How to Seduce a Hunk Again [Book 2] COMPLETED

Chapter 43: Adventure of a Lifetime

Mick's POV

Flashback (at Guadalupe Regis Haus)

"'Wag na tayong maglokohan iho. Ibigay mo na sa 'kin ang tunay na Mapa para matapos na ang paghihirap nating lahat."

Lalong bumilis ang tibok ng puso ko sa hindi ko inaasahang sambit ng Auntie ni Jace na nagngangalang Jacky. Nakuha pa niyang ngitian ako kahit dama kong sa loob-loob niya'y kabaligtaran ang kanyang ipinapamalas.

"Anong Mapa? Ibinigay na namin sa inyo ang tunay na Mapa," medyo nangangatal kong sagot.

"Uulitin ko sa iyo iho, wag na tayong maglokohan! Alam kong peke ang ibinigay niyo sa 'kin. Kung sa tingin niyo'y mabibilog niyo ang utak ko.... nagkakamali kayo!" tila pagbabanta niya.

Kanina'y ibinigay na namin sa kanya ang Mapang ginagamit namin sa paghahanap ng kayamanan matapos naming matagpuan ni Jace na wala nang malay tao ang mga kasamahan namin. Alam kong peke ito upang lituhin sila ngunit hindi ko inaasahang malalaman niyang hindi iyon tunay. Kung gayu'y sino ang nagsabi sa kanyang hindi yun ang orihinal na Mapa?

Napipi ako nang panandalian dahil hindi ko alam ang isasagot sa kanya. Kung magsasabi ba ako ng totoo o gagawa na lang ng ibang kwento para mas lalo pa silang malinlang. Nasa akin ang orihinal na Mapa na ipinagkatiwala ni Ten-Ten nang ilatag niya sa 'kin ang plano niyang linlangin ang mga Aunties niya sa paghahanap ng kayamanan.

"A-ayan lang ang Mapa. Hindi naman kami magpapakahirap na puntahan ang bawat destinasyon sa Mapang iyan kung wala naman kaming mahihita," medyo hindi ko kumpyansang sagot.

Humakbang nang malapitan ang matanda sa 'kin at tinitigan ako nang buong seryoso. Nag-aalab ang kanyang mga titig pero nakuha pa nitong ngumiti nang pasarkastiko.

"Naiintindihan kita iho kung hirap kang umamin sa 'kin, pero hindi ibig sabihin no'y aalis ako sa lugar na ito na hindi ko nakukuha ang dapat na makuha sayo."

Humakbang muli siya ngunit papalayo sa 'kin at sumilip sa pintuan kung saan makikita ang kusina. Narito kami ngayon sa likod ng bahay upang mag-usap nang masinsinan na hindi kailangang marinig ni Jace na nuo'y punong abalang gisingin ang mga nabiktima ng pampatulog ng matandang ito.

"Mick tama ba?" pagsabi niya sa pangalan ko ngunit hindi naman ako tumugon. "Namangha ako sa effort niyong magsagawa ng masusing panlilinlang sa isang tulad kong matanda na. Lubos talaga akong nasorpresa sa kakayahan niyong gawin ang isang bagay na mas mabuting iwan na lang sa imahinasyon. Ang masama lang, ginawa niyong mas kumplikado ang lahat ng bagay para madali naming matukoy kung ano talaga ang intensyon niyo sa misyong sa katunaya'y hindi ka naman dapat kasali..."

Napasalubong ang kilay ko sa matalinhagang sabi ng matanda.

"Alam kong ang isa sa inyo, si Joaquin, na nagtratrabaho sa pamilya namin, ang ipinadala ko para magsilbing mata ko sa mga ginagawa niyong plano. Pero hindi niyo alam, sinadya ko talagang gawin iyon dahil alam kong mas matimbang ang UTANG NA LOOB niya sa yumao kong kapatid kaysa sa pagiging huwarang manggawa niya sa pamilya namin."

"Pinapadalhan niya ako ng mga eksaktong impormasyon sa bawat destinasyong naroon kayo. Hindi pa kayo nakakapunta sa mga lugar kung saan makikita ang mga bagay na hinahanap niyo.... Napuntahan ko na ang mga iyon. At nang dahil du'y minabuti naming magmatyag at magimbestiga."

"At kung tingin niyo'y patatapusin namin kayo sa pekeng ekspedisyon niyo.... huh? Naririto ako upang sabihin sa inyo na TAPOS NA ANG PALABAS! Dahil ang ending ng mga pinaggagawa niyo'y walang patutunguhan. Papaniwalain niyo kaming tunay ang Mapa at sa dulo'y wala naman talagang kayamanan...... Para sabihin ko sayo iho, tumanda akong nananalig na TOTOO ang KAYAMANAN NG MGA SAAVEDRA. Ilang dekada na akong nalinlang hanggang sa pumuti na ang buhok ko. Pero ngayon, sinasabi ko sa iyo, ito na ang huli. At ikaw ang susi para makita ko na ang matagal ko nang hinahanap."