مياده

الثامن

حجزت على طياره الليل بقيت برا البيت اخذت غراض من المول لاهلي
وبعدها اتواعدت ويا عمار وصيته يمر على مياده هالايام اخاف تحتاج شي بفتره غيابي .......گتله مسافر بشغله ضروريه محجيتله بيناتنا خلاف
مياده:كعدت تقريبا بالوحده الظهر راسي ثگيل من شفت الچرچف گلت بلكت الله هداه عليه كمت خلصت شغلي طبخت الغدا بعدها فتت سبحت ورتبت شعري ومكياج ولبست نفنوف قطن كلش قصير بقيت انتظره
شاهين :رجعت للبيت المغرب فتحتلي الباب مبينه چانت تبچي ....قلبي حن لكن رجولتي وكرامتي المجروحه مكدرت اتنازل دخلت دا اصعد الدرج صاحتني شاهين انداريت عليها كلتلي اعتذر والله طلعت مني بدون قصد مجرد تعويد جاوبتها جواب قاسي گتلها بعدين النا كعده من ارجع من بغداد تحدد اذا راح نستمر او لا سألتني ودموعها تنزل انت مسافر جاوبتها اي ساعه واطلع للمطار صعدت حضرت ملابسي
كتبتلها بورقه عنواني بغداد ورقم غزوان اخويه
ورقم وسن وطيف خواتي وارقامي الي بغداد
كتبتلها اذا احتاجيتي شي اتصلي على اي واحد من هالارقام راح يوصلني خبر ارجع اتصل عليج ووصيت عمار عليج
اخذت جنطتي ونزلت لگيتها ساكته بس مبينه تعبانه ومقهوره خليتلها الورقه على الطبله الي كدامها وطلعت عمار ينتظرني بالباب ديوصلني للمطار
وصلني مسج فتحته من مياده
شاهين انتظرك ترجعلي بالسلامه طمني عنك من توصل
دزيتلها ان شاء الله
مياده :من طلع شاهين بداخلي اتأكدت اني اريد اكمل ويا هالرجال اخذت الورقه ودخلت كل الارقام الي كاتبها بتلفوني بعدها دزيتله مسج
شاهين :وصلت لبغداد اول ما وصلت للبيت دزيت لمياده مسج....... اني وصلت للبيت بسرعه ردتني (حبيبي الحمد لله على سلامتك بقى بالي لان اتأخرت ) .....متوقعت الگاها بعدها منايمه ودتنتظر تطمئن عليه
جاوبتها الله يسلمج ....... وبيني وبين نفسي لازم اضبط مشاعري وشويه اثگل عليها
ثاني يوم الصبح كعدت
طلعت ويا غزوان للشغل بقيت انتظرها ادزلي مسج حتى اطمئن عليها ما دزت الا من رجعت
ءءالظهر كاعد اتغدا ويا اهلي سمعت وصل مسج گمت من الغدا غزوان ابتسم گلولي دكمل غداك وبعدين شوف التلفون
جاوبتهم شبعت وسن اختي ابتسمت عرفت اكو شي بس اتوقعت عندي علاقه ببنيه
فتحت المسج
حبيبي شنو اخبارك؟.... هسه كعدت من النوم بالتسعه الصبح يله نمت
جاوبتها ليش بيج شي
مياده :لا الحمد لله لا يبقى بالك مابيه شي
شاهين عدي ديدك عليه تقبل اجاوبه .....ابلغه بعد ما اريد ارجعله.......و حتى لو انتَ قررت تنفصل عني اني ما ارجع لعدي
شاهين :بقلبي جاوبتها صار يومين مبتعد عنج واشتاقيتلج ......أمني حبيبتي ما اكدر انفصل عنج
جاوبتها جاوبي بس على كد الكم كلمه لتخلي ياخذ وينطي وياج واذا ضايقج انطيني علم اتصل بعمار يوگفه
مياده :شاهين راح نبقى مسجات الى ان ترجع متريد تسمع صوتي
شاهين :مياده خلينا هيج احسن بين ما تتوضح مشاعرنا وبعدها انقرر
مياده :براحتك
شاهين:انقهرت عليها لان باقيه وحدها دزيتلها مسج ادزلج عمار يوديج لبيت صبا بت عمي اتعرفي عليها غيري جو
مياده :ويا كل مسج يوصلني منه يطمئن قلبي بعده يفكر بيه  ....وبالاخص من حسيته قلق عليه لان وحدي جاوبته لا حبيبي اتعرف عليها من تجي ان شاء الله مرتاحه بالبيت اذا اريد اطلع  اغير جو عندي كرايب وصديقات هنا
شاهين : كل ميصير عندج مجال دزيلي مسج
مياده :ان شاء الله.... يله اخذ راحتك

شاهين :مرت ٨ ايام بقيت متواصل ويا مياده بالمسجات ومتلهف اشوفها واسمع صوتها وجنت ناوي افاجئها بوصولي بعد يومين حجزت لدبي
لكن ابويه صارت عنده جلطه ونقلنا للمستشفى لكن ما لحكنا عليه اتوفى  خلال هالايام التهيت  بالدفن والفاتحه  تأزمت  على فراگ ابويه   اخر يوم الفاتحه بليل  لگيت  هوايه مسجات من مياده    وكلها تسألني  وين انت بقى بالي  ....لو طمني عنك  ....لو اخر مسج دازته  ....شاهين اذا تريد ننفصل   عفيه لتعلقني بيك اكثر  وتأملني
دزيتلها مسج مكدرت ارد عليج لان وابويه أ توفى ولو مكلفه نفسج وصدك رايده تطمئنين عليه جان اتصلتي بعمار  او بالارقام الي كتبتها بالورقه  قبل لا اسافر  من دزيته ما وصل  اتصلت عليها تلفونها مغلق بقى بالي يمها  دكيت على عمار متأكد بعده سهران  سألته عنها گلي  قبل٣ايام  اتمرضت وجبناها  لبيتنا بقت يمنا وثاني يوم رجعتها للبيت  .......من گلي  على هالموضوع قلقني اكثر  طلبت منه يروحلها للبيت .....اخاف بيها شي
ورا ساعة اتصل عليه گلي دكيت الباب اظاهر ماكو احد بالبيت لان اظلم وتلفونها مغلق ..... گتله خلي انتظر للصبح اخاف رايحه يم احد من گرايبها ......بقى بالي يمها للصبح بقيت كاعد ادزلها مسجات واتصل متوصل معناها تلفونها بعده مغلق
مياده :من انطاني شاهين الاذن احجي ويا عدي مكدرت اواجهه بالتلفون بقى يدگ دزيتله مسج عدي بعد لتتصل اني مره على ذمة رجال واريد اكمل حياتي وياه رجاءا لتتصل الي بيناتنا انتهى
دزلي متخبل اكيد ناصبه عليه لو دتأدبيني
جاوبته ممسموحلي ارد عليك بس جاوبتك للتأكيد لا الموضوع جدي حياتي وياك صفحه وطويتها
بقى يدزلي مسجات كومه بين هذا ديضحك عليج يتونس كم يوم ويطلگج .....لو مدا اصدك انت تغدريني .....لو الا اندمج خليتيني مضحكه من صارت بيها تهديد خفت اتصلت بعمار الولد راح على عدي ومرزله وگايله اذا تتعرضلها ابلغ عليك وترى هسه اطلع للمركز اخليهم يدزون عليك تكتب تعهد متتعرضلها واي شي يصير بمياده احملك المسؤوليه بعدها اتصل عليه فهمني الي صار وطلبت منه ميوصل الموضوع لشاهين من يجي يله نحجيله  والولد وافق
ورا ٣ايام اتمرضت جنت متواصله ويا شاهين بالمسجات لليل هبط ضغطي اتصلت بعمار اخذني للطوارئ واخته اجتي وياه  مقبلوا ارجع وحدي للبيت رجعت وياهم لبيتهم .....امهم اتفاجئت من شافتني ويا صبا وعمار بس المره رحبت بيه ....اخذتني صبا لغرفه گلتلي ارتاحي
ورا ساعة اجتني امهم گلتلي هسه يله عرفت انت زوجة شاهين يعني بتنا مو غريبه  صبا فهمتني
جاوبتها شكرا خاله تعبتكم ويايه .....جاوبتني لا حبيبتي احنه اهل شاهين ابني اني مربيته جان من صغير مكضي كل وقته وياعمار بيتنا
ومن توفى عمه ابو عمار هو وابو قايمين بينا لليوم
متريديني اداري مرته
وصدك المره مقصرت وصبا اجتي ثاني يوم هم اطمئنت عليه  للعصر خليت عمار يرجعني للبيت وگلولي من تحتاجين شي اتصلي بينا
بس حسيت نفسي ثقلت عليهم  ....ورا يومين شاهين بطل يرد على مسجاتي .....شكيت لان مرت عمه عرفت ضاج ومديجاوب يريد يفهمني خلص ناوي يطلگني من يجي لدبي
ضجت لان نزلت نفسي هوايه وتوددتله لدرجه مثل الوحده الي ذابه روحها على واحد اتوقعت هالشي يخلي يحس اني رايدته والغلطه الي صارت مجرد كلمه طلعت مني
اخر مسج دزيته  اطلب منه اذا ناوي يطلك ليأملني ويخليني اتعلق بي  شفته مجاوب
فقدت وتعبت من الرياجيل ولعبهم عليه رحت حجزت  لبغداد ....وعلى العنوان الي مكتوب راح اوصل لشاهين واخلي يطلگني
بليل حضرت جنطتي مكدرت انام بقيت افكر بالحجي الي راح احجي وياه من اواجهه ......