حبيتك بغلطك و صوابك بدون ما احس

23

صحت ساره من النوم على رسائل ورا بعض و فتحت جوالها تشوف الرسايل صوتيه واصله لها من رقم مجهول و سمعتها و كان يقول فيها: صباح الخير ساره انا الدكتور إبراهيم اللي أدرسك بكليه الحقوق ماده العداله الجنائيه بس حبيت اقول لك كل عام و الوالد بخير و الله يطول بعمره و يخليه لكم و سلمي عليه
ابتسمت و سجلت له رساله صوتيه تقول فيها بصوتها الناعس: اهلاً صباح النور دكتور تسلم و انت بخير و ان شاء الله يوصل سلامك
تركت الجوال تدخل تتروش و تصلي فرضها

بغرفه ليان و عبدالعزيز

صحت ليان على ضوء الشمس اللي داخل من الشباك اللي فتحه عبدالعزيز و هو يقول بصوت عالي: ليان يلا قومي الساعه 11 طيارتنا!
قالت ليان بصوت منزعج: عزوز بنام
عبدالعزيز: خلاص يا قلبي قمتي و تكلمتي باقي تقومين تتروشين و تبدلين ملابسك عشان نفطر و نروح
قامت ليان و رجعت تنسدح و قالت: شيلني
ضحك عبدالعزيز و فعلاً راح يشيلها و حاوطت رقبته تتمسك فيه ، فلتت نفسها و مسكها قبل لا تطيح و راحت للحمام تتروش ، بدأ عبدالعزيز ينشف شعره بالاستشوار و بدل ملابسه و راح ينزل الشناط ، دخل و شافها تمشط شعرها اللي يتوسط ظهرها و قال: يلا رح نتأخر
ليان: الحين اتمكيج ولا اسوي شعري؟
عبدالعزيز: أنا أسوي شعرك و انتي تمكيجي
مشى باتجاهها و اخذ الاستشوار و شغله و بدأ يحركه بين خصلات شعرها بينما ليان تحرك فرشه الميكب بين أنحاء وجهها ، خلصوا و قالت ليان: ابي جديله
عبدالعزيز: ابشري
بدأ يضفر شعرها برّقه و لفه عليها و قال: انتي اربطيها ما اعرف
ربطتها ليان و اخذت جوالها و قالت: يلا
مسك يدها و طلعوا من الغرفه و نزلوا للمجلس اللي كانوا جالسين فيه و قالت ليان و هي تناظر سالي: شفيك انتي
ناظر جابر سالي و قالت ساره: ديري بالك تكلمينها مو شبعانه نوم و قهوتها خلصت
قال جابر موجه كلامه لسالي: تعالي تفطري و لك مني الحين قهوه
سالي: ما ابي اكل مو جوعانه ابي قهوه
الجده: اجل تبين قهوه ؟ تعالي اقلطي
رفعت سالي راسها تشوف دله القهوه و تأففت و قالت بغضب: وش ذي ما أبيها مو حلوه
الجده: اجل اللي تشربينها حلوه؟
سالي: اي حلوه و احلى من حقتكم
الجده بصدمه: لا بالله انك انجنيتي يا بنت سالم! كيف تكلمين جدتك كذا؟
سالي: طيب انا بنت سالم مو بنت بسمه فا رجاءً يا بسمه لحد يتدخل فيني!
قامت بغضب تتجاهل اي تذمر يوصل لها من جدتها على كلامها اللي يعتبر قليل ادب ، قالت ليلى بهمس لبدريه: ذي صدق معصبه احسبها تمزح و بس تعاند جده
بدريه: سالي إذا ما شربت قهوتها لسانها يفلت و تجلس معصبه طول الوقت و إذا رضت تسولف رح تلـ*عن اصلك
ضحكت ليلى و قالت لارا: انا بروح أشوفها
قامت و اشرت لساره تلحقها و فعلا قاموا و قالت الجده: يا سالم أبيك تشد على سالي
الجد: وش تبينه يسوي؟ هذي سالي من اول ما انولدت و هي كذا اسلوبها خمس دقايق و بتجي تحب راسك و تتأسف منك
سالم: صح كلامه يمه بعدين سالي كبرت كيف تبيني اشد عليها
الجده: ما عليه إذا سوت شي غلط فهمها ان ذا غلط
كان جابر مستمع للحوار اللي دار بينهم و ما رضى على سالي ولا على الكلام اللي قالوه و قال بهدوء: سالي تعرف الصح من الغلط و ما اذكر انها مره بحياتها سوت شي غلط
دخل سلطان ببدله الدوام و قال: متى ناوين تتحركون ؟
لفت الجده على البنت و قالت: شوفي ام طلال متى رح تجي؟
ليلى: جده الجوري قالت إنهم ما رح يجون معانا الليله رح يجون لان طلال عنده شغل
الجد: اجل يلا توكلنا على الله
قاموا و انتظروا الجد و الجده يطلعون من المجلس و قالت ليلى: الحين واحد منكم يكلم سالي تعتذر لجده ولا ترا والله بتسوي تحديد للكل و تزعل علينا كلنا
عمر: اهدوا ما رح يصير شي لارا و ساره راحوا لها الحين تلقونها تسولف مع جده
طلعوا من المجلس و فعلا سالي كانت تمشي جنب الجده بسمه و تسولف معاها ، ركبوا الليموزين اللي كانت تنتظرهم عند الباب و حركوا لمطار الطيران الخاص ، وصلوا و كل واحد منهم اخذ شنطته و تأففت سالي و قالت: وجع وش ذي الشنطه
ناظرها جابر و قال: خلاص انتي الحقيهم انا اخذها معي
ابتسمت سالي و قالت: شكرا
ابتسم يشوفها مرتاحه و هي تمشي و ناظره جمال و قال: اقول يا جنتل مان اسرع
مشى جابر جنب العيال و قال عبدالرحمن: اخيرا جابر معانا خمس سفرات و ولا وحده كنت معانا فيها
ضحك جابر و قال: ترا انت صاير غريب قبل أربع و عشرين ساعه هواش انا و انت الحين مدري وش اللي غيرك
جمال: نقص حنان الجوهره ما تعطيه وجه
ضحك جابر و ضربهم عبدالرحمن و قال عبدالله و هو يناظرهم: بس انت وياه
لف عليهم تركي و قال: بزران انتم؟
انس بانزعاج: يرحم لي والديكم اهجدوا
سحبه جابر و عفس شعره و قال: من متى يالمحامي؟
انس: من اليوم
ناظرهم عمر و قال: بس انت وياه ترا ازعجتونا
ضرب عبدالرحمن راسه و هرب و لحقه عمر و قال: وقف ولا والله اعلمك كيف تضربني!
انبطح عبدالرحمن على الأرض و بدا يلهث بسرعه من التعب و مسكه عمر و ضربه و قال جابر: ورع! اتركه خلاص ترا يمزح
غمز عبدالرحمن لعمر و قال بهمس: اضربني انا بمثل ان أغمى علي
ضربه عمر و طاح عبدالرحمن على الأرض و قال جابر بصراخ على عمر: تستهبل انت! شسويت فيه
العيال كانوا بعالم و البنات بعالم لدرجه أنهم ما لاحظوا اللي صار ، ضرب جابر عمر و سمع صوت ضحكه عبدالرحمن و قال ادم: انت يالهطف صدقت هذا هو منبطح على الأرض تقول ثور يضحك عليك
ركل جابر عبدالرحمن ببطنه و قال: يا سخيف قوم
ضحك عبدالرحمن بألم و سحبه عمر يقومه و قال: عاد الضربه كانت من قلب حتى شفايفك نزفت
لف عليه جابر و قال: من قوه السخافه اللي فيكم
صعدوا على مدرجات الطياره و قال خالد: لحظه لا يكون سلطان بيسوق فينا؟
الجد: ليه في غيره؟
خالد: لا بس الطريق ساعه و نص بس على حماس سلطان استبعد الساعه و ركز لي على النص
ضحكوا و قال قال سلطان: أبشرك مجودي معي
خالد: لا بالله رحنا فيها
ركبوا و قال يوسف: يا ويله اللي يسوي ازعاج والله احذفه من الطياره
خالد: يوسف و تهديداته كل سنه و المشكله نسوي ازعاج و ما يحذف ولا واحد فينا
تركي: إذا ما سكت انت اول واحد رح ينحذف
ضحكوا عليه و قالت ريان: ممكن تمشون؟ تحملنا ازعاجكم بزياده
فعلا دخلوا العيال و وراهم البنات و توزعوا بالمقاعد ، اقلعت الطياره و أرسلت ليان بالقروب: يا جماعه الحين عرفت ان إذا سالي مودها خرب احنا مودنا يخرب فا دوروا حل يخليها تضحك
وصلت الرساله للكل إلا سالي اللي كانت حاطه جوالها على وضع الطيران و ما تبي تكلم احد ، قال خالد بصوت عالي: مين عنده نكته
لفوا عليه و قال ماجد بصوت طفولي: انااا
خالد: يلا قول
قال ماجد بطفوليه: واحد غبي دخل مكتبه قال لهم أبغى شاورما قالوا له هذي مكتبه قال اوه اسف... طيب عطوني كتاب عن الشاورما
ضحكوا من لطافه النكته و ابتسمت ريماس و قالت بحماس: انا عندي نكته بعد
ناظروها و قالت بخجل: في واحد نام ساعه صحى خاتم
ضحكوا و ناظر جابر سالي اللي كانت مبتسمه بخفه و قال يوسف لعمر: يلا دورك
عمر: في واحد راح المدرسه ما لقى الحارس سجل هدف
ضحكوا عليه و قال خالد: انت مو بس لاعب انت مهووس
ساره: طيب انا عندي نكته
كلهم: قولي
ساره: في بيتزا و بطاطس و برقر يتسابقون تتوقعون ليه؟
كلهم: ليه
ساره: وجبات سريعه
ضحكوا و لفوا على الجد اللي قال: لقيت وحده
خالد: يلا اسكتوا
قال الجد: في وحش اكل تونا صار وحشتونا
ما ضحكوا بس خالد ضحك و قال: ليه ما تضحكون طيب
سالي: انت قلت اسكتوا
ضحكوا و قال الجد: آخر مره اقول نكته
سالي: جدي والله حلوه بس خالد خرب عليك
ليان: طيب خلاص انا عندي
لفوا عليها و قالت: في واحد لما ينام يحط جنبه اكل ليه؟
كلهم: ليه
ليان: عشان يشبع نوم
ضحكوا و قالت سالي و هي تضحك: في واحد قال لابوه كم عمر جدتي قال له أبوه 100 قال الولد افصلوها عن الشحن
ضحكوا و قالت لارا: في مفتاح مات أهله ما زعلوا عليه ليه؟
ناظروها ينتظرونها تكمل و قالت: عندهم نسخه ثانيه
ضحكوا و قال عبدالمجيد: طيب في واحد اصلع جاته فكره تزحلقت
انهاروا من الضحك خصوصا انها جت من طفل ، قال خالد و هو يضحك: بس الله ياخذ عدوكم اختنقت
ناظر عمر عبدالمجيد و قال: قوم روح قول لأبوك متى نوصل
نزل عبدالمجيد من الكرسي و راح يركض لغرفه الكابتن و قال: بابا
سلطان: ها يا بابا شفيك
عبدالمجيد: عمر يقول متى نوصل
سلطان: عشر دقايق ان شاء الله
راح عبدالمجيد و قال: بابا يقول عشر دقايق ان شاء الله
تركهم و راح لسلطان و ناظر الازرار اللي كانوا يملون المكان و اشر على زر احمر و قال: بابا وش هذا
ابتسم سلطان و قال: هذا زر الطوارئ
مسكه من ملابسه يرفعه و يجلسه بحضنه و قال: تبي تكلم جودي؟
هز عبدالمجيد راسه بالموافقه و فعلا اتصل سلطان على جود و قال عبدالمجيد اول ما شاف وجهها يملي الجوال: جودييي
ابتسمت جود و قالت بفرحه: هلا يا قلبي
عبدالمجيد: احنا جايينك
جود: و انا ناطرتكم!
لفت الكاميرا على منصور اخوها و القى السلام عليهم و قال عبدالمجيد: صرصور احنا جايين
يضحك منصور على لقبه و يقول: انتوا وينكم الحين
رفع عبدالمجيد الجوال و قلب الكاميره على الشباك و قال بطفوليه: احنا بالهوا نطير و بابا يحركنا
ضحكوا منصور و جود و قال منصور: بابا قوي والله يحرككم كلكم!
ضحك سلطان و قال عبدالمجيد: اي حتى انا قوي
لفت جود الكاميرا عليها و قالت: مجودي بقول لك سر
همس عبدالمجيد و قال: وش
جود: جبت لك لعبه انت و ريماس و ماجد عشان نلعب مع بعض
ضحك عبدالمجيد بحماس و اخذ سلطان المايك و قال: اربطوا الحزام بنهبط الحين و يا سالي عن العناد و اربطيه آخر مره سويتي أفلام
سمع صوت ضحكاتهم و ابتسم و حاوط عبدالمجيد يمسكه و قالت جود: سلطان متى توصلون
سلطان: خمس دقايق ان شاء الله
جود: عيل انا اخليكم
سلطان: براحتك يا قلبي
ابتسمت جود و قالت: يلا بايي
سلطان و عبدالمجيد: باي
سكرت المكالمه و فعلا خمس دقايق و سحب سلطان المقبض و سحب معاه عبدالمجيد و هبطوا على ارض الكويت الشقيقه ، قال سلطان و هو يسحب المايك: يلا مجودي قول لهم وصلنا
ابتسم عبدالمجيد و قال: وصلنا يلا انزلوا
لف على سلطان و قال: رح نشوف جودي الحين؟
سلطان: اي
نزل عبدالمجيد عن حضنه و راح للارا و قال و هو ينط بحماس: رح نشوف جودييي
ضحكت لارا على حماسه و قالت: طيب وين شنطتك
طلع سلطان و قال: عندي
خالد: يا هو ولدك قال نكته انسدحنا من الضحك
ضحك سلطان و سحب عبدالمجيد من ملابسه يشيله و قالت الجده: شوي شوي يا سلطان شوي شوي على ولدك
سلطان: ابشري يمه
طلعوا من الطياره و دخلوا للمطار ، خلصوا الإجراءات و راحوا لصاله الوصول و قال الجد: وين هي زوجتك؟
ابتسم سلطان و قال: تنتظرنا عند الباب
مشوا متجهين للباب و لمحوها واقفه مع أهلها ينتظرونهم ، ركض عبدالمجيد لجود و قال بصوت عالي: جوديي
لفت عليه جود و نزلت على ركبتيها تحضنه و قالت: اشتقت لك وااييددد
عبدالمجيد: انا بعد اشتقت لك كثيييرر مره كثير
قامت تسلم على البنات و تحضنهم وحده وحده بحكم معرفتها فيهم و سلمت على الجد و الجده و حضنت سلطان و قال: في احد مزعلك؟
رفعت جود راسها و قالت: لا
ناظرها و قبل راسها و بعدت عنه و مد لها بوكيه الورد و قالت بابتسامه: شكرا
ابتسم لابتسامتها و راح يسلم على أهلها ، ركبوا السياره و قالت سالي بهمس: وين رح نروح الحين ؟
جود: على طول بنروح الشاليه
ليلى: طيب شغلوا اغاني!
ساره: لحظه لا يكون العيال معانا بنفس الشاليه!
ضحكت جود و قالت: لا اهما لهم شاليه و احنا لنا شاليه
فتحت بدريه شنطتها و قالت: مين يبي تشوكلت
ليان: انا
عطتها بدريه و عطت الباقي و ناظرت عبدالمجيد و ماجد و ريماس اللي كانوا نايمين و قالت: حسافه ناموا
ناظرتهم جود كيف نايمين على بعض و شالت عبدالمجيد تنوّمه بحضنها و قالت بهمس لريما: طريقه نومهم غلط بعدين يقعدون يتشكون من ألم رقبتهم عدليهم
لفت عليهم ريما و عدلتهم و قالت رتاج: وش شعورك و عبدالمجيد نايم بحضنك
ابتسمت جود و قالت: أحسه ولدي صج
ليان: خليه يناديك ماما ليه جودي
ضحكت جود بخفه و قالت: انتي تسمعينه شلون يقولها
تنهدت ريان و قالت: الله لا يوريك أمه وش تسوي فيه لما يروح لها
لارا: طالعه طول اليوم و ما ترجع إلا بنص الليل و إذا شافته موجود تضربه و مع هذا كله يحبها و يبي يروح لها
ليلى: تخيلوا تطلع متزوجه بالسر!
جود: لا حرام عليكم يمكن عندها اشغال و ضغوطات نفسيه
لورا: و تحط حرتها بهالمسكين!
الجده: والله انها رديه و ما تستأهل الضنى
جود: انزين بس صج يمكن عندها اشغال مو شرط تكون متزوجه بالسر!
ذهب: طيب خلاص قفلوا على الموضوع ما نبي نكد
جود: شنو تبون تسمعون؟
كلهم باستثناء سالي: راشد او ماجد
سالي: محمد عبده
ضحكوا عليها و قالت جود: اقول لكم شي؟ انا بسمع سوالفكم
فعلا بداوا يسولفون لها عن مغامراتهم مع بعض و هي مستمتعه و كأنها بين خواتها و أهلها