမပြီး မတီးမမြည်မို့ သူက အရင်စပြီးမေးရသည်။
"ဒီအတိုင်း"
Jeno က ပြောသင့်မပြောသင့် စဉ်းစားနေပုံပင်။
"ကိုယ်နဲ့ ဘာလို့လမ်းခွဲခဲ့တာလဲ"
"ပြောခဲ့သားပဲ။ အိမ်က ရည်းစားထားတာ သဘောမကျလို့လေ"
လွန်ခဲ့တဲ့သုံးနှစ်။ လမ်းခွဲစကားကို Renjun က စပြောခဲ့သည်။ ဆင်ခြေဆိုပေမယ့် ငယ်သေးတဲ့အချိန်မို့ အိမ်က တကယ်ကြီးကို ရည်းစားမထားစေချင်ခဲ့ပေ။ ဒါပေမယ့် သူ့မှာ ချစ်သူရှိလျှင်လည်း အိမ်က ကန့်ကွက်မည်မဟုတ်တာ သူသိသည်။
"အဲ့ဒါထပ် တခြားတစ်ခု ရှိသေးတယ်လို့ ကိုယ်ထင်တယ်"
ဘာလဲဟ။ Lee Jeno က သုံးနှစ်ကြာမှ သူ့ကို တရားခံစစ်သလိုလာစစ်နေသည်။ အမှန်အတိုင်းသိရင် သူလည်း စိတ်ချမ်းသာမှာမဟုတ်ဘဲနဲ့။
"မင်းမသိချင်လောက်ပါဘူး"
"ဟင့်အင်း ကိုယ်သိချင်တယ်။ ဖြေပါ"
ကောင်းပြီလေ။ သိချင်နေတော့လည်း...
"ငါ မင်းကို မချစ်ခဲ့ဘူး"
"သိသားပဲ"
ဒီတစ်ခါ အံ့ဩရသူက Renjun ပင်။
"မင်း ကိုယ့်ကို မချစ်တာ ကိုယ်ခံစားမိပါတယ်"
"မင်းကို ကစားသလို ဖြစ်ခဲ့တာကို တောင်းပန်ပါတယ်။ အဲ့ဒီအကြောင်း စဉ်းစားမိရင် မင်းအပေါ် ငါ လိပ်ပြာမလုံဘူး"
အဲ့ဒါကတော့ အမှန်ပင် ။
"ကိုယ်တို့ လမ်းခွဲတုန်းက အမုန်းတွေမပါဘူးနော်။ အေးအေးဆေးဆေးပဲ လမ်းခွဲခဲ့တာ"
ဟုတ်သည်။ ကျောင်းပိတ်နေတုန်းမှာ သူက Jeno ကို ဖုန်းဆက်ပြီးလမ်းခွဲခဲ့သည်။ မျက်နှာချင်းဆိုင်ပြောဖို့ကျ သူကြောက်နေခဲ့သည်။ လမ်းခွဲပြီးနောက် ကျောင်းမှာ တွေ့တော့လည်း သူကပင် စတင်၍ သူစိမ်းတွေလို မသိချင်ယောင်ဆောင်ခဲ့သည်။ Jeno ကလည်း ဘာပြဿနာမှမရှာတာကြောင့် သူအေးဆေးနေနိုင်ခဲ့သည်။ အဲ့ဒီအတွက်လည်း အမြဲအားနာမိရသည်။
"ကိုယ်က မင်းကို တကယ်ချစ်ခဲ့တာ"
ချစ်ခဲ့တာ။ ဆိုတော့ကာ အတိတ်ကာလကြီးပါလား။ အခုတော့မချစ်တော့ဘူးလို့ ဆိုလိုချင်တာလား။
"မင်းကြောင့် တော်တော်ခံစားခဲ့ရတယ်။ အဲ့ဒီအတွက် အလျော်ပေးပါ"
Jeno က တော့ အေးအေးဆေးဆေးဆက်ပြောသည်။ အစကပြေဖို့တုံ့ဆိုင်းနေတာ သူမဟုတ်တဲ့အတိုင်းပင်။
"ကိုယ် မင်းကို ပြန်လိုက်မယ်။ ဒီတစ်ခါတော့ မင်းအချစ်ကို ရအောင် ကြိုးစားမယ်"
သူမျက်လုံးပြူးသွားသည်။ Lee Jeno ရဲ့ ဦးနှောက်က တစ်နေရာရာမှာ လွတ်နေတာများလား။ ရည်းစားဟောင်းကို လက်စားချေဖို့ဆိုရင် နောက်တစ်ယောက်ထားပြီး ပျော်ပျော်ရွှင်ရွှင်နေပြသင့်သည်။ တစ်ယောက်တည်းတောက်ပတာလည်း လုပ်လို့ရသည်။ သူ့ကျမှ exကို ပြန်လိုက်မည်တဲ့။
"အဲ့ဒါ မင်းကို ခွင့်တောင်းတာမဟုတ်ဘူး။ အသိပေးတာ"
ဆိုလိုချင်တာက သူ့ကို ရအောင်လိုက်ပြီး အသည်းပြန်ခွဲမလို့လား။ အဲ့လိုသာဆို Lee Jeno အစီအစဉ်က ကျရှုံးပြီပဲ။ သူ့နှလုံးသားက ဘယ်သူ့အတွက်မှခုန်မှာ မဟုတ်တော့ဘူး။
သေချာတယ်။
