أنة وياك
چَنت الرُوح بالرُوح
و أنة بلياك
ويَن روُيحتي تروح ؟
تَعال مسامحك
والعتب مِسموح
حَرام تضيع
عشرة عُمر وتروح
هَذا أنتَ العزيز وخنت بية
شلون الغربة بعد تَحن عليه ؟
•⊱━━━━⊰•✾•⊱━━━━⊰•
الخالة نشمية:
شبيچ بنية؟ وجهچ مو خوش، شصاير؟
تماضر:
ما أدري خالة، روحي محصورة.
الخالة نشمية:
مو أحسن من كمب الأرمن؟
تماضر:
أحسن... بس ما أدري، عبالك مثل العرب الشايلة.
الخالة نشمية:
يعني بعدچ ضايعة؟
تماضر: (بهمس)
أي، كلش... كأنه الدنيا كلها بمكان، وأنا بمكان ثاني.
الخالة نشمية:
حقچ بنية، حديثة بالغربة، والإنسان مو دجاج وين ما يوكر ينام! حتى الطيور يراد إلها حله. وانتِ كاعدة بحجرة، عكب باچر راح يجي الشتة، والهوه الجاي من الشط يكص العظام كص، وأشلون راح تكضين عمرچ بحجرة فارغة؟ دحچي، دكولي! والا هيچي الحب يعمي؟
تماضر: (بحدة)
حب؟! وهو أكو حب بالدنيا؟!
الخالة نشمية: (باندهاش)
خاطر الله متكولي لي منين تعرفيه؟
تماضر: (بألم)
خالة نشمية، متعرفين اشسووا بيه أهلي؟
الخالة نشمية:
نزول على أهلچ... وهو من طرفكم؟
تماضر: (تجهش بالبكاء)
الخالة نشمية:
تكولي عيني، قابل سر؟ وحتى السر ينعرف!
تماضر: (بصوت متقطع)
لا...
الخالة نشمية:
لعد اشلون عرفتيه؟
تماضر:
انهزمت من بيتي، وأني ناويه أذب نفسي بالشط.
الخالة نشمية:
وشافچ عالشريعة ومخلاج؟
تماضر: (بحسرة)
اوي، خالة نشمية، على بختج!
الخالة نشمية:
متكولي عيني، مو مرمرت افادي... وين شفتيه؟
تماضر:
بالسينما!
الخالة نشمية:
وچنتِ تعرفيه من قبل؟
تماضر:
خالة نشمية، جنت مثل المخبلة، ما أعرف وين أولي وجهي...
الخالة نشمية: (مترقبة)
وحاجيتيه ونمتي بحضنه؟
أنت تقرأ
نخلة والجيران
General Fictionتدور الرواية في بغداد، في احياء صفتها الاولى الفقر الشامل، أما زمن الرواية فهو الحرب الكونية الثانية، سنواتها الاخيرة، وزمن الاستعمار البريطاني والمواجهة بين الفاشية واعداء الفاشية في العالم. -الرواية واقعية -الرواية باللهجة العراقية القديمة -لل...
