Jeno ပါးကို ဘယ်လိုသတ္တိနဲ့ နမ်းခဲ့တာလဲ သူ့ကိုယ်သူပင်မသိပေ။ အဲ့ဒီအချိန်တုန်းက ဘယ်လို အတွေးတွေ တွေးမိနေလဲ မသိတော့။
အရူးပဲ.... Huang Renjun အရူးပဲ။ နောက်နေ့ကျ Jeno ကို ဘယ်လို ရင်ဆိုင်ရမလဲ။ အရက်လေးနည်းနည်းဝင်တာနဲ့ ဘာမှမထိန်းနိုင်တော့ဘူး။
ခုတင်ပေါ် လူးလိမ့်ကာ ကိုယ့်ကိုယ်ကိုယ် အပြစ်တင်နေမိရင်း ဖုန်းလာတာမို့ ကိုင်လိုက်သည်။
Lee Jeno တို့ကတော့ အခုပဲ ပြန်သွားတာကို...
"Jeno ပြော"
"ဘယ်က Jeno ရမှာလဲ ငါ Haechan ဟ"
အဲ့ဒီကျမှ နံပတ်ကို သေချာကြည့်မိသည်။
"အဲ့လောက်တောင် ဖြစ်နေပြီပေါ့ Huang Renjun တို့က"
Haechan ပြောတာကို ငြိမ်ခံရုံသာရှိသည်။
"အိမ်ကို သေချာပြန်ရောက်ရဲ့လားလို့"
"ရောက်တယ်။ အခုမှသတိရလား ငါ့ကို"
"မင်းလည်း Jeno နဲ့ ကြည်နူးနေတာ ငါသိပါတယ်"
"မင်းလည်း အတူတူနဲ့ အနူနူပါပဲ Haechan ရာ။ တော်ပြီ ဒါပဲ"
"အေးပါ။ အိပ်ပျော်အောင်အိပ်။ တစ်ညလုံး Lee Jeno ကို ပဲ သတိရမနေနဲ့"
ဘာမှမပြောတော့ဘဲ ဖုန်းချလိုက်သည်။
*
အဲ့ဒီနေ့က စပြီး Renjun ရဲ့ ဘဝမှာ အလုပ်တစ်ခုတိုးလာသည်။ Jeno ကစားသော ပွဲများကို လိုက်ပြီး အားပေးရခြင်းဖြစ်သည်။ ဒီနှစ်ရဲ့ အားကစားပွဲတွေ မပြီးမချင်း Haechan နဲ့အတူ သူပါ အလုပ်များရသည်။ သူက Haechan နဲ့အတူ ပွဲမစခင်ကတည်းက ကြိုရောက်နေတတ်ပြီဖြစ်သည်။ အဲ့ဒီအခါ Jeno က သူ့ကို စကားလာပြောပြီး သူ့ပါးမှာ စတစ်ကာကပ်ပေးသည်။
အခုလည်း ပွဲမစခင် Haechan နဲ့ သူက ရောက်နေပြီဖြစ်သည်။ Haechan က Mark Hyung နဲ့ စကားပြောနေတာမို့ သူလည်း Jeno ကို ရှာမိသည်။ ခါတိုင်းဆို Jeno က Hyung နားမှာ ရှိသည်။ ဒီနေ့တော့မတွေ့ရသေးပေ။
ပြီးမှ ခပ်လှမ်းလှမ်းမှာ ကောင်မလေးတစ်ယောက်နဲ့ စကားပြောနေတဲ့ Jeno ကို မြင်ရသည်။ သေချာကြည့်တော့မှ အဲ့ဒီကောင်မလေးက Jeno ညီမလေးလို့ သူတို့အဖွဲ့နာမည်တပ်ထားတဲ့ ကောင်မလေးဖြစ်နေသည်။
"Hyung အဲ့ဒါ Jeno ရဲ့ ex လား"
Haechan က သူကြည့်နေတာကို လိုက်ကြည့်ရာမှ မြင်ပုံရသည်။
"အမ်....ဘယ်လိုပြောရမလဲ။ Chanie က Jeno က တွဲနေတဲ့သူရှိတယ်လို့ ပြောပြီး နောက်နေ့ကျ အဲ့ကောင်မလေးနဲ့တွေ့တာပဲ"
ထိုစဉ် ဘယ်တုန်းက ရောက်နေမှန်း မသိသည့် Le Le က
"ကျွန်တော်က နှစ်ခါ သုံးခါလောက်တော့ တွေ့ဘူးတယ်။ ဒါပေမယ့် သိတယ်မလား။ အတွဲလား ရိုးရိုးခင်တာလားဆိုတာ ခံစားမိတယ်လေ။ ကျွန်တော့်ခံစားချက်ကတော့ တွဲဖူးတယ်လို့ ထင်တယ်"
ကောင်မလေးက ရိုးရိုးအေးအေးပုံလေးဖြစ်သည်။ သူတို့ထက် တစ်နှစ်ငယ်သည်။
သူတို့အဖွဲ့လူစုံနေတာမို့ စကားပြောရင်း Jeno တို့ကို အကဲခတ်နေမိသည်။ ဒါမျိုးကျ သူတို့အဖွဲ့က တိုင်ပင်စရာမလိုဘဲ အတိုင်အဖောက်ညီသည်။ သူတို့ စကားပြောနေတုန်း Jeno က သူ့တို့နားရောက်လာသည်။
"Jun ရောက်တာ ကြာပြီလား"
"အင်း"
ရုတ်တရက်ကြီး Jeno က သူနဲ့ အလှမ်းဝေးနေသည်ဟု ခံစားရသည်။
"အာ စတစ်ကာ မယူခဲ့ရသေးဘူး"
မတောင်းဆိုတာတောင် လုပ်ပေးခဲ့သည့် Jeno က အမြဲလုပ်ပေးနေကျ အလုပ်ကို မေ့လျော့နေခဲ့သည်။ သူများတွေအတွက် အသေးအဖွဲဖြစ်နိုင်ပေမယ့် သူ့အတွက်တော့ အသေးအဖွဲမဟုတ်ခဲ့ပါ။
"ပွဲစတော့မယ်တဲ့"
ကစားသမားတစ်ဦးက သူတို့နားလာပြောသည်။
"Jun စတစ်ကာက.."
"ရတယ် Haechan ဆီက တောင်းလိုက်မယ်"
ပွဲမှာ Jeno စိတ်မကောင်းဖြစ်မှာစိုးလို့ ဘာမှမဖြစ်သလို ပြုံးပြီးပြောလိုက်ပေမယ့် အဲ့ဒီနေ့က Renjun တစ်ယောက် ပါးမှာ စတစ်ကာမကပ်ဖြစ်ပါ။ ဒီအတိုင်းပွဲကို ကြည့်နေရပေမယ့် စိတ်ထဲမှာ တစ်ခုခုဖြစ်နေသည်။
ပွဲက ထုံးစံအတိုင်း Jeno တို့နိုင်ခဲ့သည်။ ကစားသမားတွေ စုပြီး စားကြမှာမို့ Haechan က Hyung နဲ့ စကားခဏပြောပြီးတာနဲ့ သူနဲ့အတူအိမ်ပြန်ခဲ့သည်။
