(Published in the Official Literary Folio of the UI Star, Turukayan 2014)
Ano bala ang gusto mo nga paho,
Ang maulo-aslom ukon ang medyo luto?
Ang saktuhan lang ukon ang medyo dalagko?
Ang nadagdag na ukon ang ginpuksi gid sa puno?
Bal-an ko may ara ka gid sang nauyunan.
Mas gusto ko ya ang sakto nga pagkaluto.
Apang isa ka adlaw sa gakaon 'ko paho,
May nagsulod sa akon panumduman.
Ang prutas daw may gusto ipabutyag sa akon.
Ang paho gali kun gusto mo na gid kaunon,
Nga bisan hilaw pa, ginpuksi mo na dayon, kinagat mo na, ilu-ad mo man gihapon!
Ang iban naman ya husto na lang mangalot,
Kag hulaton nga ang paho madagdag lang sa ila kamot.
Sigurado madagdag lang na kun piho gid nga dunot,
Ang mas lala pa gid kun naunahan ka na sang ulod!
Basi masiling kamo, "Ti ano?
Ang pag-kaon bala sang manamit paho may sikreto?
May ibulig bala ina sa pag-uswag sang kabuhi sang tawo?",
ari abyan, kalma kay isaysay ko.
Gusto mo gid bala masagamsaman ang kanamit sang prutas?
Hulata nga maluto sa insakto niya nga oras!
Kay kon ang sabor sang hilaw indi mo man lang mabatas,
Wala gid pakadtuan ang imo pagpaspas.
Kun sa pamatyag mo naman nga ang
paho luto na,
Matu-mato ka saka ukon indi man, singita!
Kay bisan damo pa na iras, pala, kay ayawan ka saka,
Pinakanamit naman ya nga paho ang imo makuha.
Gadali ka. Kasarang ka magkaon sang hilaw pa?
Ginatamad ka. Kasarang ka magkaon sang dunot na?
Mahulat ka. Lawig pa bala imo pasensya?
Sakto na ang tyempo para maghulag ka. Handa ka na bala?
Ti siguro abot mo na ang buot ko silingon.
Sa kabuhi ta damo gid sang desisyon,
Nga bisan sa simple nga pag-panginaon,
Hilaw, luto, dunot, pilian pa naton!
By: Maria Danna E. Sedantes :)
BINABASA MO ANG
Wander-ful Thoughts
RandomThis is a compilation of my write-ups over the years.. This may include poems, declamation pieces, and short stories, etc., etc. (English, Filipino, and Hiligaynon)
